Pene 12

“A mau papu i tei noaa ia oe na”

PHILADELEPHIA

1. Te faatae ra Iesu i te ono o ta ˈna poroi i te amuiraa no teihea oire, e eaha te auraa te iˈoa no teie oire?

 TE AROHA TAEAE—auê ïa huru hinaaro-rahi-hia e! Mea papu e o te reira te manaˈo o Iesu i to ˈna faataeraa ˈtu i ta ˈna poroi, te ono o te poroi, i te amuiraa no Philadelephia, no te mea teie te auraa o te reira iˈoa “aroha taeae.” Te haamanaˈo noa ra o Ioane, e taata paari oia i teie nei, e ua hau atu i te ono ahuru matahiti mahemo to Petero haapapuraa e toru taime e e aroha rahi to ˈna ia Iesu to ˈna Fatu. (Ioane 21:15-17) E te mau kerisetiano no Philadelephia, e aroha taeae anei to ratou? Ia hiˈo-anaˈe-hia, e.

2. Eaha ïa te huru o te oire o Philadelephia, eaha te huru o te amuiraa e vai ra i reira, e eaha ta Iesu i parau i te melahi o teie amuiraa?

² I te atearaa e 50 kilometera i te pae apatoa hitia o te râ no Saradi (i te vahi i tiahia te oire apî no Turetia, o Alasehir), e oire ruperupe mau  o Philadelephia i te tau o Ioane. Te mea faahiahia roa ˈtu â râ, o te huru ruperupe ïa o te amuiraa kerisetiano e vai ra i reira. Auê ïa te oaoa o teie mau kerisetiano o te farii popou mai i teie tavini o te haere maira i ǒ ratou, peneiaˈe mea na Saradi mai oia! Te vai ra i roto i teie poroi te hoê aˈoraa faaitoito mau no ratou. Tera râ, te haamata ra oia na roto i te faahaamanaˈoraa i te mana o te Taata tuiroo e hapono ra i te reira. Oia mau, te omua ra teie poroi i te na ôraa e: “E papai oe i te parau i te melahi a te ekalesia i Philadelephia ra; Te na ô maira tei moˈa ra, na ˈna te parau mau ra, o tei mau i te taviri a Davida ra, o tei iriti, e aore roa e taata e opani, e o tei opani hoi, e aore roa e taata e iriti.”—Apokalupo 3:7.

3. No te aha e tia ia parauhia e e mea “moˈa” Iesu, e mea nafea tatou e nehenehe ai e parau e e mea “mau” oia?

³ Ua faaroo hoi Ioane i to Petero parauraa ˈtu i te taata ra ia Iesu Mesia e: “Tei ia oe hoi te parau o te ora mure ore ra. Ua faaroo aˈenei hoi matou, e ua ite hoi matou e, o oe te Mesia, te Tamaiti a te Atua ora ra [tei Moˈa a te Atua ra].” (Ioane 6:68, 69) E mea moˈa mau te Atua ra o Iehova, e mea “moˈa” atoa hoi ta ˈna Tamaiti otahi. (Apokalupo 4:8) E mea “mau” atoa o Iesu. Te parau heleni i faaohipahia ra i ǒ nei (a·le·thi·nosʹ) to ˈna auraa mea mau ïa. I roto i teie huru auraa, ua riro Iesu ei maramarama mau e ei pane mau no nia mai i te raˈi ra. (Ioane 1:9; 6:32) O oia atoa te vine mau. (Ioane 15:1) E mea mau atoa o Iesu i te mea e e nehenehe e tiaturi ia ˈna. E parau noa o ˈna i te parau mau. (Hiˈo Ioane 8:14, 17, 26.) E mea tia mau i taua Tamaiti a te Atua ra ia tavini ei Arii e ei Haava.—Apokalupo 19:11, 16.

“Te taviri a Davida”

4, 5. Ua taaihia “te taviri a Davida” i teihea faufaa?

⁴ Tei ia Iesu ra “te taviri a Davida.” E na roto i te faaohiparaa i te reira, e “iriti [oia], e aore roa e taata e opani”; e e “opani hoi [oia], e aore roa e taata e iriti.” Eaha mau na ïa taua “taviri a Davida” ra?

⁵ Ua faaau o Iehova i te hoê faufaa no te hoê basileia mure ore i te arii no Iseraela ra o Davida. (Salamo 89:1-4, 34-37) Ua arii te utuafare o Davida i nia i te terono o Iehova i Ierusalema mai te matahiti 1070 e tae atu i te matahiti 607 hou to tatou nei tau, e i muri iho, ua faatae Iehova i ta ˈna haavaraa i nia i teie basileia no te mea ua rave oia i te ohipa ino. No reira, ua haamata ihora Iehova i te faatupu i ta ˈna parau tohu tei papaihia i roto i te Ezekiela 21:27, i reira tatou e taio ai: “Na ˈu e ruri ê, e ua ruri hoi, e ua ruri i te reira [Ierusalema i nia i te fenua nei], e ore roa aˈera [te sepeta arii a Davida], e ia tae mai oia ra te Fatu mau ra; e na ˈu e horoa ˈtu no ˈna.”

