Buka Bibilia numera 6—Iosua
Buka Bibilia numera 6—Iosua
Taata papai: Iosua
Vahi papairaa: Kanaana
Otiraa te papai: area 1450 H.T.T.
Area tau puohuhia: 1473-area 1450 H.T.T.
1. Eaha te huru tupuraa i farereihia e Iseraela i te matahiti 1473 H.T.T.?
O TE matahiti 1473 H.T.T. teie. Mea fifi roa te huru tupuraa e te putapû atoa. Ua ineine te mau ati Iseraela, e puhapa ra i te vahi papu no Moabi, i te haere atu i Kanaana, te Fenua Tǎpǔhia. Te faaeahia ra taua tuhaa fenua ra i te tahi pae mai o Ioridana e te mau basileia nainai e rave rahi, e nuu ta ratou tataitahi. Ua amaha ratou e ua haaparuparuhia i te roaraa o te mau matahiti faatereraa viivii a Aiphiti. Teie râ, no te nunaa o Iseraela, mea riaria te patoiraa. No te haru i te fenua, e tia ia noaa te mau oire e rave rahi i faaetaetahia, mai ia Ieriko, Ai, Hazora, e Lakisa. E tau fifi te tiai maira ia ratou. E tia ia ravehia te mau aroraa papu e ia upootia ma te tauturu a Iehova iho o te faatupu i te mau semeio puai no to ˈna nunaa, ia tupu ta ˈna parau tǎpǔ e haaparahi ia ratou i taua fenua ra. Ma te feaa ore, e tia i taua mau ohipa faahiahia ra, e au maite i te huru ohiparaa a Iehova i nia i to ˈna nunaa, ia papaihia e te hoê taata i ite mata roa ˈtu. O vai atu ïa taata e au aˈe no teie ohipa ia Iosua iho, o tei nominohia e Iehova ei mono ia Mose!—Num. 27:15-23.
2. No te aha mea tano maitai te maitiraahia o Iosua ei raatira e ei taata papai atoa?
2 Mea tano maitai te maitiraahia o Iosua, ei raatira e ei taata papai atoa i te mau ohipa e tupu mai. E hoa rave ohipa piri roa oia no Mose i te roaraa o na 40 matahiti i te medebara. Ua riro oia ei “tavini na Mose mai to ˈna taurearearaa ra,” a faaite ai e e tano oia ei raatira i te pae varua e i te pae tamaˈi atoa. (Num. 11:28, MN; Exo. 24:13; 33:11; Ios. 1:1) A faarue ai o Iseraela ia Aiphiti, i te matahiti 1513 H.T.T., o oia te raatira o te mau nuu a Iseraela i upootia i nia i to Amaleka. (Exo. 17:9-14) Ei hoa haapao maitai o Mose e ei raatira faehau mǎtaˈu ore, ua tano maitai oia ei tia no te opu o Epheraima a maitihia ˈi te hoê taata i roto i te opu fetii taitahi no te ohipa atâta hiˈopoa-haere-raa i Kanaana. Ua haapapu to ˈna itoito e to ˈna haapao maitai i taua taime ra e e haere atu oia i te Fenua Tǎpǔhia. (Num. 13:8; 14:6-9, 30, 38) Oia mau, taua taata ra o Iosua, te tamaiti a Nuna, “e taata ïa tei roto ia ˈna te varua,” te hoê taata tei ‘pee hua ia Iehova,’ te hoê taata tei ‘î i te varua paari.’ E ere ïa i te mea maere ia “haamori Iseraela ia Iehova e hope roa aˈera to Iosua ra anotau.”—Num. 27:18; 32:12; Deut. 34:9; Ios. 24:31.
3. Na te aha e haapapu mai e e tavini o Iosua no Iehova i ora aˈenei, e na ˈna i papai i te buka i topahia i to ˈna iˈoa?
