Buka Bibilia numera 41—Mareko

Taata papai: Mareko

Vahi papairaa: Roma

Otiraa te papai: area 60-65 T.T.

Area tau puohuhia: 29-33 T.T.

1. Eaha ta tatou i ite no nia ia Mareko e to ˈna utuafare?

 I TE taime a haruhia ˈi Iesu i Getesemane e a horo ai ta ˈna mau aposetolo, te pee ra “te hoê taata apî ia ˈna, ma te ahu pu i nia iho ia ˈna.” I te taime a tamata ˈi te tiaa taata i te haru atoa ia ˈna, “faarue ihora oia i to ˈna ahu, horo tahaa noa ˈtura.” Te manaˈohia ra e o Mareko taua taata apî ra. I roto i te buka Ohipa, te faataahia ra e “o Ioane, o Mareko te hoê iˈoa ra” e peneiaˈe no roto mai oia i te hoê utuafare navai maitai no Ierusalema inaha, e fare to ratou e e tavini ta ratou. E Kerisetiano atoa to ˈna metua vahine o Maria, e ua faaohipa te amuiraa matamua i to ˈna fare ei vahi putuputuraa. I te taime a faaora ˈi te hoê melahi ia ˈna mai roto mai i te fare tapearaa, ua haere atu Petero i taua fare ra, e ua itea mai ia ˈna te mau taeae e putuputu ra i reira.—Mar. 14:51, 52; Ohi. 12:12, 13.

2, 3. (a) Eaha mau â tei faaitoito ia Mareko ia rave i te taviniraa mitionare? (b) Eaha te faahoaraa ta ˈna i fanaˈo e te tahi atu mau mitionare, mai ia Petero e ia Paulo iho â râ?

² E taeae fetii te mitionare ra o Baranaba, e ati Levi no Kupero, no Mareko. (Ohi. 4:36; Kol. 4:10) I to Baranaba haereraa i Ierusalema na muri ia Paulo no te tahi tauturu i te tau oˈe, ua matau atoa ˈtura Mareko ia Paulo. Eita e ore e ua faatupu teie mau faahoaraa i roto i te amuiraa e tae noa ˈtu i te mau tavini ratere itoito, i te hinaaro o Mareko e rave atoa i te taviniraa mitionare. No reira oia i apee ai ia Paulo raua Baranaba ei hoa e ei tauturu i to raua tere mitionare matamua. No te hoê râ tumu taa ore, ua faarue Mareko ia raua i Perege, i Pamephulia, e ua hoˈi i Ierusalema. (Ohi. 11:29, 30; 12:25; 13:5, 13) No reira Paulo i patoi ai i te rave ia Mareko i te piti o te tere mitionare, e taa ê atura Paulo raua Baranaba. Ua rave ihora Paulo ia Sila, area o Baranaba ra, ua rave ïa i to ˈna taeae fetii o Mareko e fano atura raua i Kupero.—Ohi. 15:36-41.

³ Ua faaite Mareko i te haapao maitai i roto i te taviniraa e ua riro mai ei tauturu maitai roa, eiaha noa no Baranaba, i muri iho atoa râ, no te mau aposetolo Petero e Paulo. Tei ia Paulo ra o Mareko (area 60-61 T.T.) i to ˈna tapearaa matamua i Roma. (Philem. 1, 24) I muri iho, e itehia Mareko e o Petero i Babulonia i roto i te mau matahiti 62 e 64 T.T. (Pet. 1, 5:13) Ua tapea-faahou-hia Paulo i Roma peneiaˈe i te matahiti 65 T.T., e i roto i te hoê rata, e ani oia ia Timoteo ia afai atoa mai ia Mareko a parau ai e, “e maitai hoi au ia ˈna i te toroa nei.” (Tim. 2, 1:8; 4:11) Teie te taime hopea a faahitihia ˈi Mareko i roto i te Bibilia.

4-6. (a) Nafea te noaaraa mai ia Mareko te mau parau rii atoa no ta ˈna Evanelia? (b) Na te aha e haapapu i to ˈna auhoaraa piri e o Petero? (c) A horoa i te mau hiˈoraa no nia i te mau huru o Petero e itehia ra i roto i teie Evanelia.

⁴ Te parauhia ra e na taua Mareko ra i papai i teie Evanelia poto roa ˈˈe. E hoa rave ohipa oia no te mau aposetolo a Iesu e ua pûpû oia i to ˈna oraraa taatoa no te taviniraa i te parau apî maitai. E ere râ o Mareko no roto i na aposetolo 12, e e ere atoa oia i te hoa piri roa no Iesu. Ihea roa te noaaraa mai ia ˈna te mau mea rii atoa o te faaoraora i ta ˈna faatiaraa i te taviniraa a Iesu, mai te haamataraa e tae noa ˈtu i te hopea? Ia au i te tutuu matamua a Papias, a Origène, e a Tertullien, na Petero i faatia ˈtu ia ˈna inaha, mea piri roa raua Mareko. * Aita anei Petero i parau ia ˈna “tau tamaiti”? (Pet. 1, 5:13) Ua ite mata roa ˈtu Petero fatata i te mau ohipa atoa ta Mareko i papai, no reira, e rave rahi mau faataaraa ta Petero i haapii atu ia ˈna aita to roto i te tahi atu mau Evanelia. Ei hiˈoraa, te faahiti ra Mareko i te parau no “na tavini tarahuhia” o tei rave i te ohipa na Zebedaio, te lepera o tei taparu ia Iesu ma te tuu “i te turi i raro,” te taata i uruhia i te demoni o tei “otioti ia ˈna iho i te [ofai]” e te horoaraa Iesu i ta ˈna parau tohu no nia i ‘te haerea mai o te Tamaiti a te taata ma te mana rahi e te hanahana’ a parahi ai oia i nia i te mouˈa i Oliveta ‘i nia ˈˈe i te hiero.’—Mar. 1:20, 40; 5:5; 13:3, 26; MN.

