Buka Bibilia numera 36—Zephania

Taata papai: Zephania

Vahi papairaa: Iuda

Otiraa te papai: na mua ˈˈe 648 H.T.T.

1. (a) No te aha te poroi a Zephania i tano maitai ai no to ˈna ra tau? (b) Nafea te auraa o to ˈna iˈoa i tano maitai ai i te huru tupuraa?

 I TE omuaraa o te faatereraa a te arii Iosia no Iuda (659-629 H.T.T.), i te tau a parare ai te haamoriraa a Baala e a aratai ai “te mau tahuˈa a te mau atua ěê” i teie haamoriraa viivii, eita e ore e ua hitimaue to Ierusalema i te poroi i porohia e te peropheta ra o Zephania. Noa ˈtu e e huaai paha oia o te arii Hezekia no te utuafare hui arii no Iuda, ua faahapa hua Zephania i te mau ohipa i tupu i roto i to ˈna nunaa. (Zeph. 1:1, 4, MN) E poroi faautuaraa ta ˈna. Aita te nunaa o te Atua i faaroo, e o Iehova anaˈe te nehenehe e haamau faahou ia ratou i roto i te haamoriraa viivii ore e e haamaitai ia ratou ia nehenehe ratou e tavini ia ˈna ‘ei iˈoa e ei haamaitairaa i roto i te mau taata atoa o te ao nei.’ (3:20) Ua haamatara Zephania e mea na roto anaˈe i te arai o te Atua e “faatapunihia [ˈi te taata] ia tae i te mahana e riri ai Iehova ra.” (2:3) Ua tano roa ïa to ˈna iˈoa o Tsephan·yahʹ (Hebera), oia hoi “Ua faatapuni (faaherehere) o Iehova”!

2. Nafea te mau tutavaraa a Zephania i te hoonaraa, no te aha râ e taime poto noa to te reira?

² Ua hoona te mau tutavaraa a Zephania. I te 12raa o te matahiti o ta ˈna faatereraa, ua haamata aˈera te arii o Iosia, tei parahi i nia i te terono i te 8raa o to ˈna matahiti, i te ‘tamâ ia Iuda e ia Ierusalema.’ Ua faaore roa oia i te haamoriraa hape, ua tataî i “te fare o Iehova,” e ua haamau faahou i te oroa Pasa. (Par. 2, mau pene 34, 35) E taime poto noa râ to te mau tauiraa a te arii Iosia, inaha ua monohia oia e ta ˈna mau tamaiti e toru e hoê o ta ˈna mau mootua, tei rave paatoa i “te parau ino i te aro o Iehova.” (Par. 2, 36:1-12) Ua tupu ïa ia au i te mau parau a Zephania: ‘E faautuahia e au te feia mana e te mau tamarii a te arii ra, e te feia atoa e faaî i te fare o to ratou mau fatu i te rave uˈana, e te haavare ia ratou.’—Zeph. 1:8, 9.

3. Afea e ihea to Zephania tohuraa, e eaha na huru e piti o te poroi e vai ra i roto i ta ˈna buka?

³ Ia au i tei faahitihia i nia nei, e au ra e ‘ua tae mai te parau a Iehova ia Zephania ra’ maa taime rii na mua ˈˈe i te matahiti 648 H.T.T., i te 12raa o te matahiti o Iosia. Aita noa te irava matamua e faaite ra e ua tohu oia i Iuda, te faaite ra râ te mea e mea matau maitai ia ˈna te mau vahi e te mau peu i Ierusalema e te noho atoa ra oia i Iuda. E piti huru to te poroi o te buka, e poroi haamǎtaˈu e e poroi tamahanahana atoa. No nia te rahiraa i te mahana o Iehova, te hoê mahana riaria e fatata maira, i te hoê â râ taime, te tohu ra oia e e haamau faahou Iehova i te feia haehaa o ‘te tiaturi i te iˈoa o Iehova.’—1:1, 7-18; 3:12.