3 Ia au i to ˈna aravihi, to ˈna faaineineraahia, e to ˈna mau huru maitatai i tamatahia ei taata haamori mau ia Iehova, o Iosua iho â tei tia ia faaohipahia ei hoê o te mau taata papai i te mau ‘Papai i faaurua e te Atua.’ E ere Iosua i te hoê taata no roto i te aai, o te hoê râ tavini a Iehova tei ora aˈenei. Ua faahitihia to ˈna iˈoa i roto i te mau Papai Heleni Kerisetiano. (Ohi. 7:45; Heb. 4:8) Mea tano iho â e mai ia Mose i faaohipahia no te papai i te mau ohipa i tupu i to ˈna ra anotau, ia faaohipa-atoa-hia to ˈna mono ra o Iosua, no te papai i te mau ohipa ta ˈna iho i ite mata roa ˈtu. Te itehia ra i roto i te Iosua 6:25 e na te hoê taata i ite mata roa ˈtu i te mau tupuraa i papai i te buka. Te haapapu ra te parau tutuu ati Iuda e o Iosua te taata papai, e te na ô ra te buka iho e: “Ua papai ihora Iosua i teie nei mau parau i roto i te buka ture a te Atua ra.”—Ios. 24:26.
4. Nafea te tupuraa o te mau parau tohu e te faatiaraa a te feia papai Bibilia no muri mai e haapapu ai e e parau mau te buka a Iosua?
4 I te taime a haamouhia ˈi Ieriko, ua faahiti Iosua i te hoê parau tohu o te faaino i te taata atoa e patu faahou i te oire, e ua tupu te reira ma te faahiahia i te anotau o Ahaba, te arii no Iseraela, fatata e 500 matahiti i muri iho. (Ios. 6:26; Arii 1, 16:33, 34) I muri aˈe, ua haapapu te mau faahitiraa e rave rahi a te feia papai i te Bibilia no nia i te mau tupuraa i papaihia i roto, e e parau mau te buka a Iosua. Mea pinepine to te mau papai salamo faahitiraa i te reira (Sal. 44:1-3; 78:54, 55; 105:42-45; 135:10-12; 136:17-22), oia atoa o Nehemia (Neh. 9:22-25), Isaia (Isa. 28:21), te aposetolo Paulo (Ohi. 13:19; Heb. 11:30, 31), e te pǐpǐ ra o Iakobo (Iak. 2:25).
5. (a) Eaha te area tau puohuhia e te buka a Iosua? (b) No te aha te iˈoa Iosua e tano maitai ai?
5 E puohu te buka a Iosua i te hoê area taime hau atu i te 20 matahiti, mai te taime haereraa ˈtu i Kanaana (1473 H.T.T.) e tae atu fatata i te matahiti paha i pohe ai Iosua (1450 H.T.T.). Ua tano maitai te auraa o te iˈoa Iosua (Hebera, Yehoh·shuʹaʽ), oia hoi “o Iehova te Faaora,” no te hopoia a Iosua ei aratai iteahia i Iseraela a haruhia ˈi te fenua. Ua horoa oia i te hanahana atoa na Iehova ei Faaora. I roto i te Septante, te upoo parau o te buka, o I·e·sousʹ ïa (te iˈoa Heleni i tuea ia Yehoh·shuʹaʽ), e no roto mai te iˈoa Iesu i te reira. Na roto i to ˈna mau huru maitatai, te itoito, te auraroraa, e te hapa ore, ua riro mau Iosua ei hohoˈa taipe faahiahia o “to tatou Fatu ia Iesu Mesia.”—Roma 5:1.
TUMU PARAU O TE IOSUA
6. Eaha te mau tuhaa o te buka a Iosua?
6 E maha tuhaa i roto i te buka: (1) te haereraa ˈtu i te Fenua Tǎpǔhia, (2) te haruraa ia Kanaana, (3) te tufaraa i te fenua, e (4) te mau aˈoraa hopea a Iosua. Ua papaihia te aamu taatoa ma te oraora e ua î i te mau huru tupuraa peapea.
