Pene 2

Te buka e faaite ra i te ite no nia i te Atua

1, 2. No te aha tatou e hinaaro ai i te aratairaa a to tatou Poiete?

 MEA tano iho â ia horoa mai to tatou Poiete here i te hoê buka haapiiraa e aratairaa na te huitaata nei. Eita anei oe e farii e e hinaaro te mau taata i te aratairaa?

² Hau atu i te 2 500 matahiti i teie nei, teie ta te hoê peropheta e papai aamu atoa i papai: “E ere hoi tei taua taata e haere ra i te haapao i to ˈna taahiraa.” (Ieremia 10:23) I teie nei mahana, e hau aˈe teie faahitiraa parau i te papuhia i mutaa ihora. No reira te taata tuatapapa aamu ra o William H. McNeill i tapao ai e: “Ua riro te oraraa o te taata i nia i te fenua nei ei mau anairaa ati tamau e ei mau anairaa arepurepuraa i roto i te nahonahoraa o te totaiete i haamauhia.”

3, 4. (a) Nafea tatou ia haamata i te hoê haapiiraa bibilia? (b) Nafea tatou ia faatupu i te hoê tuatapaparaa no nia i te Bibilia?

³ Te haamâha nei te Bibilia i to tatou mau hinaaro atoa no te hoê aratairaa paari mau. Parau mau, mea rahi teie e teimaha nei ia hiˈopoa ratou i te Bibilia no te taime matamua. E buka rahi mau hoi, e ere roa ˈtu i te mea ohie ia taa i te auraa o te tahi o to ˈna mau tuhaa. Ahiri e ua horoahia ia oe ra i te hoê parau tutuu e faataa ra e eaha te tia ia oe ia rave e noaa ˈtu ai i te faufaa i vaiihohia mai na oe, eita anei oe e rave i te taime no te tuatapapa maite i te reira? Mai te peu e e ite oe e mea fifi roa ia taa i te auraa o te tahi mau tuhaa o taua tutuu ra, e ani ïa oe i te tauturu a te hoê taata aravihi i roto i taua mau tuhaa ra. No te aha  ïa e ore ai e na reira i te rave no te Bibilia? (Ohipa 17:11) E hau atu â te noaa mai ia tatou i te hoê tufaa materia. Mai ta tatou i haapii mai i roto i te pene na mua ˈtu, e nehenehe te ite no nia i te Atua e aratai i te ora mure ore.

⁴ E hiˈopoa na tatou i te buka e faaite ra i te ite no nia i te Atua. Na mua ˈˈe e horoa tatou i te hoê haapotoraa no nia i te Bibilia. E i muri iho, e tauaparau tatou no nia i te mau tumu e rave rahi taata i haamaramaramahia e tiaturi ai e o te reira mau te Parau faauruahia a te Atua.

EAHA TO ROTO I TE BIBILIA

5. (a) Eaha to roto i te mau Papai Hebera? (b) Eaha to roto i te mau Papai Heleni?

⁵ E 66 rahiraa buka i roto i te Bibilia tei tatuhaahia e piti tuhaa, pinepine i te parauhia te Faufaa Tahito e te Faufaa Apî. E toru ahuru ma iva mau buka bibilia e ua papaihia te rahiraa na roto i te reo Hebera e e 27 na roto i te reo Heleni. Te mau Papai Hebera, mai te Genese e tae atu i te Malaki, te faahiti ra ïa no nia i te poieteraa e no nia i na matahiti e 3 500 o te aamu taata nei. A tuatapapa ai tatou i taua tuhaa o te Bibilia ra, e haapii mai ïa tatou no nia i te mau haerea o te Atua e te mau ati Iseraela—mai to ratou riroraa mai ei nunaa i te senekele 16 hou to tatou nei tau e tae atu i te senekele 5 hou to tatou nei tau. * Mai te mau buka a Mataio e tae atu i te Apokalupo, te huti ra te mau Papai Heleni i te ara-maite-raa i nia i te mau haapiiraa e te mau ohipa ta Iesu Mesia e ta ta ˈna mau pǐpǐ i rave i te senekele matamua o to tatou nei tau.

