Iosua 7:1-26
7 Ua taiva râ te ati Iseraela no nia i tei faataahia no te haamouraa, ua rave hoi Akana+ te tamaiti a Karemi, te tamaiti a Zabadi, te tamaiti a Zera, no te opu o Iuda, i te tahi mau mea tei faataahia no te haamouraa.+ Ura ihora to Iehova riri i te ati Iseraela.+
2 Tono atura Iosua i te tahi mau tane mai Ieriko mai i Ai,+ tei piri ia Bete-avena e tei te pae hitia o te râ o Betela,+ a na ô ai ia ratou: “A pauma e a hiˈopoa i te fenua.” Pauma aˈera na tane e hiˈopoa aˈera ia Ai.
3 I te hoˈiraa mai ratou ia Iosua ra, na ô maira ratou: “Aita e faufaa ia pauma te nuu taatoa. E 2 000 aore ra e 3 000 tane ua navai e pau ai Ai. Eiaha e faarohirohi i te nuu taatoa ma te faaue ia ratou ia haere, mea iti hoi te taata i ǒ.”
4 Piri ïa i te 3 000 tane tei pauma i ǒ. Horo ê maira râ ratou i te mau tane no Ai.+
5 Taparahi pohe aˈera te mau tane no Ai e 36 tane. Aˈuaˈu aˈera te mau tane no Ai ia ratou mai te uputa o te oire tae roa i Sebarima,* e taparahi pohe aˈera ia ratou a haapou mai ai ratou. Toaruaru ihora ïa te aau o te nunaa* e tahe atura mai te pape.
6 Hahae ihora Iosua i to ˈna ahu e tuturi ihora te mata i raro i mua i te Afata a Iehova e ahiahi noa ˈtura, o ˈna e te mau matahiapo o Iseraela. Ueue noa aˈera ratou i te repo i nia i to ratou upoo.
7 Na ô atura Iosua: “Auê hoi e te Arii hau ê e Fatu ra o Iehova, eaha oe i aratai roa mai ai i teie nunaa i teie pae mai o Ioridana no te tuu noa ˈtu ia matou i te ati Amori ra ia haamouhia? Ahani iho â matou i faaea noa i te tahi atu pae* o Ioridana!
8 Eiaha na oe e inoino mai, e Iehova, eaha ˈtura ïa ta ˈu e nehenehe e parau i teie nei ua horo ê* Iseraela i to ˈna mau enemi?
9 Ia faaroo te ati Kanaana e pauroa to teie fenua i te reira, e haaati ratou ia matou e e faaore ratou i to matou iˈoa i nia i te fenua. Eaha ïa ta oe e rave no to iˈoa rahi?”+
10 Pahono maira Iehova ia Iosua: “A tia! Eaha oe e tipapa noa ˈi?
11 Ua hara Iseraela. Ua ofati ratou i ta ˈu faufaa+ ta ˈu i faaue ia ratou ia haapao. Ua rave ratou i te tahi mau mea tei faataahia no te haamouraa.+ Ua eiâ+ e ua huna ratou i te reira i roto i ta ratou mau taoˈa.+
12 No reira, eita e haere i te ati Iseraela ia aro i to ratou mau enemi. E huri tua ratou e e horo ê i to ratou mau enemi, no te mea ua riro ratou ei mea faataahia no te haamouraa. Aita faahou vau i pihai iho ia outou ia ore outou e haamou i tei faataahia no te haamouraa+ mai rotopu ia outou.
13 A tia e a haamoˈa i te nunaa!+ A parau ia ratou: ‘A haamoˈa ia outou no ananahi, teie hoi ta Iehova te Atua o Iseraela e parau ra: “To rotopu ia outou tei faataahia no te haamouraa, e Iseraela. Eita e haere ia outou ia aro i to outou mau enemi ia ore outou ia faaore i tei faataahia no te haamouraa mai rotopu ia outou.
