Pene 31

Te mau ohipa a Iehova—E ohipa rahi e te faahiahia

Orama 10—Apokalupo 15:1 e tae atu i te 16:21

Tumu parau: Tei roto Iehova i to ˈna hiero [fare pure]; e niniihia te mau auˈa e hitu ra o to ˈna riri i nia i te fenua nei

Tau no te tupuraa: Mai te matahiti 1919 e tae roa ˈtu i Aramagedo

1, 2. (a) Eaha te toru o te tapao ta Ioane e faataa ra? (b) Mai ta te mau tavini o Iehova i ite e mea maoro i teie nei, e tuhaa atoa ta te mau melahi i roto i teihea ohipa?

 UA FANAU maira te hoê vahine i te hoê tamaroa. Te imi ra te hoê teni rahi i te ravea ia pau teie aiû fanau apî ia ˈna. Na teie e piti tapao tei iteahia i nia i te raˈi, o tei faataa-maitai-hia i roto i te Apokalupo pene 12, i haamaramarama ia tatou e ua tae te aimǎrôraa tahito e vai ra i rotopu i te Huaai a te vahine a te Atua e o Satani e ta ˈna ra huaai ino i to ˈna hopea. Ua huti Ioane i te ara-maite-raa i nia i te reira mau taipe i te na ôraa e: “E tapao rahi tei itea i nia i te raˈi. . . . E ua itea maira hoi te tahi tapao i nia i te raˈi.” (Apokalupo 12:1, 3, 7-12) I teie nei, te faataa maira oia i te toru o te tapao: “Ite atura vau i te hoê tapao rahi huru ê faahiahia i nia i te raˈi; e pue melahi toohitu, e tei ia ratou na pohe hopea e hitu ra, e hope hoi te riri o te Atua i te tupu i te reira.” (Apokalupo 15:1) E auraa faufaa rahi atoa to te toru o te tapao no te mau tavini a te Atua.

² A tapao na e e ohipa faufaa rahi faahou â ta te mau melahi e rave ra no te faatupuraa i te hinaaro o te Atua. E mea maoro hoi i teie nei to te mau tavini o Iehova iteraa i te reira. I te Anotau tahito, ua nehenehe i te hoê taata papai salamo faauruahia e te Atua i te faatae atu i teie faaitoitoraa i te mau melahi e: “E haamaitai ia Iehova, e to ˈna ra mau melahi e, o tei hau i te puai, e ua haapao i ta ˈna faaueraa, i te faarooraa i tana reo ia parau.” (Salamo 103:20) I teie nei, i roto i teie orama apî, ua faauehia te mau melahi ia ninii ratou i na pohe hopea toohitu ra.

3. Eaha taua mau pohe e hitu ra, e eaha ta te niniiraa o taua mau pohe e faaite ra?

³ Eaha ïa taua mau pohe ra? Mai na oto pu toohitu ra, e mau haavaraa etaeta mau ïa e te  faaite tahaa ra te reira i te manaˈo o Iehova no nia i na tuhaa taitahi e rave rau o teie nei ao e te faaara ra te reira i te mau tupuraa hopea o ta ˈna mau faaotiraa parau-tia. (Apokalupo 8:1 e tae atu i te 9:21) Te faaite ra te niniiraa o teie nei mau pohe i te tupuraa o taua mau haavaraa ra, te taime i reira Iehova e haamou ai i te feia o ta ˈna e riri ra i te mahana no to ˈna riri rahi. (Isaia 13:9-13; Apokalupo 6:16, 17) No reira ïa, na roto i te arai o taua mau pohe ra, “e hope hoi te riri o te Atua i te tupu.” Na mua ˈˈe râ Ioane a faataa mai ai i te niniiraa o taua mau pohe ra, te faahiti ra oia i te parau no te tahi mau taata o tei ore i roohia i te reira. Teie feia haapao maitai tei ore farii i te tapao o te puaa taehae, te himene ra ratou i te mau himene arueraa ia Iehova ma te faaite atoa i te mahana tahooraa na ˈna ra.—Apokalupo 13:15-17.

