Buka Bibilia numera 43—Ioane

Taata papai: Aposetolo Ioane

Vahi papairaa: Ephesia aore ra i pihai iho

Otiraa te papai: area 98 T.T.

Area tau puohuhia: 29-33 T.T. (taa ê noa ˈtu te omuaraa)

1. Eaha ta te mau Papai e faaite ra no nia i te auhoaraa piri o Ioane e o Iesu?

 HAU atu i te 30 matahiti to te mau Evanelia a Mataio, a Mareko, e a Luka taioraahia e haafaufaa-rahi-raahia e te mau Kerisetiano no te senekele matamua ei mau buka a te mau taata i faauruahia e te varua moˈa. I teie nei, a piri mai ai te hopea o te senekele, e a iti ai te taata i fatata na ia Iesu, e nehenehe atura e uihia, Eaha ˈtu â te toe ra i te parau? Te vai râ anei te hoê taata o te nehenehe e tuu faahou mai i te tahi mau parau rii faufaa roa no nia i te taviniraa a Iesu, ta ˈna iho e haamanaˈo ra? E, te vai ra. Ua haamaitai-taa-ê-hia te taata ruhiruhia ra o Ioane i to ˈna auhoaraa e o Iesu. E au ra e tei roto oia i te mau pǐpǐ matamua a Ioane Bapetizo i farerei i te Arenio a te Atua e i na taata matamua e maha ta te Fatu i titau ia apee mai ia ˈna ma te taime taatoa i roto i te taviniraa. (Ioa. 1:35-39; Mar. 1:16-20) Ua tamau noa to ˈna auhoaraa piri e o Iesu i te roaraa o ta ˈna taviniraa e oia “te pǐpǐ here a Iesu ra” i parahi i mua i te ouma o Iesu i te Pasa hopea. (Ioa. 13:23; Mat. 17:1; Mar. 5:37; 14:33) Tei reira atoa oia i te taime mauiui mau o te haapoheraa o Iesu e to ˈna faaueraa mai ia ˈna e haapao i To ˈna metua vahine pae tino, e ua hemo atoa Petero ia ˈna i to raua hororaa ˈtu i te menema e hiˈo e ua faatia-mau-hia anei o Iesu.—Ioa. 19:26, 27; 20:2-4.

2. Nafea to Ioane faaineineraahia e faaitoitoraahia no te papai i ta ˈna Evanelia, e no teihea fa?

² Ma te aravihihia i na 70 matahiti taviniraa itoito e maoti te mau orama e te mau feruriruriraa i to ˈna tapearaahia oia anaˈe i nia i te motu no Patamo, ua ineine maitai Ioane i te papai i te mau mea ta ˈna i tamau noa e mea maoro i teie nei i roto i to ˈna mafatu. Te faaitoito ra te varua moˈa i to ˈna feruriraa ia haamanaˈo oia e ia papai roa ˈtu e rave rahi mau parau faufaa e te ora hoi, ia nehenehe te taata atoa e taio e ‘e faaroo e, o Iesu Mesia te Tamaiti a te Atua, e ia noaa hoi te ora i to ˈna iˈoa i te faarooraa.’—20:31.

3, 4. Eaha te haapapuraa no rapae mai e i roto noa iho e (a) e au te Evanelia i te canon, e (b) o Ioane te taata papai?

³ Ua farii te mau Kerisetiano no te omuaraa o te senekele piti e, na Ioane i papai i teie buka ta ratou e hiˈo atoa ra ma te feaa ore ei tuhaa o te canon o te mau Papai faauruahia. Ua haapapu o Clément no Alesanederia, o Irénée, o Tertullien, e o Origène, no te hopea anaˈe ratou o te senekele piti e te omuaraa o te senekele toru e o Ioane te taata papai. Hau atu â, e rave rahi haapapuraa e na Ioane i papai i te buka, i roto noa iho. Papu maitai e e ati Iuda te taata papai e mea matau maitai ia ˈna te mau peu a te ati Iuda e to ratou fenua. (2:6; 4:5; 5:2; 10:22, 23) Te faaite ra te hohonuraa o te aamu e e ere noa oia i te hoê aposetolo, tei roto atoa râ oia i na hoa piri roa e toru—o Petero, Iakobo, e o Ioane—o tei apee atu ia Iesu i te tahi mau taime taa ê roa. (Mat. 17:1; Mar. 5:37; 14:33) I roto ia ratou, e ere na Iakobo (te tamaiti a Zebedaio) i papai, no te mea ua haapohehia oia no te faaroo e Heroda Ageripa I i te area 44 T.T., mea maoro ïa hou teie buka a papaihia ˈi. (Ohi. 12:2) E ere atoa na Petero no te mea te faahitihia ra oia i pihai iho i te taata papai i roto i te Ioane 21:20-24.

⁴ I roto i teie mau irava hopea, te faahitihia ra te taata papai mai “taua pǐpǐ herehia e Iesu ra,” mea pinepine teie parau e te tahi atu mai teie te huru, i roto i te aamu, noa ˈtu e aita roa ˈtu te iˈoa o te aposetolo Ioane i faahitihia. No ˈna Iesu e na ô ai e: “I hinaaro vau i te vaiiho ia ˈna e ia tae noa mai au ra, eaha ta oe i reira?” (Ioa. 21:20, 22) Te faaite ra te reira e e ora maoro aˈe te pǐpǐ e faahitihia ra, ia Petero e te tahi atu mau aposetolo. E tano teie mau mea atoa i te aposetolo Ioane. Mea anaanatae ia ite e, i muri aˈe i to ˈna horoaraahia te orama o te haerea mai o Iesu i roto i te Apokalupo, e faaoti Ioane i teie parau tohu faahiahia, i te na ôraa e: “Amene. Oia ïa, a haere mai, e te Fatu, e Iesu e!”—Apo. 22:20.

