Pene 32

E hope te riri o te Atua i te tupu

1. Eaha te ohipa e tupu mai ia ninii-paatoa-hia te mau auˈa e hitu ra, e eaha te mau uiraa e tia ia anihia no nia i teie mau auˈa?

 UA FAAITE aˈena Ioane i te mau melahi e ninii ra i na auˈa e hitu ra. E te parau ra oia e no nia i te mau pohe e roohia i te niniiraahia teie mau auˈa e o “na pohe hopea e hitu ra, e hope hoi te riri o te Atua i te tupu i te reira.” (Apokalupo 15:1; 16:1) E tia ia ninii-taatoa-hia teie mau pohe e faaite ra i te mau utua i faaotihia e Iehova no te ino e vai ra i nia i te fenua nei. I reira ïa e tupu ai te mau haavaraa a te Atua e e mou ai te ao a Satani. Eaha ta te reira e faaite ra no te huitaata nei e no te mau raatira o teie nei amuiraa o te mea iino e vai nei? Eaha ta te mau kerisetiano e nehenehe e rave ia ore ratou ia roohia i taua mau pohe ra i te hoê â taime e teie nei ao o tei faautuahia? E mau uiraa faufaa mau te reira, te tia ia pahonohia. Mea papu e anaanatae roa te feia atoa e tiai ra, ma te faaoromai ore, i te upootiaraa o te parau-tia, i te mau mea o ta Ioane e ite ra i teie nei.

Te riri o Iehova i nia i te “fenua” nei

2. Eaha te ohipa i itehia i te niniiraa te melahi matamua i ta ˈna auˈa i nia i te fenua, e te faataipe ra “te fenua” i te aha?

² Te haamata ra te melahi matamua i ta ˈna ohipa. “Ua haere maira te hoê melahi, ua ninii maira i ta ˈna auˈa i nia iho i te fenua; tupuhia ihora te taata atoa i te fefe ino mauiui, tei tapaohia i te tapao a te puaa ra, e te feia i haamori i to ˈna ra hohoˈa.” (Apokalupo 16:2) Mai te aamu no nia i te oto pu matamua, “te fenua” e faahitihia ra te parau i ǒ nei, e taipe ïa no te faanahonahoraa politita, e ia hiˈo-anaˈe-hia e au ra e e mea aueue ore, e na Satani hoi i haamata i te haamau i nia i te fenua nei i te anotau o Nimeroda, ua hau atu ïa i te 4 000 matahiti i teie nei.—Apokalupo 8:7.

3. (a) Mea nafea e rave rahi mau faatereraa i te titauraa i te hoê auraroraa e au i te hoê haamoriraa te huru? (b) Eaha te faanahonahoraa ta te mau nunaa i rave no te monoraa ˈtu i te Basileia o te Atua, e eaha te tupu mai i nia i te feia e haamori ra ia ˈna?

³ I teie mau mahana hopea nei, te faahepo ra  e rave rahi mau faatereraa i to ratou mau taata te hoê auraroraa e au i te haamoriraa te huru, te onoono ra ratou ia tuuhia ˈtu te Hau i nia ˈˈe i te Atua e aore ra i te tahi noa ˈˈe titauraa. (Timoteo 2, 3:1; hiˈo Luka 20:25; Ioane 19:15.) Mai te matahiti 1914 mai â, e peu matauhia na te mau nunaa ia faahepo i te ui apî no ta ratou tau faehau, ia ineine ratou aore ra ia haere roa ˈtu ratou e tamaˈi i roto i te mau tamaˈi rahi o tei faatahe rahi i te toto i roto i te aamu o te huitaata nei. I te roaraa o te mahana o te Fatu, ua mono atoa te mau nunaa i te Basileia o te Atua na roto i te hohoˈa o te puaa—oia hoi te Taiete o te mau Nunaa, e i muri iho na roto i te faanahonahoraa o tei mono atu ia ˈna, oia hoi te Hau amui. Auê ïa parau faaino rahi e, mai ta te tahi o te mau pâpa hopea i faˈi, e ua riro teie faanahonahoraa a te taata ei tiaturiraa hoê roa o te hau no te mau nunaa! Aita râ anei te reira e patoi uˈana ra i te Basileia o te Atua? Ua riro ïa te feia atoa e haamori ra ia ˈna ei mea viivii i te pae varua, î i te fefe, mai tei ite-mau-hia i nia i to Aiphiti o tei patoi atu ia Iehova i te mau mahana o Mose.—Exodo 9:10, 11.

4. (a) Eaha ta te mea e vai ra i roto i te auˈa matamua o te riri o te Atua e faaite maitai maira? (b) Eaha to Iehova manaˈo no nia i te feia e farii ra i te tapao o te puaa taehae?

⁴ Te faaite maitai ra te mea e vai ra i roto i te auˈa matamua i te maitiraa i tuuhia i mua i te mau taata: oia hoi te faarururaa i te au ore o teie nei ao, e aore ra te riri o Iehova. E faahepohia te mau taata ia farii i te tapao o te puaa, “eiaha roa te hoê taata ia hoo atu i te taoˈa, e ia hoo mai hoi, maori râ o te taata tei ia ˈna taua tapao ra, e te iˈoa o te puaa ra, e te taio o taua iˈoa no ˈna ra.” (Apokalupo 13:16, 17) E tia râ ia aufauhia te tahi mea no te reira! Oia mau, ia au i to Iehova manaˈo, te feia o tei farii i teie tapao e roohia ratou i “te fefe ino mauiui” ra te huru. Mai te matahiti 1922 mai â, ua tapaohia ratou i mua i te mau taata e ua faarue ratou i te Atua ora. Aita ta ratou mau opuaraa politita i manuïa e tei roto ratou i te ahoaho rahi. E mea viivii ratou i te pae varua. Ia ore ratou e tatarahapa, e pohe ratou i teie maˈi “ino,” no te mea tei roto tatou, i teie nei, i te mahana haavaraa a Iehova. Eita tatou e nehenehe e faaea i ropu noa: e tuhaa tatou no te amuiraa o te mau mea e vai nei aore ra te tavini nei tatou ia Iehova i pihai iho i ta ˈna Mesia.—Luka 11:23; hiˈo Iakobo 4:4.

Ua riro te miti ei toto

5. (a) Eaha tei tupu i te niniiraahia te piti o te auˈa? (b) Eaha to Iehova manaˈo no nia i te feia e vai ra i roto i te miti taipe?

⁵ E tia ia niniihia i teie nei te piti o te auˈa o te riri o te Atua. Eaha ïa te mau faahopearaa no te huitaata nei? Te na ô maira Ioane e: “Ua ninii maira te toopiti o te melahi i ta ˈna auˈa i raro i te tai; riro atura te miti ei toto, mai te toto o te taata pohe ra: hope roa aˈera to raro i te tai ra i te pohe.” (Apokalupo 16:3) Mai tei itehia no te piti o te oto pu, ua niniihia teie auˈa i raro i te “tai,” oia hoi te mau taata arepurepu noa, orure hau e tei atea ê roa ia Iehova. (Isaia 57:20, 21: Apokalupo 8:8, 9) I mua i te aro o Iehova, ua riro teie “tai” mai te toto ra te huru; aore roa e mea te nehenehe e vai ora noa i reira. No reira e ore roa e tia i te mau kerisetiano ia riro ei tuhaa no teie nei ao. (Ioane 17:14) Te faaite ra te niniiraa o te piti o te auˈa o te riri o te Atua e mea pohe te mau taata atoa e vai ra i roto i taua miti ra i mua i te aro o Iehova. Na nia i te manaˈo o te hopoia e amohia ra e te taatoaraa, ua hara ïa ratou i te  faataheraa toto hara ore e rave rahi. No reira, ia tae anaˈe mai te mahana o te riri o Iehova, e pohe mau ïa ratou i te rima o te mau puai faautua na ˈna ra.—Apokalupo 19:17, 18; hiˈo Ephesia 2:1; Kolosa 2:13.

Te horoa ra te Atua i te toto na ratou e inu

6. Eaha tei tupu ia ninii-anaˈe-hia te toru o te auˈa, e eaha te mau parau a te hoê melahi e i muri iho no ô mai i te fata?