Te himene a Mose e a te Arenio

4. Eaha ta Ioane e mataitai ra i teie nei?

⁴ I teie nei te mataitai ra Ioane i te hoê orama faahiahia mau: “E ite atura vau, mai te mea e, e miti mai te hiˈo anaana i anoihia i te auahi; e te feia i riro ia ratou te re i taua puaa ra, e to ˈna ra hohoˈa, e ta ˈna ra tapao, e te taio i to ˈna ra iˈoa, i te tia-noa-raa i pihai iho i taua miti mai te hiˈo anaana ra, te mau ra i te mau kinura a te Atua.”—Apokalupo 15:2.

5. Te faahohoˈa ra te “miti mai te hiˈo anaana i anoihia i te auahi” i te aha?

⁵ Te “miti mai te hiˈo anaana” e faahitihia ra i ǒ nei hoê â ïa e te miti ta Ioane i ite aˈenei i mua i te terono o te Atua. (Apokalupo 4:6) Hoê â ïa huru e te “farii-vai rahi faatô,” te hoê farii pape e vai ra i roto i te hiero a Solomona i reira te mau tahuˈa e rave ai i te pape no te tamâraa ia ratou. (Te mau Arii 1, 7:23) Te faahohoˈa maitai maira te reira i “te horoiraa pape,” oia hoi te Parau a te Atua, o ta Iesu i faaohipa no te tamâraa i te amuiraa autahuˈa a te mau kerisetiano faatavaihia. (Ephesia 5:25, 26; Hebera 10:22) Teie miti mai te hiˈo anaana i “anoihia i te auahi,” te faataa ra ïa te reira e e tamatahia e  e tamâhia teie mau kerisetiano faatavaihia a auraro noa ˈi ratou i te mau titauraa teitei tei faaotihia no ratou. E hau atu â, te faahaamanaˈo ra te reira ia tatou e te vai atoa ra i roto i te Parau a te Atua te mau haavaraa puai a Iehova i nia i to ˈna ra mau enemi. (Deuteronomi 9:3; Zephania 3:8) E ite-maitai-hia vetahi o taua mau haavaraa puai ra i roto i na pohe hopea toohitu o te fatata i te niniihia.

6. (a) O vai ma te feia himene e tia noa ra i mua i te miti mai te hiˈo anaana e vai ra i nia i te raˈi, e nafea tatou e papu ai i te reira? (b) Eaha te auraa i te mea e ‘ua noaa ia ratou te re’?

⁶ I te mea, e ua faataahia te farii-vai rahi faatô i roto i te hiero a Solomona na te mau tahuˈa, te faaite ra ïa te reira e te feia himene e tia noa ra i mua i te miti mai te hiˈo anaana e vai ra i nia i te raˈi, e pǔpǔ autahuˈa ïa. E “mau kinura a te Atua” ta ratou; e nehenehe ïa ratou e faaauhia i na matahiapo e 24 e i te mau 144 000, no te mea te himene atoa ra teie na pǔpǔ i te himene ma te faaoto kinura atoa. (Apokalupo 5:8; 14:2) Te feia himene ta Ioane e ite ra e “feia i riro ia ratou te re i taua puaa ra, e to ˈna ra hohoˈa, e ta ˈna ra tapao, e te taio i to ˈna ra iˈoa.” O te mau melo ïa o te mau 144 000 e ora noa nei â i nia i te fenua i teie mau mahana hopea nei. Ei pǔpǔ, ua noaa mau â ia ratou te re. Mai te matahiti 1919 mai â, ua fatata ïa e 70 matahiti i teie nei, aita ratou i farii i te tapao a te puaa taehae e aore ra i faariro i ta ˈna ra hohoˈa ei tiaturiraa hoê roa ia noaa i te huitaata nei te hau. E rave rahi i rotopu ia ratou tei faaoromai ma te taiva ore e tae roa ˈtu i te pohe e, i teie nei, tei nia ïa ratou i te raˈi, mea papu te faaroo ra ratou ma te au rahi i te himene a to ratou mau taeae e parahi noa ra i nia i te fenua nei.—Apokalupo 14:11-13.