5. Peneiaˈe afea ra Ioane i papai ai i ta ˈna Evanelia?

⁵ Noa ˈtu e aita te mau papai a Ioane iho e faataa maira i te reira, te manaˈohia ra e ua papai Ioane i ta ˈna Evanelia i muri aˈe i to ˈna hoˈiraa mai mai to ˈna hopoi-tîtî-raahia i nia i te motu no Patamo. (Apo. 1:9) Ua faahoˈi te emepera Roma ra o Nerva (96-98 T.T.) e rave rahi feia i hopoi-tîtî-hia i te hopea o te faatereraa a te emepera no mua ˈˈe ia ˈna, o Domitien. I muri aˈe i te papairaa i ta ˈna Evanelia, i te area 98 T.T., te manaˈohia ra e ua pohe Ioane ma te  hau i Ephesia i te toru o te matahiti faatereraa a te emepera Trajan, i te matahiti 100 T.T.

6. Eaha te haapapuraa e ua papaihia te Evanelia a Ioane i rapaeau i Paletetina, i Ephesia aore ra i pihai iho?

⁶ No nia i te parau e i Ephesia aore ra te hoê vahi fatata to Ioane papairaa, te faahiti ra te taata tuatapapa o Eusèbe (area 260-area 340 T.T.) i te parau a Irénée: “Ua papai atoa Ioane, te pǐpǐ a te Fatu, i vai na i nia i to ˈna ouma, i te evanelia, a parahi ai oia i Ephesia i Asia.” * Ua papaihia teie buka i rapaeau ia Paletetina, o te haapapuhia ïa e te mea e e rave rahi taime te mau enemi o Iesu i te parau-noa-hia “te ati Iuda,” eiaha râ “te mau Pharisea,” “te mau tahuˈa rarahi,” e e rau atu â. (Ioa. 1:19; 12:9) Oia atoa, ua ravehia te iˈoa Roma o te roto i Galilea, oia hoi te roto i Tiberia. (6:1; 21:1) No te tauturu i te feia e ere i te ati Iuda, ua tatara Ioane i te mau oroa ati Iuda. (6:4; 7:2; 11:55) Tei pihai iho te vahi oia i hopoi-tîtî-hia ˈi, o Patamo, ia Ephesia, e te itehia ra e mea matau maitai ia ˈna te oire no Ephesia, e tae noa ˈtu te mau amuiraa ê atu no Asia Iti, i roto i te mau pene 2 e 3 o te Apokalupo.

7. Eaha te faufaaraa o te Papyrus Rylands 457?

⁷ Ua itehia mai te mau papai faufaa roa i te senekele 20 e haapapu ra e e parau mau te Evanelia a Ioane. Hoê o teie mau parau, o te tuhaa ïa o te Evanelia a Ioane i itehia mai i Aiphiti, matauhia i teie nei mai te Papyrus Rylands 457 (P⁵²), tei roto te Ioane 18:31-33, 37, 38, e te haapaohia ra i te Vairaa buka John Rylands, i Manchester, i Beretane. * No nia i te haapapuraa i te tutuu e na Ioane i papai i te hopea o te senekele matamua, teie ta Sir Frederic Kenyon, i pohe i teie nei, i parau i roto i ta ˈna buka (The Bible and Modern Scholarship, 1949, api 21): “Noa ˈtu to ˈna nainai, ua navai râ no te haapapu e te taiohia ra te hoê papai o teie Evanelia, peneiaˈe i Aiphiti i te mataeinaa iho i itehia mai ai, i te area 130-150 T.T. Ia taiohia te taime e titauhia ia tae mai teie buka mai to ˈna vahi papairaa, e piri roa ˈtu te tau i papaihia ˈi i te tau i faahitihia e te tutuu, oia hoi te mau ahuru matahiti hopea o te senekele matamua, e no reira, aita e tumu faahou no te feaa no nia i te tanoraa o teie tutuu.”

8. (a) Eaha te vahi faahiahia o te omuaraa o te Evanelia a Ioane? (b) Eaha te haapapuraa ta te reira e horoa maira e e toru matahiti e te afa te roaraa o te taviniraa a Iesu?

⁸ Mea faahiahia roa te Evanelia a Ioane no ta ˈna omuaraa parau e faaite ra i te Logo i vai na ‘i te Atua ra i te matamua ra,’ mai te Taata mea na roto ia ˈna te mau mea atoa i hamanihia ˈi. (1:2) I muri aˈe i te faaiteraa i te taairaa taa ê i rotopu i te Metua e te Tamaiti, e faataa Ioane ma te aravihi mau i te mau ohipa e te mau oreroraa parau a Iesu, ia au iho â râ i te here rahi e taati ra i te mau mea atoa i roto i te faanahonahoraa rahi a te Atua. E puohu teie faatiaraa i te oraraa o Iesu i te fenua nei i te area tau 29-33 T.T., e e faahiti papu i na oroa Pasa e maha ta Iesu i faatupu i roto i ta ˈna taviniraa, ei haapapuraa atoa ïa i te maororaa e toru matahiti e te afa o ta ˈna taviniraa. E toru o teie mau oroa tei parau-roa-hia e Pasa. (2:13; 6:4; 12:1; 13:1) Te parauhia ra te tahi “e oroa ta te ati Iuda ra,” tera râ, te faahiti ra te mau irava tapiri e, ua tupu i muri rii aˈe i to Iesu parauraa e “e maha marama toe e auhune ai,” e tapao faaite ïa e, o te oroa Pasa tera, e tupu i te area o te haamataraa o te auhune.—4:35; 5:1. *

9. Eaha te faaite e e parau hau te Evanelia a Ioane, e tera râ, e horoa mai anei te reira i te mau parau rii atoa o te taviniraa a Iesu?

⁹ Mea rahi te mau parau hau i roto i te parau apî maitai “a Ioane ra”; e 92 % o teie Evanelia e mau mea apî ïa, aita i faahitihia i roto i te tahi atu na Evanelia e toru. Noa ˈtu râ, e faaoti Ioane na roto i teie mau parau: “E rave rahi â ta Iesu peu i rave, ahiri i hope atoa i te papaihia, te manaˈo nei au, e ore e tia i to te ao atoa nei ia farii mai i taua mau buka ra, ahiri i papaihia.”—21:25.

