Buka Bibilia numera 26—Ezekiela

Taata papai: Ezekiela

Vahi papairaa: Babulonia

Otiraa te papai: area 591 H.T.T.

Area tau puohuhia: 613–area 591 H.T.T.

1. Eaha te huru tupuraa o te mau tîtî i Babulonia, e eaha te mau tamataraa apî ta ratou i faaruru?

 I TE matahiti 617 H.T.T., ua tuu aˈera Iehoiakina, arii no Iuda, ia Ierusalema na Nebukanesa o tei hopoi ê i te feia rahi o te fenua e te mau taoˈa o te fare o Iehova e o te fare o te arii, i Babulonia. I roto i te mau tîtî, te vai ra te utuafare o te arii e te mau tamaiti hui arii, te mau aito, te feia rimaî e te mau patu fare, e o Ezekiela te tamaiti a Buzi te tahuˈa. (Arii 2, 24:11-17; Ezek. 1:1-3) Ma te oto o te mafatu, ua tae to Iseraela i te hopea o to ratou tere fifi mau na te hoê fenua mouˈa mai, e te pape pihaa e te faa i te hoê fenua vahi papu aano. I teie nei, te faaea ra ratou i pihai iho i te pape Kebara i ropu i te hoê hau emepera puai, ma te haaatihia e te hoê nunaa haapaoraa etene mea ê roa ta ratou mau peu. Ua faatia Nebukanesa ia ratou e patu i to ratou iho fare, e rave i te mau tavini e e faanaho i te ohipa tapihoo. (Ezek. 8:1; Ier. 29:5-7; Eze. 2:65) Mai te peu e mea itoito ratou, e nehenehe ratou e ruperupehia. E topa anei ratou i roto i te marei o te haapaoraa Babulonia e o te nounou taoˈa? E tamau anei ratou i te orure i te hau ia Iehova? E farii anei ratou i to ratou faatîtîraa mai te hoê faatitiaifaroraa no ǒ mai ia ˈna ra? E farerei ratou i te mau tamataraa apî i te fenua e faatîtî ra ia ratou.

2. (a) O vai na peropheta faahiahia e toru i vai na i te mau matahiti fifi i aratai atu i te haamouraa o Ierusalema? (b) Ma te faahiahia, nafea Ezekiela e piihia ˈi, e eaha te auraa o to ˈna iˈoa? (c) I teihea mau matahiti i tohu ai Ezekiela, e eaha ta tatou i ite no nia i to ˈna oraraa e to ˈna poheraa?

 ² I roto i te mau matahiti i aratai atu i te haamouraa o Ierusalema, aita Iehova i haapae i te taviniraa a te mau peropheta e aita atoa oia i faaere i te reira i te mau Iseraela. Te tia noa ra Ieremia i Ierusalema iho, te vai noa ra Daniela i te aorai i Babulonia, e o Ezekiela te peropheta o te mau tîtî ati Iuda i Babulonia. E tahuˈa e e peropheta atoa o Ezekiela, te reira atoa te haamaitairaa a Ieremia e i muri aˈe a Zekaria. (Ezek. 1:3) I roto i te buka taatoa, hau atu i te 90 taime o Ezekiela e parauhia ˈi “te tamaiti a te taata,” e manaˈo faufaa teie ia faahohonuhia ta ˈna parau tohu no te mea, i roto i te mau Papai Heleni Kerisetiano, te parau-atoa-hia ra Iesu “te Tamaiti a te taata nei” fatata e 80 taime. (Ezek. 2:1; Mat. 8:20) O “E faaetaeta te Atua” te auraa o to ˈna iˈoa Ezekiela (Hebera, Yechez·qeʼlʹ). I te 5raa o te matahiti faatîtîraa o Iehoiakina, oia hoi 613 H.T.T., to Ezekiela tonoraahia e Iehova ei peropheta. Te taio nei tatou e te rave noa râ oia i ta ˈna taviniraa i te 27raa o te matahiti faatîtîraa, e 22 matahiti ïa i muri aˈe. (Ezek. 1:1, 2; 29:17) Mea faaipoipohia oia, ua pohe râ ta ˈna vahine i te mahana a haamata ˈi Nebukanesa i te haaatiraa hopea ia Ierusalema. (24:2, 18) Aita i itehia afea e nafea oia i pohe ai.

3. Eaha ta tatou e nehenehe e parau no nia i te mea e na Ezekiela i papai i ta ˈna buka, e e parau mau ta ˈna buka e e au i te canon?

³ Aita e mârôhia nei e na Ezekiela i papai i te buka o to ˈna iˈoa to nia iho e e tano to ˈna vairaa i roto i te canon o te mau Papai. Ua tuuhia te reira i roto i te canon i te tau o Ezera e te vai ra i roto i te mau buka a te mau Kerisetiano matamua, i roto iho â râ i te canon a Origène. Te haapapu-atoa-hia ra e e parau mau te buka na roto i te mau tuearaa maere mau o ta ˈna mau faataiperaa e o ta Ieremia e ta te Apokalupo.—Ezek. 24:2-12—Ier. 1:13-15; Ezek. 23:1-49—Ier. 3:6-11; Ezek. 18:2-4—Ier. 31:29, 30; Ezek. 1:5, 10—Apo. 4:6, 7; Ezek. 5:17—Apo. 6:8; Ezek. 9:4—Apo. 7:3; Ezek. 2:9; 3:1—Apo. 10:2, 8-10; Ezek. 23:22, 25, 26—Apo. 17:16; 18:8; Ezek. 27:30, 36—Apo. 18:9, 17-19; Ezek. 37:27—Apo. 21:3; Ezek. 48:30-34—Apo. 21:12, 13; Ezek. 47:1, 7, 12—Apo. 22:1, 2.