7. I Iseraela i tahito ra, e faaohipahia te kinura no te aha, e i te mea e faahiti-atoa-hia ra te parau no te kinura a te Atua i roto i te orama a Ioane, eaha ïa te tia ia tatou ia rave?

⁷ E mau kinura a te Atua to teie mau taata haapao maitai tei noaa ia ratou te re. E au ratou i te mau ati Levi i tahito e haamori ra ia Iehova i roto i te hiero e e himene ra ma te kinura. Te tohu atoa ra te tahi pae ma te faaoto i te kinura. (Paraleipomeno 1, 15:16; 25:1-3) Na te tai navenave o te kinura i haamaitai hau atu â i te mau himene oaoa, te mau pure arueraa e haamauruururaa o ta Iseraela i faatae atu ia Iehova. (Paraleipomeno 1, 13:8; Salamo 33:2; 43:4; 57:7, 8) I te tau ati aore ra ia afai-tîtî-anaˈe-hia ratou, eita ïa e faaroohia te kinura. (Salamo 137:2) I te mea e te vai ra te mau kinura a te Atua i roto i teie orama a Ioane, e tiai atoa ïa tatou i te hoê himene arueraa e haamauruururaa oaoa e te anaanatae rahi e faataehia ˈtu i to tatou nei Atua. *

8. Eaha te himene e himenehia ra, e eaha ta ˈna mau parau?

⁸ O te reira ïa ta Ioane e faatia ra i teie nei: “Te himene ra ratou i te himene a te tavini o te Atua ra a Mose, e te himene a te Arenio ra, i te na ôraa e, E ohipa rahi e te faahiahia ta oe, e te Fatu [Iehova] ra, e te Atua Mana hope ra e; e haerea tia e te parau mau ta oe, e te Arii o te feia moˈa ra e [te Arii hau mure ore]. O vai hoi te ore e mǎtaˈu ia oe, e te Fatu [Iehova] e, e te faahanahana i to oe iˈoa? o oe anaˈe hoi tei maitai roa: e hope atoa te mau fenua i te tae mai i mua i to aro ra a haamori ai: ua faaitehia ta oe ra mau utua tia.”—Apokalupo 15:3, 4.

9. No te aha i pii-atoa-hia ˈi teie himene e “himene . . . a Mose”?

⁹ Teie feia tei noaa ia ratou te re, te himene ra ratou i “te himene . . . a Mose,” oia hoi te hoê â huru himene e ta Mose iho i himene i te hoê â huru tupuraa. I muri aˈe i to te mau ati Iseraela iteraa i na pohe hoê ahuru i nia ia Aiphiti e te mau nuu no Aiphiti i te haamouraahia i roto i te Miti Uteute, ua aratai atura Mose ia ratou ia himene i te hoê himene arueraa e upootiaraa, e faˈi ra e: “Ei ia Iehova te hau e a muri noa ˈtu.” (Exodo 15:1-19) E mea tano iho â ïa e, i roto i te orama a Ioane, e tia i te feia tei noaa ia ratou te re i nia i te puaa taehae e e tuhaa atoa ta ratou no te faaite i na pohe hopea toohitu ra ia himene i te himene no te faahanahanaraa i te “Arii hau mure ore”!—Timoteo 1, 1:17.

10. Eaha te tahi atu â himene ta Mose i papai, e mea nafea te mau parau hopea o teie himene e tano ai no te nahoa rahi o teie nei mahana?

