A faaoaoa na i te mafatu o ta outou mau metua
Pene 12
A faaoaoa na i te mafatu o ta outou mau metua
1. No te aha e mea tano mau â ia faatura i to ˈna mau metua?
MEA apî roa tatou aore ra e taurearea tatou aore ra e taata paari, e metua anaˈe to tatou paatoa. Eita roa ˈtu e nehenehe e taio i te haamauˈaraa o na piti ahuru matahiti aupururaa, ohipa e mau tutavaraa i ravehia no te rahiraa o tatou nei, mai to tatou mai fanauraahia e tae noa ˈtu i te paariraa. Hau atu i taua mau mea atoa ra ta tatou hoi e tia ia haamauruuru, ua horoa mai to tatou mau metua i te hoê mea o te ore roa ta tatou e nehenehe e faahoˈi oia hoi: te ora. Maoti ratou eita roa ˈtu ïa tatou e vai mai. E tia mau â hoi taua ohipa nei ia faaitoito ia tatou ia auraro i teie faaueraa a te Atua e na ô ra e: “E faatura ˈtu i to metua tane e to metua vahine; (o te ture matamua ïa i pahonohia i te maitai i faaitehia mai.) Ia maitai hoi oe, e ia maoro to parahiraa i te ao nei.” — Ephesia 6:2, 3.
2. No te aha hoi e tia ˈi ia tatou ia haamauruuru i to tatou mau metua?
2 Noa ˈtu â ïa e e tia ia tatou ia haamauruuru na mua i to tatou Poiete, te Tumu mau o te ora, e tia atoa ia tatou ia haamauruuru i to tatou mau metua. Eaha hoi ta tatou e nehenehe e horoa ˈtu na ratou no te mau mea ta ratou i rave no tatou nei? Ua faaite maira te Tamaiti a te Atua e eita te mau taoˈa o te ao nei e nehenehe e hoo mai i te ora, eita hoi te reira e nehenehe e hoohia mai (Mareko 8:36, 37; Salamo 49:6-8). Te na ô ra te Parau a te Atua e: “Eiaha outou ei amu tarahu na te taata atoa, area ia aroha ˈtu te tahi i te tahi.” (Roma 13:8). E tia i to tatou mafatu ia faaitoito ia tatou ia tamau â i te here taa ê i to tatou mau metua e ia faaite atu i taua here ra a vai ora noa ˈi ratou aore ra a vai ora noa ˈi tatou nei. Noa ˈtu â ïa e eita ta tatou e nehenehe e horoa i te ora mai ta ratou i na reira i nia ia tatou nei, e nehenehe râ ta tatou e rave i te tahi mea o te horoa i te hoê auraa no to ratou oraraa, o te faaoaoa ia ratou e ia mauruuru rahi roa ratou. E nehenehe ta tatou e na reira na roto i te hoê huru raveraa taa ê mai ta te tahi paha taata e ore roa ˈtu e nehenehe e rave no te mea e mau tamarii tatou na ratou.
3. Ia au i te Maseli 23:24, 25, eaha te mau huru e faaitehia nei e te mau tamarii e faaoaoa ra i te mau metua?
3 Teie ta te Maseli 23:24, 25 e parau ra: “E oaoa te metua o te taata parau-tia ra; e te metua o te tamaiti paari ra e oaoa atoa te metua ia ˈna: oia ïa, e oaoa to metua tane e to metua vahine atoa; to metua vahine tei fanau ia oe ra, e oaoa ïa.” Mea tano maitai iho â ia teoteo roa te mau metua no to ratou mau tamarii e ia oaoa no ratou, mai te reira atoa anei no to tatou mau metua?
