Buka Bibilia numera 52—Tesalonia 1

Taata papai: Paulo

Vahi papairaa: Korinetia

Otiraa te papai: area 50 T.T.

1. (a) Eaha hoi te Tesalonia i papaihia ˈi? (b) Afea i papaihia ˈi, e eaha te vahi taa ê o teie rata?

 I TE area 50 T.T., i te piti o to ˈna tere pororaa to te aposetolo Paulo haereraa i te oire Makedonia no Tesalonia, e haamauraa i te hoê amuiraa Kerisetiano i ǒ. Aitâ i hope hoê matahiti, a tia ˈi oia i Korinetia e o Siluano (o Sila i roto i te buka Ohipa) e o Timoteo, ua hinaaro Paulo e papai i ta ˈna rata matamua i to Tesalonia no te tamahanahana e te patu ia ratou i roto i te faaroo. Papu mau e tei te hopea o te matahiti 50 T.T. Te vahi faahiahia o teie rata, e au ra ïa e o te papai matamua teie a Paulo i ô i roto i te canon Bibilia, e taa ê atu paha i te Evanelia a Mataio, o te buka matamua i papaihia i roto i te mau Papai Heleni Kerisetiano.

2. Eaha te mau haapapuraa no nia i te taata papai e e parau mau te Tesalonia Hoê?

² Mea rahi te mau haapapuraa e e parau mau teie rata e te hapa ore. Ua faaite roa Paulo e o oia iho te taata papai, e e tuea maitai teie buka e te toea o te Parau faauruahia. (Tes. 1, 1:1; 2:18) Te faahitihia ra te upoo parau o teie episetole i roto i te mau tabula matamua e rave rahi o te mau Papai faauruahia, tae noa ˈtu i te Canon de Muratori. * E rave rahi mau taata papai ekalesiatiko matamua tei faahiti i te Tesalonia Hoê, o Irenée te tahi (senekele 2 T.T.), o tei faahiti roa i te upoo parau o teie rata. Tei roto te Tesalonia Hoê i te Papyrus Chester Beatty II (P⁴⁶), no te area 200 T.T., e tei roto te tahi mau tuhaa o te Tesalonia Hoê e te Piti i te tahi atu papyrus o te senekele 3 (P³⁰), e vai nei i Ghent, i Beletita. *

3, 4. Eaha tei tupu i muri aˈe i te manuïaraa matamua o te taviniraa a Paulo i Tesalonia?

³ Ia hiˈohia te aamu poto o te amuiraa no Tesalonia, hou a papaihia ˈi teie rata, e itehia te tumu i haapeapea ˈi Paulo no te mau taeae o taua oire ra. Mai te omuaraa iho â, ua faaruru te amuiraa i te hamani-ino-raa e te patoiraa rahi. I roto i te Ohipa pene 17, te faatia ra Luka i te taeraa mai Paulo e o Sila i Tesalonia, “e sunago to reira no te ati Iuda.” E toru Sabati to Paulo pororaa ia ratou, ma te haaferuri ia ratou i nia i te mau Papai, e te faaitehia ra e ua faaea maoro atu â oia i reira, no te mea ua nehenehe oia e faaineine i ta ˈna ohipa e, hau atu â, e haamau e e faanahonaho i te hoê amuiraa.—Ohi. 17:1; Tes. 1, 2:9; 1:6, 7.

⁴ Te faatia ra te Ohipa 17:4-7 ma te oraora maitai i te faahopearaa o te pororaa a te aposetolo i Tesalonia. No to ratou pohehae e ua manuïa te taviniraa Kerisetiano a Paulo, ua haaputuputu ihora te ati Iuda i te hoê nahoa taata e faaarepurepu atura i te oire. Ua haaati atura ratou i te fare o Iasona e ua arato maira ia ˈna e vetahi mau taeae i mua i te mau raatira o te oire, ma te pii e: “O te mau taata orure hau teie i te mau fenua atoa nei, e teie mai nei â hoi: e i fariihia mai raua e Iasona, e eita anaˈe e au ta ratou parau i ta Kaisara, i te na ôraa maira hoi e, Te vai ê atura te hoê Arii, o Iesu.” Ua faahepohia ˈtura o Iasona e te vetahi ia aufau i te hoê tino moni hou ratou e tuuhia ˈi. No te maitai o te mau taeae o te amuiraa, e no te paruru atoa ia raua iho, ua hopoi-huna-hia ˈtura Paulo raua o Sila i Berea i te po. Ua oti râ te amuiraa no Tesalonia i te haamauhia.