14 E putuputu outou i te poipoi, tera e tera opu, e e tapiri mai te opu ta Iehova e maiti,+ tera e tera fetii, e e tapiri mai te fetii ta Iehova e maiti, tera e tera utuafare, e e tapiri mai te utuafare ta Iehova e maiti, tera e tera taata.
15 E taninahia+ te taata e itehia tei ia ˈna ra te mea tei faataahia no te haamouraa, o ˈna e pauroa ta ˈna, no te mea ua ofati oia i te faufaa+ a Iehova e no te mea ua rave oia i te tahi ohipa haama i Iseraela.”’”
16 Ananahi aˈe, tia maira ïa Iosua i te poipoi roa e haafatata maira ia Iseraela, tera e tera opu, e o te opu o Iuda tei maitihia.
17 Haafatata maira oia i te fetii o Iuda, e o te fetii o te ati Zera+ tei maitihia. I muri iho, haafatata maira oia i te fetii o te ati Zera, tera e tera taata, e o Zabadi tei maitihia.
18 I te hopea, haafatata maira oia i te utuafare o Zabadi, tera e tera taata, e o Akana te tamaiti a Karemi, te tamaiti a Zabadi, te tamaiti a Zera, no te opu o Iuda tei maitihia.+
19 Parau atura Iosua ia Akana: “Ta ˈu tamaiti, a faahanahana na ia Iehova te Atua o Iseraela e a faˈi ia ˈna i ta oe hara. A parau mai na eaha ta oe i rave. Eiaha e huna mai.”
20 Pahono maira Akana ia Iosua: “Oia mau, o vau tei hara ia Iehova te Atua o Iseraela, e teie ta ˈu i rave:
21 I to ˈu iteraa i roto i tei haruhia i te hoê ahu nehenehe moni rahi no Sinara,+ e 200 sekela* ario e hoê tâpû auro e 50 sekela te teiaha, hinaaro ihora vau i te reira. Rave maira ïa vau. Era ua hunahia i roto i te repo i roto i to ˈu fare ie, e to raro aˈe te moni.”
22 I reira iho, tono atura Iosua i te vea, e horo aˈera ratou i te fare ie. Ua hunahia te ahu i roto i te fare ie, e to raro aˈe te moni i te ahu.
23 Rave maira ïa ratou i na taoˈa i roto i te fare ie, afai atura ia Iosua ra e pauroa te ati Iseraela, e tuu aˈera i te reira i mua ia Iehova.
24 Rave aˈera Iosua e o Iseraela taatoa na muri ia ˈna ia Akana+ te tamaiti a Zera, te ario, te ahu moni rahi e te tâpû auro,+ oia atoa ta ˈna mau tamaiti, ta ˈna mau tamahine, ta ˈna puaatoro, ta ˈna asini, ta ˈna nǎnǎ mamoe e puaaniho, to ˈna fare ie, e pauroa ta ˈna e afai aˈera i te reira i te peho o Akora.+
25 Na ô atura Iosua: “Eaha oe i faatae mai ai i te ati* i nia ia tatou?+ E faatae mai Iehova i te ati i nia ia oe i teie mahana.” Pehi aˈera Iseraela taatoa ia ratou i te ofai,+ i muri iho tanina+ aˈera ia ratou. Ua pehihia ratou pauroa i te ofai.
26 Faatia aˈera ratou i te tahi pueraa ofai teitei roa i nia iho ia ˈna o te vai noa ra i teie mahana. Pee ihora to Iehova riri rahi.+ No reira o te peho o Akora* te iˈoa o tera vahi e tae roa i teie mahana.
Nota i raro i te api
^ “Te mau vahi paoraa ofai” te auraa.
^ Aore ra “Ere ihora te nunaa i te itoito.”
^ Oia hoi te pae hitia o te râ.
^ Aore ra “huri tua.”
^ 1 sekela: 11,4 g. Hiˈo i tuhaa hau B14.
^ Aore ra “arepurepu,” “haama.”
^ “Ati,” “Haama” te auraa.