6, 7. Afea e mea nafea te iteraahia mai “te fatu mau ra”?

⁶ A nafea e mea nafea te taeraa mai “te Fatu mau ra”? E mea nafea te sepeta a Davida i te horoaraahia ˈtu no ˈna?

⁷ Tau 600 matahiti i muri iho, ua hapû te hoê huaai a te arii a Davida, te hoê potii ati iuda o Maria te iˈoa, na roto i te arai o te varua moˈa. Ua tono ihora te Atua i ta ˈna melahi ia Gaberiela no te faaite ia Maria e e fanau oia i te hoê tamaiti e o Iesu te iˈoa. Ua na ô faahou aˈera Gaberiela e: “E rahi oia, e e parauhia i te Tamaiti na te Teitei: e na te Fatu ra na te Atua e horoa mai i te terono o to ˈna ra metua o Davida no ˈna: ei ia ˈna te hau i te fetii o Iakoba e a muri noa ˈtu; e e ore roa to ˈna basileia e mure.”—Luka 1:31-33.

8. Mea nafea Iesu i te faaiteraa e e tiaraa to ˈna no te fatu mai i te basileia o Davida?

⁸ I te matahiti 29 no to tatou nei tau i to Iesu bapetizoraahia i roto i Ioridana e faatavairaahia e te varua moˈa, riro maira oia ei Arii maitihia no te opu fetii o Davida. Ua faaite oia i te hoê hiˈoraa itoito maitai i roto i te pororaa i te parau apî oaoa o te Basileia e ua faaue ihora i ta ˈna mau pǐpǐ ia poro atoa ratou. (Mataio 4:23; 10:7, 11) Ua faahaehaa ihora Iesu ia ˈna iho, e tae roa ˈtura i te pohe i nia i te hoê pou haamauiuiraa, ei haapapuraa e e nehenehe mau oia e fatu i te basileia o Davida. Ua faatia faahou mai Iehova ia Iesu ei varua pohe ore e ua faateitei  ihora ia ˈna i to ˈna ra pae atau i nia i te mau raˈi. I reira, ua fatu ihora oia i te mau tiaraa taatoa tei taaihia i nia i te basileia o Davida. I te tau tapaohia, ua faaohipa ihora Iesu i to ˈna tiaraa no te ‘faariroraa i [to ˈna] mau enemi ei taahiraa avae no ˈna.’—Salamo 110:1, 2; Philipi 2:8, 9; Hebera 10:13, 14.

9. Mea nafea Iesu i te faaohiparaa i te taviri a Davida no te iriti e no te opani?

⁹ I teie nei râ, e faaohipa Iesu i te taviri a Davida, i te mea e e nehenehe oia e iriti i te eˈa no te horoaraa i te mau ravea e te mau haamaitairaa taa ê no nia i te Basileia o te Atua. Na roto i te arai o Iesu, i teie nei, e nehenehe Iehova e faaora i te mau kerisetiano faatavaihia e vai ra i nia i te fenua nei i “te varua mana o te pouri,” e ua tahiti ê mai ia ratou “i roto i te basileia o ta ˈna Tamaiti here ra.” (Kolosa 1:13, 14) E faaohipa-atoa-hia te taviri no te opani-etaeta-raa i te feia taiva eiaha roa ratou ia fanaˈo i teie mau huru haamaitairaa taa ê. (Timoteo 2, 2:12, 13) I te mea e te turu ra Iehova i te fatu mau ra o te basileia o Davida, eita roa ˈtu te hoê noa ˈˈe mea poietehia e nehenehe e haafifi ia ˈna no te amoraa i teie mau hopoia.—Hiˈo Mataio 28:18-20.