6. No te aha tatou e tuatapapa ˈi i te Bibilia taatoa?

⁶ Te parau ra te tahi pae e na te mau ati Iuda te “Faufaa Tahito” e te “Faufaa Apî” na te mau kerisetiano ïa. Ia au râ i te Timoteo 2, 3:16, “te mau parau moˈa atoa i papaihia ra e mea faaurua mai ïa e te Atua, e e mea maitai.” No reira, e tia ia ravehia te taatoaraa o te Bibilia no te hoê haapiiraa tano no nia i te mau Papai. Inaha, te tuati maitai ra na tuhaa e piti o te Bibilia te tahi i te tahi ma te au maite no te tatara i te hoê noa tumu parau.

7. Eaha te tumu parau o te Bibilia?

 ⁷ Peneiaˈe, ua amuimui atu oe i roto i te mau oroa faaroo ehia rahiraa matahiti e ua faaroo oe i te tahi tuhaa o te Bibilia i taio-puai-hia mai. Aore ra ua taio paha oe iho i te tahi mau tuhaa o te Bibilia. Ua ite anei oe e hoê noa manaˈo ta te Bibilia mai te Genese e tae atu i te Apokalupo? Oia mau, hoê noa tumu parau au maite ta te Bibilia. Eaha hoi taua tumu parau ra? O te faatiaraa ïa i te tiaraa o te Atua e faatere i te huitaata nei e o te tupuraa ta ˈna opuaraa here maoti to ˈna Basileia. I muri aˈe tatou e ite ai e nafea te Atua ia faatupu i taua opuaraa ra.

8. Eaha ta te Bibilia e parau ra no nia i te huru o te Atua?

⁸ Hau atu i te haafaufaaraa i te opuaraa a te Atua, te faaite ra te Bibilia i to ˈna huru. Ei hiˈoraa, e haapii mai tatou i roto i te Bibilia e e mau manaˈo hohonu to te Atua e mea faufaa na ˈna te mau faaotiraa ta tatou e rave. (Salamo 78:40, 41; Maseli 27:11; Ezekiela 33:11) Te na ô ra te Salamo 103:8-14 e e Atua “aroha e te hamani maitai . . . e ore e riri vave, te rahi ra to ˈna aroha.” E aroha oia ia tatou, ‘e te haamanaˈo maira e ua hamanihia  tatou i te repo fenua’ e e hoˈi tatou i reira ia pohe tatou. (Genese 2:7; 3:19) Auê ïa mau huru faahiahia mau to ˈna e! E ere anei teie te huru Atua o ta oe e hinaaro e haamori?

9. Nafea te Bibilia ia horoa mai i te hoê hiˈoraa maramarama maitai no nia i te mau faaueraa a te Atua, e nafea tatou e faufaahia ˈi i taua ite ra?

⁹ Te horoa maira te Bibilia i te hoê hiˈoraa maramarama no nia i te mau faaueraa a te Atua. I te tahi taime e riro atoa te reira ei mau ture. E pinepine roa râ te reira i te itehia i roto i te mau faaueraa tumu e haapiihia maoti te mau faahohoˈaraa ohie. Ua haapapai te Atua i te tahi mau tupuraa o te aamu tahito o Iseraela ei maitai no tatou. Te faaite ra taua mau aamu haavare ore ra e eaha te tupu ia ohipa te taata ia au maite i te opuaraa a te Atua, e eaha te faahopearaa peapea mau ia rave ratou mai ta ratou e hinaaro. (Te mau arii 1, 5:4; 11:4-6; Paraleipomeno 2, 15:8-15) E putapû mau to tatou mafatu i te taioraa i taua mau aamu ra no nia i te oraraa mau. Ia tamata tatou i te manaˈo e te ite ra tatou i te mau ohipa e faatiahia ra, e nehenehe tatou e ite ia tatou i rotopu i te mau taata e faahitihia ra. No reira, e nehenehe tatou e fanaˈo i te mau hiˈoraa maitatai e e nehenehe hoi e ape i te mau herepata tei faatopa i te feia rave hara. E titau râ teie uiraa faufaa roa i te hoê pahonoraa: Nafea tatou e papu ai e mea faaurua-mau-hia e te Atua te mau mea ta tatou e taio ra i roto i te Bibilia?

E NEHENEHE ANEI OE E TIATURI I TE BIBILIA?

