Ia î anaˈe te fenua i te ite no nia i te Atua
Pene 19
Ia î anaˈe te fenua i te ite no nia i te Atua
1, 2. Nafea te poieteraa a Iehova i te faainoraahia?
A FERURI na e no oti noa ˈtura te hoê taata peni tuiroo i te peni i te hoê hohoˈa nehenehe mau. Ma te tia, e faariro oia i te reira ei mea maitai roa—ei ohipa faahiahia roa ˈˈe! E ia po, haere maira te hoê enemi pohehae e faaino i te reira. Ma te papu maitai, e haamauiui rahi te reira i te taata peni. E auê hoi o ˈna i te hinaaro rahi e ite e ia tapeahia te taata i totova e! E e nehenehe hoi oe e feruri i te hinaaro rahi o te taata peni e ia faaapîhia ta ˈna hohoˈa ia au i to ˈna haviti matamua.
2 Mai taua taata peni hohoˈa ra, ua poiete o Iehova i te hoê ohipa faahiahia roa ia ˈna i faaineine i te fenua e a tuu atu ai i te taata i nia iho. I muri aˈe i to ˈna poieteraa i te tane e te vahine, ua faariro aˈera oia i ta ˈna mau ohipa atoa i te fenua nei ei “mea maitai roa.” (Genese 1:31) E mau tamarii o Adamu raua o Eva na te Atua iho, e ua here hoi oia ia raua. Ua manaˈo oia no raua i te hoê oraraa oaoa e te hanahana no a muri aˈe. Parau mau, ua aratai o Satani ia raua i roto i te orure hau, aita râ te poieteraa faahiahia mau a te Atua i ino eita ˈtu ai e nehenehe faahou e tatai.—Genese 3:23, 24; 6:11, 12.
3. Eaha ‘te oraraa mau’?
3 Ua faaoti aˈera te Atua e faaafaro i te mau ohipa. Te hinaaro rahi nei â oia e ia fanaˈo tatou i te hoê oraraa mai ta ˈna i opua i te omuaraa ra. E ere to tatou oraraa poto e te arepurepu i ‘te oraraa mau,’ e oraraa ino roa ˈˈe hoi ia faaauhia i ta Iehova i opua. ‘Te oraraa mau’ ta Iehova e hinaaro ra no tatou o te “ora mure ore” ïa i roto i te mau huru tia roa.—Timoteo 1, 6:12, 19.
4, 5. (a) Nafea te tiaturiraa o te Paradaiso ia tupu mai? (b) No te aha e tia ia tatou ia feruri i nia i to tatou tiaturiraa no a muri aˈe?
4 E faatupu te ite no nia i te Atua i te hopoia i mua ia Iehova. (Iakobo 4:17) A feruri na râ i te mau haamaitairaa ta oe e fanaˈo ia faaohipa oe i taua ite ra e noaa ˈtu ai te ora mure ore. I roto i ta ˈna Parau, te Bibilia, ua horoa o Iehova i te hoê hohoˈa haviti mau no nia i te huru o taua oraraa ra i roto i te Paradaiso i nia i te fenua nei e fatata roa maira. Papu maitai, ei nunaa no Iehova eita tatou e tavini i te Atua no te mea noa e haamaitairaa ta tatou e hinaaro ra. Te tavini nei tatou i te Atua no te mea te here ra tatou ia ˈna. (Mareko 12:29, 30) Hau atu, eita te ora e noaa ei faahoˈiraa no te mea ua tavini tatou ia Iehova. E ô te ora mure ore no ǒ mai i te Atua ra. (Roma 6:23) Mea maitai no tatou ia feruri i nia i taua huru oraraa ra no te mea te faahaamanaˈo maira te tiaturiraa o te Paradaiso ia tatou, i te huru mau o te Atua ra o Iehova—o oia te “faautua [ma te here] i te feia i imi papu ia ˈna ra.” (Hebera 11:6) Na teie tiaturiraa mau i roto i to tatou feruriraa e i roto i to tatou mafatu e tauturu ia tatou ia faaoromai i te mau faateimaharaa a te ao a Satani.—Ieremia 23:20.
5 I teie nei, ia feruri maite tatou i te tiaturiraa i niuhia i nia i te Bibilia no nia i te ora mure ore i roto i te Paradaiso no a muri aˈe i nia i te fenua nei, e tia ˈi. Eaha te huru o te oraraa ia î anaˈe te fenua i te ite no nia i te Atua?