4. Eaha te aˈoraa ta te Kolosa 3:20 e horoa maira na te mau tamarii?
4 I roto i te hoê faito rahi, tei to tatou ïa huru: te faatura mau ra anei tatou ia ratou e te faaroo atura anei tatou i ta ratou mau aˈoraa? Teie te faaueraa ta te Atua e horoa mai nei i te feia apî: “E te mau tamarii ra, e faaroo i to outou mau metua i te mau mea atoa nei, e mea mauruuru hoi te reira i te Fatu nei.” (Kolosa 3:20). “I te mau mea atoa nei”, e ere ïa te auraa e e tiaraa to te mau metua no te faahepo i ta ratou tamarii ia rave i te mau mea e ore roa ˈtu e tuati i te Parau a te Atua, te auraa râ, e hopoia na ratou a vai apî noa ˈi tatou, i te aratai ia tatou i roto i te mau tuhaa atoa o te oraraa nei. — Maseli 1:8.
5. Eaha te uiraa ta te hoê taurearea e nehenehe e uiui no nia i te mau mea ta ˈna e titau i ta ˈna iho mau tamarii?
5 E taurearea tane outou i teie mahana aore ra e taurearea vahine, tera râ i muri aˈe, e riro mai paha outou ei metua tane aore ra ei metua vahine no te hoê utuafare fetii. E hinaaro anei ïa outou i te mau tamarii e faatura mai ia outou aore ra mea au aˈe na outou i te mau tamarii e patoitoi mai, e faahua faaroo mai paha ia outou e o te ore hoi e auraro mai ia outou ia fariu outou i to outou tua? Ma te ore roa ˈtu hoi e faaoaoa i to ˈna mau metua, ta te Maseli 17:25 ïa e parau ra, “te tamaiti maamaa ra, e otoraa ïa na ta ˈna metua tane, e te ati hoi no tei fanau mai ia ˈna ra”. I te mea hoi e e nehenehe ta outou e faaoaoa taa ê i to outou mau metua, e nehenehe atoa ïa ta outou hau atu i te tahi atu mau taata e haapeapea rahi ia ratou. Tei te huru hoi o to outou haerea.
EI TAIME IHO Â ÏA E RIRO MAI AI EI TAATA PAARI MAU
6. Eaha te hiˈoraa e faaite mai e noaa mai te paari i roto i te roaraa o te mau matahiti?
6 Mea maitai roa ia papu i te mau taurearea e ua riro te matahiti ei tumu faufaa roa e noaa mai ai te paari. Ahuru anei to outou matahiti, te ite ra ïa outou e ua hau aˈe to outou ite a pae ai to outou matahiti, e ere anei? Ahuru ma pae anei to outou matahiti, eita e ore e ua ite outou hau atu i te ahururaa o to outou matahiti. Fatata anei to outou i te piti ahuru matahiti, e tia ïa ia outou ia ite e ua hau atu â to outou ite a ahuru ma pae ai to outou matahiti. Mea ohie roa ia hiˈo i muri e ia ite e e faariro mau te matahiti ei taata paari aˈe. Teie râ, mea fifi aˈe ia farii i taua parau mau nei ia hiˈohia te tau a muri aˈe. Teie râ, noa ˈtu e e manaˈo te hoê taurearea tane aore ra te hoê taurearea vahine e ua noaa ia ˈna te paari, e tia râ ia ˈna ia farii e e nehenehe te tau a muri aˈe e e tia hoi, e horoa mai i te hoê paari tei hau atu â i te rahi.
7. Eaha te haapiiraa i te pae no te paari ta tatou e nehenehe e huti mai i te mau aˈoraa i horoahia ˈtu i te arii ra o Roboama?