4. Eaha te mau tupuraa faahiahia o te mau parau tohu a Ezekiela?

⁴ Te vai atoa ra te tahi atu haapapuraa e e parau mau te buka i roto i te tupuraa peapea o te mau parau tohu a Ezekiela i nia i te mau nunaa tapiri mai ia Turia, Aiphiti e Edoma. Ei hiˈoraa, ua tohu Ezekiela e e faaanohia Turia, e ua tupu te hoê pae i to Nebukanesa haruraa i te oire i muri aˈe i te hoê haaatiraa 13 matahiti. (Ezek. 26:2-21) Aita teie tamaˈi i faatupu roa i te hopea o Turia. Te haavaraa râ a Iehova, ia haamou-roa-hia ïa oia. Ua tohu oia na roto ia Ezekiela e: “E na ˈu e paee i te repo i nia ia ˈna, e ia riro mai te pǎpǎ i nia ihora. . . . E to mau ofai, e te raau, e te repo, e tuu ïa ratou i raro i te moana.” (26:4, 12) Ua tupu roa teie mau parau hau atu i te 250 matahiti i muri aˈe, i to Alexandre le Grand haruraa i te tuhaa oire o Turia i nia i te motu. Ua paee te mau faehau a Alexandre i te mau huˈahuˈa o te tuhaa oire i nia i te fenua e ua taora ratou i te reira i roto i te moana no te hamani i te hoê purumu e 800 metera e tae atu i te tuhaa oire i nia i te motu. I muri iho, ua rave ratou i te tahi mau ohipa fifi no te haaatiraa, e ua paiuma ˈtura i te mau patu e 46 metera i te teitei e ua haru atura i te oire i te matahiti 332 H.T.T. E mau tausani taata tei pohe, e e rave rahi atu â tei hoohia ei tîtî. Mai ta Ezekiela atoa i tohu, ua riro mai Turia ‘mai to nia i te pǎpǎ ra e ei hohoraraa upeˈa.’ (26:14) * I te tahi pae mai o te Fenua Tǎpǔhia, ua haamou-atoa-hia to Edoma feia haavare, ei faatupuraa i te parau tohu a Ezekiela. (25:12, 13; 35:2-9) * Ua tupu atoa hoi te mau parau tohu a Ezekiela no nia i te haamouraa o Ierusalema e te hoˈi-faahou-raa mai o Iseraela.—17:12-21; 36:7-14.

5. Eaha te huru o te ati Iuda i mua i te mau parau tohu matamua a Ezekiela?

⁵ I te omuaraa o ta ˈna taviniraa peropheta, ua poro Ezekiela i te tahi mau haavaraa a te Atua i nia ia Ierusalema te taiva e ua faaara i te mau tîtî no nia i te haamoriraa idolo. (14:1-8; 17:12-21) Aita te mau tîtî ati Iuda i faaite i te tapao no te tatarahapa. E peu matauhia e to ratou mau raatira e uiui ia Ezekiela, aita râ ratou i haapao i te mau poroi a Iehova ta Ezekiela i horoa ˈtu na ratou. Ua tamau noa ratou i ta ratou haamoriraa idolo e ta ratou mau titauraa materia. Ua riro te ereraa i ta ratou hiero, to ratou oire moˈa, e to ratou hui arii ei tupuraa mauiui mau, mea iti roa râ tei faahaehaa e tei tatarahapa.—Sal. 137:1-9.

6. Eaha ta te mau parau tohu hopea a Ezekiela e haamatara ra, e nafea te haamoˈaraa i te iˈoa o Iehova e haamatarahia ˈi?

⁶ Te haamatara ra te mau parau tohu hopea a Ezekiela i te tiaturiraa o te hoˈi-faahou-raa. Te faautua atoa ra te reira i te mau nunaa tapiri o Iuda no to ratou oaoaraa i to ˈna toparaa. E haamoˈa to ratou faahaehaaraa e te hoˈi-faahou-raa o Iseraela, ia Iehova i mua i to ratou mata. Ei haapotoraa, teie te fa o te faatîtîraa e te hoˈi-faahou-raa: ‘E ite outou, e te taata e, te ati Iuda e to te mau nunaa, e o vau o Iehova.’ (Ezek. 39:7, 22) Ua haamatarahia teie haamoˈaraa i te iˈoa o Iehova i roto i te buka taatoa, hau atu hoi i te 60 taime e itehia ˈi teie mau parau: “E ite hoi outou [aore ra ratou] e, o vau o Iehova.”—6:7, nota i raro i te api.

TUMU PARAU O TE EZEKIELA

7. Eaha na tuhaa e toru e au ai ia vahihia te buka Ezekiela?

⁷ E au te buka ia vahihia na roto e toru tuhaa. I  roto i te tuhaa matamua, mau pene 1 e tae atu i te 24, te vai ra te mau faaararaa no nia i te haamouraa papu o Ierusalema. I roto i te piti o te tuhaa, mau pene 25 e tae atu i te 32, te vai ra te mau parau tohu haavaraa no nia tau nunaa etene. I roto i te tuhaa hopea, mau pene 33 e tae atu i te 48, o te mau parau tohu ïa no nia i te hoˈi-faahou-raa, i te orama iho â râ o te hiero apî e te oire moˈa. No te pae rahi, ua faanahohia te mau parau tohu ia au i te tereraa o te tau e te tumu parau atoa.