⁵ I te mea e e putapû haere noa Petero, ua taa ïa ia ˈna te mau manaˈo hohonu e te horuhoru o Iesu e ua nehenehe ia ˈna e faataa ˈtu ia Mareko. No reira Mareko e faatia pinepine ai eaha to Iesu huru e eaha ta ˈna i rave; ei hiˈoraa, ua hiˈo oia “e ati noa ˈˈe ma te riri e te inoino,” ua “oto” oia, e “ua autâ [oia] i roto i tana aau.” (3:5; 7:34; 8:12) Na Mareko atoa e faaite mai i te huru o Iesu i nia i te tavana apî taoˈa rahi ra, a na ô ai e “ua aroha ˈtura [Iesu] ia ˈna.” (10:21) Auê atoa te mahanahana e, ia taio tatou e aita noa Iesu i rave mai i te hoê tamarii rii a tuu atu ai i ropu i ta ˈna mau pǐpǐ, ua “hii” atoa râ oia i teie tamarii, e i te tahi atu taime, “ua rave atura [oia] ia ratou, ua hii ihora”!—9:36; 10:13-16.

 ⁶ Te itehia ra te tahi mau huru o Petero i roto i te huru papairaa a Mareko, e mea parau taue hoi, te oraora, te itoito, te taa maitai. E au ra e e ru noa oia i te faatia i te mau tupuraa. Ei hiˈoraa, mea pinepine oia i te parau e “i reira ra,” o te faahoruhoru ïa i te aamu.

7. Eaha te taa-ê-raa i rotopu i te Evanelia a Mareko e ta Mataio?

⁷ Noa ˈtu e e raea noa ia ˈna te Evanelia a Mataio e e 7 % anaˈe o ta ˈna faatiaraa aita to roto i te tahi atu mau Evanelia, e mea hape roa ia manaˈo e ua haapoto noa Mareko i te Evanelia a Mataio a amui atu ai i te tahi mau parau rii taa ê. Ua faataa Mataio ia Iesu mai te Mesia e Arii i tǎpǔhia, area o Mareko ra, te hiˈopoa ra ïa i to ˈna oraraa e ta ˈna mau ohipa ia au i te tahi atu huru hiˈoraa. E faataa oia ia Iesu mai te Tamaiti a te Atua e rave i te mau semeio, te Faaora e upootia. E haamatara Mareko i te mau ohipa a te Mesia, eiaha râ i ta ˈna mau oreroraa parau e ta ˈna mau haapiiraa. Mea iti roa te mau parabole e hoê anaˈe o te mau oreroraa parau roa aˈe a Iesu e vai ra, e aita te Aˈoraa i nia i te mouˈa. No reira te Evanelia a Mareko e poto aˈe ai, noa ˈtu e hoê â rahiraa aamu oraora mau e to roto i te toea. Ua faataa maitai oia 19 aˈe semeio.

8. Eaha te mau mea e haapapu ra e, ua papaihia te Evanelia a Mareko no to Roma?

⁸ Ua papai Mataio i ta ˈna Evanelia no te ati Iuda, area o Mareko ra, e au ra e ua papai oia no to Roma iho â râ. Nafea tatou e ite ai? E faahitihia te ture a Mose ia haere noa te hoê tauaparauraa i nia i te reira, e aita roa te huitupuna o Iesu. E vauvau oia i te evanelia a te Mesia ei mea faufaa roa no te huitaata atoa. E faataa maitai oia i te mau peu e te mau haapiiraa ati Iuda, ta te feia taio e ere i te ati Iuda i ore paha i matau maitai. (2:18; 7:3, 4; 14:12; 15:42) Ua hurihia te mau parau Aramea. (3:17; 5:41; 7:11, 34; 14:36; 15:22, 34) E faataa maitai oia i te iˈoa o te mau vahi e te mau raau tupu no Paletetina. (1:5, 13; 11:13; 13:3) E taui oia i te faufaa o te moni ati Iuda na roto i te moni Roma. (12:42, nota i raro i te api) Mea rahi aˈe te mau taˈo Latino ta ˈna e faaohipa, i te tahi atu feia papai Evanelia, ei hiˈoraa, speculator (tiai taata), praetorium (aorai o te tavana), e centurio (raatira nuu).—6:27; 15:16, 39.

9. Ihea e anafea te buka a Mareko i te papairaahia, e na te aha e haapapu e e parau mau te reira?

⁹ I te mea e ua papai Mareko na mua no to Roma, eita e ore e ua rave oia i te reira i Roma. Ia au i te tutuu tahito roa ˈˈe e te tumu parau o te buka, e nehenehe e parauhia e, ua papai oia i Roma, peneiaˈe i te tapearaa matamua o te aposetolo Paulo aore ra te piti, i te area ïa 60-65 T.T. I taua mau matahiti ra, hoê taime aore ra e piti paha taime to Mareko haereraa i Roma. Ua haapapu te feia ite atoa no te mau senekele piti e te toru e, o Mareko iho â te taata papai. Te taio-haere-aˈena-hia ra ta ˈna Evanelia e te mau Kerisetiano i ropu o te senekele piti. Te haapapu ra te mea e tei roto oia i te mau buka matamua atoa o te mau Papai Heleni Kerisetiano e e parau mau te Evanelia a Mareko.

