Exodo 5:1-23
5 I muri iho, tomo ihora Mose raua Aarona i mua ia Pharao e parau maira ia ˈna: “Teie ta Iehova te Atua o Iseraela e parau mai ra: ‘A tuu i to ˈu nunaa ia haere ia faatupu ratou i te hoê oroa no ˈu i te medebara.’”
2 Tera râ, na ô atura Pharao: “O vai o Iehova,+ ia faaroo vau i to ˈna reo e tuu ia Iseraela ia haere?+ Aita roa ˈtu vau i ite ia Iehova, e hau atu â, eita vau e tuu ia Iseraela ia haere.”+
3 Parau maira râ raua: “Ua paraparau mai te Atua o te mau Hebera ia mâua. E hinaaro matou e haere i to matou tere e toru mahana i te medebara, a pûpû atu ai i te tusia ia Iehova to matou Atua.+ Aita anaˈe, e tairi oia ia matou i te maˈi aore ra i te ˈoˈe.”
4 Pahono atura te arii o Aiphiti: “Eaha orua, Mose e Aarona, e hinaaro ai ia faaea te nunaa i te rave i ta ratou ohipa? A hoˈi i ta outou ohipa!”*+
5 Na ô faahou atura Pharao: “A hiˈo na ua rahi roa teie nunaa i teie fenua, e te hinaaro ra orua ia faaea ratou i te rave i ta ratou ohipa?”
6 I taua noa mahana ra, faaue ihora Pharao i te mau tiaau ohipa e ta ratou mau raatira ohipa:
7 “Eiaha outou e horoa faahou i te huˈahuˈa sitona na tera mau taata no te hamani i te ofai araea.+ A vaiiho e na ratou iho e ohi haere i te huˈahuˈa sitona.
8 Ia faahepo noa râ outou ia ratou ia hamani hoê â rahiraa ofai araea mai na mua ˈtu. Eiaha e faaiti mai i te reira, te faatau ra hoi ratou. No reira ratou e tuô ai, a na ô ai: ‘E hinaaro matou e haere, e hinaaro matou e pûpû i te tusia i to matou Atua!’
9 A faateimaha ˈtu â i ta ratou ohipa, e a faarave noa ia ratou i te ohipa, ia ore ratou e tâuˈa i te mau parau haavare.”
10 Haere atura ïa te mau tiaau ohipa+ e ta ratou mau raatira ohipa i rapae, e na ô atura i tera mau taata: “Teie ta Pharao i parau: ‘Eita vau e horoa faahou atu i te huˈahuˈa sitona.
11 A haere e na outou iho e tii i ta outou mau huˈahuˈa sitona na te mau vahi atoa e noaa mai ai, area ta outou ohipa, e ore roa ˈtu e faaitihia mai.’”
12 Purara ê atura ïa taua mau taata ra e ati noa ˈˈe te fenua o Aiphiti i te ohi-haere-raa i te tumu sitona mǎrô no te faahuˈahuˈa.
13 E parau onoono noa ˈtura te mau tiaau ohipa ia ratou: “Ia faaoti outou tataitahi i ta outou ohipa i te mahana hoê, mai na mua ˈtu a horoahia ˈtu ai te huˈahuˈa sitona.”
14 Ua rutu-atoa-hia+ te mau raatira ohipa ati Iseraela, ta te mau tiaau ohipa a Pharao i faatoroa i nia ia ratou. Ui atura ïa ratou: “Eaha outou i ore ai i hamani i te rahiraa ofai araea mai tei matauhia e outou? Aita outou i na reira inanahi ra e i teie atoa mahana.”
15 Tomo aˈera ïa te mau raatira ohipa ati Iseraela e autâ aˈera ia Pharao: “Eaha oe e na reira ˈi i ta oe mau tavini?
16 Aita e huˈahuˈa sitona i horoahia na ta oe mau tavini, te parau nei râ ratou ia matou: ‘A hamani i te ofai araea!’ Te rutuhia ra ta oe mau tavini, na to oe râ mau taata te hape.”
17 Tera râ, na ô atura oia: “Te faatau ra outou, te faatau ra outou!+ No reira outou e parau ai: ‘E hinaaro matou e haere, e hinaaro matou e pûpû i te tusia ia Iehova.’+
18 No reira, i teie nei, a haere, a hoˈi i ta outou ohipa! Aita e huˈahuˈa sitona e horoahia ˈtu na outou, tera râ, ia hamani â outou hoê â rahiraa ofai araea.”
19 Ite aˈera ïa te mau raatira ohipa ati Iseraela e to roto ratou i te ati no teie faaueraa: “Eiaha roa ˈtu outou e faaiti mai i te hamani i te rahiraa ofai araea i te mahana hoê.”
20 I muri iho, farerei aˈera ratou ia Mose raua Aarona, e tia noa ra i reira no te farerei ia ratou ia haere mai ratou i rapae mai mua mai ia Pharao.
21 Parau ihora ratou ia raua: “Ia hiˈo mai Iehova ia orua, a haava mai ai, i te mea no orua i vahavahahia ˈi matou e* Pharao e ta ˈna mau tavini, e ua tuu orua i te ˈoˈe i roto i to ratou rima no te haapohe ia matou.”+
22 Fariu aˈera Mose ia Iehova ra e parau atura: “Iehova, no te aha oe i haamauiui ai i teie nunaa? No te aha oe i tono ai ia ˈu?
23 Mai to ˈu tomoraa i mua ia Pharao no te paraparau ma to iˈoa,+ ua hamani ino atu â oia i teie nunaa,+ e aita roa oe i faaora i to nunaa.”+
