Exodo 39:1-43
39 Hamani aˈera ratou i te mau ahu raraa-maitai-hia no te taviniraa i te vahi moˈa i te taura ninamu, te huruhuru mamoe vareau e te ahu uteute.+ Hamani aˈera ratou i te mau ahu moˈa no Aarona+ mai ta Iehova iho â i faaue ia Mose.
2 Hamani ihora oia i te tiputa+ i te auro, te taura ninamu, te huruhuru mamoe vareau, te ahu uteute e te lino maitai roa tavirihia.
3 Tupaipai aˈera ratou i te tâpû auro e ia rairai roa, e tâpû atura oia ei taura no te raraa i te reira e te taura ninamu, te huruhuru mamoe vareau, te ahu uteute e te lino maitai roa, e ua nira-faanehenehe-hia te reira.
4 Hamani atura ratou i te tapoˈi tapono no te reira tei taatihia i to ˈna na e piti hiti i nia.
5 E te hatua raraahia, tei taamuhia i nia i te tiputa no te tapea maitai i te reira,+ hoê â ïa taoˈa i te hamaniraahia: te auro, te taura ninamu, te huruhuru mamoe vareau, te ahu uteute e te lino maitai roa tavirihia, mai ta Iehova iho â i faaue ia Mose.
6 Tamau aˈera ratou i na piti ofai sema i nia i te tapearaa auro, e nanaˈo aˈera i nia iho i te iˈoa o te mau tamaiti a Iseraela, mai te titiro ia nanaˈohia.+
7 Tuu atura oia i te reira i nia iho i na tapoˈi tapono o te tiputa ei ofai haamanaˈoraa i te mau tamaiti a Iseraela,+ mai ta Iehova iho â i faaue ia Mose.
8 Hamani ihora oia i te tapoˈi ouma+ mai ta te hoê taata nira faanehenehe, mai te hamaniraa o te tiputa, i te auro, te taura ninamu, te huruhuru mamoe vareau, te ahu uteute e te lino maitai roa tavirihia.+
9 Hoê â roa e hoê â aano to ˈna ia tufetuhia. Ua hamani ratou i te tapoˈi ouma e ia tufetuhia, hoê â ïa te roa e te aano, oia hoi hoê tiapana.*
10 Tamau aˈera ratou i nia iho e maha anairaa ofai maitai roa. Te anairaa matamua, te adama ïa, te phetade e te semaradino.
11 Te piti o te anairaa, te nepheka ïa, te saphira e te ieloma.
12 Te toru o te anairaa, te ofai lesema* ïa, te sebu e te aheleme.
13 E te maha o te anairaa, te tarisisa ïa, te sema e te isephe. Ua tamauhia te reira i nia i te mau tapea auro.
14 Hoê ofai maitai roa no na 12 tamaiti tataitahi a Iseraela. Ua nanaˈohia te ofai tataitahi mai te hoê titiro, i te iˈoa o na 12 opu tataitahi.
15 Hamani atura ratou i te fifi tavirivirihia i nia iho i te tapoˈi ouma, mai te taura auro tamâhia.+
16 Hamani atura ratou e piti tapea auro e e piti potaa, e taamu atura i na piti potaa i na poro e piti o te tapoˈi ouma.
17 I muri iho, oomo atura ratou i na piti taura auro i roto i na potaa e piti i na poro o te tapoˈi ouma.
18 E oomo atura ratou i na hopea o na taura e piti i roto i na tapea e piti, e taamu atura ia raua i te tapoˈi tapono o te tiputa, i te muaraa.
19 I muri iho, hamani atura ratou e piti potaa auro e tamau atura ia raua i na hiti e piti o te rotoraa o te tapoˈi ouma, piri atu i te tiputa.+
20 Hamani aˈera ratou e piti â potaa auro e tamau aˈera i nia iho i te muaraa o te tiputa, i raro mai i na tapoˈi tapono e piti, piri i te vahi i taatihia ˈi te reira, i nia mai i te hatua raraahia o te tiputa.
21 Taamu atura ratou i te tapoˈi ouma i te tahi taura ninamu ma te taati i to ˈna na potaa i na potaa o te tiputa, no te tapea i te tapoˈi ouma i to ˈna vairaa i nia iho i te tiputa, i nia mai i te hatua raraahia, mai ta Iehova iho â i faaue ia Mose.
