Pene 132

I te rima atau o te Atua

UA RIRO te niniiraahia mai te varua moˈa i te Penetekose ei tapao haapapuraa e ua hoˈi atu o Iesu i roto i te raˈi. Ua haapapu atoa te orama ta te pǐpǐ ra o Setephano i fanaˈo i muri noa ˈˈe e ua tapae Oia i reira. Na mua noa ˈˈe i to ˈna pehiraahia i te ofai no ta ˈna faaiteraa taiva ore, ua pii hua ˈtura o Setephano e: “Inaha, te ite atura vau i te raˈi ua vevetehia, e te Tamaiti a te taata i te tiaraa i te rima atau o te Atua ra.”

I te rima atau o te Atua, te tiai noa ra o Iesu i te faaueraa a to ˈna Metua ra: “E arii hoi oe i rotopu i to mau enemi ra.” I roto râ i taua area taime ra, e tae roa ˈtu i te taime oia e haere ai e aro i to ˈna mau enemi, eaha ta Iesu e rave? E faatere oia, aore ra e mana oia, i nia i ta ˈna mau pǐpǐ faatavaihia, ma te aratai ia ratou i roto i ta ratou ohipa pororaa e ma te faaineine ia ratou ia riro, na roto i te tia-faahou-raa, ei mau arii e apiti ia ˈna i roto i te Basileia o to ˈna Metua.

Ei hiˈoraa, ua maiti o Iesu ia Saulo (tei matauhia i muri iho i raro aˈe i to ˈna iˈoa roma, o Paulo) o te rave i te upoo i roto i te ohipa faariroraa i te taata ei pǐpǐ i roto i te mau fenua ěê. E itoito rahi to Saulo no te Ture a te Atua, teie râ, ua aratai-hape-hia oia e te mau raatira faaroo ati Iuda. No reira, eita noa o Saulo i mauruuru i te taparahiraa o Setephano, teie râ, ua haere roa ˈtu oia i Damaseko ma te parau faatia a te tahuˈa teitei ra o Kaiapha no te haru mai e no te faahoˈi mai i Ierusalema i te mau tane e te mau vahine tei riro ei pǐpǐ na Iesu tei itea mai ia ˈna. Teie râ, i nia i te purumu, ua ati ihora o Saulo i te maramarama anaana taue e ua mairi ihora oia i raro i te repo.

Ua ani maira te hoê reo no ǒ mai i te hoê vahi itea-ore-hia e: “E Saulo, e Saulo, eaha oe i hamani ino mai ai ia ˈu?” Ua ani atura o Saulo e: “E te Fatu, o vai oe?”

Ua na ô maira te reo e: “O vau o Iesu, ta oe i hamani ino mai nei.”

Ua faaue atura o Iesu ia Saulo, tei matapo roa i taua maramarama semeio ra, ia haere i Damaseko e ia tiai i te parau e faaitehia mai. I reira, ua fa maira o Iesu ia Anania, te hoê o ta ˈna mau pǐpǐ, na roto i te hoê orama. No nia ia Saulo, ua parau atura o Iesu ia Anania e: “E farii maitihia hoi oia na ˈu, ei hopoi i tau iˈoa i mua i te aro o te mau Etene ra, e i te hui arii ra, e i te tamarii hoi a Iseraela ra.”

Oia mau, maoti te turu a Iesu, ua ite o Saulo (tei piihia o Paulo i teie nei) e te tahi atu feia poro evanelia i te manuïa rahi i roto i ta ratou ohipa pororaa e ta ratou ohipa haapiiraa. Inaha, fatata e 25 matahiti i muri aˈe i te faraa mai o Iesu ia ˈna i nia i te purumu no Damaseko, ua papai o Paulo e ua “faaite-haere-hia [te evanelia] i te taata atoa i raro aˈe i teie nei raˈi.”

E rave rahi matahiti i mairi i muri iho, ua horoa maira o Iesu i te tahi mau orama i ta ˈna aposetolo here ra, o Ioane. Na roto i te ravea o teie mau orama ta Ioane i faataa i roto i te buka bibilia o te Apokalupo, ua ora oia no te ite i te hoˈiraa mai o Iesu i roto i te mana o te Basileia. Ua faaite o Ioane e, ‘maoti te varua,’ ua hopoihia oia e tae roa ˈtu i “te mahana o te Fatu ra.” Eaha taua “mahana” ra?