⁶ Mai tei itehia no te toru o te oto pu, ua niniihia te toru o te auˈa o te riri o te Atua i nia i te mau pape pihaa. “Ua ninii maira te tootoru o te melahi i ta ˈna auˈa i raro i te mau pape tahe ra, e te mau pape pihaa ra; riro atura te reira ei toto. Ua faaroo atura vau i te melahi o te mau pape i te parauraa e, E parau-tia ta oe, e te Fatu e, o te vai nei, e o tei vai na, e maitai mau â to oe, o oe i na reira i te tahoo. Ua haamanii hoi ratou i te toto o te feia moˈa e te mau peropheta ra, e ua hopoi mai oe i te toto na ratou e inu; e au ïa ia ratou. Ua faaroo atura hoi au i te tahi, tei te fata ra te parauraa mai, Oia ïa, e te Fatu e, e te Atua Mana hope e, e mea mau, e te tia ta oe faautuaraa.”—Apokalupo 16:4-7.

7. Te faahohoˈa ra “te mau pape tahe ra, e te mau pape pihaa ra” i te aha?

⁷ Te faahohoˈa ra teie ‘mau pape tahe e te mau pape pihaa’ i te mau pu e parauhia ra e mau pu no te mau aˈoraa e no te paari e fariihia e teie nei ao, mai te mau philosopho politita, i te pae faanavairaa faufaa, i te pae no te ite aivanaa, i te pae no te mau peu, i te pae totiare e i te pae no te haapaoraa e aratai ra i te mau taata i roto i ta ratou mau ohipa e ta ratou mau faaotiraa. Aita ratou i fariu ia Iehova, te Tumu o te ora, no te iteraa ˈtu i te parau mau ora, ‘ua pao’ te mau taata ‘i te farii pape amaha’ na ratou e ua inu ratou i “te paari hoi o teie nei ao, e mea maamaa ïa i te Atua.”—Ieremia 2:13; Korinetia 1, 1:19; 2:6; 3:19; Salamo 36:9.

8. Mea nafea te huitaata nei i te hararaa te hara taparahi taata?

⁸ Ua aratai teie mau “pape” viivii i te mau taata ia hara na roto i te taparahiraa taata, ei hiˈoraa na roto ïa i te turairaa ˈtu ia ratou ia faatahe i te toto e rave rahi i roto i te mau tamaˈi o te XXraa o te senekele, e ua hau atu i te hanere mirioni taata tei pohe. I roto iho â râ i te amuiraa faaroo kerisetiano, i reira te haamataraa na tamaˈi rahi o te ao nei, “te ru nei” te mau taata “i te haamanii i te toto hara ore,” e tae noa ˈtu i te toto o te mau ite o te Atua iho. (Isaia 59:7; Ieremia 2:34) Ua roo-atoa-hia te huitaata nei i te hara toto na roto i te raveraa, ma te tano ore, i te rahiraa toto faito ore no te pamû atu i te reira i roto i te mau taata, ei ofatiraa i te mau ture tia a Iehova. (Genese 9:3-5; Levitiko 17:14; Ohipa 15:28, 29) E no te  reira, ua roo-aˈena-hia ratou i te ati, na roto i te pamûraa toto ua haere roa ˈtura te maˈi SIDA i te rahiraa, e te maˈi ate e te tahi atu â mau maˈi. Ua fatata teie mau taata rave hara i te faautua-hope-roa-hia, mai tei au i te mau hara toto atoa o ta ratou i rave, ia roo-anaˈe-hia ratou i te utua hopea roa ia taataahihia ratou i roto i “te neneiraa rahi uaina ra o te riri o te Atua ra.”—Apokalupo 14:19, 20.

9. Eaha tei taaihia ˈtu i te niniiraa o te toru o te auˈa?

⁹ I te mau mahana o Mose, i te riroraa mai te mau pape o te Nil ei toto, ua nehenehe i to Aiphiti ia ora na roto i te imiraa i te pape i te vahi ê. (Exodo 7:24) Area râ, i teie nei mahana, i te tupuraa teie pohe i te pae varua, eita roa ˈtu e itehia i roto i te ao a Satani te mau pape ora. Ua taai-atoa-hia i te niniiraa o te toru o te auˈa te faaiteraa e e au “te mau pape tahe ra, e te mau pape pihaa ra” i te toto te huru, ma te aratairaa ˈtu te feia atoa e inu ra i te reira i roto i te pohe i te pae varua. Mai te peu e eita ratou e fariu tia ˈtu i nia ia Iehova, e roohia ratou i ta ˈna faautuaraa.—Hiˈo Ezekiela 33:11.

10. Eaha ta “te melahi o te mau pape” e faaite ra, e eaha ta “te fata” e faaite atoa ra?

¹⁰ “Te melahi o te mau pape,” oia hoi te melahi e ninii ra i ta ˈna auˈa i nia i te mau pape, te faateniteni nei oia ia Iehova, te Haava o te ao taatoa nei, e mea maitai roa ta ˈna mau faaotiraa tia. Te na ô ra teie melahi no nia i teie haavaraa e: “E au ïa ia ratou.” Mea papu ua riro oia iho ei ite no te mau taparahiraa taata e no te mau ino atoa tei iteahia mai i te roaraa o te mau senekele na roto i te mau haapiiraa hape e te mau philosopho o teie nei ao ino. Ua papu ïa ia ˈna e mea tia mau te faaotiraa tia a Iehova. E ua faaroo-roa-atoa-hia “te fata” o te Atua. I roto i te Apokalupo 6:9, 10, te parauhia ra e tei raro aˈe te mau nephe o te feia tei taparahi-pohe-hia i teie fata. Te turu maite atoa ra ïa “te fata” i te parau-tia o te mau faaotiraa a Iehova. * E mea tano iho â ïa, ia faahepo-atoa-hia te feia o tei manii e o tei rave i te toto ma te tano ore ia inu atoa ratou i te reira, titauraa o te faahohoˈa ra i to Iehova haapoheraa ia ratou.

E haapaapaa te mahana i te taata i te auahi

11. Ua niniihia te maha o te auˈa o te riri o te Atua i nia i te aha, e e eaha tei tupu mai i reira?

¹¹ E niniihia ïa te maha o te auˈa o te riri o te Atua i nia i te mahana. Te parau maira Ioane e: “Ua ninii maira te toomaha o te melahi i ta ˈna auˈa i nia i te mahana, e ua horoahia mai te tia ia ˈna ia haapaapaa i te taata i te auahi. Paapaa anaˈe ihora te taata i te veavea rahi, e ua faaino atura i te iˈoa o te Atua, tei ia ˈna taua mau pohe nei; e aore ratou i tatarahapa a faatia ˈtu ai ia ˈna.”—Apokalupo 16:8, 9.

12. Eaha ïa to te ao nei “mahana,” e eaha tei horoahia ˈtu i teie mahana taipe ia rave?

 ¹² I to tatou nei mahana, i te hopea o te amuiraa o te mau mea e vai nei, i reira ïa te mau taeae o Iesu i te pae varua “e anaana mai ai i te basileia o to ratou ra Metua mai te anaana o te mahana ra.” (Mataio 13:40, 43) Ua riro o Iesu iho ei “Mahana parau-tia.” (Malaki 4:2) Area râ, e “mahana” atoa ïa ta te huitaata nei; oia hoi to ˈna iho mau tia faatere e tamata ra i te anaana ma te patoi atu i te Basileia o te Atua. Ua faaite te maha o te oto pu e ‘te mahana, te avaˈe e te mau fetia’ no te mau raˈi o te amuiraa faaroo kerisetiano, e mau pu ratou no te pouri, e ere râ no te maramarama. (Apokalupo 8:12) I teie nei, te faaite ra te maha o te auˈa o te riri o te Atua e e riro te “mahana” o teie nei ao ei mea veavea roa. Te feia faatere o tei faaauhia i te mahana ra te huru e ‘haapaapaa’ ïa ratou i te huitaata nei. O te reira ïa ta te mahana taipe e rave. Oia ïa, e faatia Iehova ia riro teie mauiui ei tuhaa no ta ˈna haavaraa e au i te auahi ra te huru i nia i te huitaata nei. Mea nafea râ te mau taata i te paapaaraa?

