Ioba 28:1-28
28 “Te vai ra te tahi vahi no te eru i te arioE te tahi vahi no te auro e tamâhia.+
2 E ravehia mai te auri no roto i te repo,E e faatahehia* te veo no roto i te mau mato.+
3 E upootia te taata i nia i te poiri.E eru haere oia i roto i te rumaruma e te poiri,A imi ai i te ofai maitai roa.*
4 E hou oia i te tahi apoo eruraa mea atea i te vahi parahihia e te taata,I te mau vahi moˈe, mea atea i te vahi haerehia e te taata.E pou vetahi na nia i te taura a tarere noa ˈtu ai.
5 E tupu te maa i te niaraa o te fenua.I raro aˈe râ, te tuinohia ra te fenua mai te huru ra e na te auahi.*
6 E saphira to roto i te mau ofai i reira,E e auro to roto i te repo.
7 Aita te aeto i ite i te eˈa e tae atu ai i reira.Aita te mata o te manu aie ereere i ite aˈenei i tera vahi.
8 Aita te mau animara rahi i taahi i reira.Aita te liona apî i hahaere na reira.
9 E tupai te taata i te mato paari i to ˈna rima.E faataahuri oia i te mau mouˈa i to ratou tumu.
10 E pao oia i te mau taheraa pape+ i roto i te mato.E ite to ˈna mata pauroa te mea moni rahi.
11 E tapoˈi oia i te mau puna o te mau anavaiE e hopoi mai oia i tei hunahia i te maramarama.
12 Area te paari, ihea e itehia ˈi,+E teihea te puna o te maramarama?+
13 Aita e taata e taa i to ˈna faufaa,+E eita te reira e itehia mai i te fenua o te feia ora.
14 E parau te pape hohonu: ‘Aita i roto ia ˈu!’
E e parau te miti: ‘Aita ia ˈu nei!’+
15 Eita e nehenehe e hoo mai i te reira i te auro tamâhia.Eita atoa e nehenehe e faito i te ario ei taui i te reira.+
16 Eita e nehenehe e hoo mai i te reira i te auro no Ophira+E i te sema moni rahi e te saphira.
17 Eita e nehenehe e faaau i te reira i te auro e te hiˈo.Eita atoa e nehenehe e taui i te reira i te tahi farii auro tamâhia.+
18 Aita e faufaa ia faahiti i te toˈa e te kerehe,+Mea faufaa aˈe hoi te pute î i te paari i te pute î i te poe.
19 Eita e nehenehe e faaau i te reira i te phetade+ no Kusa.Eita e nehenehe e hoo mai i te reira i te auro tamâhia.
20 Nohea mai râ te paari,E teihea te puna o te maramarama?+
21 Ua hunahia te reira i te mata o te mau taata ora e te mau animara ora atoa+E ua hunahia i te mau manu o te raˈi.
22 E parau te haamouraa e te pohe:‘Ua faarooroo noa to mâua tariˈa i te reira.’
23 Ua ite te Atua i te eˈa e itehia mai ai te reira.O ˈna anaˈe tei ite ihea te reira e parahi ai,+
24 E hiˈo hoi oia i te hopea o te fenua,E e ite oia i te mau mea atoa i raro aˈe i te raˈi.+
25 I to ˈna faataaraa i te puai* o te mataˈi+E faitoraa i te mau pape,+
26 I to ˈna haamauraa i te hoê ture no te ûa+E te tahi eˈa no te ata vero e te patiri,+
27 I tera taime ua ite oia i te paari e ua faataa i te reira.Ua haamau e ua tamatamata oia i te reira.
28 E ua parau oia i te taata:
‘Inaha, te mǎtaˈu ia Iehova, tera te paari,+E te fariu-ê-raa i te ino, o te maramarama ïa.’”+
Nota i raro i te api
^ Heb: “niniihia.”
^ Heb: “ofai.”
^ E au ra e no te eru i te mau ofai maitai roa.
^ Heb: “teiaha.”