10. (a) No te aha vetahi e manaˈo ai e eita te Bibilia e tano no to tatou nei tau? (b) Eaha ta te Timoteo 2, 3:16, 17 e faaite maira no nia i te Bibilia?

¹⁰ Peneiaˈe ua tapao mai oe e e rave rahi buka aˈoraa o te ore faahou e tano te tahi tau matahiti i muri aˈe. Eaha ïa no nia i te Bibilia? E buka tahito roa, hau atu i te 2 000 matahiti i mairi mai te papairaahia mai â ta ˈna mau parau hopea. Te manaˈo nei râ vetahi pae e eita roa ˈtu te reira e tano no to tatou nei tau. Mai te peu râ e mea faauruahia te Bibilia e te Atua, e tano noa iho â ïa ta ˈna mau aˈoraa no to tatou nei tau noa ˈtu to ˈna rahiraa matahiti. E riro noâ te mau Papai ei mea “maitai ei haapiiraa, ei aˈoraa, ei faaiteraa hapa, ei faaite mai i te parau-tia ra; ia au roa te taata no te Atua i te mau ohipa maitatai atoa ra.”—Timoteo 2, 3:16, 17.

11-13. No te aha tatou e nehenehe ai e parau e mea faufaa te Bibilia no to tatou nei tau?

 ¹¹ E faaite mai te hoê tuatapapa-maite-raa e e tano noâ te faaohiparaa i te mau faaueraa tumu a te Bibilia no teie nei tau mai te tau i reira to ratou papai-matamua-raahia. No nia i te naturaraa o te taata, ei hiˈoraa, te faaite ra te Bibilia i te ite papu e tano no te mau ui taata atoa. E ite ohie tatou i te reira i roto i te Aˈoraa a Iesu i nia i te Mouˈa, e vai ra i roto i te buka a Mataio, pene 5 e tae atu i te 7. No te putapû hoi te taata aratai inidia ra o Mohandas K. Gandhi, i pohe, i teie aˈoraa i parau ai oia i te hoê tavana rahi beretane e: “Ia tahoê to tâua fenua i te mau haapiiraa i faahitihia e te Mesia i roto i teie Aˈoraa i nia i te Mouˈa, ua faatitiaifaro ïa tatou i te mau fifi eiaha noa o to tâua nei fenua, no to te ao atoa nei râ.”

¹² Eita ïa tatou e maere ia putapû roa te taata i te mau haapiiraa a Iesu! I roto i te Aˈoraa i nia i te Mouˈa, ua faaite mai oia ia tatou i te eˈa o te oaoaraa mau. Te faataa ra oia e nafea ia faatitiaifaro i te mau aimârôraa. Ua horoa mai Iesu i te haapiiraa e faataa mai e nafea ia pure. Ua faaite mai oia i te haerea paari roa ˈˈe te tia ia faaohipa no nia i te mau hinaaro materia e ua horoa mai i te Ture Auro no nia i te mau taairaa maitai roa ˈˈe e o vetahi ê. Nafea ia ite i te mau ohipa haavare i te pae faaroo e nafea e noaa ˈi te hoê oraraa hau no a muri aˈe, tei roto atoa ïa te reira i te mau tumu parau i vauvauhia mai i roto i teie nei aˈoraa.

¹³ I roto i te Aˈoraa i nia i te Mouˈa e i roto i te toea o to ˈna mau api, te faaite maramarama maira te Bibilia ia tatou eaha te tia ia rave e eaha te tia ia ape e maitai ai to tatou iho nei oraraa. No te faufaa hoi ta ˈna aˈoraa i parau ai te hoê taata aˈo e: “Noa ˈtu â ïa e taata aˈo vau i roto i te hoê fare haapiiraa tuarua, e ua noaa ia ˈu i te mau parau tuite toroa tuarua nui e te tuatoru, e ua taio vau ehia rahiraa buka no nia i te maitairaa o te feruriraa e no nia i te manaˈo e te haerea o te taata, ua ite mai au e te aˈoraa a te Bibilia no nia i taua mau mea ra mai te manuïaraa te faaipoiporaa, te arairaa i te mau peu iino a te ui apî e no nia i te faahoaraa e nafea ia tapea i taua auhoaraa ra, e ua hau roa ˈˈe ïa i te mau mea atoa ta ˈu i taio aore ra i tuatapapa  i te fare haapiiraa tuatoru.” Hau atu, i te pae no to ˈna ohie ia faaohipa e te tapea-noa-raa i to ˈna faufaaraa, e nehenehe mau â te Bibilia e tiaturihia.