10. Nafea e tia ˈi i te mau faaotiraa roa e te poto a Mareko ia hiˈohia, e no te aha?

¹⁰ Teie râ, eiaha te mau faaotiraa roa e te poto e tuuhia i te tahi taime i muri aˈe i te pene 16, irava 8, ia hiˈohia ei parau mau. Aita hoi e vai ra i roto i te rahiraa o te mau papai tahito, mai te Sinaiticus e te Vaticanus 1209. Ua tuea te manaˈo o na feia tuatapapa no te senekele maha ra, o Eusèbe e o Jérôme e e hope te faatiaraa mau na roto i te mau parau ra “i te rahi o to ratou mǎtaˈu.” Ua amuihia paha te tahi atu mau faaotiraa no te tamǎrû rii i te hope-taue-raa te Evanelia a Mareko.

11. (a) Na te aha e haapapu e mea tano te Evanelia a Mareko, e teihea mana e haamatarahia ra? (b) No te aha teie e riro ai ei “parau apî maitai,” e eaha te area tau e puohuhia ra e te Evanelia a Mareko?

¹¹ Te itehia ra te tanoraa o te faatiaraa a Mareko na roto i te au-maite-raa ta ˈna Evanelia, eiaha noa e te tahi atu mau Evanelia, oia atoa râ e te taatoaraa o te mau Papai Moˈa, mai te Genese e tae atu i te Apokalupo. Hau atu â, ua faahiti pinepine oia ia Iesu mai te hoê taata e mana to ˈna, eiaha noa i roto i ta ˈna mau parau, i nia atoa râ i te mau puai o te natura, i nia ia Satani e te mau demoni, i nia i te maˈi e te paruparu o te tino, e i nia atoa i te pohe iho. No reira Mareko i faaomua ˈi i ta ˈna faatiaraa na roto i teie parau horuhoru [MN]: “Te haamataraa o te [parau apî maitai] o te Tamaiti a te Atua ra o Iesu Mesia.” Ua riro to ˈna haereraa mai e ta ˈna taviniraa ei “parau apî maitai,” e no reira, e faufaahia te feia taio atoa i te haapiiraa i te Evanelia a Mareko. E puohu te mau tupuraa i faataahia e Mareko i te area mai te tau uaaraa tiare 29 T.T. e tae atu i to te matahiti 33 T.T.

TUMU PARAU O TE MAREKO

12. Eaha to roto i na irava matamua 13 a Mareko?

¹² Bapetizoraa e faahemaraa o Iesu (1:1-13). E haamata Mareko i ta ˈna parau apî maitai na roto i te faataaraa o vai o Ioane Bapetizo. O oia te vea i tohuhia mai, i tonohia no te poro e: “E haamaitai outou i te eˈa o Iehova, e faatitiaifaro i to ˈna haerea.” E parau Ioane Bapetizo no nia i te Hoê e haere maira e, “E mana rahi to ˈna i to ˈu.” Oia mau, e bapetizo oia, eiaha i te pape, i te varua moˈa râ. E haere mai Iesu mai Nazareta i Galilea mai, e e bapetizo Ioane ia ˈna. E pou mai te varua i nia ia Iesu mai te uupa ra te huru, e e faaroohia te hoê reo no te raˈi mai: “O tau Tamaiti here oe, ua mauruuru roa vau ia oe.” (1:3, 7, 11) E faahemahia Iesu e Satani i roto i te medebara, e e haere mai te mau melahi e tavini ia ˈna. Ua faatia-pauroa-hia teie mau ohipa faufaa i roto i na irava matamua 13 a Mareko.

13. Nafea Iesu e faaite ai i te omuaraa iho â, i to ˈna mana ei ‘Moˈa o te Atua ra’?

¹³ E haamata Iesu i ta ˈna taviniraa i Galilea (1: 14–6:6). I muri aˈe i to Ioane tapearaahia, e haere Iesu i Galilea e poro i te parau apî maitai a te Atua. E poroi taa ê mau ta ˈna! “Te fatata mai nei te basileia o te Atua; a tatarahapa, a faaroo mai i te evanelia nei.” (1:15) E titau oia ia Simona, Anederea, Iakobo e ia Ioane, e faarue i ta ratou mau upeˈa e e riro mai ei pǐpǐ na ˈna. I te Sabati, e haamata oia i te haapii i te taata i roto i te sunago i Kaperenaumi. E maere te taata no te mea e haapii oia “ma te mana, e ere mai ta te mau papai parau ra.” E faaite oia i to ˈna mana ei ‘Moˈa o te Atua ra’ na roto i te tiavaruraa i te hoê varua viivii i rapae i te hoê taata i uruhia, e na roto i te faaoraraa i te metua hoovai vahine o Simona, e fiva to ˈna. E parare teie parau apî mai te auahi ra te huru, e i te po, e ruru mai “te oire atoa” i mua i te fare o Simona. E faaora Iesu i te feia maˈi e rave rahi e e tiavaru atoa i te demoni e rave rahi.—1:22, 24, 33.