7. Eaha te faaitoitoraa e te aˈoraa ta Iehova e horoa na Iosua?
7 Te haereraa ˈtu i te Fenua Tǎpǔhia (1:1–5:12). Ma te ite i te mau tamataraa e tupu mai, e faaitoito e e horoa aˈena Iehova i te aˈoraa maitai na Iosua: “Ia etaeta râ oe, e ia rahi roa te itoito . . . Eiaha te buka ture na ia taa ê atu i roto i to vaha, ia haamanaˈo maite oe i te reira i te rui e te ao, ia haapao hua oe i tei papai-atoa-hia i roto ra, ei reira e maitai ai to oe haerea, ei reira oe e manuïa roa ˈi. E ere au te faaue atu na ia oe? e faaetaeta, e ia itoito roa . . . tei pihai-atoa-iho hoi to Atua o Iehova ia oe i to mau haerea atoa ra.” (1:7-9) E faahanahana Iosua ia Iehova mai te Aratai e te Raatira mau e e rave oioi oia i te mau faaineineraa no te haere i te tahi pae mai o Ioridana ia au i tei faauehia. E farii to Iseraela ia ˈna ei mono ia Mose, e e horeo ratou eiaha e taiva ia ˈna. E haere anaˈe ïa i mua e haru ia Kanaana!
8. (a) Nafea to Rahaba faaiteraa i te faaroo? (b) Nafea to Iehova faaiteraa e e “Atua ora” oia i rotopu ia Iseraela?
8 E tonohia e piti taata e hiˈopoa haere ia Ieriko. E rave o Rahaba te vahine faaturi i taua taime maitai ra no te faaite i to ˈna faaroo ia Iehova na roto i te hunaraa i na feia hiˈopoa a fifihia to ˈna ora. Ei haamauruururaa, e tǎpǔ atu te mau manu e e paruruhia oia ia haamouhia Ieriko. E hoˈi mai te feia hiˈopoa e parau e ua tarapape te aau o te huiraatira o taua fenua ra no te mau ati Iseraela. No te maitai o te poroi, e haere oioi Iosua i te anavai ra o Ioridana i manii i taua taime ra. I reira to Iehova faaiteraa ma te papu e te turu ra oia ia Iosua e, mai te tau atoa o Mose, te vai ra te hoê “Atua ora” i rotopu ia Iseraela. (3:10) A haere ai te mau tahuˈa e amo ra i te afata o te faufaa na roto ia Ioridana, e mau te pape na uta mai mai te patu ra te huru, e nehenehe atu ai to Iseraela e haere i te tahi pae mai na nia i te repo pâpâmǎrô. E rave Iosua 12 ofai no ropu mai i te anavai ei haamanaˈoraa, e e tuu oia 12 â ofai i roto i te anavai, i te vahi i tia ˈi te mau tahuˈa, e i muri iho e haere ratou i te tahi pae mai e e hoˈi faahou mai te pape mai te matamua ra.
9. Eaha te ohipa e tupu i muri aˈe i Gilagala?
9 I te tahi pae mai, e puhapa te nunaa i Gilagala, i rotopu ia Ioridana e ia Ieriko, e i reira e tuu Iosua i te mau ofai haamanaˈoraa ei faaiteraa i te mau ui no a muri aˈe “ia ite to te ao atoa nei i te huru o te puai o te rima o Iehova, e ia mǎtaˈu hoi outou i to outou Atua ra ia Iehova e a muri noa ˈtu.” (4:24) (Te faaite ra Iosua 10:15 e i muri aˈe, ua faaohipahia paha Gilagala ei puhaparaa no te hoê taime huru roa.) I reira te mau tamarii a Iseraela e peritomehia ˈi, inaha aita ratou i peritomehia a haere ai ratou na te medebara. E faatupuhia te oroa Pasa, e ore te mâna, e i te pae hopea, e haamata to Iseraela i te amu i te hotu o te fenua.
