Pene 56

Na te aha e haaviivii i te hoê taata

TE PUAI noa ˈtura te patoiraa e farereihia ra e Iesu. E rave rahi o ta ˈna mau pǐpǐ o tei faarue ia ˈna, eiaha noa râ te reira, i Iudea, ua hinaaro te mau ati Iuda e haapohe ia ˈna, mai te taime a faaea ˈi oia i Ierusalema, a tupu ai te