Exodo 37:1-29
37 Hamani ihora Bezaleela+ i te Afata+ i te raau sitima. E piti kubiti* e te afa te roa e hoê kubiti e te afa te aano e hoê kubiti e te afa te teitei.+
2 Tapiri atura oia i te reira i te auro tamâhia na roto e na rapaeau, e hamani ihora i te tahi faaunauna auro ati aˈe te niaraa o te Afata.+
3 I muri iho, faatô ihora oia e maha potaa auro no te reira, no nia ˈˈe i to ˈna na avae e maha, e piti potaa i te hoê pae e e piti potaa i te tahi atu pae.
4 Hamani ihora oia i te mau raau amoraa i te sitima e tapiri atura i te reira i te auro.+
5 Patia ˈtura oia i na raau amoraa na roto i na potaa na te hiti o te Afata no te amo i te Afata.+
6 Hamani ihora oia i te tapoˈi i te auro tamâhia.+ E piti kubiti e te afa te roa, e hoê kubiti e te afa te aano.+
7 E hamani atura oia e piti kerubi+ i te auro tupaihia i na hiti o te tapoˈi.+
8 Hoê kerubi i te tahi hiti, e te tahi atu kerubi i te tahi atu hiti. Ua hamani oia i na kerubi i na hiti o te tapoˈi.
9 E hohora na kerubi i to raua pererau i nia, ei marumaru i nia ˈˈe i te tapoˈi.+ Te fariu ra te tahi i te tahi, e te hiˈo ra to raua mata i te tapoˈi.+
10 Hamani ihora oia i te iri vairaa pane i te raau sitima.+ E piti kubiti te roa, hoê kubiti te aano, e hoê kubiti e te afa te teitei.+
11 Tapiri atura oia i te reira i te auro tamâhia e hamani atura i te tahi faaunauna auro ati aˈe i te niaraa o te iri vairaa pane.
12 Hamani atura oia i te tahi hiti ati aˈe te reira e maha manimani* te aano, e te tahi faaunauna auro na nia iho i taua hiti ra.
13 Hau atu â, faatô ihora oia e maha potaa auro no te reira e tuu ihora i na potaa i nia i na poro e maha i reira na maha avae i tamauhia ˈi.
14 To raro aˈe na potaa i te hiti o te iri vairaa pane, ei tapearaa i na raau amoraa faaohipahia no te amo i te iri vairaa pane.
15 Hamani ihora oia i na raau amoraa i te sitima e tapiri atura i te reira i te auro no te amo i te iri vairaa pane.
16 I muri iho, hamani atura oia i te mau taihaa e vai ra i nia iho i te iri vairaa pane i te auro tamâhia: te mau mereti, te mau hapaina, te mau auˈa e te mau pita e niniihia te mau tusia uaina i roto.+
17 Hamani ihora oia i te vairaa mori+ i te auro tamâhia. Ua hamani oia i te vairaa mori i te auro tupaihia. To ˈna avae, to ˈna tumu, to ˈna mau tiare, to ˈna mau umoa e to ˈna mau raupua, hoê â ïa tâpû auro.+
18 E ono amaa i te maaraa mai te tumu o te vairaa mori, e toru amaa i te hoê pae e e toru amaa i te tahi atu pae.
19 E toru tiare tei hohoˈa i te tiare sekadi to nia iho i na amaa tataitahi i te hoê pae, te umoa atoa e te raupua te tahi i muri iho i te tahi. E toru atoa tiare tei hohoˈa i te tiare sekadi to nia iho i na amaa tataitahi i te tahi atu pae, te umoa atoa e te raupua te tahi i muri iho i te tahi. Mai tera ïa no na ono amaa i te maaraa mai te tumu mai o te vairaa mori.
20 I nia iho i te tumu o te vairaa mori, e maha ïa tiare tei hohoˈa i te tiare sekadi, te umoa atoa e te raupua te tahi i muri iho i te tahi.
21 Hoê umoa to raro aˈe i na amaa matamua e piti i te maaraa mai te tumu mai, e hoê umoa to raro aˈe i na amaa e piti i muri mai, e hoê umoa to raro aˈe i na amaa e piti i muri mai. Mai tera ïa no na ono amaa i te maaraa mai te tumu mai o te vairaa mori.
22 Na umoa e na amaa e te vairaa mori taatoa, hoê â ïa tâpû auro tamâhia tupaihia.
23 Hamani ihora oia i to ˈna na mori e hitu,+ to ˈna na tapea uiti e farii auahi i te auro tamâhia.
24 Ua hamani oia i te reira, e to ˈna mau taihaa atoa, i te hoê taleni* auro tamâhia.
25 Hamani ihora oia i te fata mea noˈanoˈa+ i te raau sitima. Hoê â roa e hoê â aano to te fata, hoê kubiti te roa, hoê kubiti te aano, e e piti kubiti te teitei. E tuhaa to ˈna mau tara no taua fata ra.+
26 Tapiri atura oia i te reira i te auro tamâhia: to ˈna niaraa, to ˈna mau apaapa e to ˈna mau tara. Hamani atura oia i te tahi faaunauna auro ati aˈe te fata.
27 Hamani ihora oia e piti potaa auro no ˈna i raro aˈe i to ˈna hiti i te tahi e te tahi pae, e e tapea te reira i na raau no te amo i te fata.
28 I muri iho, hamani ihora oia i te raau amoraa i te sitima e tapiri atura i te reira i te auro.
29 Hamani atoa ˈtura oia i te monoˈi faatavai moˈa+ e te mea noˈanoˈa maitai roa+ tei anoihia i te hinu ma te aravihi.*
Nota i raro i te api
^ 1 kubiti: 44,5 cm. Hiˈo i te tuhaa hau B14.
^ E 7,4 cm. Hiˈo i te tuhaa hau B14.
^ 1 taleni: 34,2 kg. Hiˈo i te tuhaa hau B14.
^ Aore ra “mai ta te taata hamani monoˈi faatavai.”