8. Eaha ta Ezekiela e ite i roto i ta ˈna orama matamua?

⁸ E nomino Iehova ia Ezekiela ei tiai (1:1–3:27). I roto i ta ˈna orama matamua, i te matahiti 613 H.T.T., e ite Ezekiela i te hoê mataˈi puai na apatoerau mai, e te hoê atoa ata rahi e te hoê auahi. I roto i te auahi, e fa mai e maha mea ora ma te pererau, te mata taata, te mata liona, te mata puaatoro e te mata aeto. E au ratou i te arahu ura, e e au ra e te apeehia ra ratou taitahi i te huira i ropu i te hoê huira mea riaria to ˈna teitei e ua î te haaatiraa i te mau mata e ati noa ˈˈe. E tere ratou i te mau vahi atoa ma te tahoê tamau noa. I nia ˈˈe i te upoo o te mau mea ora, te vai ra mai te hoê reva ra te huru, e i nia i te reva, te vai ra te hoê terono e i nia i te reira “o te huru ra” ïa “o te anaana o Iehova.”—1:28.

9. No teihea hopoia i tonohia ˈi Ezekiela?

⁹ E pii Iehova ia Ezekiela o tei tipapa i raro: “E te tamaiti a te taata na, tia hua mai to avae.” E tono ihora oia ia ˈna ei peropheta i Iseraela e i te mau nunaa orure hau fatata. E faaroo ratou aore ra eita, e ere te reira i te mea faufaa. Ia ite râ ratou e ua tia na te hoê peropheta a te Fatu ra o Iehova i roto ia ratou. E faaue Iehova ia Ezekiela e amu i te otaro o te hoê buka, o te riro mai te meli ra i te monamona i roto i to ˈna vaha. E parau oia ia ˈna e: “E te tamaiti a te taata na, ua faariro vau ia oe ei tiai i te utuafare o Iseraela nei.” (2:1; 3:17) E tia ia Ezekiela ia faaara ma te haapao maitai, eita anaˈe e pohe oia.

10. Eaha te faataiperaa na Iseraela ta Ezekiela e hauti?

¹⁰ Te hautiraa taata ora i te haaatiraa o Ierusalema (4:1–7:27). E faaue Iehova ia Ezekiela e nanaˈo i te hoê hohoˈa fenua o Ierusalema i nia i te hoê ofai araea. E tia ia ˈna ia hauti i te hoê haaatiraa i te reira ei tapao na Iseraela. No te haamatara maitai i te manaˈo, e tia ia ˈna ia tarava i mua i te ofai araea e 390 mahana ma to ˈna pae aui i raro e e 40 mahana ma to ˈna pae atau i raro, mea iti roa ta ˈna maa e amu i taua roaraa taime ra. E pee iho â Ezekiela i te mau faaueraa, inaha e autâ oia ia Iehova e taui i te arahu tunuraa maa.—4:9-15.

11. (a) Nafea Ezekiela e faahohoˈa ˈi i te hopea ino o te haaatiraa? (b) No te aha aita e faaoraraa?

¹¹ E faaue Iehova ia Ezekiela e faataipe i te hopea ino o te haaatiraa na roto i te hahuraa i to ˈna rouru e to ˈna umiumi. E tutui oia i te hoê tuhaa i nia i te toru o te reira i te auahi, e tairi oia i te piti i te ˈoˈe e e haapurara i te toru i te mataˈi. Oia mau, i te hopea o te haaatiraa, e pohe te tahi feia no Ierusalema i te oˈe, te maˈi pohe e i te ˈoˈe, e e haapurara-ê-hia te toea i rotopu i te mau nunaa. E faaano roa Iehova ia ˈna. No te aha? No te mea ua faaooo oia ia ˈna i ta ˈna haamoriraa idolo faufau. Eita te ora e noaa i te taoˈa rahi. I te mahana o te riri o Iehova, e faarue te nunaa o Ierusalema i ta ratou ario i roto i te mau aroâ, “e ite hoi ratou e, o vau o Iehova.”—7:27.

12. Eaha te mau mea faufau ta Ezekiela e ite orama no nia ia Ierusalema te taiva?

¹² E ite orama Ezekiela ia Ierusalema te taiva (8:1–11:25). O te matahiti 612 H.T.T. teie. E hopoihia Ezekiela na roto i te hoê orama i te atea roa i Ierusalema, i reira oia e ite ai i te mau ohipa hairiiri e ravehia ra i roto i te hiero o Iehova. I roto i te aumoa, te vai ra te hoê taipe faufau o te faahae ia Iehova. Na roto i te apoo i roto i te patu, e itea ia Ezekiela e 70 feia paari e haamori ra i te mau hohoˈa hairiiri o te mau animala e te mau idolo faufau i nanaˈohia i nia i te patu. E otohe ratou a na ô ai e: “E ore Iehova e hiˈo mai, ua faarue Iehova i te fenua nei.” (8:12) I te uputa apatoerau, te oto ra te mau vahine i mua i te atua etene ra o Tamuza. E ere râ te reira anaˈe! I te uputa iho o te hiero, te haamori ra e 25 taata i te mahana ma te huri i te tua i te hiero. Te faaooo mau ra ratou ia Iehova o te ohipa mau â ia au i to ˈna riri!