7 Eaha ïa te tia ia faaoti? Oia ïa mea paari aˈe to outou mau metua ia outou e mea aravihi aˈe ia outou no te faatitiaifaro i te mau fifi o te oraraa nei. Mea fifi roa na te rahiraa o te mau taurearea ia farii i taua manaˈo nei. E pinepine hoi ratou i te parau i to ratou mau matahiapo e “e ua ruau ratou e ua hope to ratou anotau”. E parau mau paha no vetahi pae no te rahiraa râ, e ere roa ˈtu ïa i te parau mau. Mai te ore e nehenehe e parau e e upoo nevaneva anaˈe te mau taurearea atoa no te mea e e upoo nevaneva vetahi pae. E ere i te mea varavara ia faaroo i te tahi mau taurearea ia parau e mea aravihi aˈe ratou i te mau taata paari. Ua rave aˈera te hoê arii no Iseraela, o Roboama te iˈoa, i taua hape nei e inaha, e mau faahopearaa iino tei itea mai. A maha ahuru ma hoê ai to ˈna matahiti, ua mono maira oia i te arii ra ia Solomona, to ˈna metua tane, e ua ani maira te mau taata ta ˈna e faatere ra e ia haamama mai i te tahi hopoia teimaha roa ta ratou e farerei ra. Ua haere atura Roboama e farerei i te mau matahiapo tei faaue mai ia ˈna ia riro ei taata mǎrû e te maitai. I muri iho, i te mea hoi e ua fariu tia ˈtu oia i nia i te mau taurearea, ua faaue maira taua mau taata ra ia ˈna ia rave i te tahi mau ravea paari roa. Ua pee aˈera oia i to ratou manaˈo. Eaha ˈtura ïa te faahopearaa? Ua tia maira hoê ahuru o na opu ahuru e ma piti no te patoi mai ia ˈna e hoê anaˈe tuhaa i nia i te ono o to ˈna basileia, ta Roboama. Te mau taata paari, e ere râ te mau taurearea, tei faahiti i te parau ma te paari. “Tei te feia tahito te parau paari; e te ite râ, tei te rahi ïa o te mahana ra”, e ere anei? — Ioba 12:12; Mau Arii 1, 12:1-16; 14:21.
8. Eaha te huru i nia i te mau taata tei ruhiruhia, e tae noa ˈtu hoi i nia i to tatou mau metua, ta te Bibilia e faaitoito maira?
8 Eiaha e manaˈo e e mau manaˈo tahito to to outou mau metua, inaha hoi, e ere ratou i te mea apî faahou. Ia pee na râ outou i teie aˈoraa a te Parau a te Atua e na ô ra e: “E faaroo mai i to metua tane i fanau ai oe ra, e eiaha e vahavaha i to metua vahine, ia ruhiruhia ra.” E tia mau â ia tatou ia faatura i te feia paari. “E tia oe i nia i mua i te aro o te upoo teatea, e faatura oe i te taata tahito; e mǎtaˈu hoi oe i to Atua: o vau o Iehova.” Parau mau, e rave rahi mau taurearea o te ore roa ˈtu e tâuˈa nei i teie mau faaueraa. Eita râ hoi te reira e faaoaoa ia ratou e eita atoa hoi i to ratou mau metua. — Maseli 23:22; Levitiko 19:32.
IA RAVE NA OUTOU I TA OUTOU TUHAA
9. Eaha te mau faahopearaa e roohia i nia i te utuafare ia amuamu faufaa ore noa te hoê o to ˈna mau melo aore ra ia patoitoi oia?
9 E ohipa te mau mea ta outou e rave i nia i te mau taata e haaati ra ia outou. Mai te reira iho â. Mai te peu e e mauiui te hoê o te mau melo o te hoê utuafare fetii, e mauiui ïa te taatoaraa e o ˈna atoa. Oia atoa, mai te peu e eita te hoê o ratou e faaea i te amuamu noa aore ra i te patoitoi, e navai noa ïa te reira no te faaarepurepu i te hau o te taatoaraa i roto i te utuafare. Ia oaoa te hoê utuafare fetii, ia rave ïa te taata tataitahi i ta ˈna tuhaa. — A faaau e te Korinetia 1, 12:26.