10. Eaha te mau faaitoitoraa ta Iesu i horoa ˈtu no te amuiraa no Philadelephia?

¹⁰ I te mea e e no ǒ mai te reira i te hoê pû mana mau, ua tamahanahana mau ïa te mau parau a Iesu i te mau kerisetiano no Philadelephia! Ua haapopou Iesu ia ratou i te na ôraa e: “Ua ite au i ta oe ohipa: inaha, ua tuu atu na vau i te uputa atea i mua ia oe na, e aore roa e taata e tia ˈi ia opani: no te mea, e maa puai iti haihai to oe, e ua tapea tamau â oe i ta ˈu parau, e aore aˈenei i huna i to ˈu nei iˈoa.” (Apokalupo 3:8) E amuiraa oraora maitai teie e ua iritihia te hoê uputa i mua ia ˈna—mea papu e o te uputa no te taviniraa. (Hiˈo Korinetia 1, 16:9; Korinetia 2, 2:12.) No reira, ua faaitoito ihora Iesu i te amuiraa ia haafaufaa rahi roa ˈtu â i te ravea e vai ra ia ˈna ra no te poro. Ua faaoromai oia e ua faaite oia e e maa puai iti te vai ra ia ˈna ra, na roto i te arai o te varua o te Atua, no te tamauraa i te faatupu i te mau “ohipa” i roto i te taviniraa ia Iehova. (Korinetia 2, 12:10; Zekaria 4:6) Ua auraro oia i te mau faaueraa a Iesu e aita i huna i te Mesia, na roto i te mau parau e aore ra te mau ohipa.

“Tipapa ihora oia i raro”

11. Eaha te haamaitairaa ta Iesu i tǎpǔ atu no te mau kerisetiano, e mea nafea te reira i te tupuraa?

¹¹ No reira, ua tǎpǔ ihora Iesu e e noaa ia ratou te hotu: “Inaha, e riro to te sunago o Satani, o tei parau e e ati Iuda ratou, e e ere, e haavare râ; inaha, e riro ratou i te haere roa mai e tahopu i to avae, e e ite ratou e ua herehia oe e au.” (Apokalupo 3:9) Mai te amuiraa no Semurina, ua farerei paha to Philadelephia i te mau fifi no ǒ mai i te mau ati Iuda o taua vahi ra. Ua parau Iesu e e “sunago [ratou] o Satani.” Noa ˈtu te reira, te vai ra te tahi i rotopu i teie mau ati Iuda o tei ore i haamarirau i te ite e e te mau mea o ta te mau kerisetiano i poro no nia ia Iesu e parau mau ïa. E peneiaˈe na te reira e aratai ia ratou ia “tahopu” ia au i te faataaraa tei papaihia e Paulo i roto i te Korinetia 1, 14:24, 25, e no reira ratou i tatarahapa mau ai e i riro mai ai ei kerisetiano, ma te ite-papu-raa i te here rahi o Iesu no ta ˈna ra mau pǐpǐ e ua tae roa ˈi oia i te horoa i to ˈna iho ora no ratou.—Ioane 15:12, 13.

12. No te aha, te mau melo no te sunago ati iuda no Philadelephia e maere mau ai i te iteraa e e tia i te vetahi i rotopu ia ratou, ‘ia tipapa’ i mua i te pǔpǔ kerisetiano no taua vahi ra?

¹² Eita e ore te mau melo no te sunago ati iuda no Philadelephia i te maere i te iteraa e e tia i te vetahi i rotopu ia ratou i te “tahopu” i mua i te pǔpǔ kerisetiano no teie oire. Mea papu e e rave rahi te taata e ere i te ati Iuda i roto i te amuiraa, e no reira te mau ati Iuda i manaˈo ai e ohipa taa ê te tupu mai. No te aha? No te mea ua tohu Isaia e: “E te mau arii [e ere i te ati iuda] e riro ei metua faaamu no oe [te nunaa Iseraela], e ta ratou mau vahine ei metua vahine faaamu na oe; e piˈo ratou i raro ia oe, ei raro roa i te repo ra.” (Isaia 49:23; 45:14; 60:14) E ia au i te hoê â manaˈo, ua papai Zekaria i raro aˈe i te aratairaa a te Atua e: “Ia tae i taua mau mahana ra, e haru mai ai na taata tino ahuru [e ere i te ati iuda] no roto i te mau parau atoa o te mau fenua ra, i te hiti ahu o te hoê ati Iuda ta ratou e haru, a na ô atu ai, E haere atoa matou i ǒ na: ite aˈenei matou e, tei ia outou te Atua.” (Zekaria 8:23) No reira, o te mau taata ïa e ere i te ati Iuda te tia ia tipapa i mua i te mau ati Iuda, eiaha râ te mau ati Iuda iho!