10. Nafea to Iehova haapiiraa ia Iosua no nia i te haruraa ia Ieriko, e eaha te ohipa maere rahi e tupu i muri aˈe?
10 Te haruraa ia Kanaana (5:13–12:24). I teie nei, ua piri roa mai te tapao matamua. Nafea râ ia haru i teie oire i patuhia e i “opani-roa-hia” o Ieriko? (6:1) E faataa Iehova iho i te huru raveraa, ma te tono i te “raatira no te nuu a Iehova” e haapii ia Iosua. (5:14) Hoê taime i te mahana i te roaraa e ono mahana, e tia i te mau nuu a Iseraela ia haaati i te oire, e te feia tamaˈi i mua, apeehia i roto i te haereraa e te mau tahuˈa e faaoto ra i te pu iubili e vetahi e amo ra i te afata o te faufaa. I te hitu o te mahana, e tia ia ratou ia haaati e hitu taime. E horoa Iosua ma te haapao maitai i te mau faaueraa na te nunaa. Ia au maite i tei faauehia, e haaati te nuu ia Ieriko. Aita hoê aˈe parau e matara mai. Aita e maniania e faaroohia, maori râ o te avae e te faataˈiraa pu a te mau tahuˈa. E, i te mahana hopea, ia oti te hitu o te haaatiraa, e faaue Iosua ia ratou e tuô. E tuô ratou, “e tuôraa tamaˈi puai,” e e mairi te patu o Ieriko i raro! (6:20, MN) Mai te hoê anaˈe ra taata te huru, e horo ratou i roto i te oire, e haru ia ˈna, e e haamou atu ai. O Rahaba anaˈe te vahine haapao maitai e to ˈna utuafare tei faaorahia.
11. Nafea te pau i tupu i Ai e faaafarohia ˈi?
11 E haere anaˈe i te pae tooa o te râ i Ai! E riro te tiaturiraa i te tahi â upootiaraa ohie ei ahoaho, no te mea e haapurara te mau taata no Ai i na faehau o Iseraela e 3 000 i tonohia e haru i te oire. Eaha te ohipa i tupu? Ua faarue anei Iehova ia ratou? Ma te tapitapi e uiui Iosua ia Iehova. Ei pahonoraa, e faaite Iehova e noa ˈtu ta ˈna faaueraa e haamou i te mau mea atoa i Ieriko, aita te hoê taata i roto i te puhapa i auraro, e ua eiâ oia i te hoê taoˈa e ua faatapuni oia i te reira. E tia ia tatarahia teie mea viivii i rapaeau i te puhapa hou Iseraela e nehenehe ai e haere i mua ma te haamaitaihia e Iehova. Ma te arataihia e te Atua, e iteahia e o Akana te taata rave hara, e e pehihia oia e to ˈna utuafare i te ofai a pohe roa ˈtu ratou. Ma te farii-faahou-hia e Iehova, e haere atu to Iseraela e aro ia Ai. E faaite faahou â o Iehova iho eaha te ravea aravihi e tia ia faaohipahia. E arataihia te mau taata no Ai i rapae i to ratou oire i patuhia e inaha e topa ratou i roto i te hoê marei. E haruhia e e haamouhia te oire e to ˈna huiraatira atoa. (8:26-28) Aore roa e faaauraa parau e te enemi!
12. Eaha te faaueraa a te Atua ta Iosua e rave i muri aˈe?
12 Ei auraroraa i te faaueraa ta Iehova i parau ia Mose, e faatia Iosua i te hoê fata i te mouˈa ra i Ebala e e papai oia i te “hoê hohoˈa o te ture.” (8:32, MN) I muri iho, e taio oia i te mau parau o te Ture, te haamaitairaa e te parau faaino atoa, i te amuiraa o te nunaa taatoa e tia noa ra, te hoê afaraa i mua i te mouˈa ra o Gerezima e te tahi afaraa i mua i te mouˈa ra o Ebala.—Deut. 11:29; 27:1-13.
13. Eaha te faahopearaa i te ohiparaa to Gibeona “ma te ravea paari”?
13 No to ratou mǎtaˈu i te piri-oioi-raa mai o te feia haru, e tahoê te tahi mau basileia iti no Kanaana no te tapea i te haereraa i mua o Iosua. Teie râ, ia ‘ite to Gibeona i ta Iosua i rave ia Ieriko e ia Ai, e [ohipa ratou ma te ravea paari].’ (Ios. 9:3, 4; MN) Ma te haavare e na te hoê fenua atea ia Kanaana maira ratou, e faaau ratou e o Iosua i te hoê faufaa “e e faaorahia ratou.” Ia itehia te haavare, e faatura to Iseraela i te faufaa, e faariro râ ratou i to Gibeona ‘ei feia haaputu vahie e ei tii pape,’ mai te mau “tavini haehaa roa,” i reira, ua tupu rii â ïa te parau faaino faauruahia a Noa no nia ia Kanaana, te tamaiti a Hama.—Ios. 9:15, 27; Gen. 9:25.