14. Nafea Iesu e haapapu ai i to ˈna mana e faaore i te hara?

¹⁴ E faaite Iesu eaha to ˈna tere: ‘Ia parau haere au.’ (1:38) E poro oia e ati noa ˈˈe Galilea. I te vahi atoa ta ˈna e haere, e tiavaru oia i te demoni e e faaora i te feia maˈi, e tae noa ˈtu te hoê lepera e te hoê hapepa ta ˈna e parau atu e: “Ua faaorehia ta oe hara.” E na ô te tahi mau papai parau i te feruri i roto ia ratou iho e, ‘E faainaina Atua teie, e tia ia vai ia faaore i te hara maori râ i te Atua anaˈe ra?’ E ite maite Iesu i to ratou manaˈo, e e haapapu oia e “e mana to te Tamaiti a te taata i te ao nei ia faaore i te hara” na roto i te faaueraa ˈtu i te hapepa e tia i nia e e hoˈi i to ˈna fare. E faahanahana te taata i te Atua. Ia riro te telona ra o Levi (Mataio) ei pǐpǐ na ˈna, e parau Iesu i te mau papai parau e: “Aore au i haere mai i te feia parau-tia, i te feia hara râ.” E faaite oia e o o ˈna ‘te Fatu o te sabati.’—2:5, 7, 10, 17, 28.

15. Eaha ta Iesu e parau no nia i te feia e faahapa i ta ˈna mau semeio, e eaha ta ˈna e parau no nia i te mau taairaa fetii?

¹⁵ E haaputu Iesu i teie nei i na aposetolo 12. E patoi to ˈna mau fetii ia ˈna, e e pari te tahi mau papai parau no Ierusalema mai, ia ˈna i te tiavaruraa i te demoni na roto i te mana o te raatira o te mau demoni. E ui Iesu ia ratou, “Eaha e tia ˈi ia tiavaru Satani ia Satani iho?” e e faaara ˈtu oia e: ‘O te faaino i te varua moˈa ra, e ore roa ta ˈna e faaorehia, e au râ ia ˈna te pohe mure ore.’ I roto i taua aparauraa ra, e haere mai to ˈna metua vahine e to ˈna mau taeae e imi ia ˈna, e e hinaaro roa Iesu e parau e: “O tei haapao atoa i te hinaaro o te Atua ra, o to ˈu ïa taeae, o to ˈu ïa tuahine, o to ˈu hoi ïa metua vahine.”—3:23, 29, 35.

16. Na roto i te mau parabole, eaha ta Iesu e haapii no nia i “te basileia o te Atua”?

¹⁶ E haamata Iesu i te haapii “i te parau aroaro [moˈa] i te basileia o te Atua” na roto i te mau parabole. E faahiti oia i te parau no te taata e ueue i te huero o te mairi i nia i te mau repo huru rau (e faahohoˈa ra i te mau taata huru rau e faaroo i te parau) e no te mori turama i nia i to ˈna vairaa. I roto i te tahi atu parabole, e parau Iesu e ua riro te Basileia o te Atua mai te hoê taata i ueue i te huero i nia i te repo: “Na te fenua iho hoi i faatupu aˈe, o mua te oteuraa, e i muri iho te puâraa, e muri aˈera o te sitona mau ïa.” (4:11, 28; MN) E horoa atoa oia i te parabole no nia i te hoê huero sinapi o te tupu roa i te rahi ma te mau amaa ei haapuraa noa ˈtu e o te huero iti roa ˈˈe.

17. Nafea te mau semeio a Iesu e faaite ai i te rahi o to ˈna mana?

¹⁷ A fano ai ratou i te tahi pae mai o te Miti no Galilea, e tamǎrû semeio Iesu i te mataˈi rahi, e e mania roa te miti puai i to ˈna faaueraa e: “A faaea, a mania.” (4:39) I ǒ mai i te fenua no Gadara, e tiavaru Iesu i te hoê “Legeona” demoni i rapae i te hoê taata, e e faatia oia ia tomo ratou i roto i te hoê nǎnǎ fatata e 2 000 puaa, o te horo e te topa ˈtu na nia mai i te mato e paremo ihora i roto i te miti. (5:8-13) I muri iho, e fano faahou Iesu i te tahi pae. E faaorahia te hoê vahine i te maˈi tapahi, tei ore i ora 12 matahiti i te maoro, i to ˈna noa tapearaa ˈtu i te ahu pu o Iesu a haere ai oia e faatia faahou mai i te tamahine 12 matahiti a Iaeiro. Oia mau, e mana to te Tamaiti a te taata i nia i te ora e te pohe! Teie râ, e faahapa te taata no te fenua iho o Iesu i to ˈna mana. E maere oia i to ratou faaroo ore e haere noa ˈtu râ oia “na roto i te mau oire rii i reira iho i te haapii haerea.”—6:6.

18. (a) Nafea te taviniraa a Iesu i te faaaanoraahia? (b) Eaha te mea e turai ia Iesu ia haapii i te taata e ia rave i te semeio?

¹⁸ Faaaanoraa i te taviniraa i Galilea (6:7–9:50). E tono-apipiti-hia te tino 12 ma te faaueraa e te mana e poro e e haapii, e faaora i te taata, e e tiavaru i te demoni. Te tui ra te roo o Iesu, e te manaˈo ra te tahi e o Ioane Bapetizo tera i faatiahia mai te pohe mai. E peapea o Heroda i teie parau, i to ˈna hoi oroa mahana fanauraa i tâpûhia ˈi te upoo o Ioane. E hoˈi mai te mau aposetolo mai to ratou tere pororaa e e faatia ˈtu ratou ia Iesu i ta ratou ohipa i rave. E apee te hoê nahoa taata rahi ia Iesu na Galilea, e e “aroha ˈtura [oia] ia ratou; no te mea mai te nǎnǎ mamoe tiai ore ra ratou.” E haapii atura oia ia ratou i te parau e rave rahi. (6:34) E horoa atoa ˈtu oia ma te here i te maa materia, a faatamaa ˈi e 5 000 tane i na pane e pae e na iˈa e piti. I muri rii aˈe, i te taime a rohi ai te mau pǐpǐ e fano atura i Betesaida, i te faaruru i te mataˈi puai, e haere avae mai oia na nia i te miti e tamǎrû i te mataˈi. No reira iho â ïa ta ˈna mau pǐpǐ e “maere” roa ˈi “aita e faito”!—6:51.

