Iesu Mesia—Te taviri e aratai i te ite no nia i te Atua
Pene 4
Iesu Mesia—Te taviri e aratai i te ite no nia i te Atua
1, 2. Mea nafea ta te mau haapaoraa o teie nei ao faainoraa i te taviri e aratai i te ite no nia i te Atua?
TE TIA noa ra oe, i te uputa o to oe fare, e paimi ra i ta oe mau taviri. Mea toetoe e te pouri, e te ru ra hoi oe e tomo atu i roto mai—e ia taviri oe eita e matara. Mai te huru ra ïa e o te taviri mau ta oe e faaohipa ra, eita râ te rota opani e hautiuti. Auê hoi oe i te ahoaho e! E hiˈo â oe i ta oe mau taviri. Te faaohipa ra anei oe i te taviri mau? Ua faaino anei te hoê taata i te taviri?
2 E hiˈoraa tano maitai teie no te faataa eaha ta te arepurepuraa e itehia i roto i te ao faaroo, i rave i nia i te ite no nia i te Atua. Oia mau, e rave rahi tei tamata i te faaino i te taviri—oia hoi o Iesu Mesia—e haamatara ra i te reira ia maramarama tatou. Ua faaore vetahi mau haapaoraa i te taviri, ma te ore roa ˈtu ratou e tâuˈa ia Iesu. Ua faahuru ê roa vetahi pae i te tiaraa o Iesu, ma te haamori ia ˈna mai te Atua Mana hope. Noa ˈtu eaha te huru tupuraa, ua piri te uputa o te ite no nia i te Atua i mua ia tatou nei mai te peu e aita to tatou e maramarama tano maitai no nia i teie taata faufaa roa, oia hoi o Iesu Mesia.
3. No te aha o Iesu i piihia ˈi te taviri e aratai i te ite no nia i te Atua?
3 E haamanaˈo paha oe e ua parau o Iesu e: “Teie hoi te ora mure ore, ia ite ratou ia oe i te Atua mau ra, e ia Iesu i te Mesia i ta oe i tono mai.” (Ioane 17:3) I to ˈna parauraa ˈtu i te reira, aita o Iesu i faateitei ia ˈna. E rave rahi taime to te mau Papai haapapuraa i te parau no te titauraa i te ite mau i te Mesia. (Ephesia 4:13; Kolosa 2:2; Petero 2, 1:8; 2:20) “Oia hoi [Iesu Mesia] ta te mau peropheta atoa ra i parau maira,” ta te aposetolo Petero ïa i tapao. (Ohipa 10:43) E ua papai te aposetolo Paulo e: “O tei vaiiho-paatoa-hia te taoˈa ra o te paari e te ite i roto ia ˈna ra.” (Kolosa 2:3) Ua parau atoa hoi o Paulo e e riro te mau parau tǎpǔ atoa a Iehova i te tupu na roto ia Iesu. (Korinetia 2, 1:20) No reira o Iesu Mesia te taviri mau e aratai i te ite no nia i te Atua. E tia to tatou ite no nia ia Iesu ia tiamâ mai i te mau faahuru-ê-raa atoa ia au i to ˈna huru e i to ˈna tiaraa i roto i te faanahoraa a te Atua. Tera râ, no te aha te mau pǐpǐ a Iesu i faariro ai ia ˈna ei tumu faufaa roa i roto i te mau opuaraa a te Atua?
TE MESIA I TǍPǓHIA MAIRA
4, 5. Eaha te mau tiaturiraa i haamauhia i nia i te Mesia, e nafea te mau pǐpǐ a Iesu i te faariroraa ia ˈna?
4 Mai te tau o te taata haapao maitai ra o Abela, ua tiai maite te mau tavini a te Atua i te Huero i tǎpǔhia maira e te Atua ra o Iehova iho. (Genese 3:15; 4:1-8; Hebera 11:4) Ua tohuhia mai e e faatupu te Huero i te opuaraa a te Atua ei Mesia, oia hoi te auraa ‘Tei Faatahinuhia.’ ‘E opani atu oia i te hara,’ e ua faaitehia mai te hanahana o to ˈna Basileia i roto i te mau salamo. (Daniela 9:24-26; Salamo 72:1-20) O vai mau â te itehia mai ei Mesia?
