Buka Bibilia numera 46—Korinetia 1

Taata papai: Paulo

Vahi papairaa: Ephesia

Otiraa te papai: area 55 T.T.

1. Eaha te huru oire o Korinetia i te tau o Paulo?

 UA RIRO na Korinetia ei “oire tuiroo e te faufau, i reira e farereihia ˈi te mau peu hairiiri no te pae Hitia o te râ e no te pae Tooa o te râ.” * Mea na Korinetia noa e tae atu ai i te fenua rahi, tei nia hoi oia i te ariariraa i rotopu i te Péloponnèse e te tuhaa i nia i te fenua rahi o Heleni. I te tau o te aposetolo Paulo, e hemo noa to ˈna huiraatira fatata e 400 000 taata i to Roma, to Alesanederia, e to Anetiohia i Suria. I te pae hitia o te râ no Korinetia, te vai ra te miti Égée, e i te pae tooa o te râ, te ooa no Korinetia e te miti Ionienne. No reira, ua riro Korinetia, te oire pu no te tuhaa fenua no Ahaia, e ta ˈna na tapaeraa pahi e piti o Keneherea e o Léchée, ei vahi faufaa roa i te pae tapihooraa. Ua riro atoa oia ei pu no te haapiiraa Heleni. Ua parauhia e: “No te mea ua faateitei-roa-hia ta ˈna mau taoˈa rahi, ua tui roa to te reira roo; oia atoa to te peu hairiiri a to ˈna huiraatira e to ratou viivii.” * I roto i ta ˈna mau peu faaroo etene, te vai ra te haamoriraa ia Aphrodite (o te au ia Vénus i Roma). E hotu te navenave na te haamoriraa no Korinetia.

2. Nafea te haamauraahia te amuiraa no Korinetia, eaha ïa to ˈna taairaa e o Paulo?

² I teie oire rahi ruperupe e te viivii râ hoi i te pae morare o te ao Roma ta te aposetolo Paulo i ratere atu i te area 50 T.T. I to ˈna faaearaa 18 avaˈe i reira, ua haamauhia te hoê amuiraa Kerisetiano. (Ohi. 18:1-11) Auê ïa here to Paulo no teie feia faaroo, na ˈna hoi na mua i faaite atu i te parau apî maitai no nia i te Mesia! I roto i te hoê rata, e haamanaˈo oia ia ratou i to ratou taairaa pae varua e oia, a na ô ai e: “Auahuru noa ˈtu â te tausaniraa o ta outou orometua i te Mesia nei, aita rea o outou metua: na ˈu hoi outou i fanau ei pǐpǐ na te Mesia ra na Iesu, i te evanelia nei.”—Kor. 1, 4:15.

3. Na te aha i turai ia Paulo ia papai i ta ˈna rata matamua i to Korinetia?

³ No to ˈna tapitapi rahi i to ratou maitai i te pae varua i papai ai Paulo i ta ˈna rata matamua i te mau Kerisetiano no Korinetia a rave ai oia i te toru o to ˈna tere mitionare. Tau matahiti tei mahemo mai to ˈna parahiraa i Korinetia. Tei te area 55 T.T. ïa i teie nei, e te parahi ra Paulo i Ephesia. E au ra e ua tae mai ta ˈna rata mai te amuiraa apî roa no Korinetia, e te titauhia ra te hoê pahonoraa. Hau atu â, ua tae mai te mau parau faataa peapea ia Paulo ra. (7:1; 1:11; 5:1; 11:18) No te mea e mau parau peapea roa, e pahono te aposetolo i ta ratou rata i te irava matamua roa o te pene 7 o ta ˈna rata. No teie iho â râ mau parau i papai ai Paulo i to ˈna mau hoa Kerisetiano i Korinetia.