13. Mea nafea te mau tia faatere o teie nei ao o tei faaauhia i te “mahana” i te ‘haapaapaaraa’ i te huitaata nei?

¹³ I muri aˈe i te Tamaˈi rahi Matamua o te ao nei, ua haamau ihora te mau tia faatere o te ao nei i te Taiete o te mau Nunaa ei ravea ia tupu te oraraa peapea ore i te ao nei, aita râ ta ratou mau tutavaraa i manuïa. Ua tamatahia te tahi mau huru faatereraa mai te faatereraa nazi e te faatereraa haavî a Mussolini, ei hiˈoraa. Ua parare noa te faatereraa communiste. Maoti i te haamaitai i te oraraa o te huitaata nei, ua  ‘haapaapaa’ te mau raatira mai te mahana ra te huru no taua mau amuiraa politita i te huitaata nei ‘i te veavea rahi.’ I muri iho i te mau tamaˈi no Paniora, no Ethiopia e no Mandchourie, tupu maira te Piti o te Tamaˈi o te ao nei. Te faaite ra te aamu o to tatou nei tau, na te mau faatere haavî iho mai ia Mussolini, Hitler e o Staline aore ra te tahi o to ratou mau taata i haapohe i te mau ahuru mirioni taata, te rahiraa no to ratou iho ïa nunaa. E ere i te mea maoro i teie nei, ua ‘haapaapaa’ te mau aroraa a te mau nunaa e aore ra te mau tamaˈi tivira i te mau taata no te mau fenua mai ia Viêt Nam, Kampuchéa, Irane, Lebanona e Irelane, e te mau taata no te mau fenua no Marite latino e no Afirika. E tia ia faahiti-atoa-hia te aroraa e vai ra i ropu i te mau puai rarahi, e ta ratou mau mauhaa tamaˈi atomi riaria mau o te nehenehe e haapaapaa i te huitaata taatoa nei. I teie nei mau mahana hopea, ua tuu-mau-hia te huitaata nei i nia i te “mahana” veavea o ta ˈna mau tia faatere ino mau. Na te niniiraa o te maha o te auˈa o te riri o te Atua i haamaramarama maitai i te auraa o teie mau tupuraa o te aamu nei, e ua faaite te nunaa a te Atua i te reira i roto i te ao taatoa nei.

14. Eaha ta te mau Ite no Iehova i tamau noa i te faaite ei ravea hoê roa no te mau fifi o te huitaata nei, eaha ïa te huru o te rahiraa o te taata i mua i te reira poroi?

¹⁴ Ua tamau noa te mau Ite no Iehova i te haapapu e e faatitiaifarohia te mau fifi maere mau o te huitaata nei na roto noa ïa i te arai o te Basileia o te Atua, e mea na roto i teie nei ravea e faahanahana ˈi Iehova i to ˈna ra iˈoa. (Salamo 83:4, 17, 18; Mataio 6:9, 10) Aita râ te rahiraa o te taata i horoa i te hoê tariˈa faaroo i teie nei poroi. Ua patoi te rahiraa i te Basileia, e ua faaino atoa ratou i te iˈoa o te Atua, mai ia Pharao i to ˈna farii-ore-raa ˈtu i te mana hope o Iehova. (Exodo 1:8-10; 5:2) I te mea e aita ratou e haafaufaa ra i te Basileia Mesia, na te feia patoi iho â ïa i maiti ia paapaa ratou i te veavea rahi a to ratou iho “mahana,” te haavîraa teimaha a te huitaata nei.

Te terono a te puaa taehae

15. (a) Ua niniihia te pae o te auˈa i nia i te aha? (b) Eaha “te terono o te puaa taehae,” e eaha tei taaihia i te mea e ua niniihia teie auˈa i nia i teie terono?

¹⁵ Te ninii ra to muri iho melahi i ta ˈna auˈa i nia i te aha? “Ua ninii maira te toopae o te melahi i ta ˈna auˈa i nia iho i te terono o te puaa ra.” (Apokalupo 16:10a) “Te puaa taehae,” o te amuiraa politita ïa a Satani. Aita to teie nei amuiraa e terono mau, mai te puaa taehae, e ere atoa ïa i te hoê animala mau. Te faaite ra te parau no te hoê terono i te mea e e mana arii to teie puaa taehae i nia i te mau taata, e ua au maite ïa te reira i te mea e e mau korona arii to nia iho i te mau afii taitahi o taua puaa ra. I te mea mau, ua riro “te terono o te puaa taehae” ei niu, aore ra ei tumu no taua mana ra. * Te faaite ra te Bibilia i te tumu mau o te mana arii o te puaa taehae, ia parau anaˈe oia e “ua horoa maira te teni i to ˈna iho puai, e to ˈna iho terono, e te mana rahi no ˈna.” (Apokalupo 13:1, 2; Ioane 1, 5:19) No reira, ua  taaihia te niniiraa o te pae o te auˈa i nia i te terono o te puaa taehae i te hoê faˈiraa no te faaiteraa te ohipa mau ta Satani i rave e e rave noa ra no te tururaa ˈtu i te puaa taehae.

16. (a) Ma te ite aore ra aita, te tavini ra te mau nunaa ia vai? A tatara i te reira. (b) Mea nafea teie nei ao i te faaiteraa i to Satani huru? (c) Afea e faataahurihia ˈi te terono a te puaa taehae?

¹⁶ Mea nafea teie taairaa i rotopu ia Satani e te mau nunaa i te vai-noa-raa? I to Satani tamataraa ia Iesu, ua faaite orama mai oia ia ˈna i te mau basileia atoa o te ao nei e ua pûpû oia na ˈna “te hau, e te hinuhinu i teie nei mau fenua [basileia].” Te vai nei râ te hoê titauraa—na mua ˈˈe, e tia ia Iesu ia haamori ia Satani. (Luka 4:5-7) E nehenehe anei e manaˈohia e ua noaa i te mau faatereraa o teie nei ao to ratou mana ma te ore e faahoˈi mai i te tahi noa ˈˈe mea? Eita roa ˈtu ïa. Ia au i te Bibilia, o Satani te atua o teie nei amuiraa o te mau mea e vai nei, no reira ïa, ma te taa aore ra ma te taa ore i te reira, te tavini ra te mau nunaa ia ˈna. (Korinetia 2, 4:3, 4) * Mea papu te reira ia hiˈopoa-maitai-anaˈe-hia te huru faanahoraa o te amuiraa o te ao nei, o tei niuhia i nia i te here aiˈa etaeta, te au ore rahi e te miimii. Ua faanahohia te reira mai ta Satani i hinaaro—ia vai noa oia i raro aˈe i ta ˈna aratairaa. E itehia te huru ino mau o te Diabolo na roto i te viivii e vai ra i roto i te mau faatereraa, te hinaaro i te mana, te mau huru raveraa haavarevare a te mau auvaha politita e te faatitiauaraa i te pae no te mau mauhaa tamaˈi. Ua farii teie nei ao i te mau ture tia ore a Satani, a riro mai ai oia ei atua no ratou. E faataahurihia te terono o te puaa taehae ia haamou-anaˈe-hia teie puaa e ia huri anaˈe te Huaai a te vahine a te Atua ia Satani iho i roto i te abuso.—Genese 3:15; Apokalupo 19:20, 21; 20:1-3.

Te pouri e te mauiui aatiati

17. (a) Mea nafea e nehenehe e faaauhia ˈi te niniiraa o te pae o te auˈa i te pouri i te pae varua o tei tapoˈi noa na i te basileia o te puaa taehae? (b) Mai te aha te huru o te mau taata i te niniiraahia te pae o te auˈa o te riri o te Atua?

¹⁷ Mai te haamataraa mai iho â, tei roto te basileia o te puaa taehae i te pouri i te pae varua. (Hiˈo Mataio 8:12; Ephesia 6:11, 12.) I te niniiraahia te pae o te auˈa, ua faaitehia ihora ma te uˈana teie huru pouri i mua i te mau taata. Ua faarahi hau atu â oia i te reira; oia mau, ua niniihia teie auˈa o te riri o te Atua i nia i te terono iho o te puaa taehae taipe. “Ati roa aˈera to ˈna basileia i te pouri; e ua aatiati ratou i to ratou iho arero i te mauiui; e ua faaino atura i te Atua o te raˈi, i to ratou mauiui, e to ratou fefe, aitâ râ i tatarahapa i ta ratou parau.”—Apokalupo 16:10b, 11.

