Te mau tavana 10:1-18
10 I muri mai ia Abimeleka, tia maira Tola te tamaiti a Pua, te tamaiti a Dodo, e tane no te opu o Isakara, no te faaora ia Iseraela.+ I ora na oia i Samira i te tuhaa fenua mouˈa o Epheraima.
2 Ua tavana oia i nia ia Iseraela e 23 matahiti. Pohe ihora oia e hunahia ihora i Samira.
3 I muri mai ia ˈna, tia maira Iaira ati Gileada e ua tavana oia i nia ia Iseraela e 22 matahiti.
4 E 30 tamaiti ta ˈna tei na nia iho e 30 asini, e e 30 oire to ratou, tei parauhia Havota-iaira+ tae roa mai i teie mahana. Tei te fenua o Gileada taua mau oire ra.
5 I muri aˈe, pohe ihora Iaira e hunahia ihora i Kamona.
6 Rave faahou aˈera te ati Iseraela i te mea ino i te aro o Iehova,+ e tavini aˈera ratou i te mau Baala,+ te mau hohoˈa o Asetoreta, te mau atua o Arama,* te mau atua o Sidona, te mau atua o Moabi,+ te mau atua o te ati Amona,+ e te mau atua o te mau Philiseti.+ Faarue aˈera ratou ia Iehova e aita i tavini faahou ia ˈna.
7 Ura ihora to Iehova riri i te ati Iseraela, e tuu atura oia ia ratou i te rima o te mau Philiseti e te ati Amona.+
8 Hamani ino e faahepo roa aˈera ïa ratou i te ati Iseraela i taua matahiti ra, 18 matahiti to ratou faaheporaa i te ati Iseraela taatoa i te pae o Ioridana to reira te fenua o te ati Amori i Gileada.
9 Ua haere atoa hoi te ati Amona i te tahi atu pae o Ioridana e aro i te opu o Iuda, to Beniamina e to Epheraima, e hepohepo roa ihora Iseraela.
10 Tiaoro aˈera te ati Iseraela ia Iehova ia tauturu mai,+ a na ô ai: “Ua hara matou ia oe, ua faarue hoi matou ia oe, to matou Atua, e ua tavini matou i te mau Baala.”+
11 Na ô maira râ Iehova i te ati Iseraela: “Aita anei au i faaora ia outou ia Aiphiti,+ i te ati Amori,+ te ati Amona, te mau Philiseti,+
12 te ati Sidona, te ati Amaleka e te ati Midiana i to ratou faaheporaa ia outou? I to outou tiaororaa mai ia ˈu, ua faaora vau ia outou i to ratou rima.
13 Faarue maira râ outou ia ˈu, e tavini aˈera i te tahi atu mau atua.+ No reira vau e ore ai e faaora faahou ia outou.+
14 A haere atu i te mau atua ta outou i maiti e a tiaoro ia ratou ia tauturu ia outou.+ Ia faaora ratou ia outou i te taime e ahoaho ai outou.”+
15 Parau atura râ te ati Iseraela ia Iehova: “Ua hara matou. A rave ia matou mai tei au i to aro. Tera noa râ, a faaora na ia matou i teie mahana.”
16 Faaore atura ratou i te mau atua ěê mai rotopu ia ratou e tavini aˈera ia Iehova,+ a ore atu ai i noaa faahou ia ˈna ia faaoromai i to Iseraela mauiui.+
17 I muri aˈe, titau aˈera te ati Amona+ i ta ratou mau faehau, e patia ihora ratou i te puhapa i Gileada. Putuputu aˈera ïa te ati Iseraela e patia ihora i te puhapa i Mizepa.
18 Na ô aˈera te nunaa e te mau raatira no Gileada te tahi i te tahi: “O vai te aratai ia tatou no te aro i te ati Amona?+ Ia riro oia ei raatira no te mau taata atoa no Gileada.”
Nota i raro i te api
^ Aore ra “Suria.”