10. Eaha te mau haamaitairaa e noaa i te mau tamarii e haapii i te rave maitai i ta ratou ohipa?
10 E nehenehe ta outou e rave i te hoê tuhaa rahi no te turu i te oaoaraa o to outou utuafare. Mai te peu e mea apî roa outou e te faaea ra outou i pihai iho i to outou mau metua, e nehenehe ta outou e tauturu ia ratou, no te mea te ohipa puai ra ratou no te horoa mai na te utuafare fetii i te mau mea e hinaarohia ra e ratou. E horoa hoi te taata i te tuhaa rahi o to ˈna oraraa no te rave i te ohipa, e o ta te tahi pae hoi ïa e ore e au nei. Ia haapii râ outou i te rave maitai i ta outou ohipa e ma te manaˈo maitai, e mau haamaitairaa rahi mau â ïa ta outou e huti mai. Te taata râ e ore e turu mai, o te tiaturi râ i te tahi pae no te rave i te ohipa no ˈna, eita noa ïa taua taata nei e ite i taua oaoaraa nei, e riro râ oia i te faairia i te tahi pae aore ra ia au i te Bibilia, ‘mai te au auahi i te mata ra’. (Maseli 10:26; Koheleta 3:12, 13.) No reira, ia faauehia mai ia outou e rave i te tahi mau ohipa i te fare, a faatupu i te reira mai ta outou e nehenehe e rave. E mai te peu e e hinaaro mau outou e faaoaoa i to outou mau metua, a rave i te tahi atu mau ohipa ma te ore hoi e anihia mai ia outou. E riro ïa outou i te ite e o taua ohipa ra paha o te faaanaanatae rahi ia outou, inaha, ia rave outou i te reira, no te mea noa ïa e te faaitoito ra to outou mafatu ia outou ia haamauruuru i to outou mau metua.
11. Nafea te mau parau e te mau ohipa a te hoê tamarii e nehenehe ai e ohipa maitai i nia i te mau metua?
11 Ia maere roa te tahi mau taata i te haerea o te hoê taurearea tane aore ra taurearea vahine, e hinaaro iho â ïa ratou e ite na vai teie tamaiti aore ra teie tamahine. A faaite ai te taurearea ra o Davida i te itoito e i te faaroo faahiahia mau, ua ani maira te arii ra o Saula e: “E tamaiti na vai tera ra tamaiti?” (Samuela 1, 17:55-58). Ua mairihia outou i te iˈoa o to outou fetii. No reira, e ohipa ïa te mea ta outou e rave e tae noa ˈtu hoi to outou huru i nia i te manaˈo ta te taata e horoa ra no taua iˈoa nei e i nia i to outou mau metua tei horoa mai no outou i taua iˈoa ra. E nehenehe ta outou e faahanahana i to outou mau metua na roto e rave rahi mau ravea, i roto i te vahi ta outou e faaea ra e i te fare haapiiraa, ma te faaite i te hoê huru maitai, ma te ineine i te horoa i ta outou tauturu, ma te riro ei taata faatura e te hamani maitai i te tahi pae. E e faahanahana atoa hoi outou i to outou Poiete. — Maseli 20:11; Hebera 13:16.
12. No te aha e mea faufaa roa e ia tahoê te mau tamarii i to ratou mau metua e faaitoito ra i te haapii e te aˈo ia ratou?
12 Ua tuatihia te oaoaraa o to outou mau metua i nia i to outou. Te faaitoito nei ratou i te rave maitai ia outou, ia noaa ia outou i te hoê omuaraa maitai i roto i te oraraa. A tahoê atu ia ratou, e riro hoi te reira i te faaoaoa ˈtu ia ratou, inaha te imi nei ratou i te mea maitai roa ˈˈe no outou. Ta te taata i papai i te mau Maseli ïa i parau, i te na ôraa e: “E tau tamaiti e, ua paari anaˈe to oe ra aau, e oaoa ïa tau aau, to ˈu iho nei â.” (Maseli 23:15). Ia papu i te mau metua e e hopoia na ratou i mua i te aro o te Atua te aratairaa ia outou i nia i te mau eˈa o te paari mau, a tauturu atu ïa ia ratou ia rave faahope roa i te reira. “E faaroo i te parau, e farii i te aˈo, ia paari oe ia tae i to oe ra hopea.” — Maseli 19:20.