I MURI AˈE IA ARAMAGEDO—TE PARADAISO I NIA I TE FENUA NEI
6. Eaha o Aramagedo, e eaha to ˈna auraa no te huitaata?
6 Mai tei faaitehia ˈtu na, fatata roa te Atua ra o Iehova i te haamou i te amuiraa ino o te mau mea e vai nei. Te piri oioi roa ˈtura hoi te ao nei i ta te Bibilia e pii ra ia Aramagedo. E riro paha teie parau i te faahaamanaˈo i te tahi mau taata i te hoê ati atomi e faatupuhia e te mau nunaa o te aro ra, e ere roa ˈtu râ o Aramagedo mai te reira te huru. Mai ta te Apokalupo 16:14-16 e faaite ra, o Aramagedo o “te tamaˈi i taua mahana rahi o te Atua Puai hope ra” ïa. E ô “te [mau] huiarii o te ao atoa nei,” aore ra te mau nunaa, i roto i teie tamaˈi. Fatata roa te Tamaiti a te Atua ra o Iehova, oia hoi te Arii i nominohia, i te ô atu i roto i te tamaˈi. Ua papu maitai te faahopearaa. E haamouhia te feia atoa e patoi atu i te Basileia o te Atua e tei riro ei tuhaa no te amuiraa ino a Satani. O te feia haapao maitai anaˈe ia Iehova o te ora mai.—Apokalupo 7:9, 14; 19:11-21.
7. Ihea roa o Satani e ta ˈna mau demoni e tuuhia ˈi i te roaraa o na Tausani Matahiti Faatereraa a te Mesia, e nafea te huitaata ia faufaahia i te reira?
7 A feruri na e ua ora mai oe i taua ati rahi ra. Eaha ïa te huru oraraa e itehia i nia i te fenua nei i roto i te ao apî i tǎpǔhia e te Atua? (Petero 2, 3:13) Aita e faufaa e manaˈonaˈo noa, inaha te haapapu maira te Bibilia ia tatou, e mea faahiahia mau hoi ta ˈna e parau ra. Te ite ra tatou e eita o Satani e ta ˈna mau demoni e nehenehe faahou e faaino, e e tapeahia ratou i roto i te hoê abuso aita e ohipa i reira i te roaraa o na Tausani Matahiti Faatereraa a Iesu Mesia. Eita teie mau mea ora poietehia, iino e te tairoiro e tapuni noâ no te faatupu i te arepurepuraa e no te tamata i te turai ia tatou ia patoi atu i te Atua. Auê i te mâmâ mau e!—Apokalupo 20:1-3.
8, 9. I roto i te ao apî, eaha te tupu i nia i te mau mauiui, te maˈi, e te ruhiruhiaraa?
8 I te taime au ra, e ore te mau huru maˈi atoa. (Isaia 33:24) E tia mai te pirioi, e haere, e horo, e e ori ratou ma te pautuutu te avae. I muri aˈe i te mau matahiti oraraa i roto i to ratou ao muhu ore, e faaroo te tariˈa turi i te mau umereraa na pihai iho ia ratou. E mau te aho o te matapo ia ite to ˈna mata i te mau peni e te mau hohoˈa huru rau haviti mau. (Isaia 35:5, 6) A tahi ra ïa ratou e ite ai i te hohoˈa o te feia herehia e ratou ra! I reira ra, e riro paha to ratou mata i te mohimohi maa taime iti no te mau roimata oaoa mau e tahe mai.
9 A feruri na! Aita e titia mata faahou, aita e rore e e turutootoo faahou, aita e raau rapaauraa faahou, aita e fare rapaauraa niho aore ra e fare maˈi faahou! Eita te maˈi i te pae o te mau manaˈo hohonu e te taiâ rahi e faaere faahou i te taata i te oaoaraa. Eita te tamarii e mauiui faahou i te maˈi. E tauihia te mau faainoraa a te ruhiruhiaraa. (Ioba 33:25) E riro tatou ei mau taata oraora maitai aˈe, e te puai aˈe. I te mau poipoi atoa e ara mai tatou mai te hoê rui taoto haumǎrû mau e te ito faaapîhia, ma te itoito maitai e te hinaaro uˈana i te hoê mahana apî, oraraa oaoa rahi e te ohipa faahiahia mau.
