I TE TAHI taime, e rave Iehova i te ohipa maere no te paruru i te feia apî e te ore e nehenehe e paruru ia ratou iho. Ia haere oe na rapae, e ite paha oe hoê o tera mau ohipa a Iehova. Eita râ oe e taa oioi eaha te tupu ra.

I mua ia oe, e ite oe i te hoê manu. E au ra e ua pepe oia, te tarere ra hoê o to ˈna pererau. E ia faafatata ˈtu oe, e faaatea oia. A tapiri noa ˈtu ai oe, e nuu noa ˈtu â oia i mua, e inaha rere atura. Aita to ˈna pererau i pepe noa ˈˈe! Ua ite oe no te aha te manu i na reira ˈi?—

I te vahi i ite ai oe i te manu, te vai ra ta ˈna mau fanauˈa i roto i te aihere. Ua riaria te mama manu ia ite e ia haamauiuihia ta ˈna mau fanauˈa. Ua faahua pepe oia no te faaatea ia oe i ta ˈna mau fanauˈa. Ua ite anei oe o vai te nehenehe e paruru ia tatou mai teie mama manu?— I roto i te Bibilia, ua faaauhia Iehova i te hoê manu parauhia aeto o te paruru i ta ˈna mau fanauˈa.—Deuteronomi 32:11, 12.

No Iehova, mea faufaa roa ta ˈna Tamaiti ra o Iesu. I te raˈi, e tamaiti puai oia mai to ˈna Metua, e nehenehe oia e paruru ia ˈna iho! I to ˈna râ fanauraahia mai i nia i te fenua, e aiû haihai oia o te hinaaro i te parururaa.

No te rave i te hinaaro o te Atua i nia i te fenua, ua titauhia ia paari e ia riro mai Iesu ei taata tia roa e te maitai. Ua tamata râ Satani i te haapohe ia ˈna. Mea anaanatae roa ia ite eaha ta Iehova i rave no te paruru i ta ˈna tamaiti. E hinaaro anei oe ia faatia ˈtu vau?—

Tau taime i muri aˈe i to Iesu fanauraahia mai, na roto i te hoê fetia e anaana ra i hitia o te râ, ua aratai Satani i te feia hiˈo fetia i Ierusalema. I reira, ua ani ratou ihea te arii o te mau ati Iuda e fanauhia ˈi. Ua pahono mai te feia tei ite i ta te Bibilia e parau ra: ‘I Betelehema o ˈna e fanauhia ˈi.’—Mataio 2:1-6.

I te faarooraa te arii ino i Ierusalema o Heroda ua fanau mai teie arii apî, ua parau oia i te feia hiˈo fetia: “A haere a imi maitai i tera tamarii e ia itehia mai oia e outou, a hoˈi mai e faaite ia ˈu.” No te aha Heroda i hinaaro ai e ite teihea o Iesu?— No te mea ua pohehae e ua hinaaro Heroda e haapohe ia Iesu!

Mea nafea te Atua i te parururaa i ta ˈna Tamaiti?— I te iteraa te feia hiˈo fetia teihea o Iesu, ua horoa ˈtu ratou i te taoˈa. I muri mai, na roto i te hoê moemoeâ, ua faaara te Atua eiaha ratou ia hoˈi ia Heroda ra. Hoˈi atura te feia hiˈo fetia i ǒ ratou na te tahi atu purumu. I te iteraa Heroda, ua riri roa oia! No to ˈna hinaaro e haapohe ia Iesu, ua faaue Heroda ia taparahi pohe i te mau tamaroa atoa i raro mai i te piti matahiti i Betelehema. Ua reva ê na râ o Iesu.

Ua ite anei oe no te aha?— I te haereraa te feia hiˈo fetia, ua faaara Iehova ia Iosepha, te tane a Maria, ia tia e ia horo i Aiphiti. Ua atea roa Iesu i te arii ino o Heroda. Tau matahiti i muri aˈe, ua hoˈi mai Iosepha raua Maria na Aiphiti mai e o Iesu. Ua faaara faahou te Atua ia Iosepha na roto i te hoê moemoeâ ia haere i Nazareta no te paruru ia Iesu.—Mataio 2:7-23.