TUMU PARAU O TE IOANE

10. Eaha ta Ioane e parau no nia i “te Logo”?

¹⁰ Omuaraa: Faaiteraa i “te Logo” (1:1-18). Ma te ohie nehenehe mau, e parau Ioane e “i vai na te Logo i te matamua ra, i te Atua ra,” mea na roto mai ia ˈna te ora, ua riro oia ei ‘maramarama o te taata,’ e ua faaite Ioane Bapetizo no nia ia ˈna. (1:1, 4). I te ao nei na te maramarama, aita râ te ao i ite ia ˈna. Ua riro tei farii mau ia ˈna ei mau tamarii na te Atua, fanauhia e te Atua. Ua horoahia te Ture na roto ia Mose, area “te maitai [rahi] e te parau mau, na [roto ïa ia] Iesu Mesia.”—1:17; MN.

11. E faaite Ioane Bapetizo ia Iesu mai te aha, e e farii ta ˈna mau pǐpǐ ia Iesu mai te aha?

¹¹ Faaiteraa i “te Arenio a te Atua” i te taata (1:19-51). E faˈi Ioane Bapetizo e e ere oia te Mesia, e parau râ oia e te haere maira te hoê i muri mai ia ˈna, o te ore e au ia ˈna ia tatara i te tapea o to ˈna tamaa. I te mahana i muri aˈe, ia haere atu Iesu ia ˈna ra, e faaite Ioane ia ˈna mai “te Arenio a te Atua, o tei hopoi ê atu i te hara a te ao.” (1:27, 29) I muri aˈe, e haafarerei oia e piti o ta ˈna mau pǐpǐ ia Iesu, e e aratai hoê, o Anederea i to ˈna taeae o Petero ia Iesu ra. E farii atoa Philipa e o Natanaela ia Iesu mai ‘te Tamaiti a te Atua, te Arii o Iseraela.’—1:49.

12. (a) Eaha te semeio matamua a Iesu? (b) Eaha ta ˈna e rave i Ierusalema i te Pasa matamua o ta ˈna taviniraa?

¹² E haapapu te mau semeio a Iesu e o oia ‘te Moˈa a te Atua’ (2:1–6:71). E rave Iesu i ta ˈna semeio matamua i Kana i Galilea, na roto i te tauiraa i te pape ei uaina maitatai roa i te hoê oroa faaipoiporaa.  O teie ta ˈna “tapao matamua, . . . e ua faaroo aˈera ta ˈna mau pǐpǐ ia ˈna.” (2:11) E haere Iesu i Ierusalema no te Oroa Pasa. Ia ite oia i te mau hoo taoˈa e te mau hoo moni i roto i te hiero, e rave oia i te hoê tairi e tiahi ia ratou i rapae ma te itoito rahi e itea roa ˈi i ta ˈna mau pǐpǐ te tupuraa o te parau tohu: “Ua riro roa vau i te itoito i to fare.” (Ioa. 2:17; Sal. 69:9) E tohu oia e e hurihia te hiero o to ˈna iho tino i raro e e faatia-faahou-hia râ i roto e toru mahana.

13. (a) Eaha ta Iesu e faaite e mea faufaa e noaa ˈi te ora? (b) Nafea Ioane Bapetizo e faahiti ai ia ˈna iho ia faaauhia ia Iesu?

¹³ E haere Nikodemo ia Iesu ra i te po no to ˈna mǎtaˈu. E faˈi oia e na te Atua i tono ia Iesu, e e parau atu Iesu ia ˈna e e tia i te taata ia fanauhia i te pape e te varua e tae ai i te Basileia o te Atua. Mea titauhia ia tiaturi i te Tamaiti a te taata no te raˈi mai, e ora ˈi. “I aroha mai te Atua i to te ao, e ua tae roa i te horoa mai i ta ˈna Tamaiti fanau tahi, ia ore ia pohe te faaroo ia ˈna ra, ia roaa râ te ora mure ore.” (Ioane 3:16) E taa ê roa te maramarama i tae mai i te ao nei i te pouri, “O tei haapao ra i te parau mau ra, e tae mai ïa i te maramarama,” o ta Iesu ïa parau hopea. E faaroo Ioane Bapetizo no nia i te ohipa a Iesu i Iudea e e parau oia e noa ˈtu e e ere oia te Mesia, “o te hoa râ o taua tane ra . . . e oaoa rahi to ˈna i te reo o taua tane ra.” (3:21, 29) E tia ia Iesu ia tupu i te rahiraa e ia Ioane ia hoˈi i te itiraa.

14. Eaha ta Iesu e faataa i te vahine Samaria i Sikara, eaha te faahopearaa i to ˈna pororaa i reira?

¹⁴ E haere faahou â Iesu i Galilea. I nia i te purumu, no te ‘rohirohi i te haerea,’ e parahi oia e faafaaea i pihai iho i te apoo pape a Iakobo i Sikara, a haere ai ta ˈna mau pǐpǐ e hoo mai i te maa i te oire. (4:6) Ua avatea, te ono o te hora. Te haafatata maira te hoê vahine Samaria e huti i te pape, e e ani atu Iesu i te pape e inu. E, noa ˈtu to ˈna rohirohi, e haamata oia i te paraparau atu no nia i te “pape” mau o te faahaumǎrû mau e te horoa i te ora mure ore i te feia e haamori i te Atua “ma te varua e te parau mau.” E hoˈi mai te mau pǐpǐ e e faaitoito ia ˈna e tamaa, e parau atu oia e: “Teie ta ˈu maa, o te haapao i to ˈna hinaaro o to tei tono mai ia ˈu nei, e te faaoti i ta ˈna ohipa.” E faaea â oia e piti mahana hau i taua vahi ra, e e rave rahi to Samaria e faaroo e “o te Ora mau teie [taata] o to te ao.” (4:24, 34, 42; MN) Ia tae atu oia i Kana i Galilea, e faaora Iesu i te tamaiti a te hoê taata mana ma te ore e haere roa ˈtu i pihai iho.