10. Eaha te ohipa e horoahia ˈtu na te feia e ora ˈtu i Aramagedo?
10 E rave rahi mau ohipa oaoa mau te faatupuhia e te feia e ora ˈtu i Aramagedo. E faariro ratou i te fenua ei paradaiso. E tatarahia te mau toetoea atoa o te amuiraa viivii o te mau mea tahito. E mono mai te mau ô e te mau aua maa hotu e te mau faaapu i te mau vahi veve e te mau fenua i ino roa. E fanaˈo te taatoaraa i te fare nahonaho e te au maitai. (Isaia 65:21) A mairi noa ˈi te tau, e aano roa ˈtu â taua mau tuhaa o te fenua nei mai te paradaiso ra te huru e e tupu noa e tae noa ˈtu i te taime te palaneta taatoa nei e ite ai i te huru nehenehe mau ta te Poiete i tuu mai i roto i te ô i Edene ra. Auê hoi te faahiahia e ia apiti atu tatou i roto i taua ohipa faaapîraa ra e!
11. Eaha te mau taairaa o te huitaata e te mau mea i nia i te fenua nei e te mau animala a muri aˈe?
11 E tupu taua mau mea atoa ra i raro aˈe i te aratairaa a te Atua ia ore te mau mea atoa e haaati ra ia tatou ia ino. E vai hau noa te mau taata e te mau animala. Maoti hoi i te taparahi ia ratou ma te taehae, e hopoia â na te taata i te haapaoraa i te fenua nei, ma te aupuru maitai ia ratou. A feruri na i te mau luko e te mau arenio, i te mau liona e te mau puaatoro e tamaa amui ra—aita roa ˈtu te mau animala rata e haapeapea-noa-hia ˈˈe. Eita atoa te hoê tamaiti iti e mǎtaˈu i te mau animala taehae, eita atoa te hau o te ao apî e faahuehuehia e te feia taehae. (Isaia 11:6-8) Auê hoi ao apî hau mau e!
E TAUIHIA TE HUITAATA
12. Nafea te Isaia 11:9 i te tupuraa i teie nei mahana, e nafea te reira ia tupu roa i roto i te Paradaiso?
12 Te faaite mai nei te Isaia 11:9 e no te aha te ino e ore ai e rave-faahou-hia i nia i te fenua nei. Te na ô ra oia e: “E î hoi te fenua i te ite ia Iehova; mai te vairaa miti e î i te miti ra.” E tano te reira i te taata no te mea eita te mau animala e nehenehe e haapii i “te ite ia Iehova” e e faatupu i te mau tauiraa, no te mea na te hoê ite faataa-aˈena-hia e faatere ra ia ratou. E taui mau â te ite no nia i to tatou Poiete i te taata. Eita e ore ua rave aˈena oe i te tahi mau tauiraa ia oe i faaohipa i te ite no nia i te Atua i roto i to oe oraraa. Ua na reira e tau mirioni taata. No reira, ua haamata aˈena ïa taua parau tohu ra i te tupu i roto i te feia e tavini ra ia Iehova. Te faaite atoa râ oia i te parau no te tau te mau taata e haapae ai i te mau huru mai to te animala ra aore ra i te mau huru haavî uˈana e e riro mai ai ei feia hau e a muri noa ˈtu.
13. Eaha te porotarama haapiiraa e faatupuhia i nia i te fenua nei?
13 Auê hoi i te faahiahia ia î anaˈe te fenua i te ite no nia i te Atua e! E faanahohia te hoê porotarama haapiiraa e ati tia ˈˈe teie nei ao i raro aˈe i te aratairaa a te Arii ra o Iesu Mesia e ta ˈna 144 000 feia faatere e apiti atu ia ˈna. E i reira te mau “otaro” apî e faaohipahia ˈi. Papu maitai, o te mau faaueraa papaihia hoi te reira na te Atua o te riro ei niu no te haapiiraa i te mau taata na te ao atoa nei. (Apokalupo 20:12) E haapii te huitaata nei i te hau, eiaha râ te tamaˈi. E ore roa te mau mauhaa tamaˈi haamou atoa. (Salamo 46:9) E haapiihia te mau taata o te ao apî ia faaite i te here, te faatura e te tura i nia i to ratou taata-tupu.