18. Eaha te auraa e vai ra i rotopu i te pae o te oto pu e te pae o te auˈa o te riri o te Atua?

¹⁸ Ua taa ê rii te pae o te oto pu i te pae o te auˈa o te riri o te Atua, no te mea, ua faatae mai oia i te pohe no ǒ mai i te mau akaride. E tapao râ tatou e ua pouri atoa te mahana e te reva i reira. (Apokalupo 9:2-5) E teie ta tatou e taio i roto i te Exodo 10:14, 15, no nia i te mau akaride o ta Iehova i faatae mai i nia ia Aiphiti: “Ati paatoa aˈera te fenua ra o Aiphiti i taua manu [akaride] ra, tau ihora ïa i te mau vahi atoa i Aiphiti ra, e mea rahi roa. Aita ïa manu [akaride] te rahi mai mutaaiho mai â, e e ore â hoi a muri atu. Ua ati hoi taua fenua atoa ra i taua manu [akaride] ra, e pouri roa ˈtura te fenua.” Oia mau, tei roto te fenua i te pouri. I to tatou nei mau mahana, e ite-maitai-hia te pouri i te pae varua o teie nei ao i muri iho i te pae o te oto pu e i te niniiraahia mai te pae o te auˈa o te riri o te Atua. Te faatupu ra te poroi e faaitehia ra e te mau akaride o to tatou nei tau i te peapea rahi e te mauiui i to ratou patiatiaraa te feia ino “e hinaaro . . . i te pouri, aore te maramarama.”—Ioane 3:19.

19. Ia au i te Apokalupo 16:10, 11, eaha tei tupu mai i te faaite-tahaa-raahia e o Satani te atua o teie amuiraa o te mau mea e vai nei?

¹⁹ I te mea e o Satani te raatira o teie nei ao, ua faatupu oia i te ati e te mauiui e rave rahi. Te oˈe, te tamaˈi, te haavîraa uˈana, te taparahiraa taata, te raveraa te raau taero, te taiata, te maˈi pee e noaahia na roto i te taatiraa i te pae tino, te eiâ e te haavare a te haapaoraa—teie mau mea e te vai atu â e mau tapao ïa no te amuiraa o te mau mea a Satani. (Hiˈo Galatia 5:19-21.) Taa ê atu i te reira, ua mauiui e ua peapea mau te feia e pee ra i ta ˈna mau faaueraa i te faaite-tahaa-raahia e o Satani te atua o teie amuiraa o te mau mea e vai nei. “Ua aatiati ratou i to ratou iho arero i te mauiui,” i roto iho â i te amuiraa faaroo kerisetiano. E riri  mai te rahiraa ia faaite anaˈe te parau mau i to ratou huru haerea. E mǎtaˈu te tahi pae e no reira ˈtura ratou e hamani ino ai i te feia e poro ra i te reira. Te patoi ra ratou i te Basileia o te Atua e te faaino ra ratou i te iˈoa moˈa o Iehova. E i te mea te faaite-tahaa-hia ra to ratou huru maˈi e ua î hoi ratou i te fefe i te pae no te haapaoraa, ua faaino ihora ratou i te Atua o te raˈi. ‘Aita ratou i tatarahapa i ta ratou parau.’ Eita ïa tatou e tiaturi e e taui te taatoaraa o te mau taata hou te hopea o teie amuiraa o te mau mea e vai nei.—Isaia 32:6.

Ua pâpâmǎrô aˈera te anavai pape ra o Eupharate

20. Mea nafea te ono o te oto pu e te niniiraa o te ono o te auˈa i te haafifi ia Eupharate?

²⁰ Ua faaite mai te ono o te oto pu e ua tatarahia “na melahi toomaha i tapeahia i te pape rahi ra Eupharate.” (Apokalupo 9:14) I te Anotau tahito, ua patuhia te oire rahi ra o Babulonia i te hiti pape o Eupharate. E i te matahiti 1919, i te tatararaahia “na melahi toomaha” taipe ra, topa mau ihora Babulonia Rahi. (Apokalupo 14:8) E mea faufaa mau ia tapao e ua haafifi-atoa-hia Eupharate i te niniiraahia mai te ono o te auˈa o te riri o te Atua: “Ua ninii maira te tooono o te melahi i ta ˈna auˈa i raro i te pape rahi ra ia Eupharate, pâpâmǎrô aˈera taua pape ra, ia maitai te eˈa o te hui arii o te hitia o te râ ra.” (Apokalupo 16:12) E parau apî ino mau ïa te reira no Babulonia Rahi!

21, 22. (a) No nia ia Babulonia, mea nafea te mau pape no Eupharate e paruru ra ia ˈna i te mǎrôraa i te matahiti 539 hou to tatou nei tau? (b) Te faahohoˈa ra te mau “pape” e parahihia ra e Babulonia Rahi i te aha, e mea nafea teie mau pape taipe i te mǎrôraa?

²¹ I te tau a riro ai Babulonia ei oire mana rahi, ua riro te mau pape rahi no Eupharate ei ravea maitai roa no te parururaa ia ˈna. Area râ i te matahiti 539 hou to tatou nei tau, mǎrô aˈera oia i to te raatira peresia ra o Kuro faataheraa i to ˈna mau pape i te vahi ê, e mea na reira ïa te mau hui arii “no te hitia o te râ,” o Kuro no Peresia raua o Dariu no Medai i te tomoraa i roto ia Babulonia no te haruraa ia ˈna. I taua taime ati ra, aita Eupharate i paruru aˈe i taua oire rahi ra. (Isaia 44:27 e tae atu i te 45:7; Ieremia 51:36) E roo-atoa-hia Babulonia o teie nei tau, oia hoi te amuiraa o te  haapaoraa hape o te ao nei i te hoê â huru ati.

²² Te “parahi” ra Babulonia Rahi “i nia iho i te pape e rave rahi.” Ia au i te Apokalupo 17:1, 15, te faahohoˈa ra taua mau pape ra i te ‘mau nunaa, e mau pupu rarahi taata, e mau fenua, e mau reo ěê,’ te rahiraa ïa o to ˈna iho mau melo o ta ˈna i faariro ei ravea no te paruru ia ˈna. Te pâpâmǎrô noa ra teie mau “pape”! I Europa tooa o te râ, i reira hoi e mana rahi to te haapaoraa i mutaa ihora, ua faarue te mau hanere mirioni taata i te haapaoraa. I roto i vetahi mau fenua no Europa hitia o te râ, e opuaraa papu te ravehia no te faaore i te ohipa a te haapaoraa, e aita hoi te huiraatira e paruru ra ia ˈna. Oia atoa, ia tae te tau no te haamou ia Babulonia Rahi, eita roa ˈtu ïa to ˈna mau melo o te iti noa ˈtura e paruru noa ˈˈe ia ˈna. (Apokalupo 17:16) Noa ˈtu e te faahua parau ra oia e mau miria melo ta ˈna, eita roa ˈtu ïa Babulonia Rahi e paruruhia i mua i te mau “hui arii o te hitia o te râ.”

23. (a) O vai te mau arii “o hitia o te râ” i te matahiti 539 hou to tatou nei tau? (b) O vai “te hui arii o hitia o te râ” i te mahana o te Fatu ra, e nafea raua i te haamou ia Babulonia Rahi?

²³ O vai taua mau arii ra? I te matahiti 539 hou to tatou nei tau, o Dariu no Medai raua o Kuro no Peresia ïa, o ta Iehova i faaohipa no te haru mai i te oire tahito no Babulonia. I to tatou nei tau, i te mahana o te Fatu ra, e haamou-atoa-hia te mau haapaoraa hape a Babulonia Rahi e te mau taata faatere, e haavaraa faahou â teie no ǒ mai i te Atua ra. O te Atua ra o Iehova raua o Iesu Mesia, “te hui arii o te hitia o te râ,” o tei tuu i roto i te mafatu o teie mau raatira taata nei te “manaˈo” e aro atu ia Babulonia Rahi e ia haamou roa ia ˈna. (Apokalupo 17:16, 17) Te faaite maitai ra te niniiraa o te onoraa o te auˈa e ua fatata roa teie haavaraa i te faatupuhia.

24. (a) Mea nafea te mea e vai ra i roto i na auˈa matamua tooono i te faaiteraahia, e eaha tei tupu mai? (b) Na mua ˈˈe a faahitihia ˈi te parau no te auˈa hopea o te riri o te Atua, eaha ta te Apokalupo e faaite tahaa ra?

²⁴ Te vai ra i roto i na auˈa matamua tooono te hoê poroi ati mau. No reira ïa, ma te tauturuhia e te mau melahi, te haa nei te mau tavini a te Atua e vai ra i nia i te fenua nei no te faaite i te ao taatoa nei te mau mea e vai ra i roto i teie mau auˈa. No reira, ua faaarahia te taatoaraa o te mau tuhaa o te amuiraa a Satani i te ao nei, mai te au ia ravehia, e te tuu ra Iehova i mua i te taata taitahi te ravea no te farii i te parau-tia ia ora oia. (Ezekiela 33:14-16) E tia ia niniihia te auˈa hopea o te riri o te Atua. Na mua ˈˈe râ a faahitihia ˈi te reira, te faaite tahaa ra te Apokalupo e mea nafea Satani e to ˈna mau taata i te tutava no te tapea i te faaiteraa o te mau haavaraa a Iehova.