5 A feruri na i te oaoa rahi o te hoê taurearea o Anederea te iˈoa ia ˈna i faaroo atu i te mau parau a Iesu no Nazareta. Ua horo atura o Anederea i to ˈna ra taeae ia Simona Petero ra e ua na ô atura ia ˈna e: “Ua itea ia mâua te Mesia.” (Ioane 1:41) Ua papu maitai i te mau pǐpǐ a Iesu e o ˈna mau iho â te Mesia i tǎpǔhia maira. (Mataio 16:16) E ua hinaaro mau â te mau kerisetiano mau e pohe no te tiaturiraa ra o Iesu mau â te Mesia aore ra Kirito i tohuhia mai. Eaha te haapapuraa e vai ra ia ratou ra? E hiˈopoa anaˈe na e toru tumu haapapuraa.
TE HAAPAPURAA E O IESU MAU Â TE MESIA
6. (a) O vai te opu fetii e horoa mai i te Huero i tǎpǔhia maira, e nafea tatou ia ite e e na roto mai o Iesu i taua opu fetii ra? (b) No te aha te hoê noa ˈˈe taata i ora na i muri aˈe i te matahiti 70 o to tatou nei tau, i ore ai e tia ia haapapu i te titauraa e o ˈna te Mesia?
6 Te opu fetii o Iesu teie e haamau nei i te niu matamua no te haapapu mai ia ˈna ei Mesia i tǎpǔhia maira. Ua faaite atu o Iehova i Ta ˈna tavini ia Aberahama e e na roto mai te Huero i tǎpǔhia maira i to ˈna opu fetii. Ua faaitehia mai taua parau tǎpǔ ra i te tamaiti a Aberahama oia hoi ia Isaaka, i te tamaiti a Isaaka oia hoi ia Iakoba, e i te tamaiti a Iakoba oia hoi ia Iuda. (Genese 22:18; 26:2-5; 28:12-15; 49:10) Ua taotiahia te opu fetii o te Mesia tau senekele i muri aˈe, i te faaiteraahia mai i te Arii ra ia Davida e e na roto taua Huero ra i to ˈna opu fetii. (Salamo 132:11; Isaia 11:1, 10) Te haapapu ra te mau Evanelia a Mataio raua o Luka e e na roto mai o Iesu i taua opu fetii ra. (Mataio 1:1-16; Luka 3:23-38) Noa ˈtu â ïa e mea rahi to Iesu mau enemi ino mau, aita hoê noa ˈˈe o ratou i faahapa i te opu fetii no reira mai oia. (Mataio 21:9, 15) Ma te maramarama maitai, eita to ˈna opu fetii e nehenehe e faahapahia. Tera râ, ua ore roa te mau buka no nia i te opu fetii ati Iuda a faaano ai to Roma ia Ierusalema i te matahiti 70 o to tatou nei tau. I muri aˈe i taua matahiti ra, aita e taata i nehenehe e haapapu i te titauraa e o ˈna te Mesia i tǎpǔhia maira.
7. (a) Eaha te piti o te haapapuraa e o Iesu te Mesia? (b) Mea nafea te Mika 5:2 i te tupuraa i nia ia Iesu?
7 Te tupuraa te parau tohu o te piti ïa o te haapapuraa. Te faataa ra te mau parau tohu o te Papai Hebera e rave rahi mau huru tupuraa o te oraraa o te Mesia. I te vau o te senekele hou to tatou nei tau, ua tohu mai te peropheta ra o Mika e e fanauhia mai taua faatere rahi ra i roto i te oire iti ra no Betelehema. E piti oire i Iseraela o Betelehema te iˈoa, te haapapu ra râ hoi teie nei parau tohu no nia i te hoê oire taa maitai: O Betelehema i Epherata, i reira te Arii ra o Davida i te fanauraahia. (Mika 5:2) E faaea na te mau metua o Iesu, o Iosepha raua o Maria i Nazareta, 150 kilometera i te pae apatoerau no Betelehema. Te hapû ra o Maria, ia Kaisara Auguto i faaue i te mau taata atoa e haere tapao i to ratou mau iˈoa i te mau oire ratou i fanauhia ˈi. * No reira, ua tia aˈera hoi ia Iosepha ia rave i ta ˈna vahine tei hapû e haere i Betelehema, te vahi o Iesu i fanauhia ˈi.—Luka 2:1-7.