4. Na te aha e haapapu e mai Ephesia ˈtu to Paulo papairaa i te Korinetia Hoê?

⁴ Nafea râ tatou e ite ai e mai Ephesia ˈtu to Paulo papairaa i te Korinetia Hoê? Na mua, no te mea i roto i te mau aroharaa i te pae hopea o te rata, te faahiti atoa ra te aposetolo i ta Akuila raua Periseka (Perisila). (16:19) Te faaite ra te Ohipa 18:18, 19 e ua reva raua i Ephesia mai Korinetia ˈtu. I te mea e te faaea ra Akuila raua Perisila i reira e te faahiti atoa ra Paulo ia raua i roto i te mau aroharaa hopea o te Korinetia Hoê, e tapao faaite ïa e tei Ephesia oia i to ˈna papairaa i te rata. Te vai nei râ te hoê manaˈo papu maitai, o te mau parau ïa a Paulo i roto i te Korinetia 1, 16:8: “E parahi râ vau i Ephesia e ia tae i te Penetekose ra.” Ua papaihia ïa te Korinetia Hoê e Paulo i Ephesia, e au ra i te pae hopea o to ˈna parahiraa i ǒ.

5. Na te aha e haapapu e e parau mau te mau rata i to Korinetia?

⁵ E parau mau te Korinetia Hoê, e te Korinetia Piti atoa, aita e feaaraa. Ua parauhia e na Paulo i papai i teie nau rata, e ua farii te mau Kerisetiano matamua e e au te reira i te canon, e ua tuu hoi i roto i ta ratou mau haaputuraa buka. Oia mau, te parauhia ra e ua faahitihia te Korinetia Hoê e ono aˈe taime i roto i te hoê rata tei papaihia mai Roma ˈtu i to Korinetia i te area 95 T.T. e tei parauhia Clément Hoê. E au ra e te faahiti ra te taata papai i te Korinetia Hoê a faaitoito ai i te feia e taio i teie rata ia “rave faahou i te episetole a te aposetolo haamaitaihia o Paulo.” * Ua faahiti-roa-atoa-hia te Korinetia Hoê e Justin, Athénagore, Irénée, e o Tertullien. Te vai ra te haapapuraa puai e “ua faanahohia e ua neneihia” te hoê pueraa aore ra haaputuraa o te mau rata a Paulo, oia atoa te Korinetia Hoê, e te Piti, “i roto i na matahiti hopea hoê ahuru o te senekele matamua.” *

6. Eaha te mau fifi i tupu na i roto i te amuiraa no Korinetia, e eaha ta Paulo e hinaaro mau ra e rave?

 ⁶ Maoti te rata matamua a Paulo i to Korinetia, e ite roa ˈtu tatou i te amuiraa iho no Korinetia. E mau fifi ta teie mau Kerisetiano e tia ia faaruru, e e mau tumu parau te tia ia faatitiaifarohia. Te amahamaha ra te amuiraa, no te mea te pee ra vetahi i te taata. Te vai ra te hoê tupuraa tia ore roa i te pae taatiraa. Te ora ra vetahi i roto i te mau utuafare amahamaha i te pae faaroo. E tia anei ia ratou ia faaea noa i pihai iho i to ratou hoa faaipoipo faaroo ore aore ra ia faataa? E te iˈo i pûpûhia ei tusia na te mau idolo? E nehenehe anei e amu? Te hinaaro ra to Korinetia i te mau aˈoraa no nia i te huru faatereraa i ta ratou mau putuputuraa, e tae noa ˈtu i te faatupuraa i te Amuraa maa Ahiahi a te Fatu. Eaha te tiaraa o te mau vahine i roto i te amuiraa e tia ˈi? Te vai atoa ra te feia i roto ia ratou e patoi ra i te tia-faahou-raa. Mea rahi te fifi. No reira iho â ïa te aposetolo e hinaaro ai e tauturu i te faaora-faahou-raa i te pae varua o to Korinetia.

7. E tia ia tatou ia faahohonu i te Korinetia Hoê ma teihea huru feruriraa, e no te aha?

⁷ No te mea e te tuea ra te mau huru tupuraa i roto i te amuiraa e i rapaeau i Korinetia no tahito ra, e to ˈna ruperupe e ta ˈna mau peu faufau, e to teie nei tau, e tia ïa ia tatou ia haapao i te mau aˈoraa faahiahia ta Paulo i papai ma te faauruahia e te Atua. E auraa rahi to te mau parau a Paulo no to tatou nei tau, mea faufaa mau ïa te hiˈopoa-maite-raa i ta ˈna rata matamua i to ˈna mau taeae e mau tuahine herehia no Korinetia. A haamanaˈo na i teie nei i te huru feruriraa o taua tau ra e te vahi. A feruri maitai, mai ta te mau Kerisetiano no Korinetia i rave na, a hiˈo faahou ai tatou i te mau parau faauruahia hohonu e te putapû a Paulo i to ˈna mau hoa faaroo i Korinetia i tahito ra.