Te haaputuputuraahia i Aramagedo

25. (a) Eaha ta Ioane e parau ra no nia i te mau ‘parau faauruahia’ viivii mai te rana ra te huru? (b) Mea nafea te parareraa te ‘parau faauruahia viivii’ mai te rana ra te huru i te mahana o te Fatu ra, e eaha te iteahia mai i muri iho?

²⁵ Teie ta Ioane e parau ra: “Ua hiˈo atura hoi au i e tootoru varua faufau mai te rana ra i te purororaa mai, mai roto mai i te vaha o te teni, e mai roto mai i te vaha o te puaa, e mai roto i te vaha o te peropheta haavare ra. E varua demoni ratou, o tei haere i te hui arii o te fenua nei e o te ao atoa nei, ma te rave i te tapao ra, e haaputu ia ratou i te tamaˈi i taua mahana rahi o te Atua Puai hope ra.” (Apokalupo 16:13, 14) I te mau mahana o Mose, ua faatae mai o Iehova i nia ia Aiphiti e faaterehia ra e Pharao te hoê pohe faufau mau o te mau rana, e “neoneo atura te fenua atoa ra.” (Exodo 8:5-15) I te mahana o te Fatu ra, te tupu atoa ra te hoê tomoraa faufau e au i te mau rana te huru, no ǒ mai râ i teie nei i te hoê pu ê. E “tootoru varua faufau . . . i te purororaa” e o Satani ïa te tumu o te reira, e te faahohoˈa ra te reira ma te papu maitai i te hoê polititaraa no te ume i te taatoaraa o te mau aratai taata nei, “te hui arii,” ia patoi atu ratou i te Atua ra o Iehova. E ravea papu te reira a Satani eiaha ratou ia haafifihia e te niniiraa o te mau auˈa o te riri o te Atua, e ia tapea râ ratou i to Satani ra pae ia tupu anaˈe “te tamaˈi i taua mahana rahi o te Atua Puai hope ra.”

26. (a) Eaha na pu polititaraa tootoru a Satani? (b) Te faahohoˈa ra “te peropheta haavare” i te aha, e nafea tatou i papu ai i te reira?

²⁶ No ǒ mai taua polititaraa ra i te “teni” (Satani) e te “puaa taehae” (te faanahonahoraa politita a Satani i nia i te fenua nei), mau puaa o tei faahiti-aˈena-hia te parau i roto i te Apokalupo. O vai râ “te peropheta haavare”? E iˈoa apî noa to ˈna. Na mua ˈˈe rii, ua faataa mai te Apokalupo i te hoê puaa e piti o ˈna tara mai  te arenio ra te huru e te faatupu ra oia i te mau tapao rarahi i mua i te puaa taehae e hitu o ˈna afii. Ua riro taua puaa haavare ra ei peropheta no teie puaa taehae. Te faaitoito ra oia ia haamorihia te puaa taehae e ua tae roa oia i te parau e ia hamanihia te hoê hohoˈa no taua puaa taehae ra. (Apokalupo 13:11-14) Te faataa atoa ra teie puaa taehae e piti o ˈna tara i te hoê â mea e teie peropheta haavare i faahiti-noa-hia ˈtura te parau. No te haapapu i te reira, e taio tatou i muri iho, riro atura “te peropheta haavare atoa,” mai te puaa taehae taipe e piti o ˈna tara i te “rave i te tapao i mua ia ˈna [te puaa taehae e hitu o ˈna afii] ra, i vare ai ia ˈna te feia i farii i te tapao a te puaa ra, e tei haamori i to ˈna ra hohoˈa.”—Apokalupo 19:20.

27. (a) Eaha te faaararaa tano maitai ta Iesu Mesia iho i horoa? (b) Eaha atoa te faaararaa ta Iesu i horoa i to ˈna parahiraa i nia i te fenua nei? (c) Mea nafea te aposetolo Paulo i te tataipitiraa i te faaararaa a Iesu?

²⁷ No te rahi o te polititaraa i ravehia e Satani i te ao nei, e tano iho â ïa teie mau parau ta Ioane i papai i teie nei: “Inaha mai te eiâ ra to ˈu haereraa ˈtu. E ao to te ara ra, te tiai maite i to ˈna ahu ia ore oia ia haere tahaa noa a ite te taata i to ˈna nehenehe ore.” (Apokalupo 16:15) O vai teie e haere maira mai te eiâ ra te huru? O Iesu iho ïa te haere maira, i te hora faataa-ore-hia, ei Taata haamou no Iehova. (Apokalupo 3:3; Petero 2, 3:10) I to Iesu parahiraa i te fenua nei, ua faaau atoa oia i to ˈna haereraa mai i te haereraa mai o te hoê eiâ, i te na ôraa e: “E teie nei, e ara, aore hoi outou i ite i te hora e tae mai ai to outou Fatu. E teie nei, ia parahi ineine noa outou; ei te hora manaˈo-ore-hia e outou na e tae mai ai te Tamaiti a te taata nei.” (Mataio 24:42, 44; Luka 12:37, 40) Ma te faaara faahou â ia tatou, teie ta te aposetolo Paulo i parau: “Te haere maira taua mahana o te Fatu [Iehova] ra, mai te haerea mai o te eiâ i te po ra. E parau hoi te taata e, E hau, e aita e ino, ei reira ra ratou e roohia-noa-hia mai ai e te pohe  oioi.” Mai teie atu nei, te ume ra Satani i te mau nunaa ia faatupu ratou i teie piiraa haavare e: “E hau, e aita e ino!”—Tesalonia 1, 5:2, 3.

28. Mea na roto i teihea mau parau to Iesu faaararaa ta ˈna mau pǐpǐ no nia i te mau faateimaharaa o teie nei ao o ta ratou e tia i te faaruru atu, e eaha “taua mahana ra” o ta te mau kerisetiano e ore e hinaaro ia roohia mai ratou “mai te marei ra” te huru?

²⁸ Ua faaara atoa Iesu i ta ˈna ra mau pǐpǐ i te mau faateimaharaa a teie nei ao î i te polititaraa a Satani i tuuhia ˈtu i nia ia ratou. Teie ta ˈna mau parau: “E ara râ ia outou, o te teimaha outou i te rahi o te maa e te taero, e te peapea o teie nei ao, a roohia mai ai outou e taua mahana ra aore i manaˈohia. . . . E tena na, e ara outou, tamau maite â i te pure, ia au ia outou te ora i teie nei mau mea iino e fatata mai nei, e ia tia maite outou i mua i te aro o te Tamaiti a te taata nei.” (Luka 21:34-36) “Taua mahana ra,” o “taua mahana rahi o te Atua Puai hope ra” ïa. (Apokalupo 16:14) A piri noa mai ai “taua mahana ra,” i reira e faatiahia ˈi te tiaraa mana arii o Iehova, e mea fifi roa ïa te faarururaa ˈtu i te peapea o te oraraa nei. E tia ïa i te mau kerisetiano ia ara, ia haapao maitai e ia vai ara noa ratou e tae noa ˈtu i taua mahana ra.

29, 30. (a) Eaha tei taaihia ˈtu i te faaararaa a Iesu no nia i te feia o tei varea i te taoto e o tei haama i te mea e ua iritihia to ratou mau “ahu”? (b) E nehenehe e faaauhia te mau taata e ahu ra i te ahu, ia vai ma? (c) Nafea te hoê kerisetiano e erehia ˈi i to ˈna ahu taipe, e eaha ïa to ˈna hopea?

²⁹ Eaha ta te faaararaa no nia i te feia e taoto ra e o te faahaamahia na roto i te iritiraa ˈtu i to ratou “ahu” e faahaamanaˈo ra? I Iseraela i tahito ra, e hopoia rahi mau ta te mau tahuˈa e ta te mau ati Levi e tiai ra i te hiero. Ia au i te manaˈo o vetahi feia tatara parau ati iuda, ia ite-noa-hia ˈtu te hoê o ratou e ua varea i te taoto a tiai noa ˈi oia, e iritihia to ˈna ahu e e tutuihia ïa, ia haama oia i mua i te mau taata atoa.