22 Hamani ihora oia i te ahu aita e rima no te tiputa i te taura ninamu anaˈe,+ na te hoê taata raraa i hamani.
23 E apoo no te upoo to ropu i taua ahu ra, mai te apoo no te upoo o te ahu paruru o te hoê faehau. Ua raraahia te hiti o to ˈna apoo ati aˈe, ia ore tera ahu ia mutu.
24 I muri iho, hamani aˈera ratou i te hiti ahu i te remuna i te taura ninamu, te huruhuru mamoe vareau e te ahu uteute tavirivirihia te tahi i te tahi.
25 Hamani aˈera ratou i te ôe i te auro tamâhia na roto roto i te remuna e ati aˈe i te ahu aita e rima, na roto roto i te remuna,
26 ua tamau ratou i te ôe e te remuna te tahi i muri iho i te tahi, hoê ôe e hoê remuna, ati aˈe te hiti o te ahu aita e rima, tei oomohia no te taviniraa, mai ta Iehova iho â i faaue ia Mose.
27 E hamani ihora ratou i te mau ahu roa i te lino maitai roa, na te hoê taata raraa i hamani, no Aarona e ta ˈna na tamaiti,+
28 e te taamu upoo taa ê+ lino maitai roa, te taamu upoo+ lino maitai roa faanehenehe, te piripou lino+ maitai roa tavirihia,
29 e te hatua i te lino maitai roa tavirihia, te taura ninamu, te huruhuru mamoe vareau, e te ahu uteute raraahia te tahi i te tahi, mai ta Iehova iho â i faaue ia Mose.
30 Tupaipai aˈera ratou i te tahi auro tamâhia anaana, te tapao moˈa no te pûpûraa,* e nanaˈo aˈera i nia iho mai tei nanaˈo i te hoê titiro: “Na Iehova te moˈaraa.”+
31 Taamu atura ratou i te reira i nia i te taamu upoo taa ê i te hoê taura ninamu, mai ta Iehova iho â i faaue ia Mose.
32 Oti aˈera ïa te ohipa no te sekene, te tiahapa o te amuiraa, e ua rave te ati Iseraela i te mau mea atoa ta Iehova i faaue ia Mose.+ Ua na reira iho â ratou.
33 Hopoi maira ratou i te sekene+ ia Mose ra, te tiahapa+ e pauroa to ˈna taihaa: to ˈna mau pine,+ to ˈna mau iri pǎpai,+ to ˈna mau raau tarava,+ to ˈna mau pou e to ˈna mau niu,+
34 to ˈna tapoˈi iri mamoe oni faauteutehia,+ to ˈna tapoˈi iri humi, te paruru no te paruai,+
35 te afata o te Haamanaˈoraa e to ˈna mau raau amoraa+ e te tapoˈi,+
36 te iri vairaa pane, pauroa to ˈna taihaa+ e te mau pane pûpûhia,
37 te vairaa mori auro tamâhia, to ˈna mau mori,+ te anairaa mori, e pauroa to ˈna taihaa+ e te hinu no te mori,+
38 te fata+ auro, te monoˈi faatavai,+ te mea noˈanoˈa,+ te paruai*+ no te tomoraa o te tiahapa,
39 te fata veo+ e to ˈna upeˈa veo, to ˈna mau raau amoraa,+ pauroa to ˈna taihaa,+ te tura e to ˈna vairaa,+
40 te paruru o te aua, to ˈna mau pou e to ˈna mau niu,+ te paruai*+ no te tomoraa o te aua, to ˈna mau taura e naero rahi no te tiahapa+ e pauroa te taihaa no te taviniraa i te sekene, no te tiahapa o te amuiraa,
41 te mau ahu raraa-maitai-hia no te tavini i roto i te nao,* te mau ahu moˈa no Aarona te tahuˈa,+ e te mau ahu o ta ˈna mau tamaiti no te tavini ei tahuˈa.
42 Mai ta Iehova iho â i faaue ia Mose, mea na reira te ati Iseraela i te raveraa pauroa te ohipa.+
43 I to Mose hiˈopoaraa i ta ratou mau ohipa atoa, ite ihora oia e ua rave ratou mai ta Iehova iho â i faaue, e haamaitai atura Mose ia ratou.
Nota i raro i te api
^ 1 tiapana: 22,2 cm. Hiˈo i te tuhaa hau B14.
^ Aita i itehia eaha tera ofai maitai roa.
^ Aore ra “hei moˈa.”
^ Aore ra “paruru.”
^ Aore ra “paruru.”