13. O vai ma te mau ati Iuda o tei faatupu i te mau parau tohu tei faaitehia ˈtu ia Iseraela i tahito ra?

 ¹³ Ua faataehia teie mau parau tohu i te nunaa maitihia a te Atua. I te taime a parauhia ˈi te reira, no Iseraela ïa i te pae tino teie tiaraa faahiahia. Area râ i to te nunaa ati iuda faarueraa i te Mesia, i reira Iehova i te faarue-atoa-raa ia ˈna. (Mataio 15:3-9; 21:42, 43; Luka 12:32; Ioane 1:10, 11) I te Penetekose no te matahiti 33 no to tatou nei tau, ua maiti ihora oia i te Iseraela mau a te Atua, te amuiraa kerisetiano no te mono atu ia ˈna. E mau ati Iuda i te pae varua ïa to ratou mau melo e ua peritome-mau-hia ratou, to ratou iho â mafatu. (Ohipa 2:1-4, 41, 42; Roma 2:28, 29; Galatia 6:16) I muri aˈe i te reira, te ravea hoê roa no te hoê ati Iuda i te pae tino, ia faatupu faahou oia i te mau taairaa taa ê e o Iehova o te faaohiparaa ïa i te faaroo ia Iesu, te Mesia. (Mataio 23:37-39) E au ra e e o te reira ta te vetahi mau ati Iuda no Philadelephia i ineine i te rave. *

14. Eaha te tupuraa rahi o ta Isaia 49:23 e ta Zekaria 8:23 tei itehia i teie nei tau?

¹⁴ I to tatou nei tau, e tupuraa faufaa rahi mau to te mau parau tohu e vai ra i roto i te Isaia 49:23 e te Zekaria 8:23. Na roto i te pororaa a te pǔpǔ a Ioane, ua tomo mai e rave rahi mau taata na roto i te uputa matara o te taviniraa i te Basileia. * Te rahiraa i rotopu ia ratou no roto mai ïa i te amuiraa faaroo kerisetiano, mau haapaoraa o te faahua parau ra, ma te haavare hoi, e o ratou te Iseraela i te pae varua. (Hiˈo Roma 9:6.) Taua mau taata ra, e feia rahi roa ïa, e ua horoi ratou i to ratou ahu e ua teatea na roto i te faaohiparaa i te faaroo i roto i te toto tusia o Iesu. (Apokalupo 7:9, 10, 14) I to ratou auraroraa i te faatereraa arii a te Mesia, te tiaturi nei ïa ratou e e noaa ia ratou te mau haamaitairaa i nia i te fenua nei. Te haere ra ratou e ‘te tipapa ra ratou’ i mua i te mau taeae faatavaihia o Iesu, e auraa parau te reira i te pae varua, no te mea ua faaroo ratou e ‘tei roto mau â te Atua ia ratou.’ E te tavini ra ratou i teie mau taata faatavaihia e ua tahoê ratou paatoa no te faatupuraa i te hoê amuiraa autaeae i te ao nei.—Mataio 25:34-40; Petero 1, 5:9.

“Taua hora ati [tamataraa] ra”

15. (a) Eaha ta Iesu i tǎpǔ atu i te mau kerisetiano no Philadelephia e ua faaitoitohia ratou ia rave i te aha? (b) Eaha te “korona” ta te mau kerisetiano e tiai ra?

¹⁵ Te na ô faahou maira Iesu e: “No te mea ua mau papu oe i te parau faaoromai na ˈu ra, e mau atoa vau ia oe ia ora oe i taua hora ati [tamataraa] e tupu i te taata atoa ra, ei tamataraa i te feia e parahi i te fenua nei. Inaha, te haere oioi atu nei au; a mau papu i tei noaa ia oe na, eiaha to oe korona ia riro ia vetahi ê.” (Apokalupo 3:10, 11) Parau mau, eita te mau kerisetiano no te tau o Ioane e vai ora noa e tae noa ˈtu i te mahana o te Fatu ra (tei haamata i te matahiti 1914 ra), area râ, to ratou tiaturiraa i roto i te haereraa mai o Iesu, ua horoa ïa te reira i te itoito e titauhia ia tamau noa ratou i te poro. (Apokalupo 1:10; Timoteo 2, 4:2) Te tiai maira te “korona” e aore ra te utua no te ora mure ore ia ratou i nia i te mau raˈi. (Iakobo 1:12; Apokalupo 11:18) Ia tapea maite râ ratou e tae noa ˈtu i to ratou poheraa, e ore roa ïa te hoê noa ˈˈe  taata e faaere ia ratou i taua utua ra.—Apokalupo 2:10.

16, 17. (a) Eaha “taua hora ati [tamataraa] ra e tae mai i nia i te taata atoa o te fenua nei”? (b) Tei roto ïa te mau kerisetiano faatavaihia i teihea tupuraa i te haamataraa mai “taua hora ati [tamataraa] ra”?

¹⁶ Eaha ïa “taua hora ati [tamataraa] ra”? Mea papu e e farerei faahou te mau kerisetiano no Asia i te hoê hamani-ino-raa apî uˈana no ǒ mai i te hau emepera roma. * Tera râ, te tupuraa rahi, o te hora titiaraa e te haavaraa ïa o tei tupu i te mahana o te Fatu ra, e o tei itehia to ˈna tupuraa rahi mai te matahiti 1918 maira. Na te tamataraa e faaite e te turu ra anei te hoê taata i te Basileia o te Atua o tei haamauhia e aore ra te turu ra anei oia i te ao a Satani. To ˈna roaraa, hoê anaˈe iho ïa “hora,” te hoê tau poto mau, aita râ i hope atura. E tae noa ˈtu i to ˈna hopea, eiaha ia moehia ia tatou e e te ora ra tatou i “taua hora ati [tamataraa] ra.”—Luka 21:34-36.