8. (a) Afea ra na “hebedoma” e 69 i te haamataraa e eaha atoa te ohipa i tupu i taua taime ra? (b) Eaha te maororaa o na “hebedoma” e 69, e eaha te ohipa i tupu a hope ai taua mau hebedoma ra?
8 I te senekele ono hou to tatou nei tau, ua tohu mai te peropheta ra o Daniela e e fa mai “te Mesia te Arii” e 69 “hebedoma” i muri aˈe te faaueraa e rave faahou e e patu ia Ierusalema e horoahia ˈi. (Daniela 9:24, 25) Te maororaa o taua mau “hebedoma” tataitahi ra e hitu ïa matahiti. * Ia au i te Bibilia e te aamu, ua horoahia te parau e patu faahou ia Ierusalema i te matahiti 455 ra hou to tatou nei tau. (Nehemia 2:1-8) No reira e fa mai ïa te Mesia e 483 matahiti (69 taime 7) i muri aˈe i te matahiti 455 hou to tatou nei tau. E aratai ïa te reira ia tatou i te matahiti 29 o to tatou nei tau, te matahiti iho o Iehova i faatavai ia Iesu i te varua moˈa. Ua riro maira ïa o Iesu ei “Mesia” (oia hoi te auraa ‘Tei Faatahinuhia’), aore ra ei Kirito.—Luka 3:15, 16, 21, 22.
9. (a) Mea nafea te Salamo 2:2 i te tupuraa? (b) Eaha vetahi atu mau parau tohu tei tupu i nia ia Iesu? (A hiˈo i te tabula.)
9 Papu maitai, aita pauroa te taata i farii ia Iesu mai te Mesia i tǎpǔhia maira, e ua tohu mai hoi te mau Papai i te reira. Mai tei faaitehia i roto i te Salamo 2:2, ua faauruahia te Arii ra o Davida no te tohu e: “Te tiatia ra te hui arii o te fenua nei i nia, e te amui atoa ra te hui raatira e mârô ia Iehova, e ta ˈna i faatahinu ra.” Ua haapapu mai teie parau tohu e e tahoê te mau arii o te mau fenua e rave rahi no te aro atu i Tei Faatahinuhia a Iehova, aore ra Mesia. E te reira mau hoi tei tupu. No reira, e tuhaa anaˈe ta te mau aratai faaroo ati Iuda, te Arii ra o Heroda, e te tavana roma o Ponotio Pilato no te haapoheraahia o Iesu. Riro maira hoi taua mau enemi tahito ra o Heroda raua o Pilato ei nau hoa rahi roa mai reira mai. (Mataio 27:1, 2; Luka 23:10-12; Ohipa 4:25-28) No te tahi atu haapapuraa e faaite mai e o Iesu mau â te Mesia, a hiˈo na i te tabula oia hoi te upoo parau ra “Te tahi mau parau tohu faufaa roa no nia i te Mesia.”