15. Eaha te mau pariraa e ravehia i nia ia Iesu i Ierusalema, nafea râ oia e pahono ai i te feia e faahapa ia ˈna?

¹⁵ E haere â Iesu i Ierusalema no te oroa ati Iuda. E faaora oia i te hoê taata maˈi i te Sabati, o te faatupu ïa i te hoê patoiraa rahi. E pahono atu Iesu: “Te ohipa noa nei â tau Metua, e ohipa atoa hoi au.” (5:17) E parau te mau aratai ati Iuda i teie nei e, hau atu i te hara o te ofatiraa i te Sabati, te faaino ra Iesu i te Atua i te faaaifaitoraa ia ˈna i te Atua. E pahono atu Iesu e eita te Tamaiti e rave i te hoê noa ˈˈe mea na roto ia ˈna iho, e auraro roa râ oia i te Metua. E parau oia i te parau faahiahia mau e ‘e faaroo te feia atoa i roto i te apoo i tana reo, e e haere mai i rapae’ no te tia-faahou-raa. I te feia râ aita to ratou e faaroo, e parau atu Iesu e: “Eaha outou e faaroo ai, tei titau outou i ta outou iho haamaitai, e aita outou i haapao i ta te Atua anaˈe ra haamaitai?”—5:28, 29, 44.

16. (a) Eaha ta Iesu e haapii no nia i te maa e te ora? (b) Nafea Petero e faaite ai i te tiaturiraa hohonu o te mau aposetolo?

¹⁶ Ia faatamaa semeio Iesu e 5 000 tane i na pane e pae e na iˈa rii, e hinaaro te nahoa taata e haru ia ˈna e faariro ei arii, e maue râ oia i nia i te mouˈa. I muri aˈe, e faahapa oia ia ratou i te imiraa i “te maa tahuti noa.” E tia râ ia ratou ia rohi no ‘te maa e tia i te vairaa e tae noa ˈtu i te ora mure ore.’ E haapapu oia e te amuraa i te pane ora, te faaohiparaa ïa i te faaroo ia ˈna ei Tamaiti a na ô ai e: “Ia ore outou ia amu i te tino o te Tamaiti a te taata nei, e ia ore hoi ia inu i to ˈna toto, aore ïa e ora i roto ia outou.” E rave rahi o ta ˈna mau pǐpǐ te turori i te reira e te faarue ia ˈna. E ui Iesu i te tino 12 e: “E haere atoa anei outou?” e e pahono Petero e: “E te Fatu, e haere tia matou ia vai ra? tei ia oe hoi te parau o te ora mure ore ra. Ua faaroo aˈenei hoi matou, e ua ite hoi matou e, o oe te Mesia, tei [Moˈa] a te Atua.” (6:27, 53, 67-69; MN) E parau râ Iesu, ma te ite e e haavare Iuda ia ˈna, e e pari haavare te hoê o ratou.

17. Eaha te faahopearaa i to Iesu haapiiraa i roto i te hiero i te Oroa Patiaraa Tiahapa?

¹⁷ E taa ê roa “te maramarama” i te pouri (7:1–12:50). E haere omoe Iesu i Ierusalema e ia tae i te afaraa o te Oroa Patiaraa Tiahapa, e haere oia i te hiero e haapii ma te huna ore. E patoi te nunaa i to ˈna tiaraa Mesia. E parau Iesu ia ratou e: “Aore au i haere noa mai, area tei tono mai ia ˈu nei, e parau mau ta ˈna, . . . e na ˈna hoi au i tono mai nei.” I te tahi atu â taime, e pii atu oia ia ratou e: “Te taata i hiaai ra, e haere mai oia ia ˈu nei a inu ai.” E hoˈi te feia toroa i tonohia e haru ia Iesu ma te manuïa ore e e faataa ratou i te mau tahuˈa e: “Aita roa e taata e au te parau i ta tera aˈera taata.” Ma te riri rahi, e pahono te mau Pharisea e aita hoê aˈe raatira i faaroo, aita atoa e peropheta no ǒ mai i Galilea.—7:28, 29, 37, 46.

18. Eaha te patoiraa ta te ati Iuda e faatupu i nia ia Iesu, e nafea oia e pahono ai?

¹⁸ I roto i te tahi atu â oreroraa parau, e na ô Iesu e: “O vau te maramarama o teie nei ao.” Ia parihia oia ma te ino e e ite haavare oia, e ua fanauhia oia i rapaeau i te faaipoiporaa, e no Samaria oia e e demoni to ˈna, e pahono hua ˈtu Iesu e: “I haamaitai au ia ˈu ihora, e haamaitairaa faufaa ore ïa ta ˈu; o tau  Metua tei haamaitai mai ia ˈu.” Ia parau oia, “Aita Aberahama i fanau, te vai nei au,” e tamata â te ati Iuda ma te ore e manuïa i te haapohe ia ˈna. (8:12, 54, 58) No to ratou inoino, e uiui ratou i muri aˈe i te hoê taata ta Iesu i faaora semeio i te mata, e huri atu ai ia ˈna i rapae.

19. (a) Eaha te mau parau a Iesu no nia i to ˈna mau taairaa e to ˈna Metua e to ˈna tapitapiraa i ta ˈna mau mamoe? (b) Nafea oia e pahono ai i te ati Iuda ia haamǎtaˈu ratou ia ˈna?

¹⁹ E paraparau faahou â Iesu i te ati Iuda, i teie haereraa no nia i te tiai mamoe maitai, o te pii i ta ˈna mau mamoe na roto i to ratou iˈoa e o te pûpû i to ˈna ora no ratou ‘ia noaa rahi ia ratou te ora.’ E parau oia e: “E mamoe ê atu â ta ˈu, e ere i to teie nei aua, e aratai atoa mai au ia ratou e tia ˈi, e faaroo mai hoi ratou i to ˈu reo, ia hoê aˈe nǎnǎ, e hoê hoi tiai.” (10:10, 16) E faaite oia i te ati Iuda e aita hoê aˈe taata e nehenehe e haru ê i te mau mamoe i roto i te rima o to ˈna Metua, e o oia e to ˈna Metua, ua hoê ïa raua. E imi â ratou i te pehi ia ˈna i te ofai a pohe atu ai. Ei pahonoraa i ta ratou pariraa i te faaino i te Atua, e haamanaˈo oia ia ratou e i roto i te buka Salamo, e parauhia te tahi feia mana i te fenua nei ei mau “atua,” area ua faahiti oia ia ˈna iho mai te Tamaiti a te Atua. (Sal. 82:6) E aˈo oia ia ratou e tiaturi noa ˈˈe i ta ˈna mau ohipa.—Ioa. 10:34.