4. Na te aha e haapapu ra e e parau mau te buka a Zephania e mea faauruahia e te Atua?

⁴ Eita e noaa i te patoi e e parau mau teie buka parau tohu. Ua haamouhia Ierusalema i te matahiti 607 H.T.T., hau atu i te 40 matahiti i muri aˈe i to Zephania tohuraa i te reira. E ere noa na te tuatapaparaa a teie nei ao e haapapu ra i te reira, te vai atoa nei râ te haapapuraa i roto i te Bibilia iho e ua tupu mau â mai ta Zephania i tohu. I muri noa ˈˈe i te haamouraa o Ierusalema, ua papai Ieremia i te buka Oto, a faataa ˈi i te mau ohipa riaria ta ˈna i ite mata roa, a vai oraora maitai noa ˈi te reira i roto i to ˈna feruriraa. Ia faaauhia tau irava, e itehia e “mea faaurua” mau â te poroi a Zephania “e te Atua.” Te faaara ra Zephania no nia i te titauraa ia tatarahapa “aore â i tae mai te mahana riri o Iehova i nia ia outou,” area o Ieremia ra, te faahiti ra oia i te tahi mea o tei tupu aˈena ia ˈna i parau e, “ua ninii hua [Iehova] i te uˈana o to ˈna riri.” (Zeph. 2:2; Oto 4:11) Te tohu ra  Zephania e “e tuu mai [Iehova] i te ati i te taata nei, e mai te matapo ra to ratou haere . . . e ninii-noa-hia to ratou toto mai te repo huˈahuˈa ra.” (Zeph. 1:17) Te faahiti ra Ieremia i te reira mai te hoê ohipa i oti: “Ua perehahu haere noa ratou i roto i te mau aroâ mai te matapo, ua viivii hoi ratou i te toto.”—Oto 4:14; hiˈo atoa i te Zephania 1:13—Te oto o Ieremia ra 5:2; Zephania 2:8, 10—Te oto o Ieremia ra 1:9, 16 e 3:61.

5. Nafea te tuatapaparaa e faaite ai e ua tupu mau â te parau tohu a Zephania?

⁵ Te faatia atoa ra te aamu i te haamouraa o te mau nunaa etene, o Moabi e o Amona, e o Asura atoa, e tae noa ˈtu i to ˈna oire pu o Nineve, mai ta Zephania i tohu ia au i ta te Atua i faaue ia ˈna. Mai ta te peropheta o Nahuma i tohu i te haamouraa o Nineve (Nah. 1:1; 2:10), ua faaite Zephania e “e faariro hoi [Iehova] ia Nineve ei oire pau, e te pâpâmǎrô mai te medebara.” (Zeph. 2:13) No te rahi o te haamouraa, ua papai te taata tuatapapa o Hérodote, e 200 matahiti noa i muri iho, no nia i te Tigre mai “te anavai i reira te oire no Nineve i te tiaraa i mutaa ihora.” * I te area 150 T.T., ua papai te taata papai Heleni ra o Lucien e, “aita e toea faahou i teie nei.” * Te na ô ra te hoê titionare (The New Westminster Dictionary of the Bible, 1970), i te api 669 e “ua tauturu-rahi-hia” te mau nuu haru fenua “i te manii-taue-raa te Tigre, o tei tuparari i te hoê pae rahi o te patu o te oire eita e nehenehe faahou e paruruhia. . . . No te rahi o te haamouraa, i te tau o to Heleni e o to Roma, fatata roa Nineve i te riro ei aai. Teie râ, te vai noa ra te tahi mau tuhaa o te oire i raro aˈe i te mau haapueraa pehu.” I te api 627, te faaite ra teie noâ buka e ua haamou-atoa-hia o Moabi mai tei tohuhia mai: “Ua pau to Moabi ia Nebukanesa.” Te faatia atoa ra o Josèphe i te pau o Amona. * Ua moe roa te mau nunaa no Moabi e no Amona.

6. No te aha ïa e tia mau ai ia tuuhia te buka a Zephania i roto i te canon Bibilia?

⁶ Ua tuu noa iho â te ati Iuda i te buka a Zephania i roto i te canon o te mau Papai faauruahia. Ua tupu mau â ta ˈna mau parau i faahitihia ma te iˈoa o Iehova, ei faatiaraa ia Iehova.

TUMU PARAU O TE ZEPHANIA

7. Eaha te huru o te mahana rahi o Iehova no to ˈna mau enemi?

⁷ Te fatata maira te mahana o Iehova (1:1-18). E haamata te buka na roto i te mau parau faautuaraa. “E rave-ê-hia e au te mau mea atoa i nia i te fenua nei, te na reira maira Iehova.” (1:2) Aita hoê aˈe mea e ora mai, to te taata e to te animala. E pohe pauroa te feia haamori ia Baala, te mau tahuˈa o te atua ê, te feia haamori i te raˈi i nia i te mau fare, te feia e anoi i te haamoriraa a Iehova e ta Malakama, te feia e faarue ia Iehova, e te feia e ore e imi ia ˈna. E faaue te peropheta e: “Mamû noa i te aro o te Fatu ra o Iehova, ua fatata hoi te mahana o Iehova.” (1:7) Ua faaineine Iehova iho i te hoê tusia. E itehia mai te mau tamaiti hui arii, te feia haavî uˈana, te feia haavare, e te feia tâuˈa ore. E pau roa ta ratou mau faufaa e ta ratou mau taoˈa. Ua fatata te mahana rahi o Iehova! “E mahana riri taua mahana ra, e mahana ati rahi e te mauiui; e mahana pau rahi e te pohe; e mahana pouri e te rumaruma; e mahana ata rahi e te pouri taotao.” E niniihia te toto o te feia e hara ra ia Iehova mai te repo huˈahuˈa ra. “E to ratou ario e to ratou auro e ore ratou e ora i te reira i te mahana o te riri o Iehova.” E pau roa te fenua atoa i te auahi ra o to ˈna hae.—1:15, 18.