13. Na te aha e nehenehe e tauturu i te hoê tamarii ia rave i te hoê haerea maitai i nia i te mau opaniraa ta to ˈna mau metua e faahepo mai ia ˈna?
13 E riro paha outou i te manaˈo i te tahi taime ua rahi roa te mau mea ta to outou mau metua e ani mai ia outou aore ra mea etaeta roa ratou. E ere i te mea ohie ia aˈo ma te aifaito. I te hoê mahana, ia faatupu noa ˈtu outou i te hoê utuafare fetii e papu ai outou i te reira. Ia opani mai to outou mau metua ia outou eiaha e amuimui atu i roto i te tahi mau taurearea, ia faaara mai ratou ia outou eiaha e rave i te raau taero aore ra ia parau mai ratou, i roto i te tahi faito, e e tia ia outou ia faaiti mai i te amuimui atu i roto i te tahi mau taurearea vahine mai te peu e e tamaroa outou, ia feruri na outou maa taime. E ere anei ïa e mea maitai aˈe e ei mau metua to tatou o te aˈo mai ia outou maoti hoi te mau metua o te ore e tâuˈa mai ia outou (Maseli 13:20; 3:31)? A farii i ta ratou aˈo. E riro ïa te mau haamaitairaa i te noaa mai ia outou e e riro atoa outou i te faaoaoa i to outou mau metua. — Maseli 6:23; 13:1; 15:5; Hebera 12:7-11.
14, 15. Ia tupu noa ˈtu te fifi e te tahi atu mau melo o te utuafare, eaha te mau faaueraa tumu bibilia o te tauturu i te hoê tamarii ia faatupu i te hau i roto i te utuafare?
14 Parau mau, i roto i to outou utuafare, mea rahi roa te ohipa e tupu mai e e ere hoi outou te tumu, e nehenehe râ to outou huru i mua i taua mau ohipa ra e ohipa ˈtu i nia i te toea o te utuafare. Teie te aˈoraa ta te Bibilia e horoa maira: “Peneiaˈe o te tia ra, e parahi hau noa outou i roto i te taata atoa nei.” (Roma 12:18). E ere noa hoi i te mea ohie, inaha mea taa ê anaˈe tatou paatoa. E ere hoê â huru hiˈoraa ta tatou i te mau mea e e ere hoi hoê â huru i mua i te mau ohipa e tupu mai. E riro to tatou mau manaˈo e to tatou mau hinaaro i te ore e tuea. A feruri na e e tatamaˈi outou e to outou tuaana aore ra e to outou tuahine. E nafea ïa outou?
15 E tuô oioi ïa vetahi mau tamarii e e pari ratou i to ratou tuaana aore ra i to ratou tuahine, e e ani atu hoi i to ratou metua tane aore ra i to ratou metua vahine ia faaafaro mai i te reira. E tae roa atoa te tahi pae i te tupai te tahi i te tahi. Teie râ hoi ta te buka a te mau Maseli, tei faauruahia e te Atua e parau ra: “Na te haapao o te taata e ore e riri vave ai.” (Maseli 19:11). Nafea ïa? Oia hoi, e aratai te reira ia ˈna ia haapao maitai i te mau ohipa e tupu ra. (E ere paha i te mea opuahia.) E faahaamanaˈo mai te reira ia ˈna e ua hape atoa oia. (E auê hoi e te mauruuru ra o ˈna ia Iehova oia i faaore mai i ta ˈna mau hara!) E nehenehe atoa te reira e haapapu ia ˈna e mai te peu e ua hape to ˈna tuaana aore ra to ˈna tuahine, mea ino roa ïa mai te peu e riri o ˈna, inaha e faaore oia i te hau i roto i te utuafare. Teie â ta taua buka bibilia noa nei â e parau ra no nia i te taata tia ra: “O to ˈna ïa maitai i te faaore i te hara ra.” — Hiˈo atoa Kolosa 3:13, 14.
