Exodo 25:1-40
25 Na ô maira ïa Iehova ia Mose:
2 “A parau i te nunaa o Iseraela ia hopoi mai i te tahi ô na ˈu. Ta te taata tataitahi e horoa ma to ˈna aau atoa, e hopoi mai outou i ta ˈu ô.+
3 Teie te ô ta outou e rave mai ia ratou: te auro,+ te ario,+ te veo,+
4 te taura ninamu, te huruhuru mamoe vareau,* te ahu uteute, te lino maitai roa, te huruhuru puaaniho,
5 te iri mamoe oni faauteutehia, te iri humi, te raau sitima,+
6 te hinu no te mori,+ te zuri no te monoˈi faatavai+ e no te mea noˈanoˈa,+
7 e te ofai sema e te tahi atu mau ofai e tamauhia i nia i te tiputa+ e te tapoˈi ouma.+
8 E hamani ratou i te hoê nao* no ˈu, e e parahi au* i rotopu ia ratou.+
9 Ia hamani outou i te reira, te sekene e pauroa te taihaa i roto, ia au iho â i te hohoˈa ta ˈu e horoa ˈtu nei ia outou.+
10 “E hamani ratou i te hoê afata i te raau sitima, e piti kubiti* e te afa te roa e hoê kubiti e te afa te aano e hoê kubiti e te afa te teitei.+
11 I muri iho, e tapiri oe i te reira i te auro tamâhia.+ Na roto e na rapaeau e tapiri ai oe i te auro, e e hamani oe i te tahi faaunauna auro ati aˈe te niaraa o te afata.+
12 E e faatô oe e maha potaa auro no te afata, a tamau atu ai i nia noa mai i to ˈna na avae e maha, e piti potaa i te hoê pae e e piti potaa i te tahi atu pae.
13 E hamani oe i te raau amoraa i te sitima, a tapiri atu ai i te reira i te auro.+
14 E patia oe i na raau amoraa na roto i na potaa na te hiti o te Afata no te amo i te reira.
15 E vai noa na raau amoraa i roto i na potaa o te Afata. Eiaha roa te reira ia iritihia.+
16 E tuu oe i roto i te Afata i te Haamanaˈoraa ta ˈu e horoa ia oe.+
17 “E hamani oe i te hoê tapoˈi i te auro tamâhia, e piti kubiti e te afa te roa e hoê kubiti e te afa te aano.+
18 E hamani oe e piti kerubi auro. E hamani oe i te reira i te auro tupaihia, a tuu atu ai i na hiti o te tapoˈi.+
19 A hamani i na kerubi, a tuu atu ai i na hiti, hoê kerubi i te hiti tataitahi o te tapoˈi.
20 E hohora na kerubi i to raua pererau i nia, ei marumaru i nia ˈˈe i te tapoˈi,+ e e fariu te tahi i te tahi. E hiˈo te mata o na kerubi i te tapoˈi.
21 E tuu oe i te tapoˈi+ i nia iho i te Afata, e i roto i te Afata e tuu ai oe i te Haamanaˈoraa ta ˈu e horoa ia oe.
22 E faaite atu vau ia ˈu ia oe i reira, e e paraparau vau ia oe mai nia mai i te tapoˈi.+ Mai ropu i na kerubi e piti, e vai ra i nia i te afata o te Haamanaˈoraa, e faaite ai au ia oe pauroa ta ˈu e faaue ia oe no te ati Iseraela.
23 “E hamani atoa oe i te hoê iri vairaa pane+ i te raau sitima, e piti kubiti te roa e hoê kubiti te aano e hoê kubiti e te afa te teitei.+
24 E tapiri oe i te reira i te auro tamâhia, a hamani atu ai i te tahi faaunauna auro ati aˈe te niaraa o te iri vairaa pane.
25 E hamani oe i te tahi hiti ati aˈe te reira e maha manimani* te aano e te tahi faaunauna auro na nia iho i taua hiti ra.
26 E hamani oe no te reira e maha potaa auro, a tamau atu ai i na potaa i na poro e maha, to reira na avae e maha.
27 I raro aˈe i te hiti o te iri vairaa pane e tamauhia ˈi na potaa ei tapearaa i na raau amoraa no te amo i te iri vairaa pane.
28 E hamani oe i na raau amoraa i te sitima, a tapiri atu ai i te reira i te auro, e i taua na raau ra e amo ai oe i te iri vairaa pane.
29 “E hamani atoa oe no te iri vairaa pane i te farii maa, te hapaina, te pita e te auˈa no te ninii i te mau tusia uaina. Ia hamani oe i te reira i te auro tamâhia.+
30 E e tuu noa oe i na pane pûpûhia i nia i te iri vairaa pane i mua ia ˈu.+
31 “E hamani oe i te hoê vairaa mori+ i te auro tamâhia. E hamanihia te vairaa mori i te auro tupaihia. To ˈna avae, to ˈna tumu, to ˈna mau amaa, to ˈna mau tiare, to ˈna mau umoa e to ˈna mau raupua, hoê â ïa tâpû auro.+
32 E ia ono amaa i te maaraa mai te tumu mai o te vairaa mori, e toru amaa i te hoê pae e e toru amaa i te tahi atu pae.
33 E toru tiare tei hohoˈa i te tiare sekadi to nia iho i na amaa tataitahi i te hoê pae, te umoa atoa e te raupua te tahi i muri iho i te tahi. E toru atoa tiare tei hohoˈa i te tiare sekadi to nia iho i na amaa tataitahi i te tahi atu pae, te umoa atoa e te raupua te tahi i muri iho i te tahi. Mai tera ïa no na ono amaa i te maaraa mai te tumu mai o te vairaa mori.
34 I nia iho i te tumu o te vairaa mori, e maha ïa tiare tei hohoˈa i te tiare sekadi, te umoa atoa e te raupua te tahi i muri iho i te tahi.
35 Hoê umoa to raro aˈe i na amaa matamua e piti i te maaraa mai te tumu mai, e hoê umoa to raro aˈe i na amaa e piti i muri mai, e hoê umoa to raro aˈe i na amaa e piti i muri mai. Mai tera ïa no na ono amaa i te maaraa mai te tumu mai.
36 Na umoa e na amaa e te vairaa mori taatoa, hoê â ïa tâpû auro tamâhia tupaihia.+
37 E hamani oe e hitu mori no te reira, e ua ama anaˈe te mori, e turama te reira i te vahi i mua mai.+
38 Ei auro tamâhia na tapea uiti e na farii auahi o te vairaa mori.+
39 Hoê taleni* auro tamâhia ia hamanihia te vairaa mori, e teie mau taihaa.
40 A haapao maitai ia hamani oe i te reira ia au i to ratou hohoˈa tei faaitehia ˈtu ia oe i nia i te mouˈa.+
Nota i raro i te api
^ Aore ra “faauteute-paˈo-hia.”
^ Aore ra “puhapa vau.”
^ 1 kubiti: 44,5 cm. Hiˈo i te tuhaa hau B14.
^ E 7,4 cm. Hiˈo i te tuhaa hau B14.
^ 1 taleni: 34,2 kg. Hiˈo i te tuhaa hau B14.