TANO ROA E TE TIATURIHIA

14. Na te aha e faaite ra e mea tano te Bibilia i te pae no te ite aivanaa?

¹⁴ Noa ˈtu e ere te Bibilia i te hoê buka no nia i te ite aivanaa, mea tano roa oia i te pae no te ite aravihi. Ei hiˈoraa, i te hoê tau a tiaturi ai te rahiraa o te taata e mea parahurahu te fenua, ua faahiti te peropheta o Isaia i te reira mai te “hugo” (Hebera, chugh, e horoa ra hoi i ǒ nei i te manaˈo no te hoê “taoˈa menemene”). (Isaia 40:22) Aita te manaˈo no nia i te hoê fenua menemene i farii-rahi-hia e tae roa ˈtu i te tahi tausani matahiti i muri aˈe i te tau o Isaia. Hau atu, te faaite ra o Ioba 26:7—tei papaihia hau atu i te 3 000 matahiti i teie nei—e “ua faauta [te Atua] i te fenua i nia i te [a]ore.” Te na ô ra te hoê taata tuatapapa i te Bibilia e: “Mea nafea to Ioba iteraa i te parau mau, tei haapapuhia mai e te ite no nia i te reva teitei, e te vai noa ra te fenua i roto i te aore, ua riro ïa ei tumu parau fifi roa ia pahonohia e te feia e ore e tiaturi ra e mea faauruahia te Papai Moˈa.”

15. Mea nafea te tiaturiraa i te Bibilia i te haapaariraahia e to ˈna huru papairaahia?

¹⁵ E haapaari atoa te huru papairaa e itehia i roto i te Bibilia, i to tatou tiaturiraa i teie buka tahito roa. Taa ê atu i te mau aai, e tuati maitai te mau ohipa e faatiahia ra i roto i te Bibilia i te mau taata e te mau taio mahana taa maitai. (Te mau arii 1, 14:25; Isaia 36:1; Luka 3:1, 2) Area ia faarahi anaˈe te feia tuatapapa aamu tahito i te mau re a to ratou mau faatere e ma te huna i ta ratou mau pau e ta ratou mau hapa, e feia hapa ore e te parau mau te feia i papai i te Bibilia—no nia iho â râ i ta ratou iho mau hara ino mau.—Numera 20:7-13; Samuela 2, 12:7-14; 24:10.

E BUKA PARAU TOHU

16. Eaha te haapapuraa rahi roa ˈˈe e faaite maira e mea faauruahia te Bibilia e te Atua?

¹⁶ Te horoa ra te mau parau tohu i tupu i te haapapuraa hopea roa e mea faauruahia te Bibilia e te Atua. Te vai ra i roto i  te Bibilia e rave rahi parau tohu tei tupu taatoa aˈena. Aita iho â te mau taata noa i nehenehe e riro ei tumu no te reira. Eaha ïa to muri i taua mau parau tohu nei? Te na ô ra te Bibilia iho e “e ere hoi i to te hinaaro o te taata i tae mai ai te tohu i tahito ra; o te mau taata moˈa râ o te Atua tei parau i ta te [varua moˈa, aore ra puai ohipa o te Atua] i tuu mai ia ratou ra.” (Petero 2, 1:21) A tuatapapa na i te tahi mau hiˈoraa.

17. Eaha te mau parau tohu i tohu mai i te toparaa o Babulonia, e mea nafea te reira i te tupuraa?

¹⁷ Te toparaa o Babulonia. Ua tohu mai o Isaia raua o Ieremia i te toparaa o Babulonia i roto i te rima o te mau Medai e te mau Peresia. Ma te faahiahia mau, ua papaihia te parau tohu a Isaia no nia i teie toparaa te tahi tau 200 matahiti hou o Babulonia a haruhia ˈi! Ua riro hoi te mau tuhaa o te parau tohu i muri nei ei aamu papu: te haamǎrôraa i te Anavai no Eupharate ma te faatahe i to ˈna mau pape i roto i te hoê roto hamanihia e te taata (Isaia 44:27; Ieremia 50:38); te haapao-ore-raahia te mau uputa o te anavai no Babulonia (Isaia 45:1); e te haruraahia oia na te hoê arii e o Kuro te iˈoa.—Isaia 44:28.