16. Eaha te huru haerea e ravehia nei e ta ratou mau tamarii, o te faaoaoa i te mau metua e mǎtaˈu ra i te Atua?
16 Ma te papu maitai, te mea e faaoaoa i te mau metua e mǎtaˈu ra i te Atua, e faaoaoa atoa ïa ia Iehova. Te mea e haapeapea ia ratou, e haapeapea atoa ïa ia ˈna (Salamo 78:36-41). Te mau metua i ore i ite i te manaˈo o te Atua, e riro paha ïa ratou i te oaoa i te mea e e tui roa to ratou roo, e moni rahi te noaa mai ia ratou, e rave rau atu â. Ua ite te feia e o Iehova to ratou Atua, e te mou nei teie nei ao e to ˈna hinaaro, area “o tei haapao râ i to te Atua ra hinaaro, e tia ïa i te oraraa e a muri noa ˈtu”. (Ioane 1, 2:15-17.) No reira, te mea e faaoaoa mau ia ratou, te iteraa ïa ratou i ta ratou mau tamarii ia auraro i to ratou Poiete, ia faatupu i to ˈna hinaaro e ia faaohipa i to ˈna mau huru. Parau mau, e oaoa roa te mau metua kerisetiano ia manuïa ta ratou mau tamarii i ta ratou tau haapiiraa. Teie râ, e rahi roa ˈtu â ratou i te oaoa ia haapapu mai te haerea o ta ratou mau tamarii i te haapiiraa e i te tahi atu vahi e te mau maite ra ratou i te mau faaueraa tumu a te Atua e te hinaaro mau ra ratou e faaoaoa ia ˈna. E oia hoi, e oaoa taa ê ratou ia tamau â ta ratou mau tamarii, ia paari ratou, i te rave i te mau eˈa o Iehova.
TA OUTOU HOPOIA I TE AUPURURAA I TO OUTOU MAU METUA
17-19. Nafea te mau tamarii, ia paari ratou, e nehenehe ai e faaite i to ratou mauruuru i to ratou mau metua?
17 Ia paari tatou, eiaha roa ˈtu ïa to tatou here i to tatou mau metua ia iti mai, ia faarue tatou i te utuafare. Te hinaaro nei tatou ia oaoa ratou i roto i to ratou oraraa taatoa. Ua haapao mai hoi ratou ia tatou e hia rahiraa matahiti, e i te tahi taime ma te rave i te tahi mau haapaeraa rarahi. Eaha ˈtura hoi ta tatou e nehenehe e rave i teie nei ei haapapuraa ˈtu ia ratou i to tatou aau mehara?
18 E tia ia tatou ia haamanaˈo i teie faaueraa a te Atua e na ô ra e: “E faatura ˈtu i to metua tane e to metua vahine.” (Mataio 19:19). Eita e ore e mea rahi roa ta tatou ohipa, ia papu râ ia tatou e mea faufaa roa na to tatou mau metua ia ite i te tahi mau parau apî no nia ia tatou e ia haerehia ˈtu ratou e farerei.
19 I roto i te roaraa o te mau matahiti, e nehenehe tatou e ‘faahanahana’ ia ratou na roto i te tahi atu mau ravea. Mai te peu e hinaaro ratou i te tahi tauturu materia, a faaite atu ia ratou i to outou mauruuru no te mau mea atoa ta ratou i rave no outou, e a haapao i te mau faaueraa tano mau a Iehova. Teie ta te aposetolo Paulo i papai no nia i te mau taata tei ruhiruhia: “E ite maitai atu i te mau vahine ivi, i te ivi mau ra. O te vahine ivi râ e tamarii ta ˈna e te mootua, e rave na ratou i te paieti i te faaamuraa i to ratou iho fetii, a tahoo ai i te mau metua ra: e mea maitai hoi te reira e te au i te aro o te Atua ra.” — Timoteo 1, 5:3, 4.
20, 21. a) Ia au i te Mataio 15:1-6, eaha ˈtu â te auraa o te parau ra, faatura i to ˈna mau metua? b) Te vai ra anei te hoê ohipa taa ê e faatia i te hoê taata ia ore e faatura i to ˈna mau metua mai te reira te huru?