20. (a) Eaha te semeio taa ê mau ta Iesu e rave i muri iho? (b) E aratai te reira i te aha?

²⁰ E tae mai te parau apî na Betania mai i pihai atu ia Ierusalema e ua maˈihia Lazaro, te tuaane o Maria e o Mareta. I te taime a tae atu ai Iesu i reira, ua pohe ïa Lazaro e a maha ˈtura mahana oia i roto i te menema. E rave Iesu i te semeio faahiahia mau e faatia faahou mai ia Lazaro, o te faaitoito ïa i te taata e rave rahi ia faatupu i te faaroo ia Iesu. E tupu oioi te hoê putuputuraa taa ê a te Sunederi, i reira te tahuˈa rahi ra o Kaiapha e turaihia ˈi ia tohu e e tia ia pohe Iesu no te taata atoa. A tupu ai te apooraa a te mau tahuˈa rarahi e te mau Pharisea no te haapohe ia ˈna, e moe ê Iesu no te hoê taime iti i te aro o te taata.

21. (a) Eaha te huru o te nunaa e o te mau Pharisea ia tomo atu Iesu i Ierusalema? (b) Eaha te parabole ta Iesu e horoa no nia i to ˈna pohe e te fa o te reira, e eaha ta ˈna e aˈo atu i te feia e faaroo maira?

²¹ E ono mahana hou te Pasa, e tipuu atu â Iesu i Betania a haere ai oia i Ierusalema, e e fariihia oia e te utuafare o Lazaro. E, i muri aˈe i te Sabati, i te 9 no Nisana, e parahi oia i nia i te hoê pinia asini e haere atu ai i Ierusalema ma te mau haapopouraa a te nahoa rahi; e parau te mau Pharisea te tahi i te tahi e: “Aore â outou i ite e aita a outou vahi iti i noaa? inaha, ua hope te rahi atoa i te pee ia ˈna.” Na roto i te parabole o te huero sitona, te na ô ra Iesu e e tia ia ˈna ia tanuhia i roto i te pohe e ia tupu mai te maa no te ora mure ore. E ani oia i to ˈna Metua ia haamaitai i to ˈna iˈoa, e e faaroohia te hoê reo no nia i te raˈi i te na ôraa e: “Ua haamaitai au, e e haamaitai faahou â vau.” E aˈo Iesu i te feia e faaroo ra ia ˈna ia ape i te pouri e ia haere na te maramarama, oia, ia riro ei “tamarii no te maramarama.” A piri mai ai te mau puai o te pouri ia ˈna, e titau maite Iesu i te taata ia tuu i te tiaturiraa i nia ia ˈna ‘ei tiarama i haere mai i te ao nei.’—12:19, 28, 36, 46.

22. Eaha te hiˈoraa e te faaueraa apî ta Iesu e horoa i te Pasa?

²² Aˈoraa a Iesu i te mau aposetolo haapao maitai (13:1–16:33). A tupu noa ˈi te amuraa maa ahiahi o te Pasa e na tino 12, e tia mai Iesu i nia, e iriti i to ˈna ahu pu, e rave i te hoê tauera e te hoê farii pape e haamata ˈtura i te horoi i te avae o ta ˈna mau pǐpǐ. E patoi Petero, e parau atu râ Iesu e e tia atoa ia horoihia to ˈna avae. E aˈo Iesu i te mau pǐpǐ ia pee i to ˈna hiˈoraa haehaa, inaha, “aore te tavini i hau i to ˈna ra fatu.” E faahiti oia i te haavare, e tono ê atura ia Iuda. I muri aˈe i to Iuda haere-ê-raa, e haamata Iesu i paraparau i te toea anaˈe. “E tuu atu vau i te [faaueraa] apî na outou, E [here] outou ia outou iho, mai ia ˈu e [here atu] ia outou na, e [here] atoa hoi outou ia outou iho. O te mea teie e ite ai te taata atoa e, e pǐpǐ outou na ˈu, ia [here] outou ia outou iho.”—13:16, 34, 35; MN.

23. Ei tamahanahanaraa, e paraparau Iesu no teihea tiaturiraa e teihea tauturu tǎpǔhia?

²³ E parau Iesu i te mau parau tamahanahana faahiahia mau i ta ˈna mau pǐpǐ i teie taime peapea. E tia ia ratou ia faaohipa i te faaroo i te Atua e ia ˈna atoa. I roto i te fare o to ˈna Metua, e rave rahi mau parahiraa, e hoˈi mai â oia e farii ia ratou i o ˈna ra. “O vau te eˈa, e te parau mau, e te ora,” ta Iesu ïa e parau. “Aore roa e taata e tae i te Metua ra, maori râ ei ia ˈu.” Ma te mahanahana, e faaite oia i ta ˈna mau pǐpǐ e ia faaohipa ratou i te faaroo, e noaa ia ratou i te rave i te ohipa rahi aˈe i ta ˈna e e horoa oia na ratou i ta ratou e ani ma to ˈna iˈoa, ia maitai to ˈna Metua. E tǎpǔ oia ia ratou i te tahi atu â tauturu, ‘te varua parau mau ra,’ o te haapii atu ia ratou i te mau mea atoa e te haamanaˈo ia ratou i te mau mea atoa ta ˈna i haapii atu. E tia ia ratou ia oaoa e te hoˈi nei oia i to ˈna Metua ra, “e rahi hoi tau Metua ia ˈu,” ta Iesu ïa e parau.—14:6, 17, 28.

24. Eaha te mau parau a Iesu no nia i te mau taairaa o te mau aposetolo e o oia iho e e te Metua, e eaha te mau haamaitairaa e noaa mai?