13. Eaha te mau faaueraa ta te taata ma te ahu vavai e na taata tooono ma te mauhaa e rave?

¹³ A hiˈo na i teie nei! Te haere maira e ono taata ma te mauhaa taparahi taata i te rima. I roto ia ratou, te vai ra te hituraa o te taata ma te ahu vavai e te farii inita a te papai parau. E faaue Iehova i teie taata ma te ahu vavai e haere na ropu i te oire e tuu i te tapao i nia i te rae o te taata atoa e autâ e e pii hua no te mau ohipa faufau e ravehia ra i reira. I muri iho, e faaue oia i na taata tooono e haere atu e taparahi i te taata atoa, “te taata paari, e te taata apî, e te paretenia, e te tamariirii, e te vahine,” aita e tapao i nia ia ratou. E na reira ratou, a haamata ˈi na nia i te feia paari i mua i te fare. E faaite te taata ma te ahu vavai e: “Ua na reira vau i ta oe i faaue mai ia ˈu ra.”—9:6, 11.

14. Eaha ta te orama e faaite i te pae hopea no nia i te hanahana o Iehova e ta ˈna mau haavaraa?

¹⁴ E ite â Ezekiela i te hanahana o Iehova ia fa mai i nia ˈˈe i te mau kerubi. E toro atu te hoê kerubi i te arahu ura ta ˈna i rave mai i roto i te huira, e e rave mai te taata ma te ahu vavai i te reira e e taora oia i te reira i nia i te oire. Area to Iseraela i purara ê ra, e tǎpǔ Iehova e e haaputu â oia ia ratou e e horoa oia i te hoê varua apî na ratou. Eaha râ no teie feia haamori idolo iino i Ierusalema? “E tahoo atu vau i ta ratou parau i nia ia ratou iho,” ta Iehova ïa e parau ra. (11:21) E itehia te hanahana o Iehova e paiuma ra i nia ˈˈe i te oire, e e faaite Ezekiela i te orama i te nunaa i hopoi-tîtî-hia.

15. Na roto i teihea ˈtu â faahohoˈaraa e faaite ai Ezekiela e mea papu e e hopoi-tîtî-hia te feia no Ierusalema?

¹⁵ Te tahi atu mau parau tohu no nia ia Ierusalema  i papaihia i Babulonia (12:1–19:14). E hauti â Ezekiela i te tahi atu hautiraa taata ora taipe. Ia ao, e faarue oia i to ˈna fare ma te taoˈa a te tîtî, e ia po e haere oia na te hoê apoo i roto i te patu (peneiaˈe te patu o to ˈna fare) ma te mata vehîhia. E faataa oia e e tapao teie: “E haere ïa ratou, e reva hoi ratou ei tîtî.” (12:11) Te parau nei te mau peropheta maamaa o te pee i to ratou iho varua e: “E hau” e aita hoi e hau. (13:10) Ahiri noa ˈtu e tei Ierusalema o Noa, Daniela e o Ioba, eita ta ratou e nehenehe e faaora i te hoê noa ˈˈe taata maori râ ia ratou anaˈe iho.

16. Nafea e faaitehia ˈi te faufaa ore o Ierusalema, no te aha râ e tupu ai te hoê hoˈi-faahou-raa?

¹⁶ E au te oire i te vine faufaa ore. Eita e nehenehe e rave i te raau no te hamani i te rou e te pou iti! E ama na poro e piti i te auahi e e paapaa te ropuraa—mea faufaa ore ïa. Ua riro mau â Ierusalema ei oire aita e faaroo e aita e faufaa! Ua fanauhia oia i te fenua o Kanaana e ua ravehia mai oia e Iehova mai te hoê tamarii i faaruehia. Ua paari mai oia ia ˈna ra e ua ô oia i roto i te faufaa o te faaipoiporaa e oia. Ua faaunauna Iehova ia ˈna “ia au [oia] no te tiaraa arii.” (16:13, MN) Ua riro mai râ oia ei vahine e faaturi e te mau nunaa a haere mai ai ratou ia ˈna ra. Ua haamori oia i ta ratou mau hohoˈa e ua tutui i ta ˈna mau tamarii i te auahi. To ˈna hopea, o te haamouraa ïa i te rima o taua noâ mau nunaa ra, to ˈna mau hoa taatiraa. Mea ino roa ˈtu â oia i to ˈna mau tuahine ra o Sodoma e Samaria. E faaore râ Iehova, te Atua aroha hamani maitai, i ta ˈna hara e e faahoˈi faahou â oia ia ˈna ia au i ta ˈna faufaa.

17. Eaha ta Iehova e faaite na roto i te parabole o te aeto e o te vine?

¹⁷ E pûpû atu Iehova i te hoê parabole i te peropheta e e faaite atu ai i te auraa. E faahohoˈa te reira i te faufaa ore o to Ierusalema imiraa i te tauturu ia Aiphiti ra. E haere mai te aeto rahi (Nebukanesa) e haru i te amaa teitei (Iehoiakina) o te hoê arezi teitei, e hopoi oia ia ˈna i Babulonia, e e tanu oia i te hoê vine (Zedekia) ei mono ia ˈna. E fariu te vine i to ˈna mau amaa i nia i te tahi atu aeto (Aiphiti), e manuïa anei râ te reira? E taihitumuhia oia! E ohiti Iehova i te hoê amaa apî i te vahi teitei o te arezi teitei e e tanu oia i te reira i nia i te hoê mouˈa teitei. I reira te amaa e tupu ai e e riro ai ei arezi nehenehe roa e parahiraa no “te mau manu pererau te mau huru atoa.” Ia ite te taata atoa e ua na reira Iehova.—17:23, 24.