20 Te faaite papu maira te mau Papai e te hoê ravea no te ‘faahanahana’ i to ˈna mau metua, te tautururaa ˈtu ïa ia ratou i te pae materia. I te hoê mahana, ua haere maira te mau Pharisea ia Iesu ra e ua faahapa aˈera hoi i ta ˈna mau pǐpǐ i te ore e faatura i te tahi mau parau tutuu. Ua pahono atura Iesu ia ratou e: “Eaha hoi outou iho na i faahapa ˈi i te ture a te Atua i ta outou na tutuu?” — Mataio 15:1-6.
21 Ia au i te tahi parau tutuu, te taata e parau e ta ˈna moni aore ra ta ˈna mau taoˈa “[e ǒ ïa tei pûpûhia ˈtu na te Atua]”, ua matara mai ïa oia i te hopoia ra oia hoi te aupururaa i to ˈna mau metua. Aita râ o Iesu i farii i taua parau tutuu na ratou ra, e tatou, i teie nei tau, e tia ia tatou ia feruri maitai i ta ˈna mau parau. Parau mau, i roto e rave rahi mau fenua, ua rave te Hau i te tahi mau faanahoraa i te pae totiare no te tauturu i te mau taata paari. Teie râ, e navai anei taua mau faanahoraa ra? Mai te peu e e ere mai te reira te huru aore ra aita e tauturu i te pae totiare, e faaitoito ïa te mau tamarii e faahanahana ra i to ratou mau metua ia horoa i te mea ta ratou paha e hinaaro ra. Te aupururaa i to ˈna mau metua tei ruhiruhia e te hinaaro mau ra ia tauturuhia ratou, ua riro ïa mai ta te aposetolo Paulo e parau ra, ei ohipa “paieti”, ei ohipa paieti i mua i te aro o te Atua ra o Iehova iho, te Tumu no te utuafare fetii.
22. Hau atu â i te tauturu materia, eaha te tia ia tatou ia horoa na to tatou mau metua?
22 Teie râ, eita roa e tia ia tatou ia manaˈo e no te mea aita to tatou mau metua tei ruhiruhia e erehia ra i te tahi mea i te pae no te maa, te ahu e te nohoraa, aita ˈtura ïa ta tatou ohipa e rave no ratou. E mau hinaaro atoa to ratou i te pae no te here e i te pae varua. Te titau nei ratou, e mea pinepine ma te hinaaro uˈana hoi, e ia herehia mai ratou e ia tamǎrûhia mai ratou. I roto i te taatoaraa o to tatou oraraa nei, mea hinaaro mau na tatou ia ite e te here maira te hoê taata ia tatou, e fatu to tatou, e ere hoi o tatou anaˈe. Eiaha roa ˈtu ia moehia i te mau tamarii i te mau hinaaro i te pae tino e i te pae no te here o to ratou mau metua tei ruhiruhia. “O tei eiâ i ta te metua tane ra, e tei tiahi ê i te metua vahine, e tamaiti faatupu ïa i te haama e te faaino.” — Maseli 19:26.
23. Nafea te hoê tamarii e nehenehe ai e riro ei tumu oaoaraa no to ˈna mau metua?
23 Mai to ratou mai â apîraa ra e i roto i te roaraa o to ratou oraraa ia paari ratou, e tuhaa rahi roa te mau tamarii i roto i te oraraa o to ratou mau metua. Tera râ, e rave rahi tei riro ei tumu no te peapearaa e no te mauiui. Ia faatura râ outou i to outou mau metua, ia faaroo atu outou i ta ratou mau aˈo, ia here mau outou ia ratou, e nehenehe outou e riro no ratou ei tumu oaoaraa no te mau mahana atoa. Oia mau, “e oaoa to metua tane e to metua vahine atoa; to metua vahine tei fanau ia oe ra, e oaoa ïa”! — Maseli 23:25.
[Uiraa haapiiraa]