³⁰ I roto i te Apokalupo 16:15, te faaara maira Iesu ia tatou e, e tupu te hoê â huru ohipa i to tatou nei mau mahana. Te faahohoˈa ra te mau tahuˈa e te mau ati Levi i te mau taeae faatavaihia a Iesu. (Petero 1, 2:9) E nehenehe râ e horoa-atoa-hia teie faaararaa a Iesu i te nahoa rahi. Na teie mau ahu e faaite ra e, e mau kerisetiano ite o Iehova te feia e ahu ra i te reira. (Hiˈo Apokalupo 3:18; 7:14.) Mai te peu e e vaiiho ratou i te mau faateimaharaa o teie nei ao a Satani ia ohipa noa mai i nia ia ratou e a varea noa ˈtu ai ratou i te taoto, aore ra i roto i te ohipa ore, e erehia ïa ratou i teie nei mau ahu—teie ïa te auraa, eita ïa ratou e hiˈo-faahou-hia mai te mau kerisetiano viivii ore. E haama roa ïa ratou i reira. E hope ratou i te roohia i te ati.

31. (a) Mea nafea te Apokalupo 16:16 i te faaiteraa i te faufaaraa no te hoê kerisetiano ia vai ara noa? (b) Eaha te mau manaˈo o te mau raatira a te haapaoraa no nia ia Aramagedo?

³¹ E mea faufaa roa ïa ia vai ara noa te mau kerisetiano no te mea ua fatata roa teie irava o te Apokalupo i te tupu: “Ua haaputuputu ihora ratou [te mau parau faauruahia e te mau demoni] [i te hui arii aore ra te mau faatere taata nei] i te hoê vahi, o Aramagedo te iˈoa i te parau Hebera ra.” (Apokalupo 16:16) I te rahiraa o te taime, e papaihia teie iˈoa Aramagedo, hoê anaˈe iho râ taime e itehia te reira i roto i te Bibilia, area râ ua anaanatae roa te mau taata i te reira. Te faaara ra te mau aratai o te ao nei i te mau taata e peneiaˈe e tupu mai te hoê Aramagedo ati atomi. I te mea e ua faaau-atoa-hia te iˈoa o Aramagedo i te oire tahito ra o Megido, o tei riro ei vahi no te rahiraa o te mau aroraa rahi i tupu i te tau o te Bibilia, ua manaˈo ihora vetahi mau aratai o te haapaoraa e e tupu te tamaˈi rahi hopea i nia i te fenua nei i taua vahi nainai ra. Ua atea ê roa ïa ratou i te parau mau.

32, 33. (a) Maoti i te hoê vahi mau o te fenua nei, eaha ta te parau Aramagedo e faataa ra? (b) Eaha te tahi atu â mau parau no roto mai i te Bibilia e taai-atoa-hia ia Aramagedo? (c) Afea e tae mai ai te taime e ninii ai te hitu o te melahi i te auˈa hopea o te riri o te Atua?

³² Teie te auraa o te iˈoa ra o Aramagedo, “Mouˈa no Megido.” Aita ïa e faataa maira i te hoê vahi mau, area râ te faahohoˈa ra te reira i te huru o te ao nei a putuputu ai te mau nunaa atoa no te patoiraa ˈtu te Atua ra o Iehova e i te pae hopea e haamouhia ratou e a ˈna. O te hoê ïa tupuraa e itehia i te ao taatoa nei. (Ieremia 25:31-33; Daniela 2:44) Ua au maite atoa Aramagedo i te “neneiraa rahi uaina ra o te riri o te Atua ra,” i “te peho o Iehosaphata” aore ra “te peho e faataahia ˈi,” i reira te mau nunaa e haaputuputuhia ˈi ia haamouhia ratou e Iehova. (Apokalupo 14:19; Ioela 3:12, 14) Ua taai-atoa-hia o Aramagedo i te “fenua ra ia  Iseraela” i reira e haamouhia ˈi te mau nuu a Satani o Goga i te fenua o Magoga e ua taai-atoa-hia te reira i te vahi e vai ra “i ropu i na miti ra i nia i te mouˈa moˈa hanahana ra” i reira te arii no Apatoerau e tae mai ai “i to ˈna iho hopea” i te toparaa i te rima o Mihaela, te tamaiti hui arii rahi.—Ezekiela 38:16-18, 22, 23; Daniela 11:45 e tae atu i te 12:1.

³³ Ia aratai-anaˈe-hia te mau nunaa, ma te aravihi, i roto i taua tupuraa ra na roto i te haapurororaahia mai te maniania a te rana ra te huru i te polititaraa a Satani e ta ˈna mau mauhaa taata nei, ua tae ïa i reira te taime e ninii ai te hitu o te melahi i te auˈa hopea o te riri o te Atua.

“Ua oti”

34. Ua ninii te hitu o te melahi i ta ˈna auˈa i nia i te aha, e eaha te faˈiraa ‘tei haere mai i rapae au i te hiero [fare pure] mai pihai iho mai i te terono’?

³⁴ “Ua ninii maira te toohitu o te melahi i ta ˈna auˈa i roto i te reva; o te hoê reo rahi maira na roto mai i te hiero ra o te raˈi, no ǒ mai i te terono o te Atua ra, i te na ôraa mai e, Ua oti.”—Apokalupo 16:17.

35. (a) Eaha te “reva” e faahitihia ra i roto i te Apokalupo 16:17? (b) I to te melahi niniiraa i ta ˈna auˈa i nia i te reva, e eaha ïa ta te hitu o te melahi e faaite ra?

³⁵ O te “reva” te tuhaa hopea faufaa no te ora o tei roohia i te pohe. Aita râ e faahitihia ra i ǒ nei te parau no te reva mau. Aita to te reva e ino noa ˈˈe a roohia ˈi oia i te mau haavaraa faautuaraa a Iehova, mai te fenua, te miti, te mau pape pihaa aore ra te mahana mau e tia ia tairihia ratou e Iehova. O te reva râ ta Paulo i  faahiti i to ˈna piiraa ia Satani ei “arii mana o te reva nei.” (Ephesia 2:2) O te “reva” a Satani o ta te ao nei e huti ra, oia hoi te huru feruriraa aore ra te huru manaˈo atoa o te taatoaraa o te amuiraa o te mau mea iino e vai nei, te mau manaˈo a Satani e itehia ra i roto i te oraraa taatoa o te mau taata e vai ra i rapae au i te faanahonahoraa a Iehova. I to ˈna niniiraa i ta ˈna auˈa i nia i te reva, te faaite ra te hitu o te melahi i to te Atua riri ia Satani, ta ˈna faanahonahoraa e te mau mea atoa e turai ra i te mau taata ia turu atu ia Satani na roto i te patoiraa i te mana hope o Iehova.

36. (a) Eaha ta te mau pohe toohitu ra e horoa ra? (b) Eaha ta te faˈiraa parau a Iehova e: “Ua oti.” e faataa ra?

³⁶ Te horoa ra teie pohe e te tooono o te mau pohe i niniihia na mua ˈˈe i te mau haavaraa taatoa a Iehova i nia ia Satani e ta ˈna amuiraa o te mau mea e vai nei. Te faaite atea ra oia i te ati no Satani e ta ˈna ra huaai. I te niniiraahia teie auˈa hopea, ua faˈi o Iehova iho e: “Ua oti.” Aita ˈtu ïa parau toe. Ia oti anaˈe te mau mea e vai ra i roto i te mau auˈa o te riri o te Atua i te niniihia, a mauruuru roa ˈi Iehova, i reira ïa oia e faatupu ai, ma te haamarirau ore, i te mau haavaraa i faaitehia na roto i taua mau poroi ra.

37. Mea na roto i teihea mau parau to Ioane faataaraa mai i te ohipa e tupu ra i muri aˈe i te niniiraahia mai te hitu o te auˈa o te riri o te Atua?

³⁷ Te na ô faahou ra Ioane e: “E e mau reo maira hoi, e te patiri, e te uira, e te aueue rahi fenua ra, aore â e faito mai te taataraahia o te fenua nei, i te rahi e te uˈana o taua aueue fenua ra. Ootihia ihora te oire rahi ra, e toru otia, e mairi ihora te mau oire o te mau fenua ra i raro: e ua tupu aˈera to te Atua manaˈo i taua Babulonia rahi ra, e e tuu i te auˈa uaina ra o to ˈna riri uˈana ia ˈna. Pee ê atura te mau fenua atoa; e aita ra te mau mouˈa. Ua mairi maira te ûa paari rahi no nia mai i te raˈi i nia iho i te taata nei, e au te topata hoê i te taleni i te teiaha; e ua faaino atura te taata i te Atua, i taua pohe i te ûa paari ra, e pohe rahi roa hoi taua pohe ra.”—Apokalupo 16:18-21.