18. (a) Eaha te haapiiraa tumu ta Iehova e faahiti ia aˈo oia i te mau tîtî ati Iuda? (b) Eaha te haavaraa e tiai maira i te mau arii no Iuda?

¹⁸ E aˈo Iehova i te mau tîtî ati Iuda no ta ratou maseli: “Ua amu te mau metua i te vine avaava, e mania te niho o te tamarii.” Eita, “o tei rave i te hara ra, o te pohe ïa.” (18:2, 4) E tamau noa te feia parau-tia i te ora. Eita Iehova e mauruuru ia pohe te taata ino. E oaoa oia ia faarue te taata ino i to ˈna haerea ino e ia ora. Area te mau arii no Iuda ra, mai te mau liona apî, ua noaa ratou i to Aiphiti e to Babulonia. ‘Eita’ to ratou reo ‘e faaroo-faahou-hia i nia i te mau mouˈa o Iseraela.’—19:9.

19. (a) Ia oti ia ˈna i te tohu i te faaanoraa, eaha te tiaturiraa ta Ezekiela e faaite? (b) Nafea oia e faahohoˈa ˈi i te taivaraa o Iseraela e o Iuda e te mau faahopearaa o te reira?

¹⁹ Mau faaararaa ia Ierusalema (20:1–23:49). Ua tae tatou i te matahiti 611 H.T.T. E haere faahou mai te mau matahiapo a te mau tîtî ia Ezekiela ra e uiui ia Iehova. E faaroo ratou i te tuatapaparaa roa o te mau orureraa e te haamoriraa idolo faufau a Iseraela e te faaararaa e e faatae mai Iehova i te ˈoˈe no te faatupu i te haavaraa i nia ia ˈna. E faariro oia ia Ierusalema “ei huˈahuˈa, ei huˈahuˈa, ei huˈahuˈa.” Te vai ra râ te tiaturiraa hanahana! E faataa Iehova i te mana arii (“te korona”) na te haere maira ma “te tiaraa e au i te ture” e e horoa ˈtu oia na ˈna. (21:26, 27, MN) E haapoto Ezekiela i te mau ohipa faufau i ravehia i Ierusalema, “te oire i viivii i te toto.” Ua riro te fare o Iseraela mai “te ota ra” o te haaputuhia i Ierusalema e te faatahehia mai te mea ra e tei roto i te umu. (22:2, 18) E faahohoˈahia te taivaraa a Samaria (Iseraela) e a Iuda na roto e piti tuahine. E faaturi o Samaria oia hoi o Ohola e to Asura e e haamouhia oia e to ˈna mau hoa taatiraa. Eita o Iuda oia hoi o Oholiba e huti i te haapiiraa e e haerea ino roa ˈtu â to ˈna, e faaturi oia e to Asura na mua e to Babulonia i muri iho. E haamou-roa-hia oia e “e ite hoi outou e o te Fatu ra vau o Iehova.”—23:49.

20. E faahohoˈahia te haaatiraa o Ierusalema i te aha, e eaha te tapao putapû ta Iehova e horoa no nia i te haavaraa ta ˈna e faatae mai i nia ia ˈna?

²⁰ E haamata te haaatiraa hopea o Ierusalema (24:1-27). O te matahiti 609 H.T.T. teie. E faaite Iehova ia Ezekiela e ua haaati te arii no Babulonia ia Ierusalema i te 10raa o te mahana o te 10raa o te avaˈe. E faaau oia i te oire i faaetaetahia i te hoê pani rarahi, e o te feia rahi te maa i tuuhia i roto. A tahu râ i te auahi! A haapihaa râ i te viivii atoa o Ierusalema e ta ˈna haamoriraa idolo faufau! I taua atoa mahana ra, e pohe te vahine a Ezekiela, ei auraroraa râ ia Iehova, eita te peropheta e oto. E tapao teie eiaha te taata ia oto ia haamouhia Ierusalema, no ǒ mai hoi ta ˈna haavaraa ia Iehova ra, ia ite ratou o vai oia. E tono Iehova i te hoê taata i ora mai e faaite i te haamouraa o “te unauna o to ratou oaoa,” e hou oia e tae mai ai, eiaha Ezekiela e paraparau faahou i te mau tîtî.—24:25, MN.

21. Nafea te mau nunaa e ite ai ia Iehova e ta ˈna tahooraa?

²¹ Mau parau tohu no te mau nunaa (25:1–32:32). E tohu Iehova e e oaoa te mau nunaa tapiri ia hiˈa Ierusalema e i reira ratou e faaino ai i te Atua o Iuda. Eita ratou e ape i te faautuaraa! E horoahia Amona na to Hitia o te râ ma, e o Moabi atoa. E faaanohia Edoma, e e faatupuhia te tahoo rahi i nia i te mau Philiseti. Ratou pauroa, ta Iehova ïa e parau ra, “e ite hoi ratou e, o Iehova vau, ia tuu atu vau i tau riri i nia ia ratou ra.”—25:17.