14. Nafea te ao nei ia taa ê ia riro anaˈe te huitaata ei utuafare tahoê?
14 E riro te huitaata nei ei utuafare tahoê. Aita e mau patu faahou no te haafifi i te autahoêraa e te autaeaeraa. (Salamo 133:1-3) Eita te mau fare e ponaohia no te paruru i te feia eiâ. E mana hoi te hau i roto i te mau mafatu atoa, i roto i te mau fare atoa, i te mau vahi atoa o te fenua nei.—Mika 4:4.
TE TIA-FAAHOU-RAA OAOA MAU
15. Eaha na pǔpǔ e piti e faatia-faahou-hia mai i nia i te fenua nei?
15 I te roaraa o taua Tausani Matahiti ra, e tupu te tia-faahou-raa. Eita te feia i hara mau i te varua moˈa aore ra te puai ohipa o te Atua, ma te patoi i ta ˈna mau faaiteraa aore ra mau aratairaa ma te tatarahapa ore, e faatia-faahou-hia mai. (Mataio 23:15, 33; Hebera 6:4-6) Papu maitai, na te Atua e faaoti e o vai tei hara i to ˈna varua moˈa. E piti râ pǔpǔ taa maitai te faatia-faahou-hia mai—“te feia parau-tia e te feia parau-tia ore.” (Ohipa 24:15) I te mea e e ravehia te mau mea ma te nahonaho, mea tano iho â ïa ia manaˈo e te feia matamua e faatia-faahou-hia mai no te ora i nia i te fenua nei o te feia parau-tia ïa i tavini ia Iehova ma te haapao maitai.—Hebera 11:35-39.
16. (a) O vai to roto i te “feia parau-tia” o te faatia-faahou-hia mai i nia i te fenua nei? (b) O vai te feia haapao maitai no te tau tahito ta oe e hinaaro nei e farerei, e no te aha?
16 Maoti hoi i te faaroo i te parau apî no nia i te mau tamaˈi, te mau ati, e te pohe, e mau tabula oaoa mau ïa no nia i te tia-faahou-raa te faaitehia mai i te mau tavini a Iehova. E mea anaanatae mau ia ite i te parau no nia i te hoˈiraa mai o te mau tane e te mau vahine mai ia Abela, Enoha, Noa, Aberahama, Sara, Ioba, Mose, Rahaba, Ruta, Davida, Elisaia, Esetera. Auê hoi te putapû ta ratou mau aamu e faatia mai ia horoa mai ratou i te mau tuhaa rii no nia i te mau faatiaraa bibilia e rave rahi! Papu maitai e hinaaro ratou e te feia haapao maitai o tei pohe noa aˈenei, e ite no nia i te hopea o te amuiraa a Satani e mea nafea to Iehova faaraaraa i to ˈna iˈoa moˈa e to ˈna faatiaraa i to ˈna tiaraa mana arii.
17. Eaha te tauturu ta te feia haapao maitai e horoa i te feia e faatiafaahou-hia mai?
17 Auê hoi te tauturu rahi ta teie feia haapao maitai e horoa mai i te roaraa o te tuhaa hopea o te tia-faahou-raa, ia faatia-faahou-hia mai te mau tausani mirioni “feia parau-tia ore” i te tapea a te pohe! Aita te rahiraa o te huitaata nei i fanaˈo i te ite no nia ia Iehova. Ua ‘haapouri o Satani i to ratou aau.’ (Korinetia 2, 4:4) E tumâhia râ te ohipa a te Diabolo. E faahoˈihia mai te feia parau-tia ore i nia i te hoê fenua nehenehe mau e te hau. E fariihia ratou e te hoê nunaa nahonaho maitai no te haapii atu ia ratou no nia ia Iehova e ta ˈna Tamaiti e faatere ra, o Iesu Mesia. A ite e a here noa ˈi te mau tausani mirioni taata i to ratou Poiete, e î ïa te fenua nei i te ite no nia ia Iehova mai tei ore â i iteahia aˈenei.