19, 20. (a) Nafea Iesu e faahapa ˈi i te mau papai parau e te mau Pharisea? (b) Eaha te ohipa e tupu e faahapa-atoa-hia ˈi Petero?

¹⁹ I te mataeinaa no Genesareta, e aparau Iesu e te mau papai parau e te mau Pharisea no Ierusalema, no nia i te amuraa i te maa ma te ore e horoi i te rima, e e faahapa oia ia ratou ‘ua haapae hoi ratou i te parau a te Atua, e te tapea nei i tei tuuhia mai e te taata.’ E parau oia e, e ere te mea no rapaeau e ô i roto i te taata te haaviivii ia ˈna, o te mea râ no roto mai i te  mafatu, oia hoi “te manaˈo ino.” (7:8, 21) A haere ai oia i te pae apatoerau i te mau tuhaa fenua no Turia e no Sidona, e rave oia i te hoê semeio no te tahi Etene, a tiavaru ai i te hoê demoni i rapaeau i te tamahine a te hoê vahine no Phenicia-Suria.

²⁰ Ia hoˈi faahou oia i Galilea, e arohâ Iesu i te tiaa taata e apee ra ia ˈna e e faatamaa oia e 4 000 tane i na pane e hitu e te tahi iˈa rii. E faaara oia i ta ˈna mau pǐpǐ i te faahopue a te mau Pharisea e te faahopue a Heroda, aita râ ratou i maramarama i tera taime. E rave oia i te tahi atu semeio—te faaoraraa i te hoê taata matapo i Betesaida. I roto i te hoê aparauraa a haere ai ratou i te mau oire rii i Kaisarea Philipi, e faaite papu Petero e o Iesu “te Mesia,” i muri aˈe râ e patoi etaeta oia ia faahiti Iesu e e fatata mai te haamauiuiraa e te pohe o te Tamaiti a te taata. No reira Iesu e aˈo ai ia ˈna: “E haere ê oe, Satani e, aore hoi oe i au i ta te Atua ra, o ta te taata nei râ ta oe i au.” (8:29, 33) E aˈo Iesu i ta ˈna mau pǐpǐ ia pee tamau ia ˈna no te parau apî maitai; ia haama ratou ia ˈna, e haama atoa oia ia ratou ia tae mai oia ma te hanahana o to ˈna Metua.

21. (a) O vai te ite i “te basileia o te Atua i te taeraa mai ma te mana,” e nafea? (b) Nafea Iesu e haamatara ˈi i te tuuraa i te Basileia na mua?

²¹ E ono mahana i muri iho, a parahi ai ratou i nia i te hoê mouˈa teitei, e fanaˈo Petero, Iakobo, e o Ioane i te haamaitairaa taa ê e ite i “te basileia o te Atua i te taeraa mai ma te mana,” a hiˈo ai ratou ia Iesu i te faahuru-ê-raahia ma te hanahana. (9:1) E faaite â Iesu i to ˈna mana na roto i te tiavaruraa i te hoê varua vava i rapae i te hoê tamaiti, e no te piti o te taime, e faahiti oia i te parau no to ˈna haamauiuiraa e to ˈna pohe e fatata maira. E aˈo oia i ta ˈna mau pǐpǐ eiaha e vaiiho i te tahi mea ia tapea ia ratou ia fanaˈo i te ora. Te hapa ra anei oe i to oe rima? A tâpû ê atu! I to oe avae? A tâpû ê atu! I to oe mata? A faarue ê atu! Mea maitai aˈe ia tae i te Basileia o te Atua e te rima hoê i te huri-taatoa-hia i roto i te Gehena.

22. Eaha te aˈoraa ta Iesu e haamatara i roto i ta ˈna taviniraa i Perea?

²² Taviniraa i Perea (10:1-52). E tae Iesu i te otia o Iudea e i ǒ mai “i te hiti Ioridana” (i Perea). E uiui te mau Pharisea ia ˈna no nia i te faataaraa, e e rave oia i teie taime maitai no te faahiti i te mau faaueraa tumu a te Atua no nia i te faaipoiporaa. E uiui te hoê taurearea taoˈa rahi ia ˈna nafea e noaa ˈi te ora mure ore, e peapea râ oia ia faaroo oia e e tia ia ˈna ia hoo atu i ta ˈna mau faufaa e ia pee ia Iesu e noaa ˈi te taoˈa i nia i te raˈi. E na ô Iesu i ta ˈna mau pǐpǐ e: “E faaô ohie aˈe te kamela na roto i te apoo au i te taata taoˈa ia faaô i te basileia o te Atua ra.” E faaitoito oia i te feia i faarue i te mau mea atoa no te parau apî maitai, a tǎpǔ atu ai e e noaa ta ratou “e hanere atu i teie nei ao . . . e te hamani ino; e i te [faanahoraa o te mau mea i muri nei], o te ora mure ore ïa.”—10:1, 25, 30; MN.