¹⁰ I roto i te tahi atu himene o ta Mose i papai i te tau a ineine ai Iseraela i te haru ia Kanaana, e taata paari hoi oia i reira, teie ta ˈna i parau atu i te nunaa: “E faaite hoi au i te iˈoa o Iehova; e faarahi outou i to tatou Atua.” Te faaitoito atoa  ra te mau parau hopea o taua himene ra i te feia e ere i te ati Iuda. E haaputapû mau teie mau parau faauruahia e te Atua o ta Mose i parau i te mafatu o te mau melo o te nahoa rahi no teie nei mahana: “A oaoa, e te mau etene [nunaa], e to ˈna atoa ra mau taata.” No te aha ratou e oaoa ˈi? No te mea, i teie nei, “e tahoo hoi” Iehova “i te toto o tana mau tavini; e hopoi atu oia i te utua i to ˈna ra mau enemi.” E oaoa rahi te feia atoa tei tiaturi ia Iehova ia tupu anaˈe teie haavaraa tia.—Deuteronomi 32:3, 43; Roma 15:10-13; Apokalupo 7:9.

11. Mea nafea te himene ta Ioane i faaroo i te tupu-tamau-noa-raa?

¹¹ Eita e ore Mose i te oaoa i te ora i te mahana o te Fatu ra, i to tatou nei tau, no te himene atoa e te pǔpǔ himene e vai ra i nia i te raˈi: “E hope atoa te mau fenua i te tae mai i mua i to aro ra a haamori ai”. Te tamau noa nei â teie himene hanahana i te ite i te hoê tupuraa faahiahia roa i to tatou nei mau mahana; aita ïa tatou e ite orama noa ra i te reira, te ite mau ra tatou i te mau mirioni taata no te mau “fenua” atoa i te haereraa mai ma te oaoa i roto i te faanahonahoraa a Iehova i te fenua nei.

12. No te aha ua pii-atoa-hia te himene o te feia tei noaa ia ratou te re, “te himene a te Arenio”?

¹² E ere noa râ teie himene i te himene a Mose anaˈe iho, e himene “a te Arenio” atoa râ. Nafea ïa te reira? Ua riro Mose ei peropheta a Iehova no Iseraela, ua tohu râ oia e e faatupu Iehova i te hoê peropheta ‘mai ia ˈna ra te huru.’ O te Arenio ra o Iesu Mesia taua peropheta ra. I te mea e “tavini a te Atua ra” o Mose, e Tamaiti râ a te Atua o Iesu, oia hoi te Mose Rahi. (Deuteronomi 18:15-19; Ohipa 3:22, 23; Hebera 3:5, 6) Te himene atoa ra te feia himene i “te himene a te Arenio ra.”

13. (a) Mea nafea Iesu i te riroraa ei peropheta mai ia Mose ra te huru noa ˈtu e rahi hoi oia ia Mose ra? (b) Nafea tatou e nehenehe ai e tahoê atu i te feia himene?

¹³ Mai ia Mose atoa ra te huru, ua himene Iesu i mua i te mau taata i te mau himene arueraa i te Atua e ua faaite atea mai i To ˈna upootiaraa i nia i to ˈna mau enemi taatoa. (Mataio 24:21, 22; 26:30; Luka 19:41-44) Ua tiai atoa Iesu ma te faaoromai ore i te tau e haere mai ai te mau nunaa atoa no te arue ia Iehova, e ei “Arenio a te Atua,” ua faatusia oia ia ˈna iho, ua horoa oia i to ˈna ora taata ia tupu te reira. (Ioane 1:29; Apokalupo 7:9; hiˈo Isaia 2:2-4; Zekaria 8:23.) Mai ia Mose te huru i te haafaufaaraa e te faahanahanaraa i te iˈoa o te Atua, ua faaite atoa Iesu i taua iˈoa ra. (Exodo 6:2, 3; Salamo 90:1, 17; Ioane 17:6) I te mea e haavare ore Iehova, e tupu mau ïa ta ˈna mau tǎpǔ hanahana. No reira ïa, ma te tahoê mau i teie nau taata himene haapao maitai, oia hoi te Arenio raua o Mose, e turu atoa ïa tatou i te mau parau o taua himene ra e: “O vai hoi te ore e mǎtaˈu ia oe, e te Fatu [Iehova] e, e te faahanahana i to oe iˈoa?”

