Buka Bibilia numera 63—Ioane 2
Buka Bibilia numera 63—Ioane 2
Taata papai: Aposetolo Ioane
Vahi papairaa: Ephesia aore ra i pihai iho
Otiraa te papai: area 98 T.T.
1. Ua faataehia paha te Ioane Piti na vai?
MEA poto te piti o te rata a Ioane—ua papaihia paha i nia iho i te hoê noa api papyrus—mea hohonu râ to ˈna auraa. Ua faataehia te reira ‘i te vahine i maitihia ra e ta ˈna atoa ra mau tamarii.’ No te mea hoi e iˈoa topa atoa o “Kyria” (Heleni no “vahine”) i taua tau ra, te manaˈo nei te tahi mau aivanaa Bibilia e te faataehia ra teie rata i te hoê vahine o te reira to ˈna iˈoa. Area râ, te manaˈo ra te vetahi e te papai ra Ioane i te hoê amuiraa Kerisetiano ta ˈna e parau ‘te vahine i maitihia ra.’ Ua na reira paha oia no te faahape i te feia hamani ino. Mai te peu e te reira iho â, no ǒ mai ïa te mau aroharaa a ‘te mau tamarii a to tuahine’ i faahitihia i te irava hopea, i te mau melo o te tahi atu amuiraa. No reira, aita te piti o te rata i au i te taatoaraa mai te rata matamua, ua faataehia hoi te reira i te hoê taata aore ra i te hoê amuiraa taa maitai.—Ioa 2, Ir. 1.
2. (a) Eaha te haapapuraa e na te aposetolo Ioane i papai i te Ioane Piti? (b) Na te aha e faaite ra e ua papaihia te rata i Ephesia, aore ra i pihai iho, i te area 98 T.T. e na te aha e turu e e parau mau te reira?
2 Aita e tumu e feaa ˈi tatou e na Ioane i papai i teie rata. Te parau ra te taata papai ia ˈna iho “te peresibutero [aore ra “matahiapo,” MN].” E tano maitai te reira ia Ioane, eiaha noa no to ˈna matahiti rahi, no te mea atoa râ e, ei hoê o te mau “pou” (Gal. 2:9) e ei aposetolo hopea e ora noa râ, e “matahiapo” mau â oia i roto i te amuiraa Kerisetiano. Mea matau-maitai-hia oia, aita ïa e faufaa ia haapapu â oia o vai teie e papai atu nei. Te ite-atoa-hia ra e o oia te taata papai no te mea hoê â te huru papai e to te rata matamua e to te Evanelia a Ioane. Mai te rata matamua, e au ra e ua papaihia te piti o te rata i Ephesia, aore ra i pihai iho, i te area 98 T.T. Teie te hoê manaˈo no nia i te Ioane Piti e te Toru: “No te mea hoê â to raua huru, e nehenehe tatou e faaoti e ua papaihia na episetole i muri noa ˈˈe i te Episetole matamua mai Ephesia ˈtu. Te faaau nei na rata i te mau faaueraa tumu i vauvau-maitai-hia i roto i te Episetole matamua i nia i te haerea o te taata taitahi.” * Ei tururaa e e parau mau teie rata, ua faahitihia te reira e Irénée, no te piti o te senekele, e ua fariihia e Clément no Alesanederia, no taua atoa tau ra. * Te vai atoa ra te mau rata a Ioane i roto i te Canon de Muratori.
3. No te aha Ioane i papai ai i teie rata?
3 Mai te Ioane Hoê, ua papaihia teie rata no te mea te aro ra te mau orometua haavare i te faaroo Kerisetiano. Te hinaaro ra Ioane e faaara i to ˈna feia taio no nia i teie mau taata, ia nehenehe ratou e ite papu atu e e faaatea ê mai ia ratou, a tamau noa ˈi i te haere i roto i te parau mau, ma te here te tahi i te tahi.