²⁴ E faahiti Iesu ia ˈna iho mai te vine mau e i to ˈna Metua mai te faaapu. E aˈo oia i ta ˈna mau pǐpǐ ia vai hoê noa e oia, a na ô ai e: “O te mea ïa e maitai ai tau Metua, ia rahi to outou hotu; e riro ïa outou ei pǐpǐ na ˈu i reira.” (15:8) E nafea to ratou oaoa e tia roa ˈi? Na roto i te hereraa te tahi i te tahi mai ia ˈna i here ia ratou. E parau oia ia ratou e mau hoa. E taairaa faahiahia mau ïa! E riri to te ao ia ratou mai ia ratou i riri ia ˈna, e e hamani ino ia ratou, e tono  râ Iesu i te tauturu e faaite no nia ia ˈna e e aratai i ta ˈna mau pǐpǐ i roto i te parau mau atoa. E riro to ratou oto ei oaoaraa ia farerei faahou oia ia ratou, e aore e taata e faaore i to ratou oaoa. Mea tamahanahana mau teie mau parau: “Te [here] maira hoi te Metua iho ia outou, o outou i [here] ia ˈu nei, e ua faaroo e, mai ǒ mau au i te [Metua] ra.” Oia, e purara ê ratou, e parau râ Iesu e, “I parau atu vau ia outou i teie nei mau parau, ia hauhia to outou ia ˈu nei. E pohe to outou i teie nei ao. E faaitoito râ, ua [upootia vau i nia i] teie nei ao.”—16:27, 33; MN.

25. (a) Eaha ta Iesu e faˈi i roto i ta ˈna pure i to ˈna Metua? (b) Eaha ta ˈna e ani no ˈna iho, no ta ˈna mau pǐpǐ, e te feia atoa e faaroo ia ˈna i ta ratou ra haapiiraa?

²⁵ Pure a Iesu no ta ˈna mau pǐpǐ (17:1-26). I roto i te pure, e faˈi Iesu i mua i to ˈna Metua e: “Teie hoi te ora mure ore, ia ite ratou ia oe i te Atua mau ra, e ia Iesu i te Mesia i ta oe i tono mai.” Ua oti te ohipa i tonohia mai ai oia i te fenua nei, no reira Iesu e ani ai i teie nei ia haamaitaihia oia i mua i te aro o to ˈna Metua i te hanahana no ˈna hou teie nei ao ra. Ua faaite oia i te iˈoa o te Metua i ta ˈna mau pǐpǐ e e ani oia i te Metua ia tiai ia ratou ‘no To ˈna iˈoa.’ E titau oia eiaha ratou ia hopoi-ê-hia ˈtu i teie nei ao, ia tiai râ ia ratou eiaha ia noaahia i te taata ino e ia haamaitai ia ratou i Ta ˈna parau mau. E faaaano Iesu i ta ˈna pure i nia i te feia atoa e faaohipa i te faaroo i te parau a teie mau pǐpǐ, “ia riro ratou atoa ei hoê; mai ia oe, e tau Metua, i [hoê e o vau nei], e mai ia ˈu hoi i [hoê e o oe], ia faaroo to te ao e na oe au i tono mai.” E ani oia e ia tufa atoa ratou i to ˈna hanahana i nia i te raˈi, ua faaite hoi oia i te iˈoa o te Metua ia ratou, ia herehia mai ratou i To ˈna here.—17:3, 11, 21; MN.

26. Eaha te faatiahia ra no nia i te haruraa o Iesu e ta ˈna haavaraa?

²⁶ Haavahia e rîhia te Mesia i nia i te raau (18:1–19:42). E haere Iesu e ta ˈna mau pǐpǐ i teie nei i roto i te hoê ô i te tahi pae mai o te Peho Kederona. I reira Iuda e haere mai ai e te hoê pǔpǔ faehau e e haavare ai ia Iesu, o te vaiiho noa ia haruhia oia ma te hau. E paruru râ Petero ia ˈna e te hoê ˈoˈe e e aˈohia oia e: “Eiaha [anei au] e inu i te auˈa a te Metua i ho mai na ˈu ra?” (18:11; MN) E taamuhia Iesu e hopoihia ˈtu ai ia Ana ra, te metua hoovai tane o Kaiapha, te tahuˈa rahi. E tapiri noa ˈtu Ioane e o Petero na muri, e auaa o Ioane, e tae atu raua i roto i te aua o te tahuˈa rahi, i reira Petero e huna ˈi e toru taime e ua ite oia i te Mesia. E uiui-na-mua-hia Iesu e Ana e i muri iho, e hopoihia oia i mua ia Kaiapha. I muri aˈe, e hopoihia Iesu i mua i te tavana Roma o Pilato, a titau hua ˈi te ati Iuda i te utua pohe.

27. (a) Eaha te mau uiraa no nia i te ariiraa e te mana e faahitihia e Pilato, e nafea Iesu e pahono ai? (b) E tia te ati Iuda i te paeau o to vai ariiraa?

²⁷ I te uiraa a Pilato e, “O te Arii maori oe?” e pahono Iesu e: “Te parau maira oe e e Arii au. I fanau mai ai au, e i haere mai ai hoi au i te ao nei, e faaite i te parau mau.” (18:37) Aita i itea mai ia Pilato te tumu mau e faautua ˈi ia Iesu, no reira oia e pûpû ai e tuu ia ˈna, e peu matauhia hoi i te faatiamâ i te hoê tîtî i te oroa Pasa, e titau râ te ati Iuda ia tuuhia te eiâ ra o Baraba. E rave Pilato e ia huihia Iesu, e e tamata faahou â oia i te faatiamâ ia ˈna, e tuô râ te ati Iuda e: “[A rî atu ia ˈna i nia i te raau! a rî atu!] . . . oia i parau e, E tamaiti oia na te Atua.” Ia parau atu Pilato ia Iesu e e mana to ˈna no te rî ia ˈna i nia i te raau, e pahono atu Iesu e: “Aita roa o oe mana ia rave mai ia ˈu ahiri aore i horoahia mai to oe mana no nia maira.” E tuô faahou â te ati Iuda e: “[A hopoi ê atu ia ˈna! A hopoi ê atu! A rî atu i nia i te raau!] . . . Aita o matou Arii, maori râ o Kaisara anaˈe ra.” I reira, e tuu atu Pilato ia ˈna e ia rîhia i nia i te raau.—19:6, 7, 11, 15; MN.

