Isaia 39:1-8
-
Vea mai Babulonia mai (1-8)
39 I taua mau mahana ra, faatae maira te arii o Babulonia Merodaka-baladana te tamaiti a Baladana i te rata e te ô na Hezekia,+ ua faaroo hoi oia ua maˈihia na o ˈna e ua maitai mai.+
2 Farii maitai atura* Hezekia i te mau vea e faaite atura ia ratou i ta ˈna fare vairaa taoˈa:+ te ario, te auro, te monoˈi zuri e te tahi atu monoˈi maitai roa, ta ˈna mau mauhaa tamaˈi, e pauroa te mea e vai ra i roto i ta ˈna vairaa taoˈa. Aita hoê ohipa ta Hezekia i ore i faaite ia ratou i roto i to ˈna aorai* e i te vahi taatoa ta ˈna e faatere ra.
3 I muri iho i te reira haere maira Isaia te peropheta i te arii Hezekia e ui maira: “Eaha ta teie mau taata i parau, e nohea mai ratou?” Pahono atura ïa Hezekia: “No te tahi fenua atea mai ratou, no Babulonia mai.”+
4 Ui maira Isaia: “Eaha ta ratou i ite i roto i to oe aorai?”* Pahono atura Hezekia: “Ua ite ratou i te mau mea atoa i roto i to ˈu aorai.* Aita hoê ohipa ta ˈu i ore i faaite ia ratou i roto i ta ˈu vairaa taoˈa.”
5 Parau ihora Isaia ia Hezekia: “A faaroo mai i te parau a Iehova o te mau nuu:*
6 ‘Te fatata mai ra te mau mahana e hopoihia ˈi i Babulonia pauroa te mea i roto i to oe aorai* e pauroa ta to oe mau tupuna i haaputu tae roa mai i teie mahana. Eita hoê ohipa e toe mai,’+ te parau ra Iehova.+
7 ‘E hopoi-ê-hia vetahi o to oe huaai o te fanauhia mai e e riro ratou ei tia mana i te aorai o te arii o Babulonia.’”+
8 Parau atura Hezekia ia Isaia: “Mea maitai te parau a Iehova ta oe i parau.” Parau faahou atura oia: “No te mea e itehia te hau e te ati ore* i te roaraa o to ˈu oraraa.”*+
Nota i raro i te api
^ Heb: “Oaoa roa ihora.”
^ Heb: “fare.”
^ Heb: “fare.”
^ Heb: “fare.”
^ Aore ra “sabaota.”
^ Heb: “fare.”
^ Aore ra “parau mau.”
^ Heb: “to ˈu mau mahana.”