TUMU PARAU O TE KORINETIA HOÊ

8. (a) Nafea Paulo e faaite ai i te maamaa o te amahamaharaa i roto i te amuiraa? (b) Ia au i ta Paulo e faaite, eaha te titauhia e maramarama ˈi te mau mea a te Atua?

⁸ E faaite Paulo i te amahamaharaa, e aˈo oia ia tahoê (1:1–4:21). E mau manaˈo maitatai roa to Paulo no to Korinetia. Eaha râ no te mau peapea, te mau amahamaharaa i roto ia ratou? ‘Ua amahamaha te Mesia.’ (1:13) Te mauruuru ra te aposetolo e ua bapetizo oia vetahi noa o ratou, eita ïa ratou e nehenehe e parau e ua bapetizohia ratou ma to ˈna iˈoa. E poro Paulo i te Mesia i rîhia i nia i te pou. E turoriraa te reira no te ati Iuda e e mea maamaa no te mau nunaa. Ua maiti râ te Atua i te mau mea maamaa e te paruparu o te ao no te faahaama i te feia paari e te puai. No reira Paulo e ore ai e faarahi i te parau, e vaiiho râ oia i te mau taeae ia ite i te varua e te mana o te Atua na roto i ta ˈna mau parau, ia ore to ratou faaroo ia niuhia i nia i te paari o te taata, i nia râ i te mana o te Atua. Te parau nei matou i te mau mea i faaitehia mai e te varua o te Atua, ta Paulo ïa e parau, no te mea “e imi hoi te [v]arua i te mau mea atoa nei, e te mau mea hohonu atoa a te Atua ra.” Eita te taata i te pae tino e taa i te reira, o te taata i te pae varua noa râ.—2:10.

9. Eaha te haaferuriraa a Paulo no te faaite eiaha roa ˈtu e faaahaaha i roto i te taata?

⁹ Te pee ra ratou i te taata—vetahi ia Apolo, vetahi ia Paulo. O vai râ teie nau taata? E mau tavini noa raua o tei faariro i to Korinetia ei feia faaroo. E ere te feia e tanu e e pîpî i te pape i te mea faahiahia, ‘na te Atua râ hoi e faatupu,’ e e mau “hoa rave ohipa” ratou no ˈna. E haapapu te tamataraa o te auahi teihea te mau ohipa e vai maoro. E parau atu Paulo ia ratou e, “O te hiero outou o te Atua,” i reira To ˈna varua e parahi ai. “O te paari hoi o teie nei ao, e mea maamaa ïa i te Atua.” No reira, eiaha roa ˈtu e faaahaaha i roto i te taata, no te mea na te Atua te mau mea atoa.—3:6, 9, 16, 19.

10. No te aha e tano ore ai te faaahaaharaa a to Korinetia, e eaha te mau taahiraa avae ta Paulo e rave ra no te faaafaro i te fifi?

¹⁰ E mau tiaau haehaa o Paulo raua Apolo no te mau parau aro moˈa a te Atua, e ei feia haapao maitai te mau tiaau e tia ˈi. O vai te mau taeae no Korinetia e faaahaaha ˈi ratou, e eaha ta ratou, e ere i te mea noaa mai ia ratou? Ua taoˈahia anei ratou, ua haamata anei i te faatere ei arii, ua riro anei ei feia paari e te puai, area te mau aposetolo ra, o tei riro ei mataitairaa na te mau melahi e na te taata atoa, te maamaa e te paruparu noa anei â ïa, e pera ïa o te mau mea atoa? Te tono ra Paulo ia Timoteo e tauturu ia ratou ia haamanaˈo i ta ˈna mau raveraa no nia i te Mesia e ia pee i to ˈna hiˈoraa. Ia tia ia Iehova, eita e maoro e haere Paulo e farerei ia ratou no te ite eiaha noa i te mau parau a te feia faaahaaha, i to ratou râ mana.

