E nehenehe anei te hoê taata e tapea i to ˈna taiva ore i te Atua, mai te peu ua tamatahia o ˈna ma te tuu i te hopea, e mai te peu e auraro o ˈna noa ˈtu e eita o ˈna e fanaˈo i te pae materia? Ua faahitihia e ua pahonohia i teie uiraa, i roto i te tupuraa o te hoê taata o Ioba te iˈoa.

A vai ai te ati Iseraela i Aiphiti, te ora ra Ioba te hoê fetii no Aberahama, i te vahi parauhia i teie nei, Arabia. I tera area taime, ua putuputu te mau melahi i te raˈi i mua i te Atua, tei roto atoa o Satani te orure hau ia ratou. I mua i te tairururaa i te ra ˈi, ua faaite Iehova i to ˈna tiaturi rahi i ta ˈna tavini taiva ore o Ioba. Inaha, ua parau Iehova, aita hoê aˈe taata hapa ore mai ia Ioba. Tera râ, ua parau Satani, te tavini ra Ioba i te Atua no te mea noa, te haamaitai ra e te paruru ra te Atua ia ˈna. Ua parau Satani mai te peu e faaerehia Ioba i ta ˈna mau faufaa e faaino oia i te Atua.

Ua faatia te Atua ia faaere Satani ia Ioba i ta ˈna mau faufaa na mua roa, ta ˈna mau tamarii e to ˈna ea. Ma te ore e ite i te ohipa a Satani i roto i teie mau tupuraa, aita Ioba i taa no te aha te Atua i vaiiho ai ia ˈna, ia faaruru i teie mau ati. Aita roa râ Ioba i fariu ê i te Atua.

Ua haere mai e toru hoa to Ioba. Ua î te mau api o te buka a Ioba, i te hoê anairaa parau. Ua tamata na toru tane i te turai ia Ioba ia manaˈo te faautua ra te Atua ia ˈna no te mau hara ta ˈna i rave ma te huna. Ua parau atoa ratou, eita te Atua e oaoa ra i ta ˈna mau tavini e e tiaturi ra ia ratou. Ua patoi Ioba i to ratou manaˈo hape. Ma te tiaturi, ua parau Ioba, e tapea noa o ˈna i to ˈna hapa ore tae noa ˈtu i te pohe.

Ua hape râ Ioba i to ˈna tamataraa i te faatia ia ˈna iho. Ua aˈo te hoê tane apî o Elihu te iˈoa, tei faaroo i te aimârôraa, ia Ioba e to ˈna mau hoa. Ua aˈo Elihu ia Ioba no to ˈna oreraa e taa e mea faufaa te tiaraa Arii hau ê o te Atua ra Iehova ia faaauhia i te tiaraa o te tahi taata. Ua aˈo etaeta atoa Elihu i te mau hoa o Ioba.

I muri iho, ua paraparau Iehova ia Ioba ma te faaafaro i to ˈna feruriraa. Ma te faaite ia ˈna, i te mau mea faahiahia i poietehia, ua horoa Iehova i te hoê haapiiraa ia Ioba no nia i te haihai o te taata ia faaauhia i te rahi hau ê o te Atua ra. Ua farii Ioba ma te haehaa i te aˈoraa no ǒ mai i te Atua ra. E “Atua here rahi . . . e te aroha hamani maitai,” ua faaora Iehova ia Ioba, ua tataipiti o ˈna i ta ˈna mau faufaa, e ua haamaitai ia ˈna ma te horoa ˈtu ahuru tamarii. (Iakobo 5:11) Ma te tapea i to ˈna taiva ore noa ˈtu te hamani-ino-raa, ua pahono Ioba i te pariraa a Satani, tei parau eita te mau taata e nehenehe e tapea i to ratou taiva ore i te Atua i roto i te tamataraa.

​—Ua niuhia i nia i te buka a Ioba.