22. Eaha te poroi taa ê e faataehia na Turia, e nafea Iehova e haamoˈahia ˈi i Sidona?

 ²² E poroi taa ê ta Turia. Ua teoteo oia no ta ˈna ohipa tapihoo ruperupe, e au oia i te hoê pahi nehenehe i ropu i te miti, fatata râ oia i te parari i roto i te moana hohonu. “E atua vau,” o ta to ˈna ïa raatira faateoteoraa. (28:9) E faaue Iehova i ta ˈna peropheta e faahiti i te hoê himene otoraa no nia i te arii no Turia: Ei kerubi haviti i faatavaihia ra, tei Edene oia, te ô a te Atua; e tuu râ Iehova ia ˈna i rapae i To ˈna mouˈa ei mea tura ore, e e mou oia i te auahi no roto mai ia ˈna iho. E parau Iehova e e haamoˈa-atoa-hia oia maoti te haamouraa o Sidona te teoteo.

23. Eaha ta Aiphiti e ite mai, e nafea te reira e tupu ai?

²³ E parau Iehova i teie nei ia Ezekiela e fariu i to ˈna mata i nia ia Aiphiti e to ˈna Pharao e e tohu no nia ia ratou. “Na ˈu iho ta ˈu pape [Nil], na ˈu i rave na ˈu iho,” o ta Pharao ïa faateiteiraa. (29:3) E tia atoa ia Pharao e to Aiphiti e tiaturi ra ia ˈna, ia ite e o Iehova te Atua, e e horoahia te haapiiraa na roto e 40 matahiti vai-ano-raa. I ǒ nei, e tuu Ezekiela i te tahi mau parau i faaitehia ia ˈna i muri aˈe, i te matahiti 591 H.T.T. E horoa Iehova ia Aiphiti na Nebukanesa ei taoˈa aufau no ta ˈna taviniraa, oia hoi te haamouraa o Turia. (Mea iti roa te mau taoˈa ta Nebukanesa i noaa i Turia, no te mea ua horo ê to Turia i te tuhaa o te oire i nia i te motu ma ta ratou atoa mau taoˈa.) I roto i te hoê himene otoraa, e faaite Ezekiela e e faaino Nebukanesa i te teoteo o Aiphiti, e “e ite hoi ratou e, o Iehova vau.”—32:15.

24. (a) Eaha te hopoia a Ezekiela ei tiai? (b) Ia faaroo oia i te parau apî o te toparaa o Ierusalema, eaha te poroi ta Ezekiela e poro i te mau tîtî? (c) Eaha te tǎpǔ no nia i te haamaitairaa e haamatarahia i roto i te pene 34?

²⁴ Te hoê tiai na te mau tîtî; e tohuhia te hoˈi-faahou-raa (33:1–37:28). E hiˈo faahou Iehova e o Ezekiela i ta ˈna mau hopoia ei tiai. Te parau ra te nunaa e: “Aita te eˈa o Iehova i tano maitai.” E tia ïa ia Ezekiela ia faataa maitai ia ratou e ua hape mau ratou. (33:17, MN) I teie nei râ, ua tae tatou i te matahiti 607 H.T.T., i te 5raa o te mahana o te 10raa o te avaˈe. * E tae mai te hoê taata i ora mai mai Ierusalema mai e parau i te peropheta e: “Ua tairihia taua oire ra.” (33:21) I teie nei e e nehenehe faahou â ta Ezekiela e paraparau atu i te mau tîtî, e faaite atu oia e mea faufaa ore to ratou mau manaˈo atoa e tauturu ia Iuda. Noa ˈtu e e haere noa mai ratou ia Ezekiela e faaroo i te parau a Iehova, ia ratou e au noa oia i te taata himene i te mau himene no nia i te here, mai te hoê e reo navenave to ˈna o te ite i te faataˈi i te upaupa. Eita ratou e faaroo. Ia tupu râ ta ˈna mau parau, e ite ïa ratou e i tia na te hoê peropheta i roto ia ratou. E aˈo Ezekiela i te mau tiai mamoe haavare tei faarue i te nǎnǎ no te faatamaa ia ratou iho. E haaputu â Iehova te Tiai mamoe Maitai roa, i te mau mamoe i purara ê e e aratai oia ia ratou i roto i te hoê aua î i te aihere i nia i te mau mouˈa o Iseraela. I reira oia e faahiti ai i te hoê tiai mamoe no ratou, ‘o ta ˈna tavini o Davida.’ (34:23) E riro o Iehova iho ei Atua no ratou. E faaau oia i te hoê faufaa no te hau e e ninii oia i te tuâ ûa haamaitairaa i nia ia ratou.

25. (a) No te aha e nafea Iehova e faariro ai i te fenua mai te ô i Edene ra? (b) Eaha te faahohoˈahia e te orama o te mau ivi mǎrô? e to na raau e piti?

²⁵ E tohu â Ezekiela i te faaanoraa o te mouˈa o Seira (Edoma). Area te mau vahi ano o Iseraela ra, e faatia-faahou-hia ïa, no te mea e aroha Iehova no to ˈna iˈoa moˈa, ia haamoˈahia i mua i te mau nunaa. E horoa oia na to ˈna nunaa i te hoê aau apî e te hoê varua apî, e e riro mai â to ratou fenua “mai te ô ra mai ia Edene.” (36:35) E ite Ezekiela i teie nei i te hoê orama no nia ia Iseraela faahohoˈahia e te hoê peho î i te ivi mǎrô. E tohu Ezekiela no nia i te mau ivi. E tupu semeio te iˈo i nia iho, e huti ratou i te aho e e ora faahou mai. Na reira atoa Iehova e iriti ai i te mau menema o te faatîtîraa i Babulonia e e faahoˈi faahou mai ai ia Iseraela i to ˈna fenua. E rave Ezekiela e piti raau no te faataipe i na fare o Iseraela, o Iuda e o Epheraima. I to ratou fenua e riro mai ai ratou ei hoê raau. Oia mau, ia faahoˈi faahou Iehova ia Iseraela, e tahoêhia ratou maoti te hoê faufaa no te hau i raro aˈe i te faatereraa a ta ˈna tavini “o Davida.”—37:24.