¹⁷ Ia au i te hiˈoraa o te amuiraa haapao maitai no Philadelephia, i te matahiti 1918 ua faaruru atoa te mau kerisetiano faatavaihia no te pǔpǔ a Ioane i te patoiraa no roto mai i te “sunago o Satani” no to tatou nei â tau. Te mau raatira haapaoraa no te amuiraa faaroo kerisetiano e parau ra e e ati Iuda ratou i te pae varua, ua turai huna ratou i te mau raatira faatere no te faaoreraa i te mau kerisetiano mau. Area râ, ua faaitoito uˈana teie mau kerisetiano ia ‘mau papu ratou i te parau faaoromai a Iesu’; e no reira, na roto i te hoê tauturu i te pae varua, “maa puai iti haihai” faufaa mau, ua ora mai ratou e ua turaihia ratou ia haere na roto i teie uputa matara e vai ra i mua ia ratou. Mea nafea ïa te reira?

 “Te uputa atea [matara]”

18. Eaha te nominoraa ta Iesu i rave i te matahiti 1919 ra, e mea nafea te feia tei nominohia i riro mai ai mai te tavini haapao maitai a Ezekia?

¹⁸ I te matahiti 1919 ra, ua faatupu Iesu i ta ˈna tǎpǔ e ua faariro i teie pǔpǔ iti o te mau kerisetiano mau faatavaihia ei “tavini haapao maitai e te paari” no ˈna. (Mataio 24:45-47) Ua noaa ia ratou te hoê haamaitairaa taa ê mai te tavini haapao maitai o Eliakima i te mau mahana o te arii ra o Ezekia. * Teie ta Iehova i parau no nia ia Eliakima: “E na ˈu e tuu i te taviri o te utuafare o Davida i nia i tana tapono, e na ˈna e iriti, e e ore e opanihia, e na ˈna e opani, e e ore roa e iritihia.” E mau hopoia teimaha mau ta Eliakima e amo ra no Ezekia, te tamarii arii a Davida. Oia atoa i teie nei mahana, ua tuuhia i nia i te tapono o te pǔpǔ faatavaihia a Ioane “te taviri o te utuafare o Davida,” teie ïa te auraa, ua pûpûhia na ˈna te mau faufaa o te Basileia mesia i te fenua nei. Ua faaitoito Iehova i ta ˈna mau tavini ia nehenehe ratou e rave i taua ohipa ra, ma te faariroraa i to ratou puai iti ei itoito uˈana ia nehenehe ratou e horoa i te hoê faaiteraa i te ao taatoa nei.—Isaia 22:20, 22; 40:29.

19. Mea nafea te pǔpǔ a Ioane i te amoraa i te mau hopoia ta Iesu i horoa ˈtu na ratou i te matahiti 1919 ra, e eaha tei itehia mai?

¹⁹ Ma te apeeraa i te hiˈoraa o Iesu, mai te matahiti 1919 mai â, ua tutava te toea faatavaihia ia parare te pororaa i te parau apî oaoa o te Basileia. (Mataio 4:17; Roma 10:18) Ei faahopearaa, ua haere mai te vetahi no rotopu i te sunago o Satani no to tatou nei tau, te amuiraa faaroo kerisetiano, i pihai iho i teie tavini faatavaihia, ua tatarahapa e ua ‘tipapa’  ratou i mua ia ˈna, ma te fariiraa i te mana faatere o teie tavini. Ua haere atoa mai ratou no te tavini ia Iehova ma te tahoê atu i te mau melo paari aˈe no te pǔpǔ a Ioane. Ua na reira noa ïa ratou e tae noa ˈtu i te taime e naeahia te numera taatoa o te mau taeae faatavaihia a Iesu. E ua haere maira i muri iho te “feia rahi roa . . . no . . . te mau nunaa atoa” e ‘ua tipapa’ ihora i mua i te tavini faatavaihia. (Apokalupo 7:3, 4, 9) Te ohipa amui ra teie tavini e te feia rahi roa mai te hoê anaˈe iho nǎnǎ Ite o Iehova.

20. No te aha e tia i te mau Ite o Iehova i teie nei mahana ia faaite i te hoê faaroo itoito e ia itoito atoa ratou i roto i te taviniraa i te Atua?