38. Te faahohoˈa ra (a) te “aueue rahi fenua” i te aha? (b) te mea e ua vahihia te “oire rahi,” Babulonia Rahi, na roto e “toru otia” i te aha? (c) te mea e “pee ê atura te mau fenua atoa; e aita râ te mau mouˈa” i te aha? (d) “taua pohe i te ûa paari ra” i te aha?

³⁸ I teie â taime te faaite maitai maira Iehova ia ˈna i mua i te mau taata. O ta “te mau reo maira hoi, e te patiri, e te uira” e faaite ra. (Hiˈo Apokalupo 4:5; 8:5.) E faaaueuehia te huitaata nei e aitâ te reira i itehia aˈenei, i te hoê aueueraa fenua haapau te huru. (Hiˈo Isaia 13:13; Ioela 3:16.) E marua “te oire rahi” o Babulonia Rahi i teie aueueraa fenua riaria mau, e e vahihia o ˈna na roto e “toru otia,” e te faahohoˈa ra te reira i to ˈna toparaa e mou roa ˈtura. Taa ê atu i te reira, e mairi “te mau oire o te mau fenua ra” i raro. E mou roa “te mau fenua [motu] atoa” e te mau “mouˈa,” oia hoi te mau ture e te mau faanahonahoraa o tei manaˈohia e mea papu i roto i te amuiraa o te mau mea e vai nei. E roohia te mau taata, ma te uˈana rahi i “te ûa paari rahi,” hau atu i te puai i te ûa paari i faataehia ˈtu i nia ia Aiphiti i te hitu o te mau pohe, e ua fatata e hoê taleni te teiaha o te hoê topata ûa paari. * (Exodo 9:22-26) Teie pape paari e mairi ra i raro no te faautuaraa, te faahohoˈa mau ra oia i te mau faˈiraa parau etaeta mau o te mau haavaraa a Iehova, ei haapapuraa e ua tae te hopea o te amuiraa o te mau mea e vai nei. E nehenehe atoa râ Iehova e faaohipa i te ûa paari mau no te faatupuraa i ta ˈna ohipa haamouraa.—Ioba 38:22, 23.

39. Noa ˈtu e ua niniihia na pohe toohitu nei, e tamau â te rahiraa o te mau taata i te rave i te aha?

³⁹ E roohia ïa te ao a Satani i te haavaraa tia a Iehova. Tae noa ˈtu i te hopea e tamau noa ïa te mau taata i te faatihaehae e te faaino i te Atua. Mai ia Pharao i tahito ra, eita roa ˈtu to ratou mafatu e mǎrû mai i mua i taua mau pohe e rave rahi ra, e eita atoa ïa i mua te tuhaa hopea haapohe o taua mau pohe ra. (Exodo 11:9, 10) Eita e itehia i te taime hopea roa, te rahiraa o te taata ia taui i te huru o to ratou mafatu. E to ratou aho hopea e faaino â ratou i te Atua, o tei parau hoi no nia i te mau nunaa e: “E ite hoi ratou e, o vau o Iehova.” (Ezekiela 38:23) I reira ïa e faatiahia ˈi te mana arii o Iehova te Atua Puai hope ra.

[Nota i raro i te api]

[Uiraa haapiiraa]

[Tumu parau tarenihia i te api 221]

“I nia i te fenua”

Te pǔpǔ a Ioane, ua faaite ïa oia i te riri o Iehova no nia i “te fenua” na roto i te faaiteraa ˈtu i te mau faˈiraa parau mai teie te huru:

“I muri aˈe i te mau senekele tutavaraa, ua faaite papu maitai te mau pǔpǔ politita e aita ratou i ite e nafea ra i mua i te mau tupuraa o teie nei tau e nafea ia faatitiaifaro i te mau fifi ahoaho. Ua ite te feia no te pae faanavairaa faufaa e te mau tia o te Hau o tei tuatapapa maite i te reira ohipa e aita roa ˈtu ratou i ite e nafea ra.”—E ore te mau mirioni taata e ora nei e pohe faahou, 1920, api 52.

“Aita roa ˈtu e vai ra i nia i te fenua nei te hoê faatereraa o te haamaitai ra i te hoê tuhaa au noa o te ao nei. Te vai ra e rave rahi mau fenua i raro aˈe i te mana o te mau faatere haavî. Ua topatari mau te taatoaraa o te ao nei.”—Te hoê faatereraa e hinaaro-mau-hia ra, 1924, api 7.

“Mea na roto noa . . . i te faaoreraa i teie huru faanahoraa o te mau mea e vai nei, e mou ai te ino i te ao nei e i reira e vai ai te hau e te parau-tia.”—“Teie parau apî maitai o te basileia,” 1955, api 25.

“Teie nei ao, ua tui ïa to ˈna roo no te rahi o te ino, o te parau-tia ore e te orure hau i te Atua e to ˈna ra hinaaro. . . . Eita roa ˈtu oia e taui e e tia ïa, ia haamouhia te reira.”—Te Pare Tiairaa, 1 no mati 1982, api 6 (na roto i te reo farani).

[Tumu parau tarenihia i te api 223]

“I roto i te miti”

Teie te tahi mau faˈiraa parau a te pǔpǔ a Ioane i te roaraa o te mau matahiti no te faaiteraa i te riri o te Atua i nia i te “miti” arepurepu e orure hau o te mau taata paieti ore o tei atea ê roa ia Iehova:

“Te aamu o te mau nunaa taitahi, te faaite maitai maira te reira i te mau aroraa e vai ra i rotopu i te mau pǔpǔ totiare. I vai noa na te aroraa i rotopu i te feia e onahia ra na nia i ta vetahi ê ohipa e te feia rave ohipa e faahepohia ra. . . . Ua hope taua mau aroraa ra na roto i te mau orureraa hau, te mauiui rahi, e ua tahe te toto e rave rahi.”—Faatereraa, 1928, api 231.

I roto i te ao apî, “e mou ïa te ‘miti’ taipe o te mau nunaa arepurepu, paieti ore e orure hau, e no roto mai oia te puaa taehae taipe, te mauhaa a te Diabolo, i te aˈeraa mai e mea maoro i teie nei.”—Te Pare Tiairaa, 1 no me 1969, api 283 (na roto i te reo farani); Bulletin intérieur, 10/68, api 48.

“Teie nei [to]taiete taata, ua maˈihia i te pae varua. E ore roa te hoê i rotopu ia tatou e tia ia faaora, no te mea ua faaite te Parau a te Atua e, ua paruparu roa oia.”—Te hau e te ino ore mau—No hea mai ïa?, 1973, api 131.

[Tumu parau tarenihia i te api 224]

“I roto i te mau anavai pape e te mau pape pihaa”

Te toru o te pohe, ua faaite tahaa mai oia e eaha mau na “te mau anavai pape e te mau pape pihaa” na roto i te mau faˈiraa parau mai teie te huru:

“Te upoo faatere haapaoraa, e faahua parau ra e te haapii ra ratou i te mau haapiiraa a Iesu, ua haamoˈa ïa ratou i te tamaˈi e ua faariro i te reira ei ohipa moˈa. Ua oaoa roa to ˈna mau melo i te iteraa i to ratou mau hohoˈa e to ratou mau tii i te tuuhia ˈtu i pihai iho i te mau aito taehae.”—Te Pare Tiairaa no novema 1924, api 15 (na roto i te reo farani).

“Te peu hiˈohiˈo, ua niuhia ïa te reira i nia i te hoê haavare: te vai-ora-noa-raa e te huru pohe ore o te nephe.”—Te haapii ra anei te mau Papai i te “vai-ora-noa-raa” i muri aˈe i te pohe?, 1956, api 51.

“Te mau philosopho taata nei, te mau manaˈo politita, totiare e i te pae faanavairaa faufaa, e te mau tutuu a te haapaoraa, aore roa ïa i faahaumǎrû noa ˈˈe i te taata. Ua turai râ taua mau pape ra i te taata ia ofati i te ture a te Poiete no nia i te moˈaraa o te toto, e ia faatupu i te mau hamani-ino-raa i te pae o te faaroo.”—Faaotiraa tei fariihia i te Tairururaa o te mau nunaa atoa no nia i te “parau apî maitai mure ore,” i te matahiti 1963.