11. Eaha te peu morare tia ore i tupu i roto ia ratou, eaha te tia ia ravehia, e no te aha?

¹¹ Ia vai mâ noa te amuiraa (5:1–6:20). Ua faataahia e e tupuraa morare tia ore roa i roto i to Korinetia! Ua rave te hoê taata i te vahine a to ˈna metua tane. E tia ia tuu atu ia ˈna ia Satani ra, no te mea e hopue te puea atoa i te faahopue iti haihai ra. Eiaha ratou e amui atu e te taata e parauhia e taeae tei riro ei taata ino.

12. (a) Eaha ta Paulo e parau no nia i te tuuraa te tahi i te tahi i te haavaraa? (b) No te aha Paulo e parau ai e, “E maue ê atu i te poreneia”?

¹² Eaha, ua tuu atoa to Korinetia te tahi i te tahi i te haavaraa! E ere anei i te mea maitai aˈe ia ino noa ˈtu ratou? Na ratou hoi e haava i te ao nei e te mau melahi, aita anei ïa e taata i roto ia ratou no te haava i to ˈna iho mau taeae? Hau atu â, e tia ia ratou ia vai mâ noa, no te mea eita te poreneia, te feia haamori idolo, e vetahi mai ia ratou atoa, e parahi i te Basileia o te Atua. Mai te reira hoi te hoê pae o ratou, ua tamâhia e ua haamoˈahia râ ratou. “E maue ê atu i te poreneia,” ta Paulo ïa i parau. “Ua hoohia hoi outou i te hoê hoo. Oia mau, a faahanahana i te Atua, outou ei tino.”—6:18, 20, MN.

13. (a) No te aha Paulo e aˈo ai ia vetahi ia faaipoipo? Ua oti anaˈe ratou i te faaipoipohia, eaha te tia ia ratou ia rave? (b) Nafea e riro ai e “e parau maitai roa ˈtu” ta te taata taa noa?

 ¹³ Mau aˈoraa no nia i te faaea-taa-noa-raa e te faaipoiporaa (7:1-40). E pahono Paulo i te hoê uiraa no nia i te faaipoiporaa. No te rahi o te poreneia, mea maitai aˈe ia faaipoipo te hoê tane aore ra te hoê vahine, e eiaha te feia faaipoipo ia faaere te tahi i te tahi i te mea tia i te pae taatiraa. Mea maitai ia faaea taa noa te feia faaipoipo ore e te mau ivi, mai ia Paulo; ia ore râ to ratou hinaaro e vî ia ratou, ia faaipoipo ïa ratou. Ua oti anaˈe ratou i te faaipoipohia, eiaha ratou e faataa ê. Noa ˈtu e eita to ˈna hoa faaipoipo e faaroo, eiaha te taata faaroo e faarue ia ˈna, peneiaˈe mea na reira oia e faaora ˈi i to ˈna hoa faaroo ore. No nia i te peritomeraa e te tiaraa tîtî, ia vai noa ïa te taata ma te huru i parauhia mai ai oia ra. No nia i te taata faaipoipo, e feaa oia no te mea e hinaaro oia e ia mauruuru to ˈna hoa, area te taata taa noa ra, e haapeapea noa ïa oia i te mau mea a te Fatu. Eita te feia e faaipoipo e hara, “e parau maitai roa ˈtu” râ ta te feia e ore e faaipoipo.—7:38.

14. Eaha ta Paulo e parau no nia i te mau “atua” e te mau “fatu,” teie râ, eaha te taime mea maitai eiaha e amu i te maa i pûpûhia na te mau idolo?

¹⁴ Te raveraa i te mau mea atoa no te parau apî maitai (8:1–9:27). Eaha ïa no te maa e pûpûhia na te mau idolo? Mea faufaa ore te idolo! E rave rahi “te atua” e “te fatu” i te ao nei, area no te mau Kerisetiano râ, “hoê roa ïa Atua, o te Metua” e “hoê hoi Fatu o Iesu Mesia.” (8:5, 6) E nehenehe paha te hoê taata e turori ia ite mai oia ia outou ia amu i te iˈo i pûpûhia na te hoê idolo. I roto i teie mau huru tupuraa, te aˈo maira Paulo eiaha e na reira a faaturori ai i to outou taeae.

