Exodo 30:1-38
30 “E hamani oe i te hoê fata ei vahi tutuiraa i te mea noˈanoˈa.+ E hamani oe i te reira i te raau sitima.+
2 Hoê â roa e hoê â aano to te fata, hoê kubiti* te roa, hoê kubiti te aano, e e piti kubiti te teitei. E tuhaa to ˈna mau tara no taua fata ra.+
3 E tapiri oe i te reira i te auro tamâhia: to ˈna niaraa, to ˈna mau apaapa, to ˈna mau tara. E hamani oe i te faaunauna auro ati aˈe te fata.
4 E hamani atoa oe e piti potaa auro no ˈna i raro aˈe i to ˈna hiti i te tahi e te tahi pae, e e tapea te reira i na raau no te amo i te fata.
5 A hamani i na raau amoraa i te sitima e a tapiri i te reira i te auro.
6 E tuu oe i te reira i mua i te paruru i pihai iho i te afata o te Haamanaˈoraa,+ i mua i te tapoˈi i nia iho i te Haamanaˈoraa, i te vahi e fa ˈtu ai au ia oe.+
7 “E tutui Aarona+ i te mea noˈanoˈa+ i nia iho,+ a au auahi atu ai i nia i te fata, ia faaineine oia i te mau mori+ i te mau poipoi atoa.
8 Ia faaama Aarona i te mau mori i te ahiahi, e tutui atoa oia i te mea noˈanoˈa. E tusia mea noˈanoˈa tamau tera i mua ia Iehova e hope noa ˈtu to outou mau uˈi.
9 Eiaha oe e pûpû i nia iho i te mea noˈanoˈa aita i roto i te ture,+ e te tusia taauahi e te tusia huero maa, e eiaha roa oe e ninii i te hoê tusia uaina i nia iho.
10 Hoê taime i te matahiti,+ e ninii Aarona i nia iho i te mau tara o te fata maa toto o te tusia no te hara+ no te haamoˈa i te fata. E na reira oia hoê taime i te matahiti e hope noa ˈtu to outou mau uˈi. Mea moˈa roa te fata no Iehova.”
11 Na ô maira Iehova ia Mose:
12 “Ia numera e ia taio noa ˈtu oe i te mau tamarii a Iseraela,+ e horoa tataitahi ratou i te hoê hoo na Iehova no to ratou ora ia taiohia ratou, ia ore hoi ratou ia roohia i te ati ia tapaohia to ratou mau iˈoa.
13 Teie ta te mau taata atoa tei tapaohia te iˈoa e horoa: afa sekela* ia au i te sekela o te vahi moˈa.*+ Hoê sekela, e 20 ïa gera.* E ô na Iehova te afa sekela.+
14 O te taata atoa tei tapaohia te iˈoa mai te 20 matahiti e nia ˈtu te horoa i te ô na Iehova.+
15 Eiaha te taata taoˈa ia rahi aˈe i te horoa, e eiaha te taata veve ia iti aˈe i te horoa i te afa sekela* ei ô na Iehova no te hoo mai i* to outou ora.
16 E rave oe i te ati Iseraela ra i te moni ario no te hooraa mai e e horoa ˈtu oe i te reira no te taviniraa i te tiahapa o te amuiraa, ia riro hoi ei haamanaˈoraa i mua ia Iehova no te ati Iseraela, ei hoo* no to outou ora.”
17 Na ô faahou maira Iehova ia Mose:
18 “A hamani i te hoê tura veo e to ˈna vairaa no te horoiraa,+ e a tuu i te reira i ropu i te tiahapa o te amuiraa e te fata, e a tuu i te pape i roto.+
19 E horoi Aarona e ta ˈna mau tamaiti i to ratou rima e to ratou avae i reira.+
20 Ia tomo ratou i roto i te tiahapa o te amuiraa aore ra ia faafatata ratou i te fata no te rave i ta ratou taviniraa e no te pûpû i te ô taauahi e te au auahi na Iehova, e horoi ratou ia ratou i te pape ia ore ratou ia pohe.