26. No te aha Goga no Magoga e aro ai, e eaha te faahopearaa?

²⁶ Te aroraa a Goga no Magoga ia Iseraela i hoˈi faahou mai (38:1–39:29). I teie nei, te tae maira te tahi atu â taata aro! Ma te pohehae i te hau e te ruperupe o te nunaa o Iehova i hoˈi faahou mai, e tupu te riri rahi o Goga no Magoga e e aro atu oia. E horo tia ˈtu oia e horomii ia ratou. I reira Iehova e tia mai ai ma te auahi o to ˈna riri rahi. E haafariu oia i te ˈoˈe o te hoê i nia i to ˈna taeae e e hopoi oia i te maˈi pohe e te toto e te tuâ ûa ofai paari, te auahi e te gopheri i nia ia ratou. E hiˈa ratou ma te ite e o Iehova “Tei Moˈa i Iseraela nei.” (39:7) I reira to ˈna nunaa e tutui ai i te mauhaa tamaˈi fatifati i te auahi e e tanu ai i te mau ivi i “te Peho o te Feia rahi a Goga.” (39:11, MN) E amu te mau manu pererau e te mau animala i te iˈo o tei pohe e e inu i to ratou toto. I reira to Iseraela e faaea ˈi ma te ino ore, aore e taata e haamǎtaˈu ia ratou, e e ninii Iehova i to ˈna varua i nia ia ratou.

27. Eaha ta Ezekiela e ite i roto i te hoê orama o te hopoi ia ˈna i te fenua o Iseraela, e nafea te hanahana o te Atua e fa mai ai?

²⁷ Te orama a Ezekiela no nia i te hiero (40:1–48:35). Ua tae tatou i te matahiti 593 H.T.T. O te 14raa ïa o te matahiti i muri aˈe a vavahihia ˈi te hiero a Solomona, e te hinaaro ra te mau tîtî i tatarahapa i te faaitoitoraa e te tiaturiraa. E hopoi Iehova ia Ezekiela na roto i te hoê orama i te fenua o Iseraela e e tuu oia ia ˈna i nia i te hoê mouˈa teitei roa. I ǒ nei,  e ite orama oia i te hoê hiero e te “hohoˈa oire . . . tei te pae i apatoerau ra.” E faaue te hoê melahi ia ˈna e: “O ta oe e ite ra, o te faaite atu ïa i te utuafare o Iseraela.” (40:2, 4) I muri iho, e faaite oia i te mau mea atoa no nia i te hiero e te mau aumoa, a faito ai i te mau patu, te mau uputa, te mau piha o te tiai, te mau piha amuraa maa, e te hiero iho e to ˈna vahi Moˈa e to ˈna vahi Moˈa Roa. E aratai oia ia Ezekiela i te uputa i hitia o te râ. “E inaha, te haere maira te hanahana o te Atua o Iseraela mai te hitia o te râ mai: e to ˈna reo, e au ïa i te haruru tai rahi ra: e ua anaana te fenua i te hanahana no ˈna ra.” (43:2) E haapii maitai te melahi ia Ezekiela no nia i te Fare aore ra hiero: te fata e te mau tusia, te mau tiaraa e te mau hopoia a te mau tahuˈa, te ati Levi e te raatira, e te tufaraa o te fenua.

28. Eaha ta te orama a Ezekiela e faaite no nia i te pape e tahe mai na roto i te Fare, e eaha te faaitehia no nia i te oire e to ˈna iˈoa?

²⁸ E aratai faahou te melahi ia Ezekiela i te uputa o te Fare, i reira te peropheta e ite ai i te pape e tahe maira na te pae apatoa o te fata mai, na raro aˈe i te opani o te Fare e tahe tia ˈtu i hitia o te râ. E pape iti noa te haamataraa mai e haere noa ˈtura râ i te rahi e riro roa mai ai ei tahora. E tahe atu ai te reira i roto i te Miti Avaava, i reira te iˈa e ora faahou mai ai e te hoê ohipa ravaai e ruperupe mai ai. I na pae o te tahora, e horoa mai te mau raau i te maa e te faaoraraa no te taata. I muri iho e horoa te orama i te tufaa o na opu fetii 12, eita e haamoehia te purutia e te raatira, e e faataahia te oire moˈa i apatoa e to ˈna na uputa 12 ma te iˈoa o te opu fetii. E iˈoa hanahana roa to te oire: “Tei reira Iehova.”—48:35.