28. Eaha te tupu i Golagota, e eaha te mau parau tohu e tupu i reira?

²⁸ E arataihia Iesu “i te vahi e parauhia ra e, E vairaa apu upoo, i te parau Hebera ra, o Golagota ïa,” e e rîhia i nia i te raau i rotopu e piti taata ê atu. I nia ˈˈe ia ˈna, e taamu Pilato i te parau ra “O Iesu o Nazareta te Arii o te ati Iuda ra,” na roto i te reo Hebera, Latino e Heleni, ia ite e ia taa te taata atoa. (19:17, 19) E tiaturi Iesu ia Ioane no te haapao i to ˈna metua vahine e, i muri aˈe i to ˈna inuraa maa uaina avaava, e na ô oia e: “Ua tupu ïa te reira.” E piˈo ihora i to ˈna upoo e pohe ihora. (19:30, MN) Ei faatupuraa i te mau parau tohu, e tufa kelero te pǔpǔ faehau i to ˈna mau ahu, eita ratou e ofati i to ˈna avae, e e patia ratou i to ˈna aoao i te mahae. (Ioa. 19:24, 32-37; Sal. 22:18; 34:20; 22:17; Zek. 12:10) I muri aˈe, e faaineine Iosepha no Arimataio e o Nikodemo i te tino no te hunaraa a tuu atu ai i roto i te hoê menema apî aita i atea roa.

29. (a) Eaha te mau taime e fa ˈtu ai Iesu i faatia-faahou-hia i mua i ta ˈna mau pǐpǐ? (b) Eaha te mau manaˈo ta Iesu e haamatara i roto i ta ˈna mau parau hopea ia Petero?

²⁹ Mau faraa mai o te Mesia i faatia-faahou-hia (20:1–21:25). E hope te haapapu-maite-raa a Ioane e o Iesu te Mesia na roto i te parau apî oaoa o te tia-faahou-raa. E ite Maria i Magadala i te menema aita e tino faahou i roto, e e horo Petero e te tahi atu â pǐpǐ (o Ioane) i ǒ, e ite noa râ raua i te ahu vehî e te ahu vehî i te upoo i te vai-noa-raa. E paraparau Maria, i tia noa mai i pihai iho i te menema, e na melahi e piti e i te pae hopea i ta ˈna e manaˈo ra e o te taata faaapu. Ia pahono oia e, “E Maria,” e ite oioi oia e o Iesu tera. I muri aˈe, e faaite Iesu ia ˈna iho i ta ˈna mau pǐpǐ i roto i te hoê piha ua ponaohia te opani, e e faaara oia ia ratou e e noaa ia ratou te puai maoti te varua moˈa. Eita Toma e tiaturi, aita oia i reira i taua taime ra, e vau râ mahana i muri aˈe, e fa faahou atu â Iesu ia papu roa ia ˈna, i reira Toma e parau ai e: “E tau Fatu, e tau Atua.” (20:16, 28)  Tau mahana i muri aˈe, e farerei â Iesu i ta ˈna mau pǐpǐ, i te Roto i Tiberia; e rave oia e ia noaa semeio ta ratou iˈa e e tamaa oia e o ratou. E toru taime oia e ui ai ia Petero e e here anei oia ia ˈna. No te mea e onoono Petero e e here iho â oia ia ˈna, e parau Iesu ma te tano e: “A faaamu i tau mau arenio,” “A tiai i tau mau mamoe,” “A faaamu i tau mau mamoe.” E e tohu oia mea na roto i teihea pohe e faahanahana ˈi Petero i te Atua. E ui Petero no nia ia Ioane, e parau Iesu e: “I hinaaro vau i te vaiiho ia ˈna e ia tae noa mai au ra, eaha ta oe i reira?”—21:15-17, 22.

FAUFAARAA

30. Nafea Ioane e faateitei taa ê ai i te here?

³⁰ Mea puai te parau apî maitai “a Ioane ra” no to ˈna huru afaro e te papu e no to ˈna faataaraa ma te mahanahana i te Logo, i riro mai ei Mesia, te faaite maite maira te reira i te mau parau e te mau ohipa a teie Tamaiti faatavaihia a te Atua. Noa ˈtu e mea ohie te huru papairaa e te mau taˈo a Ioane, a parauhia ˈi oia e taata ‘haapii-ore-hia e te itea ore,’ e puai rahi to ta ˈna parau. (Ohi. 4:13) E raea i ta ˈna Evanelia te taime faahiahia roa ˈˈe ia faaite oia i te here rahi i rotopu i te Metua e te Tamaiti, e te mau taairaa haamaitaihia e te î i te here e fanaˈohia ia hoê tatou e o raua. E faaohipa Ioane i te mau parau “here, MN” e “herehia, MN” hau atu i te taatoaraa o na Evanelia e toru e toe ra.

31. Eaha te mau taairaa e haamatarahia i roto i te taatoaraa o te Evanelia a Ioane, e nafea e raea ˈi i te reira to ˈna taime faahiahia roa ˈˈe?

