Te rata i to Philipi 3:1-21
3 E teie nei, to ˈu mau taeae, ia oaoa noa outou i te Fatu.+ Aita e fifi no ˈu ia papai faahou atu i te mau mea ta ˈu i papai aˈena ia outou, no te paruru hoi ia outou.
2 A ara i te mau urî. A ara i te feia ohipa ino. A ara i te feia e turu ra i te peritomeraa.*+
3 Tei ia tatou te peritomeraa mau,+ tatou hoi e pûpû ra i te hoê taviniraa moˈa maoti te varua* o te Atua, tatou hoi e haapeu nei i te Mesia ra o Iesu+ e aita e tiaturi ra i ta te tino,
4 noa ˈtu e e tumu e tiaturi ai au, hau atu i te tahi atu taata, i ta te tino.
Ia manaˈo noa ˈtu te tahi taata e e tumu e tiaturi ai oia i ta te tino nei, eaha ˈtu â ïa vau:
5 ua peritomehia i te vaˈu o te mahana,+ no te nunaa Iseraela, no te opu o Beniamina, e Hebera fanauhia e na metua Hebera.+ No nia i te parau o te ture, e Pharisea.+
6 No nia i te itoito rahi, i hamani ino na vau i te amuiraa.+ No nia i te parau-tia niuhia i nia i te ture, e haerea hapa ore to ˈu.
7 Tei noaa râ ia ˈu, o ta ˈu ïa i faariro ei mea faufaa ore* no te Mesia.+
8 Hau atu â, te faariro iho â nei au i te mau mea atoa ei mea faufaa ore no te faufaa hau ê o te ite no nia i te Mesia ra o Iesu to ˈu Fatu. No ˈna i haapae ai au i te mau mea atoa, ta ˈu i faariro ei pueraa pehu, ia faufaahia vau i te Mesia
9 e ia itehia e ua hoê au e o ˈna, eiaha no te parau-tia i noaa ia ˈu no te haapaoraa i te Ture, no te parau-tia râ maoti te faaroo+ i te Mesia,+ no te faaroo hoi i riro ai tatou ei feia parau-tia i te aro o te Atua.+
10 Ta ˈu fa, ia ite ïa vau ia ˈna e te puai o to ˈna tia-faahou-raa,+ e ia mauiui vau mai ia ˈna,+ e ia ineine au i te pohe mai ia ˈna,+
11 a nehenehe atu ai au e fanaˈo i te tia-faahou-raa matamua mai te pohe mai.+
12 E ere hoi e ua fanaˈo ê na vau i te reira aore ra ua noaa ê na ia ˈu te tia-roa-raa, tera râ, te tautoo nei au+ ia mau ia ˈu te mea no reira te Mesia ra o Iesu i maiti ai ia ˈu.+
13 Taeae ma, aita râ vau e manaˈo ra ia ˈu iho mai te mea ra e ua noaa ia ˈu te reira. Te mea papu râ: aita vau e tâuˈa faahou ra i to muri,+ e tapi râ vau i to mua.+
14 Te horo tia ˈtu ra vau i te fa ia noaa ia ˈu te re,+ oia hoi te oraraa i te raˈi i titau-manihini-hia ˈi+ au e te Atua na roto i te Mesia ra o Iesu.
15 Mai te reira noa ïa te huru feruriraa o te feia paari i te pae varua,+ e ia ore noa ˈtu râ outou e manaˈo mai tera, na te Atua ïa e faaite ia outou i te huru feruriraa tano.
16 Tera râ, i te mea e ua nuu ê na tatou i mua, e haere maite noa anaˈe ïa ma te tapea i taua aveia ra.
17 Taeae ma, ia pee paatoa mai outou i to ˈu hiˈoraa+ e ia tiatonu noa outou i te feia e faaau ra i to ratou haerea i te hiˈoraa ta matou i horoa ˈtu.
18 E rave rahi hoi taata mai to te mau enemi o te pou haamauiuiraa* a te Mesia to ratou haerea. I faahiti pinepine noa na vau i to ratou parau, i teie nei râ, te na reira atoa ra vau ma te taˈi.
19 I te hopea e mou ratou, e to ratou atua o to ratou ïa opu, e to ratou hanahana o to ratou ïa haama, e tei nia noa to ratou feruriraa i te mau mea o teie nei ao.+
20 Tera râ, tei te raˈi to tatou aiˈa,+ e te tiai ru nei tatou i te hoê faaora no te raˈi mai,+ oia hoi te Fatu ra o Iesu Mesia,+
21 e i to ˈna puai rahi e faariro ai oia i to tatou tino paruparu ei tino hanahana+ mai to ˈna ra, e na roto atoa i taua puai ra e tuu ai oia i te mau mea atoa i raro aˈe ia ˈna.+
Nota i raro i te api
^ Aore ra “te feia e tâpû ra i te tino.”
^ Aore ra “puai ohipa.”
^ Huri-atoa-hia “o ta ˈu ïa i hinaaro e haapae.”