“Aita ïa e ora no ǒ mai i te feia aivanaa, o te haamouraa ïa o te huitaata nei te tiaihia ra no ǒ mai i te taata iho. . . . Eita atoa tatou e nehenehe e tiaturi e e taui te mau taote o te ao nei no te pae o te feruriraa, i te manaˈo o te mau taata. . . . Eita atoa tatou e nehenehe e tiaturi i nia i te hoê faanahoraa puai o te mau mutoi o te ao nei . . . no te faahepo i te mau nunaa ia riro to tatou nei palaneta ei vahi hau i reira tatou e ora ˈi.”—E faaorahia te huitaata nei,—na roto i te Basileia, 1970, api 5.

[Tumu parau tarenihia i te api 225]

“I nia i te mahana”

Te “mahana” oia hoi te haavîraa a te taata nei te ‘haapaapaa’ ra i te huitaata nei i te mahana o te Fatu ra. Ua huti te pǔpǔ a Ioane i te ara-maite-raa i nia i te reira ohipa na roto i te mau faˈiraa parau mai teie te huru:

“I teie nei, Hitler raua o Mussolini, na faatere haavî, te haafifi mau ra raua i te hau o te ao taatoa nei. Te turu ra te Ekalesia katolika no Roma i ta raua ohipa no te haamouraa i te tiamâraa.”—Faatereraa haavî aore ra tiamâraa, 1939, api 12.

“I te roaraa o te aamu, teie ïa te huru polititaraa a te mau faatere haavî, oia hoi haavî aore ra haamou. I teie nei râ, e tia ia Iesu Mesia, te Arii haamauhia e te Atua ia faatupu i te ao nei te ture ra: A farii i te faatereraa e aore ra o te haamouraa ïa.”—Ia tahoê anaˈe te mau nunaa atoa i raro aˈe i te Basileia o te Atua, 1961, api 23.

“Mai te matahiti 1945 mai â, ua pohe hau atu i te 25 mirioni taata i roto i na 150 tamaˈi o tei tupu i te ao nei.”—Te Pare Tiairaa, 15 no eperera 1980, api 6 (na roto i te reo farani).

“Aita roa ˈtu [te mau nunaa atoa] e haapeapea ra no ta ratou mau hopoia aore ra te mau ture e tia ia ratou ia haapao. No te faatupu i ta ratou i opua na, e faaohipa te tahi pae o ratou i te mau ravea atoa o ta ratou e manaˈo ra e e mea maitai no ratou—te mau taparahiraa taata, te totovaraa, te totovaraa na roto i te reva, te mau topitaraa e e rave rau atu â. . . . Eaha te maororaa te tau te mau nunaa e faaoromai ai te tahi e te tahi i roto i teie huru tupuraa maamaa ra e te huenane hoi?”—Te Pare Tiairaa, 1 no setepa 1985, api 4.

[Tumu parau tarenihia i te api 227]

“I nia i te terono o te puaa taehae”

Te mau Ite no Iehova, ua faaite tahaa ratou e eaha te terono o te puaa taehae e ua faaite ratou e ua faautua Iehova i te reira na roto i te mau faˈiraa parau mai teie te huru:

“Te mau faatere e te mau raatira o te mau nunaa, te haafifihia ra ratou e te mau puai haavarevare hau aˈe i te puai taata nei, e te umehia ra ratou ma te papu i te aroraa hopea roa o Aramagedo.”—I muri aˈe ia Aramagedo, e haamau te Atua i te hoê ao apî, 1954, api 8.

Te ‘puaa taehae,’ te hoê huru faatereraa a te taata nei, e ere to ˈna mana politita no ǒ mai i te Atua ra, ua noaa râ ia ˈna te puai, te mana e te terono no ǒ mai i te Teni ra. E mea titauhia ïa ia pee o ˈna i te huru raveraa a te pǔpǔ politita, maoti ra te huru raveraa a te Teni.”—I muri aˈe ia Aramagedo, e haamau te Atua i te hoê ao apî, 1954, api 15.

“Te mau nunaa etene, tei te pae iho â ratou o te Enemi rahi o te Atua, oia hoi te Diabolo ra o Satani.”—Faaotiraa o tei fariihia i te tairururaa o te mau nunaa atoa “Ua noaa i te Atua te re,” i te matahiti 1973.

[Tumu parau tarenihia i te api 229]

“Pâpâmǎrô aˈera taua pape ra”

I teie nei atoa, te pâpâmǎrô ra te rahiraa o te feia e turu ra i te haapaoraa a Babulonia i te mau fenua e rave rahi. Te faaite maira te reira i te ohipa e tupu mai ia aro anaˈe mai “te hui arii o te hitia o te râ.”

“Te faaite ra te hoê titorotororaa rahi e 75 % o te feia e noho ra i roto i te oire (i Thailande) eita roa ˈtu ratou e haere i te mau fare pure a Bouddha no te faaroo i te mau aˈoraa parau; i te mataeinaa, te iti noa ˈtura te feia e haere ra i te fare pure; ua fatata i te 50 % anaˈe.”—Bangkok Post, 7 no setepa 1987, api 4.

“Te haapaoraa tinito parauhia taoïsme, ua faaorehia ïa ta ˈna ra mau peu tahutahu i te fenua [Tinito] i reira oia te faraa mai ua fatata e piti tausani matahiti i teie nei. . . . I te mea e ua erehia oia i ta ˈna ra mau ravea tahutahu e mea na reira hoi ratou e te feia tahito ra i te umeraa mai i te mau pǐpǐ e rave rahi, aita ˈtura to te mau tahuˈa e taata mono faahou; te itehia ra te moeraa teie haapaoraa tinito ei faaroo faanahohia i te fenua Tinito iho.”—The Atlanta Journal and Constitution, 12 no setepa 1982, api 36-A.

“Te fenua Tapone . . . o te hoê ïa o te mau fenua o te ao nei i reira e itehia ˈi te hoê numera rahi roa ˈˈe o te mau mitionare ěê, ua fatata ïa e 5 200; area râ . . . ua iti aˈe i te 1 % o te huiraatira e mau kerisetiano ïa. . . . Ia au i te hoê perepitero no te pǔpǔ a François d’Assise o tei tae mai i reira i roto i te mau matahiti 50, . . . ‘ua hope ïa te tau o te mau mitionare ěê i te fenua Tapone.’”—The Wall Street Journal, no te 9 no tiurai 1986, api 1.

I te fenua Beretane, i roto i na toru ahuru matahiti i mahemo, “i nia 16 000 fare pure a te haapaoraa beretane, ua fatata e 2 000 tei opanihia no te mea aita ratou e faaohipa-faahou-hia ra. Ua topa te numera o te taata e haere ra i te pureraa e o ratou hoi te numera nainai roa ˈˈe i rotopu i te mau fenua e parauhia e kerisetiano. . . . ‘Eita e nehenehe e parau faahou e e fenua kerisetiano te fenua Beretane,’ ta [te arii epikopo no Durham] ïa i faˈi.”—The New York Times, 11 no me 1987, api A4.

“I muri aˈe i te hoê aimârôraa uˈana e rave rahi hora, i teie nei mahana ua haamana te Apooraa hau [heleni] i te hoê ture e faatia ra i te faatereraa socialiste ia fatu mai i vetahi mau tuhaa fenua rahi a te Ekalesia orthodoxe heleni. . . . Taa ê atu i te reira, te horoa ra teie ture i te tiaraa no te mau taata e ere no roto mai i te haapaoraa ia hiˈopoa ratou i te mau apooraa e te mau tomite a te Ekalesia e haapao ra i te haafaufaaraa i te moni a te Ekalesia i roto i te mau hotela, te mau vahi tarairaa marmora e tae noa ˈtu i te mau piha raveraa ohipa.”—The New York Times, 4 no eperera 1987, api 3.

 [Hohoˈa i te api 222]

Te faatupu ra na auˈa matamua e maha o te riri o te Atua hoê â huru pohe e to te mau oto pu matamua e maha

[Hohoˈa i te api 226]

Te faaite ra te pae o te auˈa e, te terono o te puaa taehae o te mana ïa ta Satani i horoa ˈtu no taua puaa ra

[Hohoˈa i te api 231]

Te haaputuputu ra te polititaraa a te mau demoni i te mau taata faatere i roto i te tupuraa hopea roa, oia hoi o Aramagedo, i reira e faataehia ˈi i nia ia ratou te mau haavaraa a Iehova

[Hohoˈa i te api 233]

Te feia o te vaiiho i te “reva” viivii a Satani ia ohipa mai i nia i to ratou mau hiaai, e roohia ïa ratou i te mau haavaraa tia a Iehova