10. Mea nafea to Iehova haapapuraa e o Iesu Tei Faatahinuhia e ana?
10 Te faaiteraa a te Atua ra o Iehova o te toru ïa o te haapapuraa e o Iesu mau â te Mesia. Ua tono mai o Iehova i te mau melahi ia ite te taata e o Iesu te Mesia i tǎpǔhia maira. (Luka 2:10-14) Inaha, i te roaraa o te oraraa o Iesu i nia i te fenua nei, ua parau maira o Iehova iho mai te raˈi maira, no te faaite mai e te farii mau ra oia ia Iesu. (Mataio 3:16, 17; 17:1-5) Ua horoa te Atua ra o Iehova i te mana ia Iesu no te faatupu i te mau semeio. Ua riro hoi te reira ei haapapuraa no ǒ mai i te Atua ra e o Iesu mau â te Mesia, inaha eita roa ˈtu te Atua e horoa i te hoê taata haavare te mana no te faatupu i te mau semeio. Ua faaohipa atoa o Iehova i to ˈna varua moˈa no te faaurua i te mau faatiaraa a te Evanelia, ia riro te haapapuraa e o Iesu mau â te Mesia ei tuhaa no te Bibilia, te buka hurihia e te opere-rahi-roa ˈˈe-hia i roto i te aamu nei.—Ioane 4:25, 26.
11. Ehia rahiraa haapapuraa e o Iesu mau â te Mesia?
11 Ia amuihia, e itehia i roto i teie mau haapapuraa atoa e rave rahi hanere mau ohipa e faaite mai ia Iesu ei Mesia i tǎpǔhia maira. Ma te papu maitai, te faariro nei te mau kerisetiano mau ia ˈna mai ‘ta te mau peropheta atoa i parau maira’ e mai te taviri no te ite no nia i te Atua. (Ohipa 10:43) Tera râ, mea rahi â te tia ia haapiihia no nia ia Iesu Mesia i te parau noa e o ˈna mau â te Mesia. Nohea mai hoi oia? Eaha mau na to ˈna huru?
TE ORARAA O IESU HOU AˈE OIA E RIRO MAI AI EI TAATA
12, 13. (a) Nafea tatou e ite ai e i ora na o Iesu i nia i te raˈi hou aˈe oia e haere mai ai i te fenua nei? (b) O vai “te Logo,” e eaha ta ˈna ohipa i rave hou aˈe oia e riro mai ai ei taata?
12 E tia te oraraa o Iesu ia tatuhaahia na roto e toru tuhaa. Ua haamata te tuhaa matamua na mua roa ˈˈe oia e fanauhia mai ai i nia i te fenua nei. Te parau ra o Mika 5:2 e “mai tahito mai â hoi to ˈna haerea, mai te matamua mai â.” E ua haapapu atoa mai o Iesu e “no nia vau,” oia hoi, no te raˈi mai. (Ioane 8:23; 16:28) Eaha te maororaa oia i roto i te raˈi hou aˈe oia e haere mai ai i te fenua nei?
13 Ua piihia o Iesu te “Tamaiti fanau tahi” a te Atua no te mea na Iehova iho i poiete ia ˈna. (Ioane 3:16) Ma to ˈna tiaraa ‘fanau matamua o te mau mea atoa i poietehia,’ ua faaohipahia aˈera hoi o Iesu e te Atua no te poiete i te tahi atu mau mea atoa. (Kolosa 1:15; Apokalupo 3:14) Te na ô ra te Ioane 1:1 e tei te Atua ra “te Logo” (o Iesu i to ˈna oraraa hou aˈe oia e riro mai ai ei taata) “i te matamua ra.” No reira, tei pihai iho atura ïa te Logo ia Iehova a hamanihia ˈi “te raˈi e te fenua.” O taua Logo nei ta te Atua i na ô atu e: “E hamani tatou i te taata ma to tatou iho huru.” (Genese 1:1, 26) Oia atoa, te Logo o te ‘taata rave ohipa rahi’ ïa i faataahia i roto i te Maseli 8:22-31 mai te paari i faarirohia ei taata, e rave ra i te ohipa i pihai iho ia Iehova no te hamani i te mau mea atoa. I muri aˈe i to Iehova poieteraa ia ˈna, ua faaea te Logo e rave rahi roaraa matahiti i pihai iho i te Atua i nia i te raˈi hou aˈe oia e riro mai ai ei taata i nia i te fenua nei.
