Numera 22:1-41
22 Faareva aˈera te ati Iseraela e puhapa ihora ratou i te mau vahi papu pâpâmǎrô o Moabi i te tahi atu pae o Ioridana mai Ieriko+ mai.
2 Ite ihora Balaka+ te tamaiti a Tipora i ta te ati Iseraela atoa i rave i te ati Amori,
3 e mehameha roa ihora to Moabi i te nunaa, mea rahi roa hoi ratou. Oia mau, ua pohe roa to Moabi i te riaria i te ati Iseraela.+
4 Parau ihora to Moabi i te mau matahiapo o Midiana:+ “E pau te mau mea atoa ati aˈe ia tatou i teie amuiraa, mai te aihere e pau i te puaatoro.”
O Balaka te tamaiti a Tipora te arii o Moabi i taua taime ra.
5 Tono ihora oia i te vea ia Balaama te tamaiti a Beora i Petora,+ o te tia ra i te hiti Anavai* i to ˈna fenua tumu. Titau maira oia ia ˈna, a na ô ai: “Inaha, e nunaa teie na Aiphiti mai. Inaha, ua apǐ roa te fenua+ ia ratou, e te parahi nei ratou i mua mau ia ˈu.
6 A haere mai na e a faatae na no ˈu i te ino i nia i teie nunaa,+ mea puai aˈe hoi ratou ia ˈu. Peneiaˈe e pau ratou ia ˈu a nehenehe atu ai au e tiahi ia ratou i teie fenua, ua ite maitai hoi au e haamaitaihia te taata ta oe e haamaitai, e e ino te taata ta oe e faatae i te ino.”
7 Tere atura ïa te mau matahiapo o Moabi e te mau matahiapo o Midiana e te moni aufauhia no te peu hiˈohiˈo, e haere atura ia Balaama+ e faaite atura ia ˈna i te poroi a Balaka.
8 Pahono maira oia ia ratou: “A faaea mai i ǒ nei i teie po, e e faatia vau ia outou i te mau parau atoa ta Iehova e parau mai ia ˈu.” Faaea maira ïa te huiarii o Moabi ia Balaama ra.
9 Haere maira te Atua ia Balaama e na ô maira:+ “O vai teie mau taata ia oe ra?”
10 Parau atura Balaama i te Atua mau: “Ua faatae mai Balaka te tamaiti a Tipora, te arii o Moabi i te hoê poroi ia ˈu a na ô ai:
11 ‘Inaha, ua apǐ roa te fenua i te nunaa na Aiphiti i te haereraa mai i rapae. A haere mai e a faatae i te ino i nia ia ratou no ˈu.+ Peneiaˈe e nehenehe au e aro e e tiahi ia ratou.’”
12 Parau maira râ te Atua ia Balaama: “Eiaha e haere na muri ia ratou. Eiaha e faatae i te ino i nia i te nunaa, ua haamaitaihia hoi ratou.”+
13 Tia aˈera Balaama i te poipoi e parau atura i te huiarii a Balaka: “A haere i to outou fenua, aita hoi Iehova i faatia ia ˈu ia haere na muri ia outou.”
14 Faareva aˈera ïa te huiarii o Moabi e hoˈi atura ia Balaka e na ô atura: “Aita Balaama i farii e haere mai na muri ia matou.”
15 Tera râ, tono faahou atura Balaka i te huiarii, rahi aˈe e te faatura-rahi-hia aˈe i to te pǔpǔ matamua.
16 Haere atura ratou ia Balaama e na ô atura: “Teie ta Balaka te tamaiti a Tipora i parau: ‘Eiaha na e vaiiho i te tahi mea e tapea ia oe ia haere mai ia ˈu,
17 e faahanahana rahi hoi au ia oe e e rave au pauroa ta oe e parau mai ia ˈu. No reira a haere mai na, e a faatae na no ˈu i te ino i nia i teie nunaa.’”
18 Pahono maira râ Balaama i te mau tavini a Balaka: “Ia horoa noa mai â Balaka no ˈu i to ˈna iho fare ua î i te ario e te auro, aita e ohipa ta ˈu e nehenehe e rave na nia ˈˈe i te faaueraa a Iehova to ˈu Atua, mea iti anei aore ra mea rahi.+
19 Tera râ, a faaea mai na i ǒ nei i teie atoa po, ia nehenehe au e ite eaha ˈtu â ta Iehova e parau mai ia ˈu.”+
20 Haere maira te Atua ia Balaama i te po e na ô maira: “Mai te peu ua haere mai teie mau taata e titau ia oe, a haere na muri ia ratou. O te mau parau anaˈe râ ta ˈu e parau ia oe ta oe e parau.”+
21 Tia aˈera Balaama i te poipoi, tuu ihora i te parahiraa i nia i ta ˈna asini* e haere atura na muri i te huiarii o Moabi.+
22 Ura ihora râ to te Atua riri no te mea te haere ra oia, e tia noa ˈtura ta Iehova melahi i nia i te purumu no te tapea ia ˈna. Te na nia ra Balaama i ta ˈna asini, e e piti tavini ta ˈna i pihai iho ia ˈna.
