Exodo 18:1-27
18 Faaroo ihora Ietero te tahuˈa no Midiana, to Mose metua tane hoovai,+ pauroa ta te Atua i rave no Mose e no to ˈna nunaa o Iseraela, mea nafea to Iehova aratairaa ia Iseraela i rapae i Aiphiti.+
2 Ua rave Ietero to Mose metua hoovai ia Zipora ta Mose vahine faaipoipo ia ˈna ra, i to Zipora faahoˈiraahia i ǒ ˈna
3 e ta ˈna e piti tamaiti.+ O Geresoma*+ te iˈoa o te tahi tamaiti, no te mea ua parau Mose: “Ua riro vau ei taata ê e noho ra i te hoê fenua ê,”
4 e o Eliezera* te iˈoa o te tahi atu, no te mea ua parau oia: “O te Atua o to ˈu metua tane to ˈu tauturu, tei faaora ia ˈu i te ˈoˈe a Pharao.”+
5 Haere maira ïa Ietero, to Mose metua hoovai, e ta Mose na tamaiti e ta ˈna vahine faaipoipo i te medebara i reira Mose i puhapa ˈi i te mouˈa o te Atua mau.+
6 Poroi maira ïa oia ia Mose: “Te tae atu nei au, to metua hoovai o Ietero,+ e ta oe vahine faaipoipo e ta oe na piti tamaiti.”
7 I reira iho, haere atura Mose i rapae e farerei i to ˈna metua hoovai, piˈo ihora oia i raro e apa ˈtura ia ˈna. Ui aˈera raua i to te tahi e te tahi huru, e tomo atura i roto i te fare ie.
8 Faatia ˈtura Mose i to ˈna metua hoovai pauroa ta Iehova i rave ia Pharao e i to Aiphiti no Iseraela,+ e pauroa te fifi ta ratou i farerei i to ratou tere,+ e mea nafea to Iehova faaoraraa ia ratou.
9 Oaoa ihora Ietero i te mau maitai atoa ta Iehova i rave no Iseraela a faaora ˈi ia ratou i Aiphiti.*
10 Parau maira Ietero: “Ia aruehia Iehova, tei faaora ia outou i to Aiphiti e ia Pharao, e tei faaora i te nunaa i te faatereraa a to Aiphiti.
11 Ua ite au i teie nei e mea hau aˈe Iehova i te tahi atu mau atua+ no ta ˈna i rave i te feia tei haa ma te teoteo i nia i to ˈna nunaa.”
12 Hopoi maira Ietero, to Mose metua hoovai, i te hoê tusia taauahi e te tahi mau tusia no te Atua, e haere maira Aarona e pauroa te matahiapo o Iseraela e tamaa e te metua hoovai o Mose i mua i te Atua mau.
13 Ananahi aˈe mai tei matauhia, parahi ihora Mose ei haava no te nunaa, e te tia noa ra te nunaa i mua ia Mose mai te poipoi mai e ahiahi noa ˈtura.
14 I te iteraa to Mose metua hoovai pauroa te ohipa ta ˈna e rave ra no te nunaa, parau maira oia: “Eaha tena ta oe e rave ra no te nunaa? Eaha oe e parahi ai o oe anaˈe a tia noa ˈi te nunaa taatoa i mua ia oe mai te poipoi mai e ahiahi noa ˈtu?”
15 Parau atura Mose i to ˈna metua hoovai: “Te haere noa mai ra hoi te nunaa ia ˈu nei no te uiui i te Atua.
16 Ia tupu te tahi fifi i rotopu e piti taata, e faaite mai raua ia ˈu, e haava vau ia raua, e e faaite au i te mau faaotiraa a te Atua mau e ta ˈna mau ture.”+
17 Parau maira to Mose metua hoovai ia ˈna: “E ere i te mea maitai ta oe e rave nei.
18 Papu e rohirohi oe, o oe e teie atoa nunaa na muri ia oe, no te mea e hopoia rahi roa teie no oe e eita e maraa ia oe anaˈe ia amo.
19 A faaroo mai i teie nei. E horoa ˈtu vau ia oe i te hoê aˈoraa, e ei ia oe te Atua.+ Te tavini nei oe ei tia no te nunaa i mua i te Atua mau,+ e e hopoi oe i te mau fifi i mua i te aro o te Atua mau.+
20 E faaara oe ia ratou eaha te mau faaueraa e te mau ture,+ e e faaite oe ia ratou i te eˈa ia haere e te ohipa ia rave.
21 E maiti râ oe i rotopu i te nunaa i te tahi mau tane aravihi+ e mǎtaˈu ra i te Atua, te nehenehe e tiaturi e mea hae na ratou te apî e noaa mai i te ohipa taviri,+ a faatoroa ˈtu ai ia ratou ei raatira tausani, ei raatira hanere, ei raatira pae ahuru e ei raatira ahuru.+
22 E haava ratou i te nunaa ia tupu te fifi,* e e hopoi ratou i mua ia oe i te mau fifi rahi atoa,+ area te mau fifi rii atoa, na ratou iho e haapao. A haamâmâ ia oe ma te vaiiho ia ratou ia amo atoa i te tahi mau hopoia.+
23 Ia na reira oe, o ta te Atua hoi e faaue nei ia oe, e maraa ïa ia oe te hopoia ia amo, e e mauruuru pauroa te taata ia hoˈi ratou i te fare.”
24 I reira iho, faaroo atura Mose i to ˈna metua hoovai e rave pauroa ihora i ta ˈna i parau.
25 Maiti ihora Mose i te tahi mau tane aravihi no roto mai ia Iseraela taatoa e faatoroa ˈtura ia ratou ei aratai o te nunaa, ei raatira tausani, ei raatira hanere, ei raatira pae ahuru e ei raatira ahuru.
26 Haava aˈera ïa ratou i te nunaa ia tupu te fifi. E hopoi ratou i mua ia Mose i te fifi rahi,+ area te mau fifi rii atoa, na ratou ïa e haava.
27 I muri iho, tuu atura Mose i to ˈna metua hoovai ia haere,+ e reva ˈtura oia i to ˈna fenua.
Nota i raro i te api
^ “E taata ê i ǒ” te auraa.
^ “To ˈu Atua te tauturu” te auraa.
^ Heb: “i te rima o Aiphiti.”
^ Heb: “i te mau taime atoa.”