5. Nafea to Paulo faaiteraa i to ˈna haapeapearaa e to ˈna anaanatae î i te here i te amuiraa no Tesalonia?

⁵ Ma te patoi uˈana, ua auau te ati Iuda ia Paulo i Berea, e ua haamǎtaˈu atu i te haafaaea i ta ˈna pororaa i reira. Ua haere atura oia i Ateno, i Heleni. Te hinaaro noa ra râ oia e ite i te huru o to ˈna mau taeae i Tesalonia i roto i te ati. E piti taime to ˈna tamataraa i te hoˈi atu ia ratou ra, teie râ i na taime atoa ra, ‘na Satani i faaore.’ (Tes. 1, 2:17, 18) No to ˈna haapeapearaa rahi i te amuiraa apî e to ˈna mauiui i te ati ta ratou e faaruru ra, ua tono faahou atura Paulo ia Timoteo i Tesalonia e tamahanahana i te mau taeae e e faaitoito ia ratou i roto i te faaroo. I to Timoteo hoˈiraa mai e te mau parau apî mahanahana, ua oaoa roa Paulo i to ratou taiva ore ma te itoito i roto i te hamani-ino-raa uˈana. Ua riro maira to ratou parau ei hiˈoraa no te feia faaroo na Makedonia e Ahaia atoa. (1:6-8; 3:1-7) Ua mauruuru Paulo i te Atua ra o Iehova no to ratou faaoromai ma te taiva ore, ua taa atoa râ ia ˈna e, a haere noa ˈi ratou i te paariraa, e hinaaro ratou i te aratairaa e te aˈoraa hau. No reira, a tia noa ˈi oia i Korinetia e o Timoteo e o Siluano, ua papai Paulo i ta ˈna rata matamua i to Tesalonia.

 TUMU PARAU O TE TESALONIA HOÊ

6. Eaha ta Paulo e haapopou i to Tesalonia?

⁶ Ua riro to Tesalonia ei hiˈoraa no te tahi atu feia faaroo (1:1-10). E haamata Paulo i ta ˈna rata i to Tesalonia na roto i te haapopouraa mahanahana no to ratou raveraa i te ohipa ma te haapao maitai, rohiraa ma te here, e faaoromairaa ma te tiaturi. Aita te parau apî maitai i porohia i roto ia ratou ma te parau vaha noa, ‘ma te puai atoa râ, e ma te ite papu.’ Ma te pee i te hiˈoraa i horoahia ˈtu, ua farii to Tesalonia i te parau ‘ma te oaoa a te varua moˈa’ e ua riro ratou iho ei hiˈoraa no te feia faaroo atoa i Makedonia, i Ahaia, e i ô atu â. Ua faarue roa ratou i ta ratou mau idolo, no te ‘haamori i te Atua mau e te ora ra, e te tiai i ta ˈna Tamaiti no te raˈi mai.’—1:5, 6, 9, 10.