18. Mea nafea te parau tohu a te Bibilia i te tupuraa i te tau “te arii no Iavana [Heleni]” i maraa ˈi e i topa ˈi?

¹⁸ Te maraaraa e te toparaa “te arii no Iavana [Heleni].” I roto i te hoê orama, ua ite o Daniela i te hoê puaaniho oni tei tui i te mamoe oni ma te ofati i to ˈna na tara e piti. E i muri iho, ua fati te tara rahi o te puaaniho, e e maha tara tei mono mai ia ˈna. (Daniela 8:1-8) Ua faataahia ˈtura ia Daniela e: “O te mamoe oni ta oe i hiˈo ma te tara atoa, o na arii ïa no Medai e no Peresia. E te puaaniho aito ra, o te arii ïa no Iavana [Heleni]: e te tara rahi i ropu i te area mata ra, o te arii matamua ïa. E ofatihia ihora te reira, e monohia ihora e maha atoa ra, o na basileia ïa e maha e tia mai no roto i taua fenua ra, eita râ e au i to ˈna mana.” (Daniela 8:20-22) Ia au i taua parau tohu nei, te tahi tau piti hanere matahiti i muri iho, ua pau te hau emepera tara piti ra o Medai raua o Peresia i “te arii no Iavana,” ia Alesanedero Rahi. Ua pohe o Alesanedero i te matahiti 323 hou to tatou nei tau e na to ˈna mau tenerara e maha i mono ia ˈna. Aita râ hoê noa ˈˈe o teie mau basileia i muri mai i aifaito i te mana o te hau emepera o Alesanedero.

19. Eaha te mau parau tohu i tupu i nia ia Iesu Mesia?

 ¹⁹ Te oraraa o Iesu Mesia. Te vai ra i roto i te mau Papai Hebera te mau parau tohu e rave rahi o tei tupu a fanauhia ˈi, a tavini ai, a pohe ai, e a faatia-faahou-hia ˈi o Iesu. Ei hiˈoraa, hau atu i te 700 matahiti na mua ˈtu, ua tohu mai o Mika e e fanauhia te Mesia, i Betelehema. (Mika 5:2; Luka 2:4-7) Ua tohu mai o Isaia, i ora na hoê â tau e o Mika e e tairihia te Mesia e tutuhahia ˈtu hoi i nia ia ˈna. (Isaia 50:6; Mataio 26:67) E pae hanere matahiti na mua ˈtu, ua tohu mai o Zekaria e e haavarehia te Mesia no e 30 moni ario. (Zekaria 11:12; Mataio 26:15) Hau atu i te hoê tausani matahiti na mua ˈˈe, ua tohu mai o Davida i te mau tupuraa e tuati i te poheraa o te Mesia ra o Iesu. (Salamo 22:7, 8, 18; Mataio 27:35, 39-43) E e pae senekele na mua ˈtu, ua faaite mai te parau tohu a Daniela afea te Mesia e fa mai ai e tae noa ˈtu hoi te roaraa o ta ˈna taviniraa e te taime oia e pohe ai. (Daniela 9:24-27) O te hoê noa teie tuhaa no te mau parau  tohu i tupu i nia ia Iesu Mesia. E ite mai hoi oe e e faufaahia oe ia taio hau atu â no nia ia ˈna i muri aˈe.

20. Eaha te tiaturiraa ta te faatiaraa tia roa a te Bibilia no nia i te tupuraa te parau tohu, e horoa maira no tatou nei?