TUMU PARAU O TE IOANE PITI
4. No te aha râ Ioane e faaue ai ia here te tahi i te tahi, e ia nafeahia te feia e haere roa ˈtu i mua ma te ore e tapea tamau i te haapiiraa a te Mesia?
4 A here te tahi i te tahi; a patoi atu i te feia taiva (Mau ir. 1-13). I muri aˈe i to ˈna faaiteraa i to ˈna here i ‘te vahine i maitihia ra e ta ˈna mau tamarii’ i te parau mau nei, e oaoa Ioane i te iteraa e te haere noa ra te tahi pae i roto i te parau mau, mai tei faauehia mai e te Metua. E ani oia e ia here ratou ia ratou iho a tamau noa ˈi i te haere ia au i te mau faaueraa a te Atua. Ua haere atu hoi te feia haavare e te mau anetimesia i roto i teie nei ao, o ratou e ore e faˈi e ua haere taata mai o Iesu Mesia. O te haere roa ˈtu i mua ma te ore e tapea tamau i te haapiiraa a te Mesia, aita ïa te Atua ia ˈna ra, o tei tapea tamau râ i teie haapiiraa, “tei ia ˈna te Metua e te Tamaiti atoa hoi.” Te taata e ore e afai mai i teie haapiiraa, eiaha ïa ia fariihia i roto i to ratou mau fare, eiaha atoa ia arohahia ˈtu. E rave rahi ta Ioane parau e papai atu ia ratou, te manaˈo nei râ oia e haere tino roa ˈtu e paraparau ia ratou, “ia tia roa” to ratou oaoaraa.—Mau ir. 9, 12.
FAUFAARAA
5. (a) Eaha te huru tupuraa i itehia i te tau o Ioane e te ite-atoa-hia ra i teie nei tau? (b) Mai ia Ioane, nafea tatou ia faaite e te haafaufaa ra tatou i te tahoêraa o te amuiraa?
5 E au ra e i te tau o Ioane, mai te itehia ra i teie nei tau, te vai ra te tahi pae o tei ore e mauruuru ra i te faaea-noa-raa i roto i te mau haapiiraa ohie e te maramarama maitai a te Mesia. Te hinaaro ra ratou i te mea hau, te hoê mea o te faanavenave ia ratou iho, o te faateitei ia ratou e o te tuu atu ia ratou i roto i te pǔpǔ o te mau philosopho no teie nei ao, e te hinaaro ra ratou e haaviivii e e faaamahamaha i te amuiraa Kerisetiano ia manuïa ta ratou mau fa miimii. Te haafaufaa ra Ioane i te au-maite-raa i roto i te amuiraa o te vai noa i roto i te here e te haapiiraa tia ma te ati maite atu i te Metua e te Tamaiti. E tia atoa ia tatou ia haafaufaa i te tahoêraa o te amuiraa i teie mahana, a patoi atoa ˈi i te amuimui atu e te aroha ˈtu i tei taiva e tei turu i te hoê haapiiraa ê atu i tei noaa mai maoti te mau Papai faauruahia. Na roto i te tamau-noa-raa i te haere ia au i te mau faaueraa a te Atua, e ma te oaoa tia roa e itehia i roto i te hui taeae Kerisetiano mau, e nehenehe tatou e papu e ‘ei ia tatou te [maitai rahi], e te [aroha] hamani maitai, e te hau no ǒ mai i te Atua Metua ra, e no te Fatu ra hoi no Iesu Mesia, te Tamaiti a te Metua ra, i te parau mau e te [here].’ (Ir. 3; MN) Oia mau, te haapapu ra te piti o te rata a Ioane i te haamaitairaa o teie tahoêraa Kerisetiano.
[Nota i raro i te api]
^ Cyclopedia a McClintock e Strong, nenei-faahou-raa no 1981, buka IV, api 955.
^ New Bible Dictionary, piti o te neneiraa, 1986, neneihia e J. D. Douglas, api 605.
[Uiraa haapiiraa]