8. (a) Nafea e noaa mai ai te paruru? (b) Eaha te mau pohe i tohuhia i nia i te mau nunaa?

⁸ A imi ia Iehova; e haamouhia te mau nunaa (2:1-15). Hou taua mahana ra e pee ai mai te ota ra, e te feia haehaa e, “e imi ia Iehova . . . e imi i te parau-tia, e imi i te haehaa,” peneiaˈe outou i te “faatapunihia ia tae i te mahana e riri ai Iehova ra.” (2:3) E parau faahou Iehova, a tohu ai i te pohe i nia i te fenua o te Philiseti, o te riro a muri aˈe ei “tahatai no te toea i te utuafare o Iuda.” E riro o Moabi e o Amona teoteo ra ei fenua ano mai ia Sodoma e o Gomora “no te mea ua faaino ratou e ua [faateoteo] ia ratou iho i te mau taata no Iehova sabaota ra.” E mou to ratou mau atua e o ratou atoa. (2:7, 10; MN) E tairi atoa te “ˈoˈe” a Iehova i to Etiopia. Eaha ïa no Asura, e to ˈna ra oire pu o Nineve, i te pae apatoerau? E riro mai ïa ei medebara e ei parahiraa no te mau animala oviri, oia, “[ei maereraa]” e “e riro te taata atoa e na pihai ihora i te tâhito e te ueue i te rima” ma te hitimahuta.—2:12, 15; MN.

9. (a) No te aha te pohe i tohuhia ˈi i nia ia Ierusalema, e eaha te haavaraa a Iehova i nia i te mau nunaa? (b) E hope te parau tohu na nia i teihea parau oaoa?

⁹ Titauhia Ierusalema, te orure hau e faaafaro i te parau; haamaitaihia te toea haehaa (3:1-20). E pohe atoa to Ierusalema, te oire orure hau e te faahepo! Aita to ˈna mau tamaiti hui arii, “te mau liona uuru” e ta ˈna mau peropheta, “te feia haavare” i tiaturi i to ˈna Atua o Iehova. E titau oia ia ratou e faaafaro maitai i te parau. E mǎtaˈu anei to ˈna mau taata ia Iehova e e farii anei i te aˈo? Eita, inaha e “oioi ratou i te haapiˈo roa i ta ratou mau raveraa atoa.” (3:3, 4, 7, MN) E faaotiraa haavaraa na Iehova te haaputuputuraa i te mau nunaa e te niniiraa i to ˈna riri uˈana i nia ia ratou, e e pau te fenua atoa i te auahi o to ˈna ra hae. Te vai nei râ te hoê parau tǎpǔ faahiahia! “I reira” Iehova “e taui ai i te reo o te mau nunaa ei reo viivii ore, ia tiaoro paatoa ratou i te iˈoa o Iehova, ia tavini ratou ia ˈna ma te aau hoê.” (3:9, MN) E faaorehia te feia e oaoa ma te teoteo, e e imi te hoê  toea haehaa o te rave i te parau-tia i te haapuraa i roto i te iˈoa o Iehova. E faaroohia te mau piiraa oaoa, te mau huro, te rearearaa, e te ouˈauˈaraa i roto ia Ziona, inaha tei roto te Arii o Iseraela ra o Iehova ia ratou. E ere teie i te taime no te mǎtaˈu aore ra no te toaruaru, e faaora hoi Iehova e e ouˈauˈa oia i te oaoa e i te here ia ratou. “E faatupu hoi au i to outou iˈoa e te haamaitai ia outou i roto i te mau taata atoa o te ao nei, ia ruri ê au i to outou tîtîraa i mua i to outou mata, te na reira maira Iehova.”—3:20.