18. Eaha ïa to oe huru ia farii anaˈe oe i te feia e faatia-faahou-hia mai o ta oe e here ra?
18 Auê hoi oaoaraa rahi ta te tia-faahou-raa e faatupu i roto i to tatou mafatu e! O vai tei ore aˈenei i mauiui i te ohipa a to tatou enemi ra o te pohe? Oia mau, o vai o tei ore i mauiui roa aˈenei i te motu-ê-raa te taairaa o te here aore ra o te auhoaraa ia pohe tei herehia e tatou i te maˈi, te ruhiruhiaraa, te ati purumu, aore ra te haavîraa uˈana? A feruri na i teie nei i te oaoaraa o te mau amuimuiraa i roto i te Paradaiso. E horo atu hoi te mau metua vahine e te mau metua tane, te mau tamarii tamaroa e te mau tamarii tamahine, te mau hoa e te mau fetii, e tauahi te tahi i te tahi, ma te ata e te taˈi i te oaoa.
I TE PAE HOPEA TE HURU TAATA TIA ROA!
19. Eaha te semeio e itehia i te roaraa o te Tausani Matahiti?
19 I te roaraa o te Tausani Matahiti, e tupu te hoê semeio faahiahia mau. No te huitaata nei, e riro paha ei tuhaa putapû roa ˈˈe no te Tausani Matahiti Faatereraa a te Mesia. E aratai o Iehova i ta ˈna Tamaiti ia faaohipa i te faufaa o te tusia taraehara i nia i te mau tane e te mau vahine tataitahi haapao maitai e te auraro. Na roto i taua ravea ra, e faaorehia te mau hara atoa e e arataihia hoi te huitaata nei i nia i te huru taata tia roa.—Ioane 1, 2:2; Apokalupo 21:1-4.
20. (a) Eaha te auraa ia riro oia ei taata tia roa? (b) Afea te feia e ora ˈtu i Aramagedo e te feia e faatia-faahou-hia mai e haamata ˈi i te ora papu maitai roa?
20 Te huru tia roa! Eaha ïa to ˈna auraa? O te ite-faahou-raa ïa i te ora ta Adamu e o Eva i fanaˈo na hou aˈe raua i hara ˈi i te Atua ra o Iehova. I te pae tino, i te pae feruriraa, i te pae no te mau manaˈo hohonu, i te pae morare, i te pae varua—i roto i te mau tuhaa atoa e nehenehe e manaˈohia—e faaî te feia tia roa i te mau faaueraa a te Atua. Hoê ra anei huru to te mau taata atoa? Eita roa ˈtu! Te mau mea i poietehia e Iehova—te mau tumu raau, te mau tiare, te mau animala—te haapii paatoa maira ia tatou e mea au na ˈna i te huru rau. E mau ihotaata e e mau aravihi taa ê to te feia tia roa. E fanaˈo te taata tataitahi i te ora mai ta te Atua i faanaho. Te na ô ra te Apokalupo 20:5 e: “Area te tahi pae o te feia i pohe ra, ia hope taua na matahiti hoê tausani ra, i ora faahou ai.” Mai te feia rahi roa o te ora ˈtu i Aramagedo, e ora roa mai te feia e faatia-faahou-hia ia tapae ratou i nia i te huru taata tia roa e aita e hara faahou.
21. (a) Eaha te ohipa e tupu i te hopearaa o te Faatereraa Tausani Matahiti a te Mesia? (b) Eaha te tupu i nia ia Satani i te pae hopea e i nia i te taatoaraa o te turu atu ia ˈna?
21 E farerei â te feia tia roa i te hoê tamataraa hopea. Ia hope te Tausani Matahiti, e tuuhia o Satani e ta ˈna mau demoni mai roto atu i te abuso no te hoê taime poto e e faatiahia ratou e rave i te hoê tutavaraa hopea ia fariu ê te mau taata ia Iehova. E tuu te tahi pae i te mau hinaaro tano ore i nia ˈˈe i te here o te Atua, e haapotohia râ taua orureraa hau ra. E haamou o Iehova i taua mau taata miimii ra e tae noa ˈtu hoi ia Satani e ta ˈna mau demoni atoa. E faaore-roa-hia e a muri noa ˈtu te feia rave hara ra.—Apokalupo 20:7-10.
EAHA ÏA TA OE E RAVE?