E faaite mai te hoê tuatapapa-maite-raa o te mau parau tohu a te Bibilia, e oia atoa te parau tohu a Iesu iho no nia i te mau mahana hopea, e ua haamata teie “mahana o te Fatu” i te matahiti faufaa mau o 1914 ra, oia mau, i roto i teie nei ui! Tei te matahiti 1914 ïa to Iesu hoˈiraa mai ma te itea-ore-hia e te mata taata nei, ma te ore e faaatutu i te parau i mua i te taata e o ta ˈna mau tavini haapao maitai anaˈe o tei ara i to ˈna hoˈiraa mai. I taua matahiti ra to Iehova faaueraa ˈtu ia Iesu ia haere e arii i rotopu i to ˈna mau enemi ra!

Ma te auraro i te faaueraa a to ˈna Metua, ua tamâ ihora o Iesu i te mau raˈi na roto i te tiahiraa ia Satani e ta ˈna mau demoni, ma te huri mai ia ratou i nia i te fenua nei. I muri aˈe i to ˈna iteraa i teie ohipa i te tupuraa i roto i te hoê orama, ua faaroo atura o Ioane i te hoê reo no te raˈi maira i te na ôraa e: “Teie mai nei te ora, e te puai, e te basileia o to tatou Atua, e te mana o ta ˈna ra Mesia.” Oia mau, ua haamata te Mesia i te faatere ei Arii i te matahiti 1914 ra!

Auê ïa parau apî oaoa e no te feia haamori atoa ia Iehova i nia i te raˈi ra! Te faaitoitohia ra ratou e: “A oaoa, e te mau raˈi ra e, e o outou atoa hoi o tei parahi i reira ra.” Eaha râ no te feia i nia i te fenua ra? Ua na ô faahou aˈera te reo no te raˈi mai e: “E ati ra hoi to te fenua e to te tai, tei raro atu na hoi te diabolo ia outou na; e riri rahi hoi to ˈna, no te mea ua ite oia e maa taime poto to ˈna e toe nei.”

Tei roto tatou i taua area taime poto ra i teie nei. Te faataa-ê-hia nei te mau taata no te tomo atu i roto i te ao apî a te Atua aore ra no te haamouraa. I te parau mau ra, e faataahia e e haere tatou ihea, ia au i to tatou huru fariiraa i te parau apî maitai o te Basileia o te Atua e porohia nei na nia i te fenua atoa nei i raro aˈe i te mana o te Mesia.

Ia oti anaˈe te taata i te faataa-ê-hia, e ohipa o Iesu Mesia ei Mauhaa na te Atua no te faatiamâ i te fenua nei i te faanahoraa taatoa o te mau mea a Satani e te feia atoa e turu nei i te reira. E faatupu o Iesu i teie haamouraa o te mau mea iino atoa na roto i te tamaˈi tei parauhia i roto i te Bibilia o Aramagedo. I muri iho, e haru o Iesu, te Taata teitei roa ˈˈe i roto i te ao taatoa nei i muri aˈe i te Atua ra o Iehova iho, ia Satani e ta ˈna mau demoni e e ruuruu oia ia ratou no te hoê tausani matahiti i roto i te “abuso,” oia hoi te ohipa-ore-raa mai te pohe ra te huru. Ohipa 7:55-60; 8:1-3; 9:1-19; 16:6-10; Salamo 110:1, 2; Hebera 10:12, 13; Petero 1, 3:22; Luka 22:28-30; Kolosa 1:13, 23; Apokalupo 1:1, 10; 12:7-12; 16:14-16; 20:1-3; Mataio 24:14; 25:31-33.

▪ I muri aˈe i to Iesu maueraa i nia i te raˈi, teihea roa ˈtura o ˈna, e eaha ta ˈna e tiai ra?

▪ Ua faatere mai o Iesu i nia ia vai i muri aˈe i to ˈna maueraa i nia i te raˈi, e mea nafea ta ˈna faatereraa i te iteraahia?

▪ Afea râ to “te mahana o te Fatu” haamataraa, e eaha te ohipa i tupu i te haamataraa o teie mahana?

▪ Eaha te ohipa faataa-ê-raa e ravehia nei i teie mahana o te ohipa i nia ia tatou tataitahi, e te faataa-ê-hia nei te taata ia au i teihea niu?

▪ Ia oti anaˈe te ohipa faataa-ê-raa, eaha te mau ohipa e tupu i muri iho?