14. Nafea to Iehova faaiteraa e te aro ra oia no Iseraela i Gibeona?
14 E ere teie taivaraa a to Gibeona i te hoê ohipa nainai, no te mea “e oire rahi Gibeona . . . e rahi te reira ia Ai, e e taata aito anaˈe hoi to reira ra.” (Ios. 10:2) Te manaˈo ra o Adoni-zedeka, te arii no Ierusalema, e e fifi te reira no ˈna iho e no te tahi atu mau basileia i Kanaana. E tia ia horoahia te hoê hiˈoraa no te opani i te hororaa ˈtu i te enemi ra. No reira o Adoni-zedeka e te tahi atu na arii e maha (no te mau oire basileia o Heberona, Iaremuta, Lakisa, e Egalona), e tahoê ai no te aro ia Gibeona. Ma te faatura i ta ˈna faufaa e to Gibeona, e haere Iosua e ia ao aˈe te po e tauturu ia ratou e e haapurara oia i te mau nuu a na arii e pae. E aro faahou â Iehova, a faaohipa ˈi i te mau puai hau aˈe i ta te taata e te mau tapao, ma te mau faahopearaa ino. E topa mai te mau pape paari teiaha mai te raˈi mai, a haapohe ai e rave rahi aˈe enemi i ta te mau ˈoˈe a te nuu Iseraela. E i muri aˈe, e mea maere mau, ‘e faaea noa te mahana i ropu i te raˈi, aore e mairi vave i raro, [fatata hoê mahana i te maoro].’ (10:13; MN) E nehenehe atura ïa e faaoti i te ohipa tamâraa. E vahavaha paha te feia paari ia au i teie nei ao i teie tupuraa semeio, e farii râ te feia faaroo i te faatiaraa a te Atua, a ite maitai ai e maoti to ˈna mana, e mau ia Iehova te mau puai o te ao taatoa e e aratai oia ia ratou ia au i to ˈna hinaaro. Oia mau, “na Iehova hoi i aro i ta Iseraela tamaˈi.”—10:14.
15. A faataa na i te haruraa o Hazora e te tupuraa faahiahia roa ˈˈe.
15 Ia oti ia ˈna i te haapohe i na arii e pae, e haamou Iosua ia Makeda. Ma te haere oioi i te pae apatoa, e haamou roa oia ia Libena, Lakisa, Egalona, Heberona, e Debira—mau oire e vai ra i nia i te mau aivi i rotopu i te Miti Avaava e te Miti Rahi. I teie nei, ua parare te parau apî o te haruraa na Kanaana taatoa. I te pae apatoerau, na Iabina, arii no Hazora e faaara ia vetahi ê. I te mau vahi atoa, i na hiti e piti o Ioridana, e pii oia i te mau pǔpǔ taata e tahoê no te aro i to Iseraela. A puhapa ˈi ratou i te pae pape o Meroma, e au te mau nuu amui a te enemi i “te one tahatai ra te huru.” (11:4) E haapapu faahou â Iehova ia Iosua e e upootia mai oia e e faanaho oia i te huru aroraa. Eaha te faahopearaa? Te tahi atu â ïa pau rahi no te mau enemi o te nunaa a Iehova! E tutuihia Hazora i te auahi, e e haamouhia te mau oire i amui mai ia ˈna e to ratou mau arii. E faarahi atu ïa Iosua i te vahi e faaterehia e Iseraela i te roaraa e te aanoraa o Kanaana. E toru ahuru ma hoê arii tei pau.
