Iosua 6:1-27
6 Ua opani-maitai-hia hoi te mau uputa o Ieriko no te ati Iseraela. Aita e taata e haere i rapae e aita e taata e haere i roto.+
2 Na ô maira Iehova ia Iosua: “Inaha, ua tuu vau ia Ieriko, to ˈna arii e ta ˈna mau aito puai+ ia oe.
3 E haaati outou pauroa, te mau faehau, i te oire hoê taime. Tera ta outou e rave e ono mahana.
4 A rave mai e hitu tahuˈa o te amo e hitu pu tara mamoe oni na mua i te Afata. I te hitu râ o te mahana, e haaati outou i te oire e hitu taime e e faaoto te mau tahuˈa i na pu tara.+
5 Ia faaotohia te pu tara mamoe oni, i te taime iho â e faaroo ai outou i te taˈi o te pu tara,* e huro te mau faehau atoa ma te reo puai. I reira te patu o te oire e marua ˈi,+ e e tomo te mau faehau i roto i te oire, te faehau tataitahi i mua ia ˈna.”
6 Titau atura ïa Iosua te tamaiti a Nuna i te mau tahuˈa e na ô atura ia ratou: “A rave i te afata o te faufaa, e e amo e hitu tahuˈa e hitu pu tara mamoe oni na mua i te Afata a Iehova.”+
7 Parau atura oia i te mau faehau: “A haere e a haaati i te oire, e e haere te mau faehau e mauhaa tamaˈi ta ratou+ na mua i te Afata a Iehova.”
8 E mai ta Iosua i parau i te mau faehau, haere aˈera na hitu tahuˈa o te amo ra e hitu pu tara mamoe oni na mua ia Iehova, e faaoto aˈera i na pu tara, e te na muri mai ra te afata o te faufaa a Iehova ia ratou.
9 Haere aˈera te mau faehau e mauhaa tamaˈi ta ratou na mua i na tahuˈa e faaoto ra i na pu tara, e pee maira te mau faehau no muri i te Afata a faaoto-noa-hia ˈi na pu tara.
10 I faaue na Iosua i te mau faehau: “Eiaha e tuô e eiaha to outou reo ia faaroohia. Eiaha hoê parau ia matara mai roto mai i to outou vaha e tae roa i te mahana e parau ai au ia outou: ‘A tuô!’ A tuô ïa.”
11 Faahaere ihora oia i te Afata a Iehova ati aˈe te oire hoê taime, e i muri iho, hoˈi maira ratou i te puhapa e taoto ihora i reira.
12 Ananahi aˈe, tia maira Iosua i te poipoi roa, rave aˈera te mau tahuˈa i te Afata+ a Iehova
13 e haere aˈera na hitu tahuˈa e amo ra i na hitu pu tara mamoe oni na mua i te Afata a Iehova, a faaoto noa ˈi i na pu tara. Te haere ra te mau faehau e mauhaa tamaˈi ta ratou na mua ia ratou a pee mai ai te mau faehau no muri i te Afata a Iehova a faaoto-noa-hia ˈi na pu tara.
14 Haaati aˈera ratou i te oire hoê taime i te piti o te mahana, e hoˈi maira i te puhapa. Tera ta ratou i rave e ono mahana.+
15 Tia maira ratou i te poipoi roa i te hitu o te mahana, i te haamataraa iho â i te marama, e haaati aˈera ratou i te oire mai tera atoa e hitu taime. Tera anaˈe te mahana i haaati ai ratou i te oire e hitu taime.+
16 E i te hitu o te taime, faaoto aˈera na tahuˈa i na pu tara, e na ô atura Iosua i te mau faehau: “A tuô,+ ua tuu hoi Iehova i te oire ia outou!
17 Ia faataahia te oire e pauroa to roto no te haamouraa,+ na Iehova pauroa te reira. O Rahaba anaˈe+ te vahine taiata te nehenehe e ora noa, o ˈna e te feia atoa ia ˈna ra i roto i to ˈna fare, no te mea ua faatapuni oia i na mata huna ta tatou i tono.+
18 A faaatea ê mai râ ia outou i tei faataahia no te haamouraa,+ ia ore outou ia hinaaro e ia rave mai i te tahi mea tei faataahia no te haamouraa,+ a faariro atu ai i te puhapa o Iseraela ei mea faataahia no te haamouraa ma te faatae mai i te ati.*+
19 Mea moˈa râ na Iehova pauroa te ario, te auro e te taihaa veo e auri.+ E tuuhia te reira i roto i te pueraa taoˈa a Iehova.”+
20 Tuô aˈera te mau faehau i te faaotoraahia na pu tara.+ I te faarooraa iho â te mau faehau i te taˈi o te pu tara e te huroraa ratou ma te reo puai, marua ihora te patu.+ I muri iho, tomo aˈera te mau faehau i roto i te oire, te faehau tataitahi i mua ia ˈna, e haru aˈera i te oire.
21 Haapohe aˈera ratou pauroa to roto i te oire i te ˈoˈe, te tane e te vahine, te taata apî e te ruhiruhia, te puaatoro, te mamoe e te asini.+
22 Na ô atura Iosua i na piti tane tei hiˈopoa i te fenua: “A tomo i roto i te fare o te vahine taiata e a aratai mai ia ˈna e to ˈna mau taata atoa i rapae, mai ta orua i horeo ia ˈna.”+
23 Tomo atura na mata huna apî i roto e aratai maira ia Rahaba i rapae, e to ˈna metua tane, to ˈna metua vahine, to ˈna mau taeae, e to ˈna mau taata atoa. Oia mau, ua aratai mai raua i to ˈna utuafare taatoa i rapae,+ e afai atura ia ratou i te tahi vahi i rapae i te puhapa o Iseraela.
24 Tanina aˈera ratou i te oire e pauroa to roto. Area te ario, te auro e te mau taihaa veo e auri, ua tuu ratou i te reira i roto i te pueraa taoˈa o to Iehova fare.+
25 O Rahaba anaˈe te vahine taiata, te utuafare o to ˈna metua tane e to ˈna mau taata atoa ta Iosua+ i faaherehere. Ora noa ˈtura oia i Iseraela tae roa i teie mahana,+ no te mea ua faatapuni oia i na tane ta Iosua i tono e hiˈopoa ia Ieriko.+
26 I taua taime ra, faahiti atura Iosua i teie horeo:* “Ua ati* te taata i mua ia Iehova o te opua e patu faahou i teie oire o Ieriko. E ere oia i ta ˈna matahiapo ia haamau oia i to ˈna niu, e e ere oia i ta ˈna tamarii hopea ia tamau oia i to ˈna mau uputa.”+
27 Tei pihai iho noa ïa Iehova ia Iosua,+ e atutu aˈera to ˈna roo na te fenua taatoa.+
Nota i raro i te api
^ Aore ra “oto pu roa.”
^ Aore ra “arepurepu,” “haama.”
^ Huri-atoa-hia “faahoreo ihora Iosua i te nunaa i teie horeo.”