²⁰ Ua tupu aˈena e rave rahi mau parau tohu faufaa roa a te Bibilia. ‘Tera râ,’ o ta oe paha ïa e ani, ‘nafea hoi te reira ia ohipa i nia i to ˈu nei oraraa?’ Inaha, ia parau noa mai te hoê taata i te parau mau e rave rahi matahiti, e feaa taue anei oe ia parau mai oia i te tahi mea apî? Eita! Ua faaite mai te Atua i te parau mau i roto i te Bibilia. Eita anei te reira e haapaari i to oe tiaturiraa i te mau parau tǎpǔ a te Bibilia, mai ta ˈna mau parau tohu no nia i te paradaiso i nia i te fenua nei e fatata ra? Oia mau, e nehenehe e noaa ia tatou hoê â tiaturiraa e to te aposetolo Paulo, te hoê o te mau pǐpǐ a Iesu o te senekele matamua, tei papai e ‘eita te Atua e tia ia haavare.’ (Tito 1:2) Hau atu, ia taio tatou i te mau Papai e ia faaohipa i ta ˈna aˈoraa, te faaohipa ra ïa tatou i te paari ta te mau taata iho e ore e nehenehe e faatupu, no te mea o te Bibilia te buka o te faaite i te ite no nia i te Atua o te aratai i te ora mure ore.

“IA HIAAI MAITE OUTOU” I TE ITE NO NIA I TE ATUA

21. Eaha ta oe e rave ia riro te tahi mau mea o ta oe e haapii mai i roto i te Bibilia, ei mea teimaha mau?

²¹ A haapii noa ˈi oe i te Bibilia, e au ra ïa e te haapii ra oe i te mau mea e taa ê nei i tei haapiihia na ia oe i mutaa ihora. E riro atoa paha oe i te ite e aita te Atua e farii maira i te tahi mau peu faaroo i poiherehia na e oe. E ite mai oe e te vai ra ta te Atua mau faaueraa no nia i te mea tia e te mea hape e tei hau aˈe hoi i tei matauhia i roto i teie nei ao o te faatia noa nei i te mau mea atoa. I te haamataraa, e riro paha te reira ei mea teimaha. Tera râ, eiaha na e ru! A tuatapapa maite i te mau Papai ia itea ia oe i te ite no nia i te Atua. Ia farii oe e e titau paha te aˈoraa a te Bibilia e ia taui oe i to oe feruriraa e ta oe mau ohipa.

22. No te aha oe e haapii ai i te Bibilia, e nafea oe e nehenehe ai e tauturu i te tahi pae ia taa i te reira?

²² E riro paha te mau hoa e te mau fetii manaˈo maitai i te  patoi mai i ta oe haapiiraa bibilia, ua parau râ hoi o Iesu e: “E teie nei, o tei faˈi ia ˈu i mua i te aro o te taata nei, e faˈi atoa vau ia ˈna i mua i te aro o tau Metua i te ao ra. O tei huna râ ia ˈu i mua i te aro o te taata nei, e huna atoa vau ia ˈna i mua i te aro o tau Metua i te ao ra.” (Mataio 10:32, 33) E riro paha vetahi i te mǎtaˈu ia ô atu oe i roto i te hoê faaroo huru ê aore ra ia riro oe ei taata paieti ino. Tera râ, i te parau mau, te faaitoito noa ra oe i te rave mai i te ite mau no nia i te Atua e i ta ˈna parau mau. (Timoteo 1, 2:3, 4) No te tauturu atu i te tahi pae ia taa i te reira, ei haerea mǎrû na to oe e tia ˈi, eiaha ei manaˈo aimârô, ia paraparau atu oe ia ratou no nia i te mau mea o ta oe e haapii ra. (Philipi 4:5) Ia haamanaˈo na oe e mea rahi tei “noaa [ma te parau ore ra]” ia ite papu maitai ratou e faufaa-mau-hia te taata i te ite no roto mai i te Bibilia.—Petero 1, 3:1, 2.

23. Nafea oe e nehenehe ai “e hiaai maite” i te ite no nia i te Atua?

²³ Te faaue ru maira te Bibilia ia tatou e: “Ia hiaai maite outou, mai te tamarii fanau apî, i te û anoi-ore-hia ra i te parau, ia paari outou i te reira.” (Petero 1, 2:2) E tiai te aiû i te maa no ǒ mai i to ˈna metua vahine e e onoono noa oia e mâha noa ˈtu ai to ˈna hiaai. Oia atoa hoi, tei te ite no nia i te Atua to tatou ora. “Ia hiaai maite” na i ta ˈna Parau ma te tamau i ta oe haapiiraa. Inaha, ia haamau na oe ei tapao na oe i te taioraa i te Bibilia i te mau mahana atoa. (Salamo 1:1-3) E hopoi mai te reira i te mau haamaitairaa taoˈa rahi mau na oe, te na ô ra hoi te Salamo 19:11 no nia i te mau ture a te Atua e: “E tei te haapao i te reira te utua rahi.”