²⁰ Tahoêhia e te hoê aroha taeae mau mai te mau kerisetiano no Philadelephia, ua taa i te mau Ite o Iehova no teie mahana e ohipa rû te pororaa. Ua fatata te ao ino o Satani i te hope na roto i te ati rahi. No reira, ia itehia mai tatou ma to tatou faaroo itoito e ia itoito atoa tatou i roto i te taviniraa i te Atua, eiaha to tatou iˈoa ia paraihia i roto i te buka ora a Iehova! (Apokalupo 7:14) Ia haapao maitai ïa tatou i te faaararaa ta Iesu i faatae atu i te amuiraa no Philadelephia, ia nehenehe tatou e tapea maite i ta tatou mau haamaitairaa taa ê i roto i te taviniraa e ia noaa ia tatou te utua o te ora mure ore.

Te mau haamaitairaa no te feia tei noaa ia ratou te re

21. Mea nafea te mau kerisetiano faatavaihia i teie nei mahana i ‘mau papu i te parau faaoromai o Iesu,’ e eaha tei mua ia ratou?

²¹ I teie nei mahana, ‘ua mau papu’ te pǔpǔ a Ioane ‘i te parau faaoromai a Iesu’; i te mea e ua pee ratou i to ˈna hiˈoraa e ua faaoromai ratou. (Hebera 12:2, 3; Petero 1, 2:21) E ua faaitoito-rahi-hia ratou i teie mau parau a Iesu i te amuiraa i Philadelephia e: “O te riro ia ˈna te re ra, e faariro vau ia ˈna ei pou i roto i te hiero o tau Atua, e e ore oia e haere faahou i rapae.”—Apokalupo 3:12a.

22. (a) Eaha te hiero o te Atua o Iesu? (b) Mea nafea te mau kerisetiano faatavaihia tei noaa ia ratou te re e riro ai ei mau pou i roto i teie hiero?

²² Auê ïa haamaitairaa taa ê e ia riro mai ratou ei pou i roto i te hiero o Iehova! I Ierusalema i tahito ra, ua riro te hiero ei pû no te haamoriraa ia Iehova. E pûpû te tahuˈa rahi, hoê taime i te matahiti, i te toto tusia o te mau animala i roto i te hiero i mua i te maramarama semeio tei riro ei taipe i te mea e tei reira Iehova “i te vahi Moˈa Roa.” (Hebera 9:1-7) I to Iesu bapetizoraahia, itehia maira te tahi atu hiero, te hiero rahi i te pae varua no te haamoriraa ia Iehova. Tei nia ïa i te mau raˈi te vahi moˈa roa o teie hiero, e i reira, mea tano ia tia Iesu “i mua i te aro o te Atua.” (Hebera 9:24) O Iesu te Tahuˈa Rahi, e ua pûpûhia te hoê anaˈe iho tusia no te faaore-roa-raa i te mau hara: te toto tei maniihia e te taata tia o Iesu. (Hebera 7:26, 27; 9:25-28; 10:1-5, 12-14) Ia haapao maitai noa anaˈe ratou, e tamau noa ïa te mau kerisetiano faatavaihia e vai nei i te fenua nei i te tavini ei tahuˈa tauturu i roto i te mau aua o teie hiero i te fenua nei. (Petero 1, 2:9) Ia noaa râ ia ratou te re, e tomo atoa ïa ratou i roto i te vahi moˈa roa i nia i te raˈi e e riro ratou ei mau turu aueue ore e aore ra ei mau pou i roto i te hiero pûpûhia no te haamoriraa i te Atua. (Hebera 10:19; Apokalupo 20:6) E ‘e ore ratou e haere faahou i rapae.’

23. (a) Eaha te tǎpǔ ta Iesu i parau atu i muri iho i te mau kerisetiano faatavaihia tei noaa ia ratou te re? (b) Eaha ïa te auraa i te mea e, ua papaihia i nia ia ratou te iˈoa o Iehova e te iˈoa o te Ierusalema apî?

 ²³ E te tamau ra Iesu i te parau i te na ôraa e: “E e papai au i te iˈoa o tau Atua i nia iho ia ˈna, e te iˈoa no te oire o tau Atua ra, o Ierusalema apî, no nia mai i te raˈi, no ǒ i tau Atua ra; e o to ˈu iho hoi iˈoa apî.” (Apokalupo 3:12b) Oia mau, ua papaihia te iˈoa o Iehova i nia i te feia tei noaa ia ratou te re—e Atua oia no ratou e e Atua atoa no Iesu. Te haapapu maitai maira te reira e e piti teie na taata taa ê mau o Iehova e o Iesu, e ere râ e piti tuhaa no te hoê Atua Toru tahi. (Ioane 14:28; 20:17) E i te pae hopea, e ite ïa te mau mea atoa tei poietehia e no Iehova teie feia faatavaihia. E o ratou to ˈna mau ite. Ua papai-atoa-hia i nia ia ratou te iˈoa o Ierusalema apî, te oire e vai ra i nia i te raˈi o te pou maira mai nia mai i te raˈi mai te huru e, te faatae ra oia i ta ˈna faatereraa î i te aroha i nia i te huitaata haapao maitai. (Apokalupo 21:9-14) E e ite atoa te mau mamoe kerisetiano e vai ra i nia i te fenua, e teie feia faatavaihia tei noaa ia ratou te re, e melo ïa ratou no te Basileia aore ra Ierusalema i nia i te raˈi.—Salamo 87:5, 6; Mataio 25:33, 34; Philipi 3:20; Hebera 12:22.