Ua ite anei oe mea nafea Iehova i te parururaa i ta ˈna Tamaiti?— O vai te nehenehe e faaauhia ia Iesu aore ra i te mau fanauˈa manu ta te mama manu i paruru?— E, o oe! Te vai ra hoi te taata o te hinaaro e haamauiui ia oe. Ua ite anei oe o vai?—

Te parau ra te Bibilia e au Satani i te hoê liona uuru e imi nei i te amu ia tatou. Mai te liona e haru i te fanauˈa animara, e haamauiui atoa Satani e ta ˈna mau demoni i te tamarii. (Petero 1, 5:8) Mea puai aˈe râ Iehova ia Satani, e nehenehe Iehova e paruru i ta ˈna mau tamarii e e faaore i te ino ta Satani e rave i nia ia ratou.

Haamanaˈo ra oe i te pene 10 o teie buka, eaha ta te Diabolo e te mau demoni e turai ia tatou ia rave?— E, e turai mai ratou ia rave i te mau peu taotoraa ta te Atua e ore e au. O vai anaˈe râ te nehenehe e taoto i te tane aore ra i te vahine?— E, e piti taata paari, te tane e ta ˈna vahine faaipoipo.

Te vahi peapea râ, e hinaaro vetahi taata paari e taoto i te tamarii. Ia na reirahia, e rave atoa te tamarii i te mau mea ino i ravehia i nia ia ratou. E haamata atoa ratou i te faaohipa i to ratou mero taatiraa ma te tano ore. O te ohipa ïa i tupu i tahito i te oire o Sodoma. Te parau ra te Bibilia ua tamata te feia o Sodoma “mai te tamaroa e tae roa i te ruhiruhia” i te taoto i te mau tane tei haere mai e farerei ia Lota.—Genese 19:4, 5.

Mai ia Iesu, e hinaaro atoa oe ia paruruhia oe i te feia paari aore ra tamarii o te rave i te peu ino i nia ia oe. Pinepine, e parau ra ratou e hoa ratou no oe. E horoa atoa mai paha i te tahi mea ia ore oe e faaite i ta ratou e hinaaro e rave i nia ia oe. E feia teie o te haapao noa ia ratou mai ia Satani e ta ˈna mau demoni. No ratou, e ohipa hauti noa, mea ino râ ia taoto i te tamarii!

Ua ite anei oe eaha ta ratou e rave?— E tapea paha ratou i to oe mero taatiraa aore ra e tapiri i to ratou mero taatiraa i nia i to oe. Eiaha roa râ oe e vaiiho i te tahi noa ˈˈe taata e tapea i to oe mero taatiraa, to oe anei taeae, tuahine, mama aore ra papa.

Nafea ia paruru ia oe i te feia o te rave i teie mau mea ino?— Na mua roa, eiaha e vaiiho i te tahi noa ˈˈe taata ia tapea i to oe mero taatiraa. Ia tamata te tahi i te na reira, a parau ma te reo puai e te papu: “A faaea, e faaite au i ta oe e rave!” Ia parau mai oia no oe te hape, eiaha e tiaturi atu, e haavare. A haere e a faaite i ta ˈna i rave. A na reira atoa ia parau mai oia: “Eiaha e faaite, i roto noa ia tâua.” Ia horoa mai oia i te tahi mea aore ra ia parau taparahi o ˈna ia oe, a horo e a faaite i ta ˈna i rave.

Eiaha roa ˈtu oe e mǎtaˈu, a haapao maitai râ! Ia parau mai to oe metua mea atâta te tahi taata aore ra vahi, a faaroo atu. Ia na reira oe, te paruru ra oe ia oe i te taata o te hinaaro e haamauiui ia oe.

No te paruru ia oe i te mau peu taotoraa ino, a taio i te Genese 39:7-12; Maseli 4:14-16; 14:15, 16; Korinetia 1, 6:18 e te Petero 2, 2:14.