[Nota i raro i te api]

A HIˈOPOA NA I TO OE ITE

I roto i teihea mau tuhaa te Bibilia e riro ai ei buka otahi roa?

No te aha oe e nehenehe ai e tiaturi i te Bibilia?

Na te aha e haapapu mai ia oe e e Parau faauruahia te Bibilia e te Atua?

[Uiraa haapiiraa]

[Tumu parau tarenihia i te api 14]

IA MATAU NA OE I TA OE BIBILIA

Te haamatauraa oe i te Bibilia, e ere i te mea fifi. A faaohipa i ta ˈna tabula o te mau buka no te haapii i te faanahoraa e te vairaa o te mau buka o te Bibilia.

E mau pene e e mau irava ta te mau buka o te Bibilia no te faaohie i te imiraa. Ua ravehia te mau tatuhaaraa i te mau pene i te senekele 13 e ua tatuhaa te hoê taata nenei farani i te mau Papai Heleni ei mau irava i te senekele 16. Te Bibilia matamua taatoa e pene ta ˈna e e mau irava, o te hoê ïa neneiraa na roto i te reo Farani, i piahia i te matahiti 1553.

Ia faahitihia te mau papai i roto i teie buka, e faaite ïa te numera matamua i te pene e to muri mai i te irava. Ei hiˈoraa, te auraa o te faahitiraa parau a te “Maseli 2:5” o te buka Maseli ïa, pene 2, irava 5. Ia hiˈo oe i te mau papairaa i faahitihia, e ohie roa ïa oe i te imi i te mau parau a te Bibilia.

Te ravea maitai roa ˈˈe e matau ai oe i te Bibilia o te taioraa ïa i te reira i te mau mahana atoa. I te omuaraa, e riro paha ei tautooraa na oe. Ia taio râ oe e toru e tae atu i te pae pene i te mahana, tei te huru to ratou roaraa, e hope roa ia oe i te taio i te Bibilia i roto i te area hoê matahiti. No te aha ïa e ore ai e haamata i teie nei mahana?

[Tumu parau tarenihia i te api 19]

TE BIBILIA—TE HOÊ BUKA OTAHI ROA

• Te Bibilia “e mea faaurua mai ïa e te Atua.” (Timoteo 2, 3:16) Noa ˈtu â ïa e na te mau taata i papai i te mau parau, na te Atua râ i aratai i to ratou mau manaˈo, e inaha riro mau atura hoi te Bibilia ei “parau . . . na te Atua.”—Tesalonia 1, 2:13.

• Ua papaihia te Bibilia i nia i te hoê area tau 16 senekele, na te tahi tau 40 taata no roto mai i te mau huru tiaraa totiale atoa. E au maite râ te Bibilia taatoa mai te haamataraa e tae noa ˈtu i te hopea.

• Ua ora mai te Bibilia i te mau patoiraa uˈana hau atu ia faaauhia i te tahi atu buka. I te matahiti 476 e tae atu i te matahiti 1453 i Europa, ua tutuihia te taata i nia i te pou no te mea noa e mau Papai ta ratou.

• Ua riro te Bibilia ei buka numera hoê roa ˈˈe i roto i te ao nei. Ua hurihia oia, i roto i to ˈna taatoaraa aore ra te hoê noa tuhaa, na roto hau atu i te 2 000 reo. Tau tausani mirioni Bibilia i neneihia, aita e vahi i nia i te fenua nei eita e nehenehe e itehia te Bibilia.

• Te tuhaa tahito roa ˈˈe o te Bibilia no te senekele 16 ïa hou to tatou nei tau. E te reira hou aˈe te iteraahia mai te Rig-Veda hindou (fatata 1300 hou to tatou nei tau), aore ra te “Haapueraa ture o na farii e toru” a Bouddha (senekele pae hou to tatou nei tau), aore ra te Coran a te mau Mahometa (senekele hitu o to tatou nei tau), e te Nihongi Shinto (720 o to tatou nei tau).

 [Hohoˈa api taatoa i te api 20]