24. Eaha te auraa o te iˈoa apî o Iesu, e mea nafea te reira i te papairaahia i nia i te mau kerisetiano haapao maitai faatavaihia?

²⁴ I te pae hopea, e papaihia i nia i te feia faatavaihia te noaa ia ratou te re, te iˈoa apî o Iesu. Teie iˈoa, ua taaihia ïa i nia i te tiaraa apî o Iesu e te mau haamaitairaa taa ê hoê roa o ta Iehova i horoa no ˈna. (Philipi 2:9-11; Apokalupo 19:12) Aore roa e taata ê atu tei ite i teie iˈoa, i te mea e aore e taata ê atu tei farerei i teie huru tupuraa e tei pûpûhia ˈtu no ˈna teie mau huru haamaitairaa taa ê. Area râ, i te taime a papai ai Iesu i to ˈna iˈoa i nia i to ˈna mau taeae haapao maitai, e taaihia ïa ratou ia Iesu na roto i te mau taairaa hohonu roa i nia i te mau raˈi e e apiti atoa ratou i roto i teie mau haamaitairaa taa ê. (Luka 22:29, 30) Eita ïa tatou e maere ia faaoti anaˈe Iesu i teie poroi ta ˈna i faatae i teie feia faatavaihia na roto i te parau-faahou-raa ˈtu i teie faaitoitoraa e: “E tariˈa to ˈna ra, a faaroo oia i ta te [v]arua e parau i te mau ekalesia ra.”—Apokalupo 3:13.

25. Mea nafea te mau kerisetiano taitahi i teie nei mahana e nehenehe ai e faaohipa i te faaueraa tumu e vai ra i roto i te mau aˈoraa ta Iesu i faatae atu i te amuiraa no Philadelephia?

²⁵ Auê ïa faaitoitoraa rahi ta teie poroi i horoa ˈtu no te mau kerisetiano haapao maitai no Philadelephia! E e haapiiraa puai mau atoa teie no te feia o te pǔpǔ a Ioane e ora noa ra i teie mahana, i te mahana o te Fatu ra. Area râ, e mea faufaa atoa te mau ture tumu e vai ra i roto i teie nei poroi no tatou tataitahi, e noa ˈtu e feia faatavaihia e aore ra e mau mamoe ê atu. (Ioane 10:16) E mea tia ïa ia tatou tataitahi ia tamau â i te faahotu i te hotu o te Basileia ia au i te hiˈoraa o teie mau kerisetiano no Philadelephia. E maa puai iti haihai atoa to tatou paatoa. E nehenehe atoa tatou paatoa e rave i te tahi ohipa i roto i te taviniraa ia Iehova. Ia faaohipa ïa tatou i teie puai, e tia ˈi! E no te raveraa i te mau haamaitairaa taa ê rahi atu â no te ohipa o te Basileia, ia haavitiviti ïa tatou i te tomo na roto i te uputa e matara ra i mua ia tatou. E nehenehe atoa e pure ia Iehova ia iriti mai o ˈna i te hoê uputa mai te reira te huru. (Kolosa 4:2, 3) Ia pee ïa tatou i te faaoromai o Iesu e ia tapea maite tatou i to ˈna iˈoa; ia na reira anaˈe tatou, te faaite atoa ra ïa tatou e e tariˈa to tatou no te faaroo i ta te varua moˈa o te Atua e parau ra i te mau amuiraa.

[Nota i raro i te api]

[Uiraa haapiiraa]

[Tumu parau tarenihia i te api 63]