7. Eaha te huru o Paulo e o to ˈna mau hoa i ǒ i to Tesalonia, e eaha ta ratou i aˈo atu ia ratou ia rave?

⁷ To Paulo haapeapearaa î i te here i to Tesalonia (2:1–3:13). I muri aˈe i to ratou farereiraa i te hamani-ino-raa i Philipi, ua faaitoito noa Paulo e to ˈna mau hoa i te poro atu i to Tesalonia. Aita ratou i poro no te haamauruuru aore ra te faatietie i te taata, aore ra ia faahanahanahia mai ratou e te taata. Aita roa ˈtu, ta Paulo ïa e parau ra, “i mǎrû noa râ matou i roto ia outou, mai te [metua vahine] i poihere i ta ˈna ra tamarii; oia atoa matou no te rahi o to matou aroha ia outou, ua tia roa ia matou i te horoa ˈtu i te evanelia a te Atua ia outou na, e eiaha hoi te reira anaˈe ra, o matou atoa iho ïa, no te mea ua riro outou ei here na matou.” (2:7, 8; MN) Ua tamau noa ratou i te aˈo i to Tesalonia, mai te hoê metua tane i ta ˈna mau tamarii, ia haere â ratou ma te au i te Atua, o te titau ra ia ratou i roto i to ˈna Basileia e to ˈna hanahana.

8. Nafea to Tesalonia i te riroraa ei korona oaoaraa no Paulo, e eaha ta ˈna e pure no ratou?

⁸ E haapopou Paulo ia ratou no to ratou farii-maite-raa i te parau apî maitai mai tei tia mau â, ei ‘parau na te Atua.’ E ere o ratou anaˈe te hamani-ino-hia ra e to ratou iho nunaa, no te mea ua faaruru atoa te feia faaroo matamua i Iudea i taua mau huru hamani-ino-raa ra i te rima o te ati Iuda. No to ˈna tapitapi ia ratou, e piti taime to Paulo hinaaroraa e haere roa ˈtu e hiˈo ia ratou, ua haafifi râ Satani i ta ˈna opuaraa. No Paulo e to ˈna mau hoa ohipa, ua riro te mau taeae no Tesalonia ei korona oaoaraa, oia ‘to ratou hinuhinu, e to ratou oaoaraa.’ (2:13, 20) Aita o Paulo i faaoromai faahou i te oreraa e faarooroo i to ratou parau, ua tono atura oia ia Timoteo i Tesalonia e faaitoito i to ratou faaroo e e tamahanahana ia ratou. No hoˈi noa maira Timoteo e te mau parau apî o to ratou ruperupe i te pae varua e o to ratou here, e ua tamahanahana e ua faaoaoa te reira i te aposetolo. E haamauruuru Paulo i te Atua e e pure oia ia horoa mai te Fatu i te maraaraa, ia rahi to ratou here te tahi i te tahi, e ia ‘moˈa’ to ratou mafatu “ma te hapa ore” i mua i te Atua ra te Metua i te vairaa mai o te Fatu ra o Iesu.—3:13.

9. Eaha ta Paulo e aˈo no nia i te moˈaraa e te here te tahi i te tahi?

⁹ Te taviniraa ma te moˈa e te tura (4:1-12). E haapopou Paulo i to Tesalonia no te haereraa ma te auhia mai e te Atua, e e aˈo atu oia ia rahi atu â to ratou na reiraraa. “Ia ite” te taata taitahi “i te vaiiho i to ˈna iho tino ma te [moˈa] e te tura; eiaha ia tuu-noa-hia ˈtu i te hinaaro tia ore [i te pae taatiraa].” I ǒ nei, eiaha roa te hoê ia taataahi i te mau tiaraa o to ˈna taeae. No te mea ua titau te Atua ia ratou, ‘eiaha no te parau faufau, ia [moˈa] râ. E teie nei, o te patoi mai, e ere ïa i te taata ta ˈna i patoi maira, o te Atua râ.’ (4:4, 5, 7, 8; MN) E haapopou Paulo i to Tesalonia no te mea te faaite ra ratou i te here te tahi i te tahi, e e aˈo oia ia rahi atu â to ratou here, e ia riro ei fa na ratou te oraraa ma te hau, te haapaoraa i ta ratou iho ohipa e te raveraa to ratou rima i te ohipa. Ei haerea nehenehe to ratou “i te feia i rapae au ra” e tia ˈi.—4:12.