Te mau melahi e te mau auˈa

14. O vai ta Ioane e ite ra i te haereraa mai i rapae au i te hiero [fare pure], e eaha tei horoahia ˈtu ia ratou?

¹⁴ E mea tano ia faaroo tatou i te himene a te feia faatavaihia e te varua e o tei noaa ia ratou te re. No te aha? No te mea ua haapuroro ratou i te fenua nei te mau haavaraa e vai ra i roto i te mau auˈa o tei î i te riri o te Atua. Area râ, no te niniiraa i taua mau auˈa ra e titauhia tei hau aˈe i te taata noa, mai ta Ioane e faatia ra e: “E muri aˈe i te reira, hiˈo atura vau, e inaha iritihia aˈera te hiero o te sekene faaiteraa i nia i te raˈi ra: e ua haere maira na melahi toohitu, o tei mau i na pohe e hitu ra, mai roto mai i te hiero ra, ma te ahu teatea e te anaana i te ahuraa, e ma te tatuahia te ouma i te tatua auro ra. E ua tuu maira te hoê o na mea ora e maha ra i e hitu auˈa auro i na melahi toohitu ra, ua îî i te riri o te Atua, o te tia i te oraraa e a muri noa ˈtu.”—Apokalupo 15:5-7.

15. No te aha eita tatou e maere i te mea e no roto mai i te hiero [fare pure] te mau melahi e hitu ra i te haereraa mai i rapae au?

¹⁵ I te tau o te hiero o te mau ati Iseraela, te vai ra i roto, te mau hohoˈa o te mau mea no te raˈi, o te tahuˈa rahi anaˈe râ te nehenehe e tomo i roto i te vahi Moˈa Roa, o tei piihia i ǒ nei “te hiero [te fare pure].” (Hebera 9:3, 7) Te faahohoˈa ra te reira i te hoê vahi i nia i te raˈi, te vahi tei reira Iehova. Area râ i nia i te raˈi, e ere te Tahuˈa Rahi anaˈe o Iesu Mesia te nehenehe e tomo i mua i te aro o Iehova, o te mau melahi atoa râ. (Mataio 18:10; Hebera 9:24-26) E ere ïa i te mea maere i te iteraa e hitu mau melahi i te haereraa mai i rapae au i te hiero [fare pure] e vai ra i nia i te raˈi. Na Iehova iho i horoa i teie ohipa na ratou: oia hoi te niniiraa i te mau auˈa tei îî i te riri o te Atua.—Apokalupo 16:1.

16. (a) Na te aha e faaite ra e ua faaî mau te mau melahi i te mau titauraa e au no te raveraa i ta ratou ohipa? (b) Na te aha e haapapu ra e e rave atoa vetahi ê i teie ohipa rahi oia hoi te niniiraa i te mau auˈa taipe?

 ¹⁶ Ua faaî maite te mau melahi i te mau titauraa e au no te faatupuraa i teie ohipa. Ua ahu ratou i te mau ahu teatea e te anaana, oia hoi e mea mâ e e mea moˈa ratou i te pae varua, e mea tia atoa i mua i te aro o Iehova. Ua tatua-atoa-hia ratou i te tatua auro. E peu matauhia ia tatua te hoê taata ia ˈna no te raveraa i te hoê ohipa. (Levitiko 8:7, 13; Samuela 1, 2:18; Luka 12:37; Ioane 13:4, 5) Ua tatuahia ïa te mau melahi no te raveraa i te hoê ohipa. E hau atu â i te reira, e mau tatua auro ïa. I roto i te sekene i tahito ra, e ravehia te auro no te faahohoˈaraa i te mau mea a te Atua e vai ra i nia i te raˈi. (Hebera 9:4, 11, 12) E nehenehe ïa i te faaoti e e ohipa faufaa rahi e e ohipa na te Atua ta teie mau melahi e tia ia rave. E rave atoa vetahi ê i teie ohipa rahi. Oia mau, te horoa ra te hoê o na mea ora e maha i te mau auˈa ia ratou ra. Mea papu o te mea ora matamua teie, mai te liona ra te huru, e faahohoˈa ra i te mǎtaˈu ore e te itoito fati ore e au no te faaiteraa i te mau haavaraa a Iehova.—Apokalupo 4:7.