³¹ E taairaa hanahana mau e vai ra i te matamua ra i rotopu i te Logo e te Atua, te Metua! Maoti te faanahoraa a te Atua ‘i riro mai ai te Logo ei taata e ua tiahapa mai i ǒ tatou nei, (e ua ite tatou i to ˈna hanahana, mai te hanahana e au i te Tamaiti fanau tahi a te Metua ra,) ua î i te maitai e te parau mau.’ (Ioa. 1:14) E, i te roaraa o te buka a Ioane, e haamatara Iesu e, ua niuhia to ˈna mau taairaa e te Metua i nia i te auraroraa ma te otia ore i To ˈna hinaaro. (4:34; 5:19, 30; 7:16; 10:29, 30; 11:41, 42; 12:27, 49, 50; 14:10) E raea i to ˈna faaiteraa i teie mau taairaa piri roa i te faito faahiahia roa ˈˈe i roto i ta ˈna pure putapû mau i papaihia i roto i te Ioane pene 17, i reira Iesu e faataa ˈi i to ˈna Metua e ua oti ia ˈna te ohipa Ta ˈna i ho mai na ˈna e rave i te fenua nei a na ô faahou atu ai e: “E teie nei, e tau Metua, e haamaitai mai oe ia ˈu i mua i to aro na i te maitai no ˈu ia oe hou teie nei ao ra.”—17:5.

32. Na roto i teihea mau parau e faaite ai Iesu i to ˈna iho mau taairaa e ta ˈna mau pǐpǐ e o oia te ravea hoê roa e tae mai ai te mau haamaitairaa o te ora i nia i te huitaata?

³² Eaha ïa no nia i te mau taairaa o Iesu e ta ˈna mau pǐpǐ? E haapapu-tamau-hia te hopoia a Iesu ei ravea hoê roa e tae mai ai te mau haamaitairaa a te Atua i nia ia ratou e i nia i te huitaata taatoa. (14:13, 14; 15:16; 16:23, 24) E faahitihia oia mai “te Arenio a te Atua,” “te pane ora,” “te maramarama o teie nei ao,” “te tiai mamoe maitai,” “te tia-faahou-raa e te ora,” “te eˈa, e te parau mau, e te ora,” e “te vine mau.” (1:29; 6:35; 8:12; 10:11; 11:25; 14:6; 15:1) Mea na roto i teie parabole o “te vine mau” Iesu e faaite ai i te tahoêraa faahiahia mau e vai ra eiaha noa i rotopu i ta ˈna mau pǐpǐ mau e oia iho e to ˈna atoa râ Metua. Ia rahi to ratou hotu, e faahanahana ïa ratou i to ˈna Metua. “Mai te Metua i here mai ia ˈu nei ra, ua here atoa ˈtu hoi au ia outou: ia vai herehia ˈtu â outou e au,” ta Iesu ïa e aˈo mai.—15:9.

33. Eaha te tapao o ta ˈna taviniraa ta Iesu e faaite i roto i te pure?

³³ I muri iho, e pure oia ma te itoito mau ia Iehova e ia hoê pauroa teie feia herehia, e ‘te feia atoa râ e faaroo mai ia ˈna i ta ratou ra haapiiraa,’ e to ˈna Metua e oia iho, ma te haamaitaihia i te parau mau! Oia mau, te ite-maitai-hia ra te tapao faahiahia o te taviniraa a Iesu i roto i te mau parau hopea o ta ˈna pure i to ˈna Metua: “Ua faaite atu hoi au ia ratou, e e faaite atu â vau, i to oe iˈoa, ia herehia mai ratou i to hereraa mai ia ˈu nei ra, e [ia hoê hoi au e o] ratou.”—17:20, 26; MN.

34. Eaha te aˈoraa faufaa ta Iesu i horoa ia upootia tatou i nia i teie nei ao?

³⁴ Noa ˈtu e te faarue maira Iesu i ta ˈna mau pǐpǐ i te ao nei, eita oia e vaiiho ia ratou ma te tauturu ore, te tauturu o ‘te varua parau mau.’ Hau atu â, ua horoa oia na ratou i te aˈoraa tano no nia i to ratou mau taairaa e to te ao, a faaite atu ai nafea ia upootia ei “tamarii no te maramarama.” (14:16, 17; 3:19-21; 12:36) “I mau maite outou i ta ˈu parau, e pǐpǐ mau ïa outou na ˈu i reira,” ta Iesu ïa i parau, “e ite ïa outou i te parau mau, e na te parau mau outou e faatiamâ.” Area râ, i te mau tamarii o te pouri, ua parau oia e: “O te diabolo to outou na metua, i faatia ˈi â outou i te hinaaro o to outou metua ra. . . . Aore oia i haapao i te parau mau, no te mea aore e parau mau i roto ia ˈna.” E opua maite anaˈe ïa e ati tamau noa i te parau mau, oia, e ‘haamori i te Metua ma te varua e te parau mau,’ e ia faaitoitohia e te mau parau a Iesu: “E faaitoito râ, ua [upootia vau i nia i] teie nei ao.”—8:31, 32, 44; 4:23; 16:33; MN.

35. (a) Eaha te faaiteraa ta Iesu i horoa no nia i te Basileia o te Atua? (b) No te aha te Evanelia a Ioane e horoa ˈi i te tumu no te oaoaraa e te mauruuru?

³⁵ E auraa to teie mau mea atoa e te Basileia o te Atua. Ua haapapu Iesu i to ˈna haavaraahia e: “E ere i to teie nei ao to ˈu basileia; ahiri no teie nei ao to ˈu basileia, ua faaitoito ïa tau mau tavini ia ore au ia tuuhia ˈtu i te rima o te ati Iuda; e ere râ to ˈu basileia i to ǒ nei.” E, ei pahonoraa i te uiraa a Pilato, ua parau oia e: “Te parau maira oe e e Arii au. I fanau mai ai au, e i haere mai ai hoi au i te ao nei, e faaite i te parau mau. No te parau mau oia ra, e faaroo ïa i tau reo.” (18:36, 37) Oia mau, e ao to te feia e faaroo  e e “fanau faahou” no te “ô i te basileia o te Atua ra” ia hoê e te Arii. E ao to te mau “mamoe ê atu” e faaroo i te reo o teie Tiai mamoe e Arii e e noaa ia ratou te ora. E nehenehe mau â tatou e mauruuru no te horoaraahia mai te Evanelia a Ioane, ua papaihia hoi “ia faaroo outou e, o Iesu te Mesia te Tamaiti a te Atua, e ia noaa hoi to outou ora i to ˈna iˈoa i te faarooraa.”—3:3, 5; 10:16; 20:31.

[Nota i raro i te api]

[Uiraa haapiiraa]