16. Nafea te fenua e operehia ˈi?
16 Te tufaraa i te fenua (13:1–22:34). Noa ˈtu teie mau upootiaraa e rave rahi, te haamouraa i te mau oire faahiahia i patuhia e te faaea-rii-raa o te patoiraa i faanahohia, “e fenua rahi roa râ te toe nei aore â i noaa.” (13:1) Teie râ, ua fatata i te 90 matahiti to Iosua, e e tia ia ravehia te tahi atu ohipa rahi—te tufaraa i te fenua ei parahiraa no na opu fetii e iva e no te opu vaehaa o Manase. Ua horoa-aˈena-hia na Reubena, na Gada, e na te tahi atu opu vaehaa o Manase to ratou fenua tufaa i te pae hitia o te râ o Ioridana, e aita hoê aˈe na te opu o Levi, inaha “o te Atua o Iseraela ra o Iehova” to ratou tufaa. (13:33) Na roto i te tauturu a te tahuˈa ra o Eleazara, e faanaho Iosua i teie nei i te tufaraa i te pae tooa o te râ o Ioridana. E 85 matahiti to Kaleba i teie nei, e te itoito noa râ oia no te aro i te mau enemi o Iehova e tae roa i te hopea, e e ani oia e ia horoahia na ˈna te fenua o Heberona, mea rahi to Anaka i reira. (14:12-15) I muri aˈe i te opereraa i te tufaa o te mau opu fetii, e ani Iosua i te oire o Timenata-sera i te mouˈa o Epheraima, e e horoahia te reira na ˈna mai “ta Iehova i parau maira.” (19:50) E haamauhia te sekene putuputuraa i Silo, tei te vahi mouˈa atoa o te fenua o Epheraima.
17. Eaha te faanahonahoraa e ravehia no te mau oire haapuraa e no te mau oire faaearaa o te mau ati Levi?
17 E faataahia e ono oire haapuraa no te taata i taparahi pohe ma te ore e opua, e toru i na pae taitahi o Ioridana. Te mau oire i te pae tooa o te râ o Ioridana, o Kedesa ïa i Galilea, o Sekema i Epheraima, e o Heberona i te fenua mouˈa o Iuda. Te mau oire i te pae hitia o te râ, o Besera ïa i te vahi o Reubena, o Ramota i Gileada, e o Golana i Basana. E faataahia te reira ei “mea moˈa.” (20:7, MN) E horoahia e maha ahuru ma vau oire e to ratou mau vahi matie no roto mai i te tufaa o te mau opu fetii ei oire faaearaa no te mau ati Levi. Tei roto na oire haapuraa e ono. Inaha, “noaa ihora hoi taua fenua ra ia” Iseraela, “e ua parahi i nia iho.” Mai ta Iehova i tǎpǔ, “hope roa ˈˈera i te tupu.”—21:43, 45.
18. Eaha te fifi rahi e tupu i rotopu i te mau opu fetii no hitia o te râ e no tooa o te râ, nafea râ te reira e faaafarohia ˈi?
18 I teie nei e ua faaitoitohia ratou ia haapao maitai noa e ua haamaitaihia ratou e Iosua, e hoˈi te feia tamaˈi no roto mai i te mau opu o Reubena e o Gada e te opu vaehaa o Manase, tei pee ia Iosua e tae roa i taua taime ra, i to ratou fenua tufaa i te tahi pae mai o Ioridana. I nia i te purumu, a fatata ˈtu ai ratou ia Ioridana, e faatia ratou i te hoê fata rahi. E faatupu te reira i te hoê fifi rahi. No te mea te vahi i faataahia no te haamori ia Iehova, o te sekene putuputuraa ïa e vai ra i Silo, e mǎtaˈu te mau opu fetii no te pae tooa o te râ i te haavare e te taivaraa, e e faaineine ratou i te aro i te feia ta ratou e manaˈo e e feia orure hau. E apehia râ te haamaniiraa toto ia faataahia e aita te fata i hamanihia no te mau tusia, ia riro noa râ “ei ite . . . no tatou [te mau ati Iseraela i te pae hitia o te râ e tooa o te râ o Ioridana] e o Iehova te Atua” mau.—22:34.
19, 20. (a) Eaha te mau aˈoraa hopea ta Iosua e horoa? (b) Eaha te maitiraa ta ˈna e tuu i mua ia Iseraela, e nafea oia e haamatara ˈi i te maitiraa maitai e tia ia Iseraela ia rave?