23. Eaha te tauaparauraa e te semeio e tupu i te haereraa i Ierusalema?

²³ E haere Iesu e te tino 12 i Ierusalema. E faaite Iesu ia ratou no te toru o te taime i te haamauiuiraa e tiai maira ia ˈna e i to ˈna atoa tia-faahou-raa. E ui oia ia ratou e e tia anei ia ratou ia inu i te auˈa ta ˈna e fatata i te inu, e e na ô atu e: “O te hinaaro ia hau oia ra, ei tavini ïa no outou atoa na e tia ˈi.” A faarue ai ratou ia Ieriko, e pii mai te hoê taata taparu matapo i te pae purumu e: “E te Tamaiti a Davida ra, e Iesu e, e aroha mai oe ia ˈu.” E faaaraara Iesu i te mata o te taata matapo—ta ˈna faaoraraa semeio hopea i faatiahia e Mareko.—10:44, 47, 48.

24, 25. (a) Na roto i teihea mau ohipa e haapapu ai Iesu i to ˈna mana? (b) Eaha ta ˈna mau pahonoraa i to ˈna mau enemi? (c) Eaha te faaararaa ta Iesu e horoa ˈtu i te nahoa taata, e eaha ta ˈna e faaitoito atu i ta ˈna mau pǐpǐ?

²⁴ Te ohipa a Iesu i Ierusalema e na pihai iho (11:1–15:47). E haere oioi te faatiaraa i mua! E tomo Iesu i roto i te oire na nia i te hoê pinia asini, e e farii popou te taata ia ˈna ei Arii. I te mahana i muri iho, e tamâ oia i te hiero. E mǎtaˈu roa te mau tahuˈa rarahi e te mau papai parau ia ˈna e e imi ratou i te haapohe ia ˈna. “O vai te tumu i rave ai oe i teie nei mau mea?” o ta ratou ïa e ui. (11:28) E pahono Iesu i ta ratou uiraa ma te aravihi e e faatia oia i te parabole o te feia faaapu vine tei haapohe i te taata aiˈa o te ô vine. E taa ia ratou te auraa e e vaiiho atura ia ˈna.

²⁵ I muri iho, e tono ratou i te tahi mau Pharisea e haavarevare ia ˈna i nia i te parau no te tute. E ani oia ia horoahia mai te hoê moni veo, a ui atu ai e: “No vai teie nei hohoˈa e teie nei parau?” E pahono mai ratou e: “No Kaisara.” E parau atu ai Iesu e: “E tuu atu i ta Kaisara ra ia Kaisara, e ta te Atua ra, e tuu atu ïa i te Atua.” E maere mau â ïa ratou ia ˈna! (12:16, 17) O te mau Sakudea ˈtura, o te ore e tiaturi i te tia-faahou-raa, te tamata i te haavarevare ia ˈna e teie uiraa: ‘Ia faaipoipo te hoê vahine e hitu tane te tahi i muri aˈe i te tahi, e riro oia ei vahine na vai i te tia-faahou-raa?’ E pahono oioi atu Iesu e e au te feia e tia faahou mai te pohe mai “i te mau melahi o te [mau raˈi]” inaha, eita ratou e faaipoipo. (12:19-23, 25; MN) “Teihea na te parau rahi o te ture ra?” o ta te hoê papai parau ïa e ui. E pahono atu Iesu e: “Teie te parau rahi o te ture ra, E faaroo mai, e Iseraela e; O Iehova to tatou Atua, hoê hoi Iehova. E e hinaaro oe i to Atua ia Iehova ma to aau atoa, e ma to [nephe] atoa, e ma to manaˈo atoa, e ma to puai atoa. . . . E mai te reira atoa hoi te piti, E aroha ˈtu oe i to taata-tupu mai to aroha ia oe iho na.” (12:28-31; MN) I muri aˈe i teie parau, aita hoê taata e uiui faahou ia ˈna. Ua haapapuhia te mana o Iesu ei orometua haapii tia roa. Ua au roa te tiaa rahi i te faarooraa ia ˈna, e e faaara Iesu ia ratou no nia i te mau papai parau teoteo. E i mua i ta ˈna mau pǐpǐ, e haapopou oia i te vahine ivi veve o te rahi aˈe ta ˈna e tuu i roto i te afata faufaa o te hiero i te taata atoa, “ua hope roa [hoi] a ˈna taoˈa rii navai ore,” ta  ˈna na lepeta e piti, “i te tuuhia e ana i roto.”—12:44.

26. Eaha te oreroraa parau roa hoê i papaihia e Mareko, e e hope te reira na roto i teihea aˈoraa?

²⁶ A parahi ai oia i nia i te mouˈa i Oliveta ma te hiˈo atu i te hiero, e faaite Iesu i ta ˈna mau pǐpǐ e maha anaˈe i “te tapao” o te hopea o teie mau mea. (Teie anaˈe te oreroraa parau roa i papaihia e Mareko, e te tuea ra oia e te mau pene 24 e te 25 a Mataio.) E hope te reira e te aˈoraa a Iesu: “Area te reira mahana e te reira hora, e ore roa te hoê e ite; e ore hoi te mau melahi o te raˈi, e ore atoa te Tamaiti, maori râ o te Metua anaˈe ra. E ta ˈu e parau atu ia outou na, o ta ˈu ïa parau i te taata atoa, [A vai ara noa].”—13:4, 32, 37; MN.