23 I to te asini iteraa i te melahi a Iehova i te tiaraa i nia i te purumu ma te ˈoˈe i to ˈna rima, tamata ˈtura oia i te faarue i te purumu no te haere i roto i te aihere. Haamata ˈtura râ Balaama i te tupai i te asini no te faahoˈi ia ˈna i nia i te purumu.
24 Tia ˈtura ta Iehova melahi i nia i te hoê eˈa pirihao i ropu e piti faaapu vine, e patu ofai to te tahi e te tahi pae.
25 I to te asini iteraa i te melahi a Iehova, tapiri atura oia i te pae patu, e piri roa ˈtura te avae o Balaama i nia i te patu, e haamata faahou atura Balaama i te tupai ia ˈna.
26 Haere faahou maira ta Iehova melahi na pihai iho e tia ˈtura i te tahi vahi pirihao eita e nehenehe e tipuu i te pae atau aore ra aui.
27 I to te asini iteraa i te melahi a Iehova, taoto ihora oia i raro aˈe ia Balaama. Riri ihora ïa Balaama e tupai noa ˈtura oia i te asini i ta ˈna raau.
28 I muri iho, haaparaparau atura Iehova i te asini,*+ e na ô maira te asini ia Balaama: “Eaha ta ˈu i rave i tupai mai ai oe ia ˈu teie e toru taime?”+
29 Pahono atura Balaama i te asini: “No te mea ua haamaau oe ia ˈu. Ahiri e ˈoˈe i to ˈu rima, e haapohe au ia oe!”
30 Na ô maira ïa te asini ia Balaama: “E ere anei au i ta oe asini tei parahihia e oe i to oe oraraa taatoa e tae roa mai i teie mahana? Ua na reira aˈena anei au ia oe na mua ˈˈe?” Pahono atura oia: “Aita!”
31 Araara aˈera te mata o Balaama ia Iehova,+ e ite ihora oia i ta Iehova melahi i te tiaraa i nia i te purumu ma te ˈoˈe i to ˈna rima. I reira iho, tipapa ihora oia te mata i raro.
32 Na ô maira ta Iehova melahi ia ˈna: “Eaha oe i tupai ai i ta oe asini teie e toru taime? Inaha, o vau iho tei haere mai no te tapea ia oe, no te mea te patoi ra to oe haerea i to ˈu hinaaro.+
33 Ua ite te asini ia ˈu e ua tamata i te ape ia ˈu teie e toru taime.+ Ahiri aita oia i ape ia ˈu, eaha te tupu? Ua haapohe ïa vau ia oe i teie nei taime, e ua vaiiho vau i te asini ia ora.”
34 Parau atura Balaama i ta Iehova melahi: “Ua hara vau, no te mea aita vau i ite o oe teie e tia ra i nia i te purumu no te farerei ia ˈu. I teie nei, mai te peu aita e tano teie tere to ˈu, e hoˈi ïa vau.”
35 Na ô maira râ ta Iehova melahi ia Balaama: “A haere na muri i tera mau taata, o te mau parau anaˈe râ ta ˈu e parau ia oe ta oe e parau.” Tamau atura ïa Balaama i te haere na muri i te huiarii o Balaka.
36 I to Balaka faarooraa e ua tae mai Balaama, i reira iho, haere maira oia i rapaeau e farerei ia ˈna i te oire o Moabi, i te hiti o te Aranona i te otia o te tuhaa fenua.
37 Parau atura Balaka ia Balaama: “Aita anei au i faaue e tii ia oe? No te aha aita oe i haere mai? Ua manaˈo anei oe eita ta ˈu e nehenehe e faahanahana rahi ia oe?”+
38 Pahono atura Balaama ia Balaka: “Teie au ua tae mai ia oe ra. E faatiahia anei râ vau e parau i te tahi mea? O te mau parau anaˈe ta te Atua e tuu i roto i to ˈu vaha ta ˈu e nehenehe e parau.”+
39 Haere atura ïa Balaama na muri ia Balaka, e tae atura raua i Kiriata-huzota.
40 Pûpû atura Balaka ei tusia i te puaatoro e te mamoe e horoa ˈtura i te tahi na Balaama e te huiarii ia ˈna ra.
41 I te poipoi, rave maira Balaka ia Balaama e aratai atura ia ˈna i Bamota-baala, mai nia mai ïa o ˈna i nehenehe ai e ite i te nunaa taatoa.+
Nota i raro i te api
^ Oia hoi Eupharate.
^ Heb: “asini ufa.”
^ Heb: “faahamǎmǎ ˈtura Iehova i te vaha o te asini ufa.”