FAUFAARAA

29. Nafea te ati Iuda i faufaahia ˈi i te parau tohu a Ezekiela?

²⁹ Ua faataa-maitai-hia ˈtu te mau parau, te mau orama e te mau tǎpǔ ta Iehova i horoa ia Ezekiela ra i te mau tîtî ati Iuda. Noa ˈtu e ua tâhitohito te rahiraa i te peropheta, ua tiaturi mau â te tahi pae. Ua haamaitai-rahi-hia ïa teie mau taata. Ua faaitoitohia ratou maoti te mau tǎpǔ no te hoˈi-faahou-raa. Taa ê atu i te tahi atu mau nunaa i hopoi-tîtî-hia, ua tapea ratou i to ratou tiaraa nunaa, e ua faahoˈi faahou Iehova i te hoê toea, mai tei tohuhia, i te matahiti 537 H.T.T. (Ezek. 28:25, 26; 39:21-28; Eze. 2:1; 3:1) Ua patu faahou ratou i te fare o Iehova e ua haamata apî i te haamoriraa mau i ǒ.

30. Eaha te mau haapiiraa tumu i roto i te Ezekiela mea faufaa no tatou i teie mahana?

³⁰ Mea faufaa atoa te mau faaueraa tumu i roto i te Ezekiela no tatou i teie mahana. E faatupu noa te taivaraa e te haamoriraa idolo apeehia e te orureraa hau i te riri o Iehova, atira ˈtu ai. (Ezek. 6:1-7; 12:2-4, 11-16) Na te taata taitahi e faˈi i ta ˈna iho hara, e faaore râ Iehova i te hara a te taata e faarue i to ˈna haerea ino. E arohahia taua taata ra e e ora noa oia. (18:20-22) Ia riro te mau tavini a te Atua ei mau tiai haapao maitai mai ia Ezekiela, noa ˈtu te fifi o te hopoia e noa ˈtu te faaoooraa e te faahaamaraa. Eiaha tatou e vaiiho i te taata ino ia pohe ma te ore e faaarahia, ma to ˈna toto i nia i to tatou upoo. (3:17; 33:1-9) E hopoia rahi ta te mau tiai mamoe o te nunaa o te Atua i te haapaoraa i te nǎnǎ.—34:2-10.

31. Eaha te mau parau tohu i roto i te Ezekiela e faaite ra no nia i te haerea mai o te Mesia?

³¹ Mea faahiahia roa te mau parau tohu no nia i te Mesia i roto i te buka Ezekiela. Te faahitihia ra oia mai te taata “[tei ia ˈna te tiaraa e au i te ture]” e parahi i nia i te terono o Davida e e tia ia horoahia te reira na ˈna. E piti vahi e parauhia ˈi oia “tau tavini nei o Davida,” oia atoa “te tiai [mamoe],” “arii,” e “[raatira].” (21:27, 34:23, 24; 37:24, 25; MN) I te mea e ua pohe aˈena Davida, te faahiti ra ïa Ezekiela i te Taata o te riro ei Tamaiti e ei Fatu atoa no Davida. (Sal. 110:1; Mat. 22:42-45) Te parau ra Ezekiela mai ia Isaia atoa no te tanuraa i te hoê ohǐ apî ta Iehova e faateitei.—Ezek. 17:22-24; Isa. 11:1-3.

32. A faaau na i te orama a Ezekiela no nia i te hiero e te orama o te ‘oire moˈa’ i roto i te Apokalupo.

³² Mea faahiahia roa ia faaau i te orama a Ezekiela no nia i te hiero e te orama i roto i te Apokalupo no nia i ‘te oire rahi ra ia Ierusalema moˈa.’ (Apo. 21:10) E tapao tatou i te tahi mau taa-ê-raa; ei hiˈoraa, tei te vahi ê te hiero a Ezekiela i te pae apatoerau o te oire, area râ, o Iehova iho te hiero o te oire i roto i te Apokalupo. I na pae e piti râ, te tahe maira te hoê pape ora, te horoa ra te mau raau i te hotu e te mau rauere no te faaoraraa i te mau avaˈe atoa, e te vai ra te hanahana o Iehova. E tauturu mai na orama ia haafaufaa tatou i te mana arii o Iehova e te faanahoraa ta ˈna i rave no te faaora i te feia e pûpû i te taviniraa moˈa na ˈna.—Ezek. 43:4, 5—Apo. 21:11; Ezek. 47:1, 8, 9, 12—Apo. 22:1-3.

33. Eaha ta Ezekiela e haamatara, e eaha te faahopearaa no te feia e haamoˈa nei ia Iehova i teie nei i roto i to ratou oraraa?

³³ Te haamatara ra te buka Ezekiela e mea moˈa Iehova. Te faaite ra oia e mea faufaa aˈe te haamoˈaraa i te iˈoa o Iehova i te mau mea atoa. “E haamaitai hoi au i tau iˈoa rahi, . . . e ite hoi te mau fenua e, o Iehova vau, te na reira maira te Fatu ra o Iehova.” Mai ta te parau tohu e faaite ra, e haamoˈa oia i to ˈna iˈoa na roto i te haamouraa i te feia i faaino i taua iˈoa ra, e tae noa ˈtu ia Goga no Magoga. E paari mau ïa to te feia atoa e haamoˈa ra i teie nei ia Iehova na roto i te faaauraa i to ratou oraraa i ta ˈna mau titauraa no te haamori ia ˈna ma te fariihia mai. E fanaˈo ratou i te faaoraraa e te ora mure ore maoti te tahora e tahe maira na te hiero mai. E hanahana e e nehenehe rahi to te oire o “Tei reira Iehova” to ˈna iˈoa!—Ezek. 36:23; 38:16; 48:35.

[Nota i raro i te api]

[Uiraa haapiiraa]