Te tautururaa e rave rahi mau taata ia tipapa ratou i raro

I nia i te mau 144 000 feia faatavaihia tei fatu i te Basileia i nia i te raˈi, e au ra e te toea, te pǔpǔ a Ioane, fatata 9 000 taata, e tia ia ratou ia faahope i ta ratou hororaa i nia i te fenua nei. I roto i te hoê â taime, ua naeahia i te feia rahi roa hau atu i te 3 000 000. (Apokalupo 7:4, 9) Na te aha i faatupu mai i teie maraaraa rahi? Na te mau fare haapiiraa e rave rau tei faaterehia e te mau Ite o Iehova. Taa ê atu i te mau fare monahi o te amuiraa faaroo kerisetiano o te haapii ra i te mau philosopho o te ao nei e o te faaino nei i te Bibilia, area te mau fare haapiiraa a te mau Ite, te haapii ra ratou te hoê faaroo hohonu i te Parau a te Atua. Te faaite ra ratou i te faufaaraa o te Bibilia no te iteraa i te hoê oraraa viivii ore e te morare, e no te taviniraa i te Atua ma te itoito. I roto i te ao taatoa nei e te reira mai te matahiti 1943 mai â, te aratai ra te mau amuiraa taitahi a te mau Ite o Iehova i roto i ta ratou Piha o te Basileia te hoê Haapiiraa teotaratia no te taviniraa. Ua tae noa mai te mau mirioni taata i te mau hebedoma atoa i reira e te apee ra ratou i te hoê porotarama haapiiraa bibilia tahoê maitai.

Mai te matahiti 1959 mai â, te aratai ra te mau Ite o Iehova i te Haapiiraa o te Basileia no te taviniraa no te faaineineraa i te mau matahiapo e te mau tavini tauturu i roto i te mau amuiraa. E mai te matahiti 1977 mai â, ua faaineine ïa te Haapiiraa a te mau pionie hau atu i te 200 000 taeae e tuahine hoê â “huru feruriraa e to Philadelephia,” i te taviniraa ia Iehova i te taime taatoa i roto i te ohipa pororaa. I te matahiti 1987 ra, ua haamauhia te Haapiiraa no te faaineineraa i te taviniraa no te haapii i te mau tane, Ite o Iehova, e no te tono atu ia ratou i roto i te tahi mau taviniraa taa ê e vai ra i roto i te ao nei.

Te mea faahiahia roa ˈˈe i rotopu i te mau haapiiraa atoa tei faaterehia e te mau Ite o Iehova, o te Fare haapiiraa bibilia no Gileada tei haamauhia e te Taiete Watch Tower. Mai te matahiti 1943 mai â, ua horoa teie haapiiraa o te mau mitionare e vai ra i roto i te hau no New York i te mau parau tuite na e piti pǔpǔ feia haapii i te mau matahiti atoa. I te pae hopea, ua faaineine aˈena oia hau atu i te 6 000 tavini no Iehova no te raveraa i te taviniraa mitionare i roto i te mau fenua ěê. Te feia tei noaa ia ratou te parau tuite i roto i teie fare haapiiraa, ua tavini ïa ratou i roto hau atu i te hanere fenua, e i te rahiraa o te taime, na ratou i haamata te ohipa o te Basileia i reira. Ua hau atu i te 40 matahiti i mahemo i teie nei e te itoito noa ra e rave rahi mau mitionare matamua, i te raveraa i te ohipa e te mau mitionare apî no te haaparareraa i te faanahonahoraa a Iehova i roto i te ao nei. Auê ïa tupuraa maere rahi e!

[Tapura i te api 64]

I te matahiti 1919 ra, ua iriti te Arii ra o Iesu i te hoê uputa no te taviniraa kerisetiano. Te hoê rahiraa kerisetiano o te haere noa ˈtura i te rahi e o tei pûpû i to ratou oraraa no te Atua, ua haafaufaa ïa ratou i te reira.

Matahiti Fenua naeahia Mau kerisetiano Feia poro

i te pororaa tei rave i te i te taime

ohipa pororaa * taatoa *

1918 14 3 868 591

1928 32 23 988 1 883

1938 52 47 143 4 112

1948 96 230 532 8 994

1958 175 717 088 23 772

1968 200 1 155 826 63 871

1978 205 2 086 698 115 389

1987 210 3 237 751 436 179

[Nota i raro i te api]

[Tapura i te api 65]

Ua rave te mau Ite o Iehova i teie ohipa ma to ratou mafatu taatoa. A hiˈopoa na, ei hiˈoraa, i te rahiraa hora o ta ratou i horoa i roto i te pororaa e te haapiiraa, e tae noa ˈtu te rahiraa maere mau o te mau haapiiraa bibilia o ta ratou i faatere ma te tamoni ore i roto i te fare o te mau taata.

Matahiti Hora i roto Haapiiraa bibilia

i te pororaa (Numera au noa

(Rahiraa i te matahiti) i te avaˈe hoê)

1918 19 116 Aita i tapaohia

1928 2 866 164 Aita i tapaohia

1938 10 572 086 Aita i tapaohia

1948 49 832 205 130 281

1958 110 390 944 508 320

1968 208 666 762 977 503

1978 307 272 262 1 257 084

1987 739 019 286 3 005 048

[Hohoˈa i te api 59]

Te hoê taviri no Roma no te senekele matamua