15. Eaha te haerea o Paulo i roto i te taviniraa?

¹⁵ E faaere Paulo ia ˈna iho i te mau mea e rave rahi no te taviniraa. Ei aposetolo, e tiaraa to ˈna ‘ia ora i te evanelia,’ aita râ oia i na reira. Teie râ, mea titauhia ia poro oia; oia mau, te parau nei oia e, “E ati hoi to ˈu ia ore au ia parau i te evanelia!” No reira oia i faariro ai ia ˈna iho ei tavini no te taata atoa, a faaau ai ia ˈna “i te mau mea atoa i te taata atoa nei, ia ora te tahi pae” ia ˈna “i taua mau ravea atoa nei,” ma te rave i te mau mea atoa “no te evanelia.” Ia noaa te re e te korona tahuti ore, e haavî oia i to ˈna tino eiaha oia, ia oti ia ˈna i te poro ia vetahi ê, e ‘riro ei taata ite-ore-hia mai.’—9:14, 16, 19, 22, 23, 27.

16. (a) Eaha te faaararaa no nia i tei ravehia e te “hui metua” e tia i te mau Kerisetiano ia haapao? (b) No nia i te haamoriraa idolo, nafea te mau Kerisetiano ia rave i te mau mea atoa no te faahanahana i te Atua?

¹⁶ Faaararaa i te mau ohipa iino (10:1–33). Eaha ïa no te “hui metua”? Tei raro aˈe na ratou i te ata e ua bapetizohia ratou i roto ia Mose. Aita te Atua i mauruuru i te rahiraa o ratou, ua pohe râ ratou i te medebara. No te aha? Ua nounou ratou i te mau ohipa iino. Ia faaarahia te mau Kerisetiano i te reira e eiaha e rave i te haamoriraa idolo e te poreneia, e aa ˈtu ia Iehova, e e ohumu. O te manaˈo e te tia ra oia, e ara ïa eiaha e hiˈa. E tae mai te tamataraa, eita râ te Atua e vaiiho i to ˈna mau tavini ia tamatahia hau aˈe i ta ratou e nehenehe e faaruru; e horoa oia i te hoê ravea ia nehenehe ratou e faaoromai. “E teie nei,” ta Paulo ïa e papai, “e maue ê atu i te haamori idolo.” (10:1, 14) Eita tatou e nehenehe e tamaa i nia i te airaa maa a Iehova e i nia i te airaa maa a te mau demoni. Teie râ, ia titauhia mai outou e tamaa i ǒ te hoê taata ra, eiaha e uiui nohea mai te iˈo. Ia faaara mai râ te hoê taata ia outou e ua pûpûhia te iˈo na te mau idolo, eiaha ïa e amu no to ˈna manaˈo haava. “E te mau mea atoa ta outou e rave na, e rave ïa ma te [faahanahana] i te Atua,” ta Paulo ïa e papai.—10:31; MN.

17. (a) Eaha te faaueraa tumu ta Paulo e haamau no nia i te tiaraa upoo? (b) Nafea oia e taai ai i te tumu parau o te amahamaharaa i roto i te amuiraa e te Amuraa maa Ahiahi a te Fatu?

¹⁷ Tiaraa upoo; te Amuraa maa Ahiahi a te Fatu (11:1-34). “Ei pee mai outou ia ˈu mai ia ˈu atoa e pee i te Mesia nei,” ta Paulo ïa e parau, e faahiti atu ai oia i te faaueraa tumu a te Atua o te tiaraa upoo: O te tane te upoo o te vahine, o te Mesia te upoo o te tane, o te Atua te upoo o te Mesia. No reira, e tia i te vahine ia tapoˈi i to ˈna upoo “ei tapao o te mana” ia pure oia aore ra ia aˈo oia i roto i te amuiraa. Eita ta Paulo e nehenehe e haapopou i to Korinetia, no te mea te vai ra te amahamaharaa i roto ia ratou ia putuputu ratou. I roto i teie huru tupuraa, nafea ratou e nehenehe ai e apiti atu ma te au i te Amuraa maa Ahiahi a te Fatu? E faahiti faahou oia nafea to Iesu haamauraa i te oroa Haamanaˈoraa o to ˈna poheraa. E tia i te taata taitahi ia hiˈopoa ia ˈna iho hou a apiti ai, eiaha oia e faatae mai i te haavaraa i nia ia ˈna iho no te oreraa e hiˈo i “te tino.”—11:1, 10, MN, 29.

18. (a) Noa ˈtu e e rau te mau ô e te mau taviniraa, no te aha aita e amahamaharaa i roto i te tino? (b) No te aha te here e hau aˈe ai?