14. No te aha o Iesu i parauhia ˈi e “o te huru mau oia o te Atua hiˈo-ore-hia ra”?
14 No reira, eita ïa tatou e maere ia parau te Kolosa 1:15 no Iesu “o te huru mau oia o te Atua hiˈo-ore-hia ra”! I te roaraa o te mau matahiti e rave rahi o to raua tahoê-maite-raa, ua riro maira te Tamaiti auraro ra mai to ˈna Metua, o Iehova. Teie te tahi atu tumu o Iesu e riro ai ei taviri e aratai i te ite no nia i te Atua e horoa i te ora. Te mau mea atoa ta Iesu i rave ia ˈna i haere mai i nia i te fenua nei mai te huru ra ïa e o ta Iehova atoa ïa i rave. No reira, te iteraa ia Iesu, te auraa ra te faarahi ra ïa tatou i to tatou ite no nia ia Iehova. (Ioane 8:28; 14:8-10) E ma te papu maitai, mea faufaa roa ia haapii hau atu â tatou no nia ia Iesu Mesia.
TE HURU ORARAA O IESU I TE FENUA NEI
15. Mea nafea to Iesu fanauraahia mai ei aiû tia roa?
15 Te piti o te tuhaa o te oraraa o Iesu, tei ǒ nei ïa i nia i te fenua nei. Ua farii mau â oia e ia tuu mai te Atua i to ˈna ora mai te raˈi mai i roto i te opu o te hoê paretenia faaroo ati Iuda o Maria te iˈoa. Ua ‘tamǎrû’ te varua moˈa mana o Iehova, aore ra puai ohipa, ia Maria, ma te rave e ia hapû oia e ia fanau mai oia i te hoê aiû tia roa. (Luka 1:34, 35) Aita roa ˈtu o Iesu i fanauhia mai i roto i te hara, no te mea no roto mai to ˈna ora i te hoê Tumu tia roa. Ua paari oia i roto i te hoê utuafare haehaa mau mai te tamaiti faaamu a te tamuta ra o Iosepha e o ˈna te matahiapo o te mau tamarii e rave rahi o te utuafare.—Isaia 7:14; Mataio 1:22, 23; Mareko 6:3.
16, 17. (a) Nohea mai te mana o Iesu no te faatupu i te mau semeio, e eaha vetahi o taua mau semeio ra? (b) Eaha vetahi mau huru ta Iesu i faaite?
16 Ua ite-papu-hia te paieti hohonu o Iesu no te Atua ra o Iehova i te 12raa o to ˈna matahiti. (Luka 2:41-49) I to ˈna paariraa mai e to ˈna haamataraa i ta ˈna taviniraa i te 30raa o to ˈna matahiti, ua faaite atoa o Iesu i to ˈna here hohonu no to ˈna mau taata-tupu. I te horoaraa mai te varua moˈa o te Atua i te mana ia ˈna no te faatupu i te mau semeio, ua faaora aˈera hoi oia i te maˈi ma te aroha mau, i te hapepa, te matapo, te tariˈa turi, te lepera. (Mataio 8:2-4; 15:30) Ua faaamu o Iesu e rave rahi tausani taata i pohe i te poia. (Mataio 15:35-38) Ua tamǎrû oia i te vero tei haamǎtaˈu i te ora o to ˈna mau hoa. (Mareko 4:37-39) Inaha, ua faatia atoa oia i tei pohe. (Ioane 11:43, 44) Ua haapapu-maitai-hia teie nei mau semeio ei mau ohipa mau i tupu i roto i te aamu. Ua farii roa atoa te mau enemi iho o Iesu e ‘e rave rahi mau tapao ta ˈna i rave.’—Ioane 11:47, 48.