21 E horoi ratou i to ratou rima e to ratou avae ia ore ratou ia pohe, e e riro te reira ei faaueraa mure ore no ratou, no Aarona e to ˈna huaai, e hope noa ˈtu to ratou mau uˈi.”+
22 Paraparau noa maira Iehova ia Mose:
23 “I muri iho, a rave i te mau mea noˈanoˈa roa ˈˈe: e 500 mura paari, e te afaraa o te reira, e 250 kinamo noˈanoˈa, e 250 aeho noˈanoˈa,*
24 e e 500 kade, faitohia ia au i te sekela o te vahi moˈa,*+ e te hoê hina* hinu olive.
25 I muri iho, a hamani i te hoê monoˈi faatavai moˈa i te reira. E anoihia te reira ma te aravihi.*+ E riro te reira ei monoˈi moˈa faatavai.
26 “E faatavai oe i te tiahapa o te amuiraa+ e te afata o te Haamanaˈoraa i tera monoˈi,
27 oia atoa te iri vairaa pane e ta ˈna mau taihaa, te vairaa mori e ta ˈna mau taihaa, te fata mea noˈanoˈa,
28 te fata tusia taauahi e pauroa ta ˈna taihaa, e te tura e to ˈna vairaa.
29 E haamoˈa oe i te reira ia moˈa roa.+ Ia moˈa te taata e tapea i te reira.+
30 E faatavai e e haamoˈa oe ia Aarona+ e ta ˈna mau tamaiti+ ia tavini ratou ia ˈu ei tahuˈa.+
31 “E parau oe i te ati Iseraela: ‘Ia riro noa teie ei monoˈi faatavai moˈa no ˈu no tera e tera uˈi.+
32 E ere te reira no te parai i nia i te iri o te taata, e eiaha roa oe e hamani i te hoê mea mai teie te huru. Mea moˈa te reira, e ia riro noa te reira ei mea moˈa no outou.
33 Te taata e hamani i te hoê monoˈi mai tera e e parai i te reira i nia i te hoê taata e ere i te tahuˈa,* e haapohehia oia mai roto mai i to ˈna nunaa.’”+
34 Na ô maira Iehova ia Mose: “A rave i te hoê â faito o teie mau mea noˈanoˈa:+ te natapha, te sehelata, te helebena e te tapau libano maitai.
35 A hamani i te reira ei mea noˈanoˈa,+ ia anoihia te mea noˈanoˈa ma te aravihi,* ia tamitihia,+ ei mea maitai e te moˈa.
36 Ia pâpâhia e oe maa mea noˈanoˈa e ia huˈahuˈa roa a tuu atu ai maa vahi o te reira i mua i te Haamanaˈoraa i roto i te tiahapa o te amuiraa, i te vahi e fa ˈtu ai au ia oe. Ia riro te reira ei mea moˈa roa no outou.
37 Eiaha roa outou e hamani i te mea noˈanoˈa na outou mai teie te hamaniraa.+ Ia hiˈo outou i te reira ei mea moˈa no Iehova.
38 Te taata atoa e hamani i te mea noˈanoˈa mai tera no te hauˈa i to ˈna noˈanoˈa, e haapohehia ïa mai roto mai i to ˈna nunaa.”
Nota i raro i te api
^ 1 kubiti: 44,5 cm. Hiˈo i te tuhaa hau B14.
^ 1 sekela: 11,4 g. Hiˈo i te tuhaa hau B14.
^ Aore ra “sekela moˈa.”
^ 1 gera: 0,57 g. Hiˈo i te tuhaa hau B14.
^ 1 sekela: 11,4 g. Hiˈo i te tuhaa hau B14.
^ Aore ra “no te faahauraa no.”
^ Aore ra “faahauraa.”
^ Aore ra “kane momona.”
^ Aore ra “sekela moˈa.”
^ 1 hina: 3,67 L. Hiˈo i te tuhaa hau B14.
^ Aore ra “mai ta te taata hamani monoˈi faatavai.”
^ Heb: “taata ê,” oia hoi e ere i te huaai o Aarona.
^ Aore ra “mai ta te taata hamani monoˈi faatavai.”