¹⁸ Mau ô i te pae varua; te here e te tapiraa ˈtu i te reira (12:1–14:40). E rau te mau ô i te pae varua, hoê anaˈe râ varua; e rau te mau taviniraa e te mau ohipa, hoê anaˈe râ Fatu e hoê anaˈe Atua. Oia atoa, e rave rahi mau melo to te tino tahoêhia o te Mesia, e hinaaro te tahi i te tahi, mai to te tino taata nei. Ua haamau te Atua i te mau melo o te tino nei i Ta ˈna vahi e hinaaro ra, e e melo taitahi ta ˈna iho ohipa, “ia ore roa te au ore i te tino nei.” (12:25) E faufaa ore te feia e faaohipa i te mau ô i te pae varua aita anaˈe e here. Mea faaoromai e mea maitai te here, eita e pohehae, eita e faaahaaha. E oaoa noa te here i te parau mau. “E ore roa te [here] e mou.” (13:8; MN) E mou te mau ô i te pae varua, mai te tohu e te reo ěê, area te faaroo, te tiaturiraa, e te here ra, e vai noa ïa. O tei hau aˈe i taua toru nei, o te here ïa.

19. Eaha te aˈoraa ta Paulo e horoa no te patu i te amuiraa e ia nahonaho maitai te mau mea?

¹⁹ “A tapi i te [here],” ta Paulo ïa e faaue mai. E tia  ia faaohipa i te mau ô i te pae varua ma te here no te patu i te amuiraa. No reira, mea hau aˈe te tohu i te paraparau i te mau reo ěê. Mea hau aˈe na ˈna e faahiti e pae parau ma te maramarama no te haapii ia vetahi ê, i te faahiti hoê ahuru tausani parau na roto i te hoê reo matau-ore-hia. E tapao te reo ěê no te feia faaroo ore, area te tohu ra, no te feia faaroo ïa. Eiaha ratou ei “tamarii” i te taaraa i teie mau mea. E no te mau vahine, e tia ia ratou ia auraro i roto i te amuiraa. “E rave râ i te mau mea atoa ra ma te tia e te [nahonaho].”—14:1, 20, 40; MN.

20. (a) Eaha te haapapuraa ta Paulo e horoa e ua faatiahia te Mesia? (b) Eaha te tapǔpǔraa o te tia-faahou-raa, e o vai ma te mau enemi e haamouhia?

²⁰ Te tiaturiraa papu o te tia-faahou-raa (15:1–16:24). Ua fa ˈtu te Mesia i faatiahia i mua ia Kepha, te tino 12, na taeae hau atu i te 500 i te hoê taime, ia Iakobo, te mau aposetolo atoa, e ia Paulo i te pae hopea roa. Ahiri “e aore te Mesia i tia i nia,” ta Paulo ïa e papai, “e faufaa ore mau ta tatou pororaa e to tatou faaroo, MN.” (15:14) E faatiahia mai te taata atoa i to ˈna iho pǔpǔ, o te Mesia te matamua, e i muri aˈe o to te Mesia i to ˈna vairaa mai. I te pae hopea, e faahoˈi oia i te Basileia i to ˈna Metua ra ia hope roa to ˈna mau enemi i te faaorehia e ana. E faaore-atoa-hia te pohe, te enemi hopea. Eaha ïa te faufaaraa no Paulo ia faaruru tamau i te pohe ahiri e aita e tia-faahou-raa?

21. (a) Nafea te feia e tufa i te Basileia o te Atua e faatiahia ˈi? (b) Eaha te parau aro moˈa ta Paulo e faaite, e eaha ta ˈna e parau no nia i te upootiaraa i nia i te pohe?

²¹ Nafea râ te feia pohe e faatiahia mai ai? Ia nehenehe te hoê maa e tupu mai, e tia i te huero i ueuehia ia pohe. Oia atoa no te tia-faahou-raa o tei pohe. “I ueuehia ei tino taata, i faatiahia ei tino varua. . . . E ore te tino iˈo nei e te toto e parahi i te basileia o te Atua.” (15:44, 50) E faahiti Paulo i te hoê parau aro moˈa: Eita te taatoaraa e taoto i roto i te pohe, ia tae râ i te pu hopea, mai te amoraa mata ra, e tauihia ratou. Ia riro te mea pohe noa ei mea pohe ore, e horomiihia te pohe e a muri noa ˈtu. “E te pohe e, teihea to oe tara? E hade e, teihea to oe re?” E parau Paulo ma to ˈna mafatu atoa e: “Ia haamaitaihia te Atua, o tei horoa mai i te re no tatou, no to tatou Fatu ra no Iesu Mesia.”—15:55, 57.