17 Ua tere haere o Iesu na to ˈna ra fenua, i te haapiiraa i te taata i te parau o te Basileia o te Atua. (Mataio 4:17) Ua vaiiho atoa mai oia i te hoê hiˈoraa faahiahia mau i te pae no te faaoromai e no te manaˈo maitai. Noa ˈtu e aita oia i mauruuru i ta ˈna mau pǐpǐ, ua na ô atura oia ia ratou ma te hamani maitai e: “Ua tia hoi i te varua e paruparu râ to te tino.” (Mareko 14:37, 38) Inaha, e taata itoito o Iesu e te faaite tahaa i te manaˈo i te feia e ore e au i te parau mau e o te faahepo hoi i te feia paruparu. (Mataio 23:27-33) E hau atu â, ua pee maite oia i te hiˈoraa here mau o to ˈna Metua. Ua hinaaro mau atoa o Iesu e pohe ia noaa i te huitaata tia ore nei i te hoê tiaturiraa no a muri aˈe. Eita ïa e maerehia, e e tia mau â ia tatou ia faaau ia Iesu ei taviri e aratai i te ite no nia i te Atua! Oia mau, o ˈna te taviri ora! Tera râ, no te aha hoi tatou e parau ai e te taviri ora? E aratai te reira ia tatou i nia i te toru o te tuhaa o to ˈna oraraa.
IESU I TEIE MAHANA
18. Nafea tatou ia hiˈo ia Iesu Mesia i teie mahana?
18 Noa ˈtu â ïa e te faatia ra te Bibilia no nia i te poheraa o Iesu, i teie nei mahana te ora nei â oia! Inaha, ua ite mata roa ehia hanere taata i ora na i te senekele matamua o to tatou nei tau e ua faatiahia mai oia. (Korinetia 1, 15:3-8) Mai tei tohuhia mai, ua parahi aˈera oia i muri iho i te rima atau o to ˈna Metua e ua tiai e ia horoahia mai ia ˈna ra te mana arii i nia i te raˈi. (Salamo 110:1; Hebera 10:12, 13) No reira, nafea ïa tatou ia hiˈo ia Iesu i teie mahana? E manaˈo anei tatou ia ˈna mai te hoê aiû paruparu roa i roto i te phatene? Aore ra te ite ra anei tatou ia Iesu mai te hoê taata e mauiui ra e e haapohehia ˈtura? Eita. E Arii puai oia e faatere ra! Fatata roa oia i te faaohipa i ta ˈna faatereraa i nia i to tatou fenua taatoa e vai nei i roto i te arepurepu.
19. Eaha te ohipa ta Iesu e rave i roto i te hoê tau e fatata roa maira?
19 I roto i te Apokalupo 19:11-15, te faaite-papu-hia ra te Arii ra o Iesu Mesia e haere maira ma te puai rahi no te haamou roa i te feia iino. Auê hoi teie Arii here i te hinaaro ru e faaore roa i te mauiui e farereihia nei e te mau mirioni taata i teie mahana e! E te hinaaro ru atoa nei oia e tauturu i te feia e faaitoito ra i te pee i te hiˈoraa tia roa ta ˈna i vaiiho mai ia ˈna i parahi i te fenua nei. (Petero 1, 2:21) Te hinaaro nei oia e faaora ia ratou mai roto i te “tamaˈi i taua mahana rahi o te Atua Puai hope ra,” pinepine i te piihia o Aramagedo, ia nehenehe ratou e ora e a muri noa ˈtu i nia i te fenua nei ei mau taata no taua Basileia o te Atua i te raˈi ra.—Apokalupo 7:9, 14; 16:14, 16.
20. Eaha ta Iesu ohipa e rave no te huitaata nei i roto i ta ˈna Tausani Matahiti Faatereraa?
20 I te roaraa o te Tausani Matahiti Faatereraa hau a Iesu i tohuhia mai, e faatupu oia i te mau semeio no te huitaata taatoa nei. (Isaia 9:6, 7; 11:1-10; Apokalupo 20:6) E faaore roa o Iesu i te mau maˈi atoa e e faaore roa hoi i te pohe. E faatia faahou mai oia e rave rahi tausani mirioni taata ia nehenehe atoa ratou e ora e a muri noa ˈtu i nia i te fenua nei. (Ioane 5:28, 29) Te tiaturi nei matou e e oaoa roa oe i te haapii hau atu â i nia i ta ˈna Basileia mesia i roto i te hoê pene i mua nei. Ia papu na oe: Eita ta tatou e nehenehe e feruri i te faahiahia o to tatou nei oraraa i raro aˈe i te faatereraa a te Basileia. Auê hoi i te faufaa ia matau maitai tatou ia Iesu Mesia e! Oia mau, mea faufaa roa ia ore roa ˈtu e moehia ia tatou e o Iesu, te taviri ora e aratai i te ite no nia i te Atua e e aratai hoi i te ora mure ore.