FAUFAARAA

10. Eaha te faufaaraa o te parau tohu a Zephania i te tau o te arii Iosia ra?

¹⁰ O te arii ra o Iosia te hoê tei haapao i te poroi faaararaa a Zephania e tei faufaa-rahi-hia i te reira. Ua rave oia i te hoê ohipa tauiraa rahi i te pae faaroo. Mea na reira te iteraahia mai te buka o te Ture, o tei moe i te tau a ore ai te fare o Iehova e tâuˈa-faahou-hia. Ua oto Iosia i te faarooraa i te mau faahopearaa o te auraro-ore-raa i taiohia ˈtu i roto i taua buka ra o te haapapu na roto i te vaha o te tahi atu ite, o Mose, i te parau ta Zephania i tohu noa ra. Ua faahaehaa aˈera Iosia i mua i te Atua, e no reira, ua tǎpǔ mai Iehova ia ˈna e e ore te haamouraa i tohuhia e tupu i to ˈna ra tau. (Deut., mau pene 28-30; Arii 2, 22:8-20) Ua ora ïa te fenua i te ati! Eita râ e maoro, inaha aita te mau tamaiti a Iosia i pee i te hiˈoraa maitai ta ˈna i horoa ˈtu. Ua faufaa-mau-hia râ Iosia e to ˈna nunaa no to ratou haapaoraa i “te parau a Iehova i tae mai ia Zephania.”—Zeph. 1:1.

11. (a) Nafea te buka a Zephania e tuea ˈi e te Aˈoraa i nia i te mouˈa e te rata a Paulo i to Hebera i te pae o te faaararaa? (b) No te aha Zephania e parau ai e “peneiaˈe outou o te faatapunihia”?

¹¹ I roto i ta ˈna Aˈoraa tuiroo i nia i te mouˈa, ua haapapu te Mesia ra o Iesu, te peropheta rahi roa ˈˈe a te Atua, e e peropheta mau o Zephania na te Atua, i to ˈna faahitiraa fatata hoê â mau parau e te aˈoraa a Zephania i te pene 2, irava 3: “E imi ia Iehova, e te feia i haehaa i nia i te fenua nei, . . . e imi i te parau-tia, e imi i te haehaa.” Teie hoi ta Iesu i faaue: “E mata na râ outou i te imi i te basileia o te Atua, e te parau-tia na ˈna.” (Mat. 6:33) E tia i te feia e mata i te imi i te Basileia o te Atua ia ara i te tâuˈa ore ta Zephania i faaara na, i to ˈna parauraa no “te feia i faarue ia Iehova . . . e te feia aore i imi ia Iehova, e aore i ui ia ˈna” e “o tei parau to ratou aau e, E ore Iehova e rave i te maitai, e ore atoa e rave i te ino.” (Zeph. 1:6, 12) I roto i ta ˈna rata i to Hebera, ua faahiti atoa Paulo i te hoê mahana haavaraa e fatata maira e ua faaara oia eiaha e otohe i muri. E na ô faahou atu ai oia e: “E ere râ tatou i to te feia i orai tia i muri e pohe atu; no te feia râ i noaa te faaroo, e ora ˈtu ai te [nephe].” (Heb. 10:30, 37-39; MN) E ere no te feia taiva aore ra te feia mauruuru ore, no te feia râ e imi ia Iehova ma te haehaa e te haavare ore, e te faaroo, te peropheta e parau ai e: “Peneiaˈe outou o te faatapunihia ia tae i te mahana e riri ai Iehova ra.” No te aha “peneiaˈe”? No te mea tei te haerea o te taata taitahi to ˈna ora. (Mat. 24:13) E haamanaˈoraa atoa te reira e eiaha tatou e tiaturi e e aroha haere noa mai Iehova. Te haapapu maitai ra te parau tohu a Zephania e e tupu taue mai taua mahana ra ma te manaˈo-ore-hia.—Zeph. 2:3; 1:14, 15; 3:8.

12. Eaha te faaitoitoraa ta Zephania e horoa ra na te feia “e imi ia Iehova”?

¹² E poroi teie o te tohu ra i te haamouraa no te feia e hara nei i mua ia Iehova, e o te horoa nei râ i te mau faahiˈoraa o te mau haamaitairaa no te feia e “imi ia Iehova” ma te tatarahapa. E nehenehe teie feia tatarahapa e faaitoito, inaha te na ô ra Zephania e, “tei roto ia oe ra te arii o Iseraela, o Iehova.” E ere i te taime no Ziona ia mǎtaˈu aore ra ia toaruaru ma te ohipa ore. E taime râ no te tiaturi ia Iehova. “E puai to te Atua no oe ra, to Iehova, i roto ia oe ra; na ˈna e faaora, na ˈna e mauruuru ia oe ma te oaoa: e faaea maite oia i to ˈna aroha, e ouˈauˈa oia ia oe ma te haamaitai.” Ia oaoa atoa te feia o te ‘mata i te imi i to ˈna basileia,’ a tiai noa ˈtu ai ia fanaˈo ratou i ta ˈna paruru î i te here e ta ˈna haamaitairaa mure ore!—3:15-17.

[Nota i raro i te api]

[Uiraa haapiiraa]