E te mau taeae e tuahine here e:

I te senekele hitu hou te Mesia, ua ite te peropheta Ezekiela i te hoê orama faahiahia mau. Ua ite orama oia i te hoê pereoo iti rahi i te ra‘i tei faahorohia e te Arii hau ê o te ao nui. E mea faahiahia ’tu â te huru tereraa a taua pereoo ra, mai te uira ra hoi to ’na faito tere. E ia tipuu oia, aita te reira e haamǎrû aore ra e tioi noa ’‘e!—Ezk. 1:4, 9, 12, 14, 16-27.

Te haamana‘o mai ra teie orama e e tere noa te tuhaa i te ra‘i o te faanahonahoraa a Iehova. Tera atoa anei no te tuhaa o taua faanahonahoraa ra i nia i te fenua? Ua ite-papu-hia i te matahiti taviniraa i mairi mai nei e te aratai atoa ra Iehova i to ’na nunaa faanahohia i nia i te fenua i te hoê â faito tere!

I te Hau amui no Marite nei, e mea rahi te ohipa a te mau mero o te utuafare o te Betela o te taui nei i te nohoraa. Ua faarue ratou ia Brooklyn, e te haere ra ratou i te pu rahi apî i Warwick, i New York. I te tahi atu mau amaa na te ao nei, e mea rahi atoa te ohipa: te paturaa, te hamaniraa i te hoho‘a fare e au, te tataîraa aore ra te tauiraa i te vahi. E oe? Noa ’tu aita oe i rohirohi mai te reira i te pae tino, e tuhaa atoa râ ta oe i rave.

Ua putapû roa e ua itoitohia te Tino aratai i te iteraa e te rohi mau nei te nunaa o te Atua na te ao atoa nei a tamau noa ’i i te pee i te faito tere o te faanahonahoraa a Iehova. E rave rahi tei faarue i to ratou nohoraa no te tavini i te vahi e hinaarohia ’i te tauturu. Ua imi vetahi atu i te ravea no te tavini hau atu â, mai te haapiiraa i te hoê reo apî no te pororaa. Ua tamata vetahi atu i te hoê huru taviniraa apî ta ratou i ore i matau maitai. E rave rahi â tei ite mai i te tahi atu mau ravea no te tavini hau atu â. O te mau Kerisetiano taiva ore atoa, oia atoa te ruhiruhia e tei paruparuhia i te ma‘i, te horo nei i te hororaa no te ora, a haere noa ’i ratou i mua i te taviniraa a Iehova e a apiti atoa ’i ratou i te haapapu e e haavare o Satani!—Kor. 1, 9:24.

Ia papu ia oe e ua tapao Iehova i to oe huru feruriraa (Heb. 6:10) Te haamana‘o ra matou ia Aberahama raua o Sara no to oe itoito rahi i roto i te taviniraa. Hau atu i te 70 matahiti to Aberahama i te faarueraa oia i te oire Kaladaio ra o Ura e te aratairaa i to ’na utuafare i te fenua atea ra o Kanaana, i reira oia e puhapa ’i i roto i te fare ie e pohe noa ’tu oia hoê hanere matahiti tiahapa i muri a‘e. E huru feruriraa aau tae mau ta raua ta ’na vahine here i faaite!—Gen. 11:31; Ohi. 7:2, 3.

Hoê â anei huru feruriraa to oe? Te rave nei outou paatoa e faaoromai tamau ra ma te taiva ore i teie anotau fifi nei i ta Iesu i faaue ia  tatou, ia ’na hoi i parau: “A haere ïa e faariro i te taata o te mau nunaa atoa ei pǐpǐ na ’u ma te bapetizo ia ratou i te i‘oa o te Metua e o te Tamaiti e o te varua mo‘a.”—Mat. 28:19.

Ia Iesu i faahiti i te parau “haere,” te na ô mai ra oia e ia rohi e ia vai itoito noa tatou. E mea oaoa roa ia ite i ta te feia e pee ra i te Mesia i rave ma te itoito rahi i teie matahiti i mairi mai nei! Te ite-papu-hia ra te rima puai o Iehova i te haamaitairaa i te ohipa pororaa i te parau apî oaoa a te Faatereraa arii i te mau nunaa atoa.—Mar. 13:10.

E rave rahi taata te farii nei i teie poroi. Ua raea roa te faito numera o te taata poro i te matahiti i mairi mai nei i te 8 340 847, e to te mau haapiiraa Bibilia i te 10 115 264 i te ava‘e hoê. Papu maitai, te tere nei te pereoo i te ra‘i, e te na reira atoa ra oe! A tamau â i te rave i ta outou ohipa maitai i teie tau poto e toe ra hou Iehova a tapiri ai i te uputa o te ora.

Ua tano roa ïa ta tatou irava no te matahiti 2017: “Tiaturi ia Iehova, a rave ai i te . . . maitai.” (Sal. 37:3) Ia haapao oe i teie mau parau, a rave ai i te maitai ma te apiti i te taviniraa mo‘a a Iehova, te tiaturi ra ïa oe ia ’na. A haamana‘o noa na e ere o oe ana‘e. E parau mau râ ta Iesu i te na ôraa e: “Tei pihai iho vau ia outou i te mau mahana atoa e tae noa ’tu i te anotau hopea o te faanahoraa o te ao nei.”—Mat. 28:20.

Ia papu ia oe e e haamaitai noa Iehova i ta oe taviniraa taiva ore. Mea iti anei ta oe e rave ra aore ra e mea rahi, te mea faufaa no Iehova, ia horoa ïa oe i te mea maitai roa ’‘e ma te aau tae. E oaoa na to ’na aau e e roaa ia oe to ’na farii maitai no ta oe mau ô atoa mai teie te huru. (Kor. 2, 9:6, 7) A tamau ïa i te haafatata ’tu i to outou Metua here a pure ai ia ’na ma te tuutuu ore, a haapii ai i te Parau a te Atua, a haere ai i te mau putuputuraa Kerisetiano e a apiti ai i te taviniraa ma te itoito.

A hope ai te “taime poto” e toe ra i te Diabolo, e imi noa teie orure hau ino i te mau ravea atoa no te faataupupu i ta tatou hororaa, oia hoi to tatou taiva ore ia Iehova. (Apo. 12:12) Ia vai piri noa outou ia Iehova, eita ïa e manuïa ta te Diabolo ra mau ravea (Sal. 16:8) Ia ite outou e e here rahi to matou ia outou e te mauruuru nei matou i ta outou tauturu no te haapao i te mau ohipa a te Faatereraa arii a te Fatu i teie mau mahana hopea nei.

To outou mau taeae,

Tino aratai a te mau Ite no Iehova