[Nota i raro i te api]
^ Ua riro taua tapaoraa iˈoa i ravehia e te Hau emepera roma ei ravea na ratou no te titau i te mau tute. No reira, ua turu aˈera hoi o Auguto ma te ite ore i te tupuraa te parau tohu no nia i te hoê faatere e ‘o te tono i te tahi titau i te hinuhinu o te basileia.’ Ua faaite atea mai taua iho parau tohu nei e “te arii atoa i haafaufaahia ra [te Aratai o te faufaa ra],” aore ra te Mesia, “e ofatihia” ïa i te tau o te mono o teie arii. Ua haapohehia o Iesu i raro aˈe i te faatereraa a te arii mono o Auguto, oia hoi o Tibère.—Daniela 11:20-22.
^ E peu matauhia e te mau ati Iuda i tahito ra i te faariro i te mau hebedoma ei matahiti. Ei hiˈoraa, te hitu o te mahana e mahana sabati ïa, te hitu o te matahiti e matahiti sabati ïa.—Exodo 20:8-11; 23:10, 11.
A HIˈOPOA NA I TO OE ITE
Mea nafea te opu fetii o Iesu i te haapapuraa e o ˈna mau â te Mesia?
Eaha vetahi mau parau tohu no nia i te Mesia tei tupu i nia ia Iesu?
Mea nafea to te Atua faaiteraa e o Iesu Tei Faatahinuhia e ana ra?
No te aha o Iesu te taviri ora e aratai i te ite no nia i te Atua?
[Uiraa haapiiraa]
[Tapura i te api 37]
TE TAHI MAU PARAU TOHU FAUFAA ROA NO NIA I TE MESIA
TOHU OHIPA I TUPU TUPURAA
TO ˈNA VAI-TAMARIIRII-RAA
Isaia 7:14 Fanauhia e te hoê paretenia Mataio 1:18-23
Ieremia 31:15 Mau aiû i haapohehia i muri Mataio 2:16-18
aˈe i to ˈna fanauraa
TA ˈNA TAVINIRAA
Isaia 61:1, 2 Ta te Atua ohipa i horoa Luka 4:18-21
na ˈna
Isaia 9:1, 2 Taviniraa tei turai i te Mataio 4:13-16
taata ia ite i te hoê
maramarama rahi
Salamo 69:9 Itoito no te fare no Iehova Ioane 2:13-17
Isaia 53:1 Aita i tiaturihia Ioane 12:37, 38
Zekaria 9:9; Tomoraa i Ierusalema i nia Mataio 21:1-9
Salamo 118:26 i te hoê asini; fariihia ei
arii e tei haere mai na nia
i te iˈoa o Iehova
TO ˈNA HOORAAHIA E TO ˈNA POHERAA
Salamo 41:9; Te hoê aposetolo taiva; Ohipa 1:15-20
109:8 tei hoo ia Iesu e tei
monohia i muri aˈe
Zekaria 11:12 Hoohia no e 30 moni ario Mataio 26:14, 15
Salamo 27:12 Ite haavare i faaohipahia Mataio 26:59-61
no te aro ia ˈna
Salamo 22:18 Tufa-kelero-hia to ˈna ahu Ioane 19:23, 24
Isaia 53:12 Amuihia e te feia rave hara Mataio 27:38
Salamo 22:7, 8 Faainohia a pohe ai oia Mareko 15:29-32
Salamo 69:21 Horoahia ˈtu te vinega Mareko 15:23, 36
Isaia 53:5; Patiahia Ioane 19:34, 37
Isaia 53:9 Hunahia e te feia moni Mataio 27:57-60
Salamo 16:8-11 Faatiahia hou to ˈna tino ai Ohipa 2:25-32;
[Hohoˈa i te api 35]
Ua horoa mai te Atua i te mana ia Iesu no te faaora i te maˈi