27. A faataa na i te mau ohipa e aratai i te hooraahia Iesu i Getesemane.

²⁷ I Betania, te oire i pihai atu, e faatahinu te hoê vahine ia Iesu i te hinu noˈanoˈa moni rahi. E patoi vetahi i te reira ei haamâuˈaraa, e parau râ Iesu e e ohipa maitai ta ˈna i rave, ei faaineineraa i to ˈna tanuraa. I te taime au, e putuputu Iesu e te tino 12 i te oire no te oroa Pasa. E faaite oia o vai te taata e hoo ia ˈna e e haamau oia i te oroa tamaaraa haamanaˈoraa e ta ˈna mau pǐpǐ haapao maitai, e haere atu ai ratou i nia i te mouˈa i Oliveta. A haere ai ratou, e faaite Iesu e e turori pauroa ratou. “E ore roa vau,” o ta Petero ïa e parau taue. E na ô aturâ Iesu ia ˈna e: “I teie nei â rui, eita e tae i te piti o te aaoaraa moa, e taitoru ai to oe hunaraa ia ˈu.” Ia tae atu ratou i te vahi parauhia Getesemane, e faaatea ê Iesu e pure, a ani ai i ta ˈna mau pǐpǐ ia vai ara noa. E uˈana roa ta ˈna pure ia tae i teie mau parau: “E Aba, e tau Metua, e tia te mau mea atoa ia oe; e hopoi ê atu i teie nei auˈa; ia tupu râ to oe hinaaro, eiaha to ˈu.” E toru taime Iesu e hoˈi ai i ta ˈna mau pǐpǐ ra, e e toru taime ua varea ratou i te taoto, “i te hoê taime mai teie!” (14:29, 30, 36, 41, MN) Ua tae râ i te hora! A hiˈo na!—teie mai nei te taata haavare!

28. Eaha te mau huru tupuraa i to Iesu tapearaahia e to ˈna tiaraa ˈtu i mua i te tahuˈa rahi?

²⁸ E tapiri mai Iuda e apa ia Iesu. O te tapao ïa no te mau tavini a te tahuˈa rahi e mauhaa ta ratou, no te haru ia ˈna. E aratai ratou ia ˈna i te aua o te tahuˈa rahi, e rave rahi i reira o te riro ei mau ite haavare, eita râ ta ratou mau faaiteraa e tuea. E mamû noa Iesu. I te pae hopea, e ui te tahuˈa rahi ia ˈna e: “O te Mesia anei oe te Tamaiti a tei haamaitaihia ra?” E pahono Iesu e, “O vau ïa.” E pii te tahuˈa rahi e, ‘Faainaina Atua!’ e e faautua pauroa ratou ia ˈna i te pohe. (14:61-64) I roto i te aua i raro mai, ua huna Petero ia Iesu e toru taime. E aaoa te moa no te piti o te taime, haamanaˈo aˈera Petero i te parau a Iesu, topatari ihora e oto atura.

29. Nafea Mareko e faatia ˈi i te haavaraa hopea e te haapoheraa o Iesu, e nafea te faaiteraahia e o te Basileia te tumu parau rahi?

²⁹ I te poipoi roa, e apooraa ta te Sunederi, e hopoi ratou ia Iesu ma te ruuruuhia ia Pilato ra. E papu oioi ia ˈna e e ere Iesu i te taata ohipa ino e e tamata oia i te tuu ia ˈna. Teie râ, no te onoono a te nahoa taata e turaihia ra e te mau tahuˈa rarahi, i te pae hopea, e tuu oia ia Iesu ia patitihia i nia i te raau. E arataihia Iesu i Golagota, (oia hoi “Vairaa apu upoo”) e e patitihia oia i nia i te raau, ma te pariraa i papaihia i nia ˈˈe ia ˈna: “O te Arii o te ati Iuda ra.” E faaooo te feia e haere ra, ia ˈna e, “Ua faaora oia ia vetahi ê, eita râ e tia ia ˈna te faaora ia ˈna iho.” I te avatea (te ono o te hora), e pouri roa ˈˈera te fenua taatoa e tae roa ˈtu i te hora toru. I reira, e pii hua Iesu e, “E tau Atua, e tau Atua, eaha oe i faarue mai ai ia ˈu?” e pohe ihora. Ia ite oia i teie mau ohipa, e na ô te hoê raatira faehau e: “O te Tamaiti mau â teie nei taata na te Atua.” E ani o Iosepha no Arimataio, melo no te Sunederi, e taata tiaturi râ i te Basileia o te Atua, i te tino o Iesu ia Pilato a tuu atu ai i roto i te hoê menema i paohia i roto i te mato.—15:22, 26, 31, 34, 39.

30. I te mahana matamua o te hebedoma, eaha te ohipa e tupu i te menema?

³⁰ Mau tupuraa i muri aˈe i te poheraa o Iesu (16:1-8). I te poipoi roa i te mahana matamua o te hebedoma, e haere atu e toru vahine i te menema. E maere roa ratou i te mea e ua huri-ê-hia te ofai rahi i te uputa ra. E parau mai “te hoê taata apî” e parahi ra i roto mai e ua faatiahia o Iesu. (16:5) Aita oia i ǒ faahou, ua haere râ oia na mua ia ratou i Galilea. E horo ê ratou mai te menema ˈtu, ma te ruru e te riaria.

FAUFAARAA

31. (a) Nafea Mareko e haapapu ai e o Iesu te Mesia? (b) Na te aha e haapapu i te mana o Iesu ei Tamaiti a te Atua, e eaha ta ˈna i haamatara?