Tei roto Iehova i to ˈna ra hiero [fare pure]

17. Eaha ta Ioane e parau ra no nia i te hiero [fare pure], e eaha ta te reira e faahaamanaˈo ra ia tatou no nia i te hiero e vai ra i Iseraela i tahito ra?

¹⁷ I te pae hopea, no te faaoti i teie tuhaa o te orama, te na ô ra Ioane e: “Ua î te hiero i te au  auahi, no te hanahana o te Atua, e no to ˈna ra mana; e aore roa i tia i te hoê ia tomo noa ˈtu i roto i taua hiero ra, e hope noa ˈtu na pohe e hitu a na melahi toohitu ra i te faatupuhia.” (Apokalupo 15:8) I te tahi mau taime i roto i te aamu o Iseraela, ua moe te hiero i te hoê ata e no te reira aita ˈtura te mau tahuˈa i nehenehe i te tomo faahou i roto i te hiero i mua i teie faaiteraa hanahana a Iehova. (Te mau Arii 1, 8:10, 11; Paraleipomeno 2, 5:13, 14; hiˈo Isaia 6:4, 5.) Ua itehia te reira i te taime Iehova a ohipa ˈi i te fenua nei.

18. Afea te mau melahi e hoˈi ai i mua i te aro o Iehova no te faaiteraa ˈtu ia ˈna i te ohipa o ta ratou i rave?

¹⁸ Te anaanatae atoa ra Iehova i te mau ohipa e tupu ra i teie nei tau i nia i te fenua nei. Te hinaaro ra oia ia faaoti te mau melahi i ta ratou ohipa. Te ora ra tatou i te hoê anotau haavaraa faufaa rahi, mai tei faataahia ˈtu i roto i te Salamo 11:4-6: “Tei roto Iehova i to ˈna ra nao moˈa; Iehova, tei te raˈi to ˈna terono, te hiˈo maira to ˈna mata; e te tamata maira to ˈna opani mata i te tamarii a te taata nei. Te tamata maira Iehova i te feia parau-tia, area te taiata e te rave parau ino ra, ua riri roa tana aau ia ˈna. E haamairi mai oia i te pura auahi e te gopheri i nia i te paieti ore ra; e te vero rahi riaria, o ta ratou ïa tufaa i ta ratou auˈa.” Eita na melahi e hitu ra e hoˈi i mua i te aro hanahana o Iehova e ia hope noa ˈtu na pohe e hitu i te niniihia i nia i te feia ino.

19. (a) Eaha te faaueraa tei horoahia, e na vai te reira? (b) Afea te niniiraa o te mau auˈa taipe i te haamataraa?

¹⁹ E ua faaroohia ihora te hoê faaueraa riaria mau: “Ua faaroo atura vau i te hoê reo rahi no roto mai i te hiero ra, i te parauraa mai i na melahi toohitu ra e, A haere a ninii i na auˈa îî i te riri o te Atua i nia iho i te fenua ra.” (Apokalupo 16:1) Na vai teie faaueraa? Na Iehova iho te reira, no te anaana o to ˈna ra hanahana e to ˈna puai aore atura te hoê noa ˈˈe taata e nehenehe e tomo i roto i te hiero [fare pure]. Ua haere maira Iehova i roto i to ˈna hiero i te pae varua i te matahiti 1918 no te haava. (Malaki 3:1-5) E au ra e i muri iti noa iho i taua taio matahiti ra to ˈna faaueraa ia niniihia te mau auˈa o te riri o te Atua. I te mea mau, ua haamata i te faaitehia, ma te puai, te mau haavaraa e vai ra i roto i taua mau auˈa taipe ra i te matahiti 1922, e te puai noa ˈtura te reira faaiteraa e tae roa mai i teie nei mahana.