10. Eaha te manaˈo o te mau taeae no nia i tei taoto i roto i te pohe e tia ˈi?

¹⁰ Te tiaturiraa o te tia-faahou-raa (4:13-18). No nia i tei taoto ra i roto i te pohe, eiaha te mau taeae ia oto mai te feia aita to ratou e tiaturiraa. Mai te peu e te tiaturi ra ratou e ua pohe Iesu e ua tia faahou mai, oia atoa ïa, na roto ia Iesu, e faatia mai te Atua i te tahi atu tei taoto i roto i te pohe. I te vairaa mai o te Fatu, e pou mai oia mai te raˈi mai ma te reo faaue, “e te feia i pohe i roto i te Mesia ra, o te tia mai na ïa i nia.” I muri iho te feia e ora mai “e afaihia ˈi i nia i roto i te ata, ia farerei atu i te Fatu i roto i te reva nei,” a parahi noa ˈtu ai i pihai iho i te Fatu.—4:16, 17.

11. No te aha e tia ˈi i to Tesalonia ia vai ara noa, e e tia ia ratou ia tamau noa i te aha?

¹¹ A vai ara noa a fatata mai ai te mahana o Iehova (5:1-28). “Te haere maira taua mahana o [Iehova] ra, mai te haerea mai o te eiâ i te po ra.” Ia parau te taata e “E hau, e aita e ino” i reira ratou e roohia ˈi i te haamouraa oioi. No reira, ia vai ara noa to Tesalonia e tia ˈi, ‘ei tamarii no te maramarama e ei tamarii no te ao,’ ma te haapao maitai e “ma te tapoˈi ouma ra o te faaroo e te [here] i te ahuraa, e ma te manaˈo ora ei taupoo.” (5:2, 3, 5, 8; MN) Teie te taime e tamahanahana e e patu ai ratou te tahi i te tahi. ‘Ia rahi roa te faatura ma te here’ i te feia e rave puai ra i te ohipa e e peretiteni ra i roto ia ratou. I te tahi aˈe pae, e tia ia aˈohia te feia haapao ore, ia faaitoitohia tei paruparu, e ia faaitehia te faaoromai i te taata atoa. Oia mau, ta Paulo ïa e papai, “e titau maite râ i te maitai eiaha e faaea, i roto ia outou iho e te taata atoa ra.”—5:13, 15.

12. I te pae hopea, e horoa mai Paulo i te mau aˈoraa no nia i teihea mau manaˈo faufaa roa, e nafea oia ia faaoti i ta ˈna rata i to Tesalonia?

¹² I te pae hopea, e horoa Paulo i te tahi mau aˈoraa no nia i te mau manaˈo faufaa roa: ‘Eiaha e faaea  i te oaoa. Eiaha e tuutuu i te pure. E haamaitai no te mau mea atoa. Eiaha e tinai i te auahi o te varua. Eiaha e haapao ino i te [mau parau tohu]. E hiˈopoa maite i te mau mea atoa e tei maitai ra e tapea maite. E haapae atu i te mau mea ino atoa ra.’ (5:16-22) E pure atu ai oia ia haamoˈa roa te Atua hau ra ia ratou e ia vai hapa ore noa ratou i roto i te varua, te aau, e te tino i te vairaa mai o te Fatu ra o Iesu Mesia. E faaoti oia i ta ˈna rata ma te mau parau faaitoitoraa mahanahana mau, e ma te faatǎpǔ e ia taiohia teie nei rata i te mau taeae atoa.

FAUFAARAA

13. Ua riro Paulo e to ˈna mau hoa ei hiˈoraa maitai roa i roto i teihea tuhaa, e eaha te faahopearaa o te here aau tae i roto i te amuiraa?