³¹ Maoti teie faataaraa oraora mau ia Iesu Mesia, ua nehenehe te feia atoa i taio i te Evanelia a Mareko, mai te tau mai â o te mau Kerisetiano matamua e tae roa mai i teie nei, e ite papu i te tupuraa o te mau parau tohu e rave rahi o te mau Papai Hebera no nia i te Mesia. Mai te mau parau matamua ra, “Inaha, e tono vau i tau vea i mua ia oe,” e tae roa ˈtu i te mau parau hopea a Iesu i nia i te raau, “E tau Atua, e tau Atua, eaha oe i faarue mai ai ia ˈu?” ua tuea te taatoaraa o te aamu o ta ˈna taviniraa itoito, ia au i ta Mareko i papai, e ta te mau Papai Hebera i tohu. (Mar. 1:2; 15:34; Mal. 3:1; Sal. 22:1) Hau atu â, ta ˈna mau semeio e ta ˈna mau ohipa faahiahia, ta ˈna haapiiraa o te faaora, ta ˈna mau pahonoraa hapa ore, to ˈna turui-taatoa-raa i nia i te Parau a Iehova e to ˈna varua, e to ˈna tiairaa i te mamoe ma te here—e mau tapao anaˈe ïa o te haapapu e o Oia tei haere mai ma te mana ei Tamaiti a te Atua. Ua haapii oia i te taata “ma te mana,” e mana no ǒ mai ia Iehova ra, e ua haamatara oia e e ohipa faufaa roa na ˈna i te fenua nei “te parau haerea i te parau maitai o te basileia o te Atua,” oia hoi “te fatata mai nei te basileia o te Atua.” Mea maitai roa ta ˈna haapiiraa no te feia atoa e haapao i te reira.—Mar. 1:22, 14, 15.

32. Ehia taime e faahiti ai Mareko i te parau ra “basileia o te Atua,” e eaha te tahi mau faaueraa tumu rahi ta ˈna e vauvau e noaa ˈi te ora na roto i te Basileia?

 ³² Ua parau Iesu i ta ˈna mau pǐpǐ e: “Ua horoahia mai te ite ia outou i te parau aroaro [moˈa] i te basileia o te Atua.” Ua faaohipa Mareko 14 taime i te parau ra “basileia o te Atua” e ua faataa oia e rave rahi faaueraa tumu aratairaa no te feia e fanaˈo atu i te ora na roto i te Basileia. Ua parau Iesu e: “O tei tia ia ˈna i te tuu i to ˈna ora ia ˈu e te evanelia nei, e ora ïa to ˈna.” E tia ia haapae i te mau haafifiraa atoa e tapea ia tatou ia noaa te ora: “E maitai hoi oe ia tae mata hoê i te basileia o te Atua, i te mata piti ia hurihia i te [Gehena].” Ua parau faahou Iesu e: “O te ore e farii i te basileia o te Atua mai te tamaiti aruaru ra, e ore roa ˈtu oia e ô i reira,” e “Te faaô taiata o te feia taoˈa rahi i te basileia o te Atua e!” Ua parau oia e, te taata e taa ia ˈna e mea hau roa ˈˈe ia haapao i na faaueraa rahi e piti i te mau tusia taauahi e te mau tusia atoa, ‘aore ïa i atea ê atu i te basileia o te Atua ra.’ Ua riro teie mau parau e te tahi atu mau haapiiraa no nia i te Basileia o te Evanelia a Mareko, ei mau aˈoraa maitatai roa ta tatou e nehenehe e faaohipa i roto i to tatou oraraa i te mau mahana atoa.—4:11; 8:35; 9:43-48; 10:13-15, 23-25; 12:28-34; MN.

33. (a) Nafea tatou e faufaahia ˈi i te Evanelia a Mareko? (b) Te faaitoito nei Mareko ia tatou ia aha, e no te aha?

³³ E oti paha te parau apî maitai “a Mareko” i te taiohia i roto hoê aore ra e piti hora, o te horoa i te taata taio i te hoê hiˈo-faahou-raa anaanatae, te oioi, e te itoito mau o te taviniraa a Iesu. E ohipa faufaa noâ teie huru taioraa i te faatiaraa i faauruahia, e tae noa ˈtu te faahohonuraa e te feruriruriraa i te reira. Mea faufaa roa te Evanelia a Mareko no te mau Kerisetiano e hamani-ino-hia ra i teie mahana mai to te senekele matamua ra inaha, te faaruru nei te mau Kerisetiano mau i teie nei i te tau “ati rahi” e te hinaaro nei ratou i teie aratairaa i faauruahia, mai teie faatiaraa no nia i to tatou Hiˈoraa o Iesu Mesia. A taio atu e ia putapû outou i te mau tupuraa oraora e faatiahia ra, e a huti mai i te faaitoitoraa ia pee i te taahiraa avae o te Tumu e te Faaoti i to tatou faaroo, o Iesu, ma te oaoa aueue ore mai ta ˈna atoa i faaite. (Tim. 2, 3:1; Heb. 12:2) Oia, a faariro ia ˈna ei taata ohipa oraora, ia î outou i to ˈna itoito, e ia pee i to ˈna hapa ore taiva ore e to ˈna itoito i mua i te tamataraa e te patoiraa. Ia tamahanahanahia outou e teie tuhaa faufaa roa o te mau Papai i faauruahia. Ia faufaahia outou i te reira a imi ai outou i te ora mure ore!

[Nota i raro i te api]

[Uiraa haapiiraa]