22. Eaha te mau aˈoraa e faaitoitoraa hopea ta Paulo e horoa?

²² Ei faaotiraa, e horoa Paulo i te mau aˈoraa e ia nahonaho te ohiraa i te mau ô e afaihia ei tauturu na te mau taeae riirii no Ierusalema. E faaite oia e e tere oia na Makedonia ˈtu e farerei ia ratou e peneiaˈe, o Timoteo e o Apolo atoa. “E ara,” ta Paulo ïa e aˈo atu. “Ia mau papu i te faaroo, e faataata paari outou, e faaitoito. Ia ravehia te mau mea atoa i roto ia outou na ma te [here].” (16:13, 14; MN) E faatae Paulo i te mau aroharaa i te mau amuiraa i Asia, e papai atu ai oia ma to ˈna iho rima i te hoê aroharaa hopea, a faaite ai i to ˈna here.

FAUFAARAA

23. (a) Nafea Paulo e faahohoˈa ˈi i te mau faahopearaa iino o te nounou ino e te tiaturiraa ia ˈna iho? (b) E faahiti Paulo i teihea mana ia aˈo oia no nia i te Amuraa maa Ahiahi a te Fatu e te maa e au?

²³ Mea faufaa roa teie rata a te aposetolo Paulo no te taa maitai i te mau Papai Hebera, ta ˈna i faahiti rahi. I roto i te pene 10, te haamatara ra Paulo e ua inu to Iseraela e arataihia ra e Mose, i te pape o te mato pae varua, oia hoi te Mesia. (Kor. 1, 10:4; Num. 20:11) E faahiti atu ai oia i te mau faahopearaa iino ia nounou i te mau ohipa iino, mai tei itehia i nia i to Iseraela e arataihia ra e Mose, e e parau â oia e: “Roohia ihora ratou e taua mau mea ra ei hiˈoraa, e ei aˈo mai hoi ia tatou, i te feia i roohia mai i te hopea o te mau tau nei, i papaihia ˈi.” Eiaha roa ˈtu tatou e tiaturi ia tatou iho, ma te manaˈo e e ore tatou e hiˈa! (Kor. 1, 10:11, 12; Num. 14:2; 21:5; 25:9) E rave faahou oia i te hoê faahohoˈaraa no roto mai i te Ture. E faahiti oia i te tusia no te hau i Iseraela no te faaite nafea ia apiti ma te au i te airaa maa a Iehova i roto i te Amuraa maa Ahiahi a te Fatu. I muri iho, no te turu i ta ˈna parau e e nehenehe e amu i te mau mea atoa e hoohia i te hooraa iˈo, e faahiti oia i te Salamo 24:1, a na ô ai e: “No [Iehova] hoi te fenua, e te mau mea atoa i roto ra.”—Kor. 1, 10:18, 21, 26; MN; Exo. 32:6; Lev. 7:11-15.

24. Teihea ˈtu â mau irava o te mau Papai Hebera ta Paulo e faahiti no te turu i ta ˈna mau haaferuriraa?

²⁴ Ia faaite oia i te hau ê o ‘te mau mea ta te Atua i vaiiho no te feia i here ia ˈna’ e te faufaa ore o “te manaˈo o te feia paari” no teie nei ao, e faahiti faahou Paulo i te mau Papai Hebera. (Kor. 1, 2:9; 3:20; Isa. 64:4; Sal. 94:11) Ei haamanaraa i ta ˈna mau faaueraa i roto i te pene 5 no nia i te tiavaruraa i te taata rave hara, e faahiti oia i te ture a Iehova e ‘faataa ê i te ino i roto ia outou ra.’ (Deut. 17:7) Ia parau oia e e tiaraa to ˈna e ora i te taviniraa, e faahiti â Paulo i te Ture a Mose e na ô ra eiaha e tavaha i te mau animala e rave ra i te ohipa ia ore ratou ia amu i te maa, e e tia i te ati Levi e tavini ra i te hiero, ia fanaˈo i ta ratou tufaa no nia i te fata.—Kor. 1, 9:8-14; Deut. 25:4; 18:1.