19 Te mau aˈoraa hopea a Iosua (23:1–24:33). “E pue mahana maoro aˈera tei mahemo, i muri aˈe i ta Iehova horoaraa mai i te hau ia Iseraela i to ratou mau enemi atoa e ati noa ˈˈe; e ua ruhiruhia Iosua, ua rahi roa o ˈna pue mahana,” e e pii oia ia Iseraela taatoa no te horoa ˈtu i te mau aˈoraa faaitoitoraa hopea. (23:1) Ma te haehaa e tae roa ˈtu i te hopea, e parau oia e na Iehova i horoa mai i te mau upootiaraa rarahi i nia i te mau nunaa. E tamau paatoa anaˈe ïa i te haapao maitai! “E tena na, e faaitoito outou i te haapao e te rave i te mau mea atoa i papaihia i roto i te ture a Mose ra, eiaha outou e ohipa ê i te pae atau e te pae aui.” (23:6) Ia faarue ratou i te mau atua haavare e tia ˈi e ‘ia ara ia ratou, [na roto i te here-maite-raa] i to ratou Atua ra ia Iehova.’ (23:11; MN) Eiaha roa ˈtu ei faaauraa e te mau ati Kanaana e toe ra, eiaha ei faaipoiporaa aore ra ei taairaa i te pae faaroo e o ratou, a roohia ratou i te riri uˈana o Iehova.
20 Ma te haaputuputu i te mau opu fetii atoa i Sekema e ma te titau i to ratou mau tia mana i mua i te aro o Iehova, e vauvau atu Iosua i te mau parau a Iehova no nia i To ˈna mau auraa e To ˈna nunaa mai te tau i aratai ai Oia ia Aberahama i Kanaana e tae roa i te taime a roaa ˈi e a faaeahia ˈi te Fenua Tǎpǔhia. E faaara faahou â Iosua no nia i te haapaoraa hape, a faaitoito atu ai ia Iseraela e ‘mǎtaˈu ia Iehova, e e haamori hoi ia ˈna ma te haavare ore, ma te parau mau.’ Oia mau, e “haamori ia Iehova”! E tuu atu ai oia i te maitiraa taa maitai: “E faataa na outou i teie nei mahana i ta outou e haamori; e o te mau atua anei a to outou mau metua i haamori . . . e te mau atua anei o te ati Amori nei no ratou te fenua ta outou e parahi nei? area vau e to ˈu atoa ra utuafare, e haamori ïa matou ia Iehova.” Ma te tiaturi papu mai ia Mose, e haamanaˈo Iosua ia Iseraela e o Iehova, “e Atua moˈa roa hoi oia; e Atua [o te titau e oia anaˈe te haamorihia].” No reira, ia faarue ratou i te mau atua ěê! E turai te reira i te nunaa ia parau mai te hoê anaˈe ra taata e: “E haamori matou i to matou Atua ia Iehova, e to ˈna te reo ta matou e faaroo!” (24:14, 15, 19, 24; MN) Hou oia e vaiiho ai ia ratou ia haere, e fafau Iosua i te hoê faufaa e o ratou, e papai oia i taua mau parau ra i roto i te buka ture a te Atua, e e faatia oia i te hoê ofai rahi ei faaiteraa. I muri iho, e pohe Iosua i te matahiti rahi 110 e e tanuhia oia i Timenata-sera.
FAUFAARAA
21. Eaha te aˈoraa paari faufaa rahi no teie mahana e vai ra i roto i te buka a Iosua?
21 A taio ai outou i te mau aˈoraa hopea a Iosua no nia i te taviniraa ma te haapao maitai, aita anei te reira e haaputapû ra i to outou mafatu? Eita anei outou e pee i te mau parau ta Iosua i faahiti hau atu i te 3 400 matahiti aˈenei: “Area vau e to ˈu atoa ra utuafare, e haamori ïa matou ia Iehova”? Aore ra ia tavini outou ia Iehova i roto i te mau tamataraa aore ra ia faataa-ê-hia outou i te tahi atu mau tavini haapao maitai, eita anei outou e imi i te faaitoitoraa i roto i te mau parau ta Iehova i faatae atu ia Iosua ra, i te omuaraa o te haereraa i te Fenua Tǎpǔhia: “Ia etaeta râ oe, e ia rahi roa te itoito”? Hau atu â, aita anei outou e ite ra i te haamaitairaa faito ore ia pee outou i Ta ˈna aˈoraa e ‘[taio]’ i te Bibilia ‘[ma te reo haehaa] i te rui e te ao, ei reira oe e manuïa roa ˈi’? Ma te papu maitai, e ite te feia atoa e pee ra i teie aˈoraa paari e e mea faufaa taa ê mau â.—24:15; 1:7-9; MN.