Te mau auˈa e te mau oto pu

20. Eaha ta te mau auˈa o te riri o Iehova e faaite ra, e mea nafea ratou i te niniiraahia?

²⁰ Te faaite tahaa ra te mau auˈa o te riri o Iehova i te mau tupuraa i te ao nei ia au i to Iehova huru hiˈoraa, e te faaite ra te reira i te mau haavaraa o ta ˈna e faatae mai. Te ninii ra te mau melahi i te mau auˈa na roto i te arai o te amuiraa o te mau kerisetiano faatavaihia e vai noa ra i nia i te fenua nei, oia hoi te feia e himene ra i te himene a Mose e te himene a te Arenio. Ma te faaite i te Basileia ei parau apî maitai, te faaite ra te pǔpǔ a Ioane ma te mǎtaˈu ore i te mea e vai ra i roto i teie mau auˈa o te riri. (Mataio 24:14; Apokalupo 14:6, 7) E poroi hau ia faaite anaˈe ratou i te tiamâraa no te huitaata nei, e e poroi aroraa atoa râ ia faaara anaˈe ratou no nia i “te mahana tahooraa na to tatou Atua.”—Isaia 61:1, 2.

21. Mea nafea na tapao o te mau auˈa matamua e maha o te riri o te Atua i au maite ai i te mau tapao o na oto pu matamua e maha, e i roto teihea tuhaa ratou i taa ê ai?

²¹ E niniihia na auˈa matamua e maha o te riri o te Atua mai to te mau oto pu matamua e maha i nia i te hoê â mau huru tapao; oia hoi, te fenua, te miti, te mau anavai e te mau pape pihaa, e tae noa ˈtu i te mau tiarama o te raˈi. (Apokalupo 8:1-12) Ua faaite mai te mau oto pu i te mau pohe o te faataehia ˈtu i nia i “te toru o te tufaa,” e roohia râ te taatoaraa i te niniiraa o te mau auˈa o te riri o te Atua. I te mea e, ua roo-matamua-hia te amuiraa faaroo kerisetiano, oia hoi “te toru o te tufaa” i te mau pohe i te mahana o te Fatu ra, eita ïa te hoê noa ˈˈe tuhaa o te amuiraa o te mau mea a Satani i erehia i te mau haavaraa a Iehova o te faariri ia ratou e i te mau mauiui o ta ratou e faatupu.

22. Eaha te mea i taa ê ai te mau oto pu hopea tootoru, e mea nafea ratou i te taaihia ˈtu i na auˈa hopea tootoru o te riri o te Atua?

²² E mea taa ê mau na oto pu hopea e toru no te mea ua parauhia e e mau ati. (Apokalupo 8:13; 9:12) Na ati toopiti matamua no nia ïa i te mau akaride e te nuu puaahorofenua, e te toru no nia ïa i te fanauraahia mai te Basileia o Iehova. (Apokalupo 9:1-21; 11:15-19) Mai ta tatou e ite atu i teie nei, te faaite atoa ra na auˈa tootoru hopea o te riri o te Atua i te tahi o taua mau mea ra, ua taa ê rii râ ratou i teie e toru ati. A haapao maitai anaˈe na i teie nei i te mau faaiteraa faufaa rahi o te iteahia mai i te niniiraahia te mau auˈa o te riri o Iehova.

[Nota i raro i te api]

[Uiraa haapiiraa]