¹³ I roto i teie rata, ua faaite Paulo i te tapitapi î i te here i to ˈna mau taeae. Ua horoa oia e to ˈna mau hoa tavini i te hoê hiˈoraa au roa o te here, ma te horoa ˈtu, eiaha noa i te parau apî maitai a te Atua, i to ratou atoa râ nephe no to ratou mau taeae here i Tesalonia. Ia tutava te mau tiaau atoa i te faatupu i teie mau huru taairaa here i roto i ta ratou mau amuiraa e tia ˈi! E turai teie tapao no te here i te taatoaraa ia faaite i te here te tahi i te tahi, mai ta Paulo i parau: “E ia faaîî mai te Fatu ia outou i te [here] e ia manii noa ia outou iho, e te taata atoa ra, mai ia matou e [here] ia outou na.” Ua riro teie here aau tae i roto i te nunaa atoa o te Atua, ei mea faaitoito mau. Maoti teie here ‘e itoito maite ai te aau, e te [moˈa] ma te hapa ore i mua i te aro o to tatou Atua e Metua [i te vairaa] mai o to tatou Fatu ra o Iesu ma te feia moˈa atoa no ˈna ra.’ Na teie here e faataa ê i te mau Kerisetiano i te ao viivii e te tia ore i te pae morare ia nehenehe ratou e haere ma te moˈa e te tura e ia faaoaoa i te Atua.—3:12, 13; 2:8; 4:1-8.

14. Nafea te Tesalonia Hoê e riro ai ei hiˈoraa maitai roa o te aˈoraa au maitai e te î i te here?

¹⁴ Ua riro teie rata ei hiˈoraa maitai roa no te horoaraa i te aˈoraa au maitai e te î i te here i roto i te amuiraa Kerisetiano. Noa ˈtu e mea itoito e mea haapao maitai te mau taeae no Tesalonia, te vai ra te tahi mau tuhaa te tia ia faatitiaifarohia. I roto râ i te tuhaa taitahi, e haapopou Paulo i te mau taeae no to ratou mau huru maitatai. Ei hiˈoraa, ia faaara oia no nia i te viivii i te pae morare, e haapopou na mua oia i to ratou haereraa ma te auhia mai e te Atua e e aˈo atu oia “ia rahi atu â” i te na reira, ia tapea te taata taitahi i to ˈna tino i roto i te moˈaraa e te tura. E, i muri aˈe i to ˈna haapopouraa ia ratou no to ratou here taeae, e aˈo oia ia ratou ia tamau noa i te na reira e “ia rahi atu â,” ma te haapao i ta ratou iho ohipa e ma te ora i te oraraa tura i mua i to rapaeau. Ma te au maitai, e faaue Paulo i to ˈna mau taeae ‘ia titau maite i te maitai i roto ia outou iho e te taata atoa ra.’—4:1-7, 9-12; 5:15.

15. Eaha te faaite e ua poro Paulo i te tiaturiraa o te Basileia ma te itoito i Tesalonia, e eaha te aˈoraa maitai roa ta ˈna i horoa i roto i teie tuhaa?

¹⁵ E maha taime to Paulo faahitiraa i te “vairaa mai, MN” o Iesu Mesia. E au ra e ua anaanatae rahi te feia i riro apî mai ei Kerisetiano i Tesalonia i teie nei haapiiraa. I to ˈna tiaraa i to ratou oire, ua poro mau â Paulo ma te itoito i te Basileia o te Atua e o te Mesia, mai tei haapapuhia e te parau i parihia ia ˈna e to ˈna mau hoa: “Eita anaˈe e au ta ratou parau i ta Kaisara, i te na ôraa maira hoi e, Te vai ê atura te hoê Arii, o Iesu.” (Ohi. 17:7; Tes. 1, 2:19; 3:13; 4:15; 5:23) Ua tuu te mau taeae no Tesalonia i to ratou tiaturiraa i nia i te Basileia e, no to ratou faaroo i te Atua, ua tiai ratou ia faaorahia ratou e “ta ˈna Tamaiti no te raˈi mai, o ta ˈna i faatia mai te pohe maira, oia hoi o Iesu,” i te ati a muri aˈe. Oia atoa, te feia atoa e tiaturi nei i te Basileia o te Atua i teie mahana, e tia ia ratou ia pee i te aˈoraa maitai roa a te Tesalonia Hoê, ia rahi te here, ma te mafatu itoito maitai e te hapa ore, ‘ia au to ratou haerea i te Atua, o tei parau ia ratou no to ˈna ra basileia e no te [hanahana].’—Tes. 1, 1:8, 10; 3:12, 13; 2:12; MN.

[Nota i raro i te api]

[Uiraa haapiiraa]