22. Eaha te mau huru maitai faufaa o te haamoriraa mau tei haamatarahia?
22 E ere noa te mau tupuraa i papaihia ma te oraora maitai i roto i te buka a Iosua, i te aamu tahito. E haamatara te reira i te mau faaueraa tumu a te Atua—i te faufaaraa iho â râ o te faaroo e te auraroraa ia Iehova ma te mafatu taatoa ia roaa mai ta ˈna haamaitairaa. Te faatia ra te aposetolo Paulo e no te faaroo “i hiˈa ˈi te aua i Ieriko ra i raro, a rui hitu aˈera i te haaati-haere-raahia,” e no te faaroo “i ore i pohe atoa ˈi te faaturi ra o Rahaba a pohe ai te feia faaroo ore ra.” (Heb. 11:30, 31) Te faahiti atoa ra o Iakobo ia Rahaba mai te hoê hiˈoraa faufaa no te mau Kerisetiano no nia i te faatupuraa i te mau ohipa o te faaroo.—Iak. 2:24-26.
23. Eaha te mau haamanaˈoraa puai e vai ra i roto i te buka a Iosua?
23 Te mau ohipa semeio taa ê i faatiahia i roto i te Iosua 10:10-14, oia te mau-noa-raa te mahana e te avaˈe, e te tahi atoa ˈtu mau semeio e rave rahi ta Iehova i faatupu no to ˈna nunaa, e mau haamanaˈoraa puai anaˈe ïa no te aravihi o Iehova e no ta ˈna opuaraa e haamou roa i te feia ino atoa e patoi ra ia ˈna. Ua faaau Isaia ia Gibeona, te vahi aroraa i te tau o Iosua e te tau atoa o Davida, i te riri rahi o Iehova o te tia mai no te hoê haamouraa, “ia rave oia i ta ˈna ohipa, ta ˈna ohipa huru ê ra, ia faatupu oia i ta ˈna e rave ra i ta ˈna ravea huru ê ra.”—Isa. 28:21, 22.
24. Nafea te buka a Iosua e taaihia ˈi i te mau parau tǎpǔ a te Basileia, e eaha te haapapuraa e horoahia ra e ‘e hope roa te reira i te tupu’?
24 Te huti ra anei te mau tupuraa i papaihia e Iosua i te ara-maite-raa i nia i te Basileia o te Atua? Ma te papu maitai, e! Ua taaihia te haruraa e te parahiraa ˈtu i te Fenua Tǎpǔhia i te tahi ohipa faufaa roa ˈtu â mai tei faaitehia e te aposetolo Paulo: “Ahiri hoi Iosua i horoa i te faaearaa no ratou, e ore hoi te Atua e na muri i te faaite mai i te tahi â mahana. E teie nei, te vai râ maori te faaearaa no te taata no te Atua.” (Heb. 4:1, 8, 9) Te faaitoito nei ratou no te haapapu i to ratou tomoraa ˈtu “i roto i te basileia mure ore o to tatou Fatu o Iesu Mesia, to tatou ora ra.” (Pet. 2, 1:10, 11) Mai tei faaitehia i roto i te Mataio 1:5, ua riro o Rahaba ei vahine tupuna no Iesu Mesia. E tuhaa faufaa ïa te buka a Iosua no te aratai atu i te Huero o te Basileia ra. Te haapapu maira te reira e e tupu mau â te mau parau tǎpǔ a te Basileia o Iehova. No nia i ta Iehova i tǎpǔ ia Aberahama, ia Isaaka, e ia Iakoba e tei parau-faahou-hia i te mau ati Iseraela, to ratou huaai, te na ô ra te faatiaraa no nia i te tau o Iosua e: “Aore roa te hoê mea maitai a Iehova i parau mai i te utuafare o Iseraela i ore i te tia; hope roa ˈˈera i te tupu.” (Ios. 21:45; Gen. 13:14-17) Oia atoa te “parau maitai” a Iehova no nia i te Basileia parau-tia o te raˈi ra—e hope roa te reira i te tupu!
[Uiraa haapiiraa]