22. Eaha ta oe e titau ra e rave i roto i te Paradaiso?
22 E ora mure ore to mua i te feia e here ra i te Atua ra o Iehova e e parahi tamau â ratou i roto i te Paradaiso i nia i te fenua nei. Mea fifi roa hoi na tatou ia feruri i to ratou oaoa, e e nehenehe atoa oe e apiti atu i te reira. Te upaupa, te ohipa aravihi, te ohipa rima î—inaha, e riro te mau ohipa a te huitaata tia roa ei hau aˈe i te mau ohipa maitatai roa ˈˈe e ravehia e te feia tuiroo roa ˈˈe o te ao tahito! I muri iho, e riro te mau taata ei feia tia roa e e tau taotia-ore-hia hoi to mua ia ratou. Ei taata tia roa, a feruri na eaha ta oe e nehenehe e rave. A feruri atoa eaha ta oe e ta to mau taata-tupu e nehenehe e ite no nia i te poieteraa a Iehova—no nia i te mau tausani mirioni haapueraa fetia ati noa ˈˈe te ao nei e tae roa ˈtu i te faito nainai roa ˈˈe o te mau huˈahuˈa rii atomi. E faaoaoa hoi te mau mea atoa ta te huitaata e faatupu i te mafatu o to tatou Metua here i te raˈi ra o Iehova.—Salamo 150:1-6.
23. No te aha te oraraa i roto i te Paradaiso e ere roa ˈtu i te mea haumani?
23 I reira e ere hoi te oraraa i te mea haumani. E rahi noa ˈtu â te anaanatae a mairi noa ˈi te tau. Ua ite oe, aita e hopea to te ite no nia i te Atua. (Roma 11:33) I te roaraa o te oraraa mure ore, e rahi noa ˈtu â te mau mea e tia ia haapiihia e te mau ohipa apî te tia ia maimihia. (Koheleta 3:11) A tamau noa ˈi oe i te haapii no nia i te Atua ra o Iehova, e ora noa oe—eiaha i te tahi noa tau matahiti e a muri noa ˈtu râ!—Salamo 22:26.
24, 25. No te aha e tia ia oe i teie nei iho â ia ora ia au maite i te ite no nia i te Atua?
24 Eita anei te hoê oraraa oaoa no a muri aˈe i roto i te paradaiso i nia i te fenua nei e haafaufaa i te mau tutavaraa aore ra i te mau faatusiaraa atoa o ta oe e rave? Papu maitai oia! Inaha hoi, ua pûpû mai Iehova ia oe ra i te taviri no taua oraraa faahiahia no a muri aˈe. Te taviri o te ite ïa no nia i te Atua. E faaohipa anei oe i te reira?
25 Ia here anaˈe oe ia Iehova, e oaoa ïa oe i te faatupu i to ˈna hinaaro. (Ioane 1, 5:3) Ia tamau noa oe i roto i taua haerea ra, auê ïa mau haamaitairaa ta oe e fanaˈo! Ia faaohipa oe i te ite no nia i te Atua, e nehenehe te reira e horoa mai no oe i te hoê oraraa oaoa aˈe, noa ˈtu i roto i teie nei ao arepurepu. E mau haamaitairaa rarahi mau to a muri aˈe, inaha teie te ite e aratai i te ora mure ore! O teie te taime tano no oe ia ohipa. Ia faaoti na oe i te ora ia au maite i te ite no nia i te Atua. A faaite i to oe here no Iehova. A faahanahana i to ˈna iˈoa moˈa e a haapapu e e haavare o Satani. Ei faahoˈiraa, e oaoa ïa te Atua ra o Iehova, te Tumu o te paari e o te ite mau, ia oe ma to ˈna mafatu here rahi. (Ieremia 31:3; Zephania 3:17) E e here mai hoi oia ia oe e a muri noa ˈtu!
A HIˈOPOA NA I TO OE ITE
Eaha ‘te oraraa mau’?
I muri aˈe ia Aramagedo, eaha te itehia i nia i te fenua nei?
O vai te faatia-faahou-hia mai i te fenua nei?
Nafea te huitaata ia riro mai ei feia tia roa e nafea ratou ia tamatahia i te pae hopea?
Eaha to oe tiaturiraa no nia i te Paradaiso?
[Uiraa haapiiraa]
[Hohoˈa i te mau api 188, 189]
Te tiaturi ra anei oe e ora i roto i te Paradaiso, ia î te fenua i te ite no nia i te Atua?