25. Eaha te tahi mau haapiiraa faahiahia e te faufaa o te Korinetia Hoê?

²⁵ E mau haapiiraa faauruahia e rave rahi mau i noaa ia tatou no to tatou maitai maoti te rata matamua a Paulo i te mau Kerisetiano no Korinetia! A feruriruri i te mau aˈoraa i horoahia no nia i te mau amahamaharaa e te peeraa i te taata. (Mau pene 1-4) A haamanaˈo na i te tupuraa morare tia ore, e nafea to Paulo haamatararaa i te faufaaraa o te haerea tura e te vai-mâ-raa i roto i te amuiraa. (Mau pene 5, 6) A hiˈo na i ta ˈna mau aˈoraa faauruahia no nia i te faaea-taa-noa-raa, te faaipoiporaa, e te faataaraa. (Pene 7) A feruri na i te tauaparauraa a te aposetolo no nia i te maa i pûpûhia na te mau idolo, e oia atoa, nafea te haamatara-maitai-raahia te faufaaraa e ara i  te faaturori ia vetahi ê e i te topa i roto i te haamoriraa idolo. (Mau pene 8-10) Te faaararaa no nia i te auraro e tia, te hiˈoraa i te mau ô i te pae varua, te oreroraa faufaa roa no nia i te faaoromai, te huru maitai o te here o te ore e mou—o te mau mea ïa i hiˈopoahia. E ua haamatara maitai te aposetolo i te faufaaraa ia nahonaho te mau putuputuraa Kerisetiano! (Mau pene 11-14) Auê atoa te aravihi o to ˈna parururaa i te tia-faahou-raa ma te faauruahia! (Pene 15) O te tahi noa teie o te mau tumu parau i haamanaˈohia—e mea faufaa roa hoi no te mau Kerisetiano i to tatou nei tau!

26. (a) Eaha te ohipa i tohu-atea-hia mai ta te Mesia i faatiahia e faatupu ia faatere oia ei Arii? (b) No te tiaturiraa o te tia-faahou-raa, eaha te faaitoitoraa puai ta Paulo e horoa?

²⁶ Maoti teie rata, e maramarama roa ˈtu â tatou i te tumu parau hanahana o te Bibilia, oia hoi te Basileia o te Atua. Te faaara teimaha maira oia e e ore te feia parau-tia ore e parahi i te Basileia, e te tabula ra i te mau peu hairiiri e rave rahi e ore ai te hoê taata e fariihia. (Kor. 1, 6:9, 10) Te mea faufaa roa ˈtu â, te faataa ra oia i te taairaa i rotopu i te tia-faahou-raa e te Basileia o te Atua. Te faaite ra oia e tei te Mesia “te matamua” o te tia-faahou-raa, “te hau, e ia hope roa te mau enemi atoa i te tuuhia e [te Atua] i raro aˈe i tana avae.” Ia oti ia ˈna i te haamou i te mau enemi atoa, e tae noa ˈtu i te pohe, “e pûpû atu ai oia i te basileia i te Atua, i te Metua ra . . . ia riro te Atua i nia iho i te mau mea atoa i te mau vahi atoa ra.” I te pae hopea, no te faatupu i te tǎpǔ o te Basileia i faahitihia i Edene, e haaparuparu roa te Mesia e To ˈna mau taeae pae varua i faatiahia mai, i te afii o te Ophi. E rahi mau â te tiaturiraa o te tia-faahou-raa o te feia e tufa i te tahuti ore e te Mesia ra o Iesu i roto i te Basileia o te raˈi. No te tiaturiraa o te tia-faahou-raa e aˈo ai Paulo e: “E teie nei, e au mau taeae here e, ia itoito outou, eiaha e aueue, ia rahi â te rave i te ohipa a te Fatu eiaha e faaea, ua ite hoi outou e, e ere i te mea faufaa ore te ohipa a te Fatu ta outou e rave na.”—Kor. 1, 15:20-28, 58; Gen. 3:15; Roma 16:20.

[Nota i raro i te api]

[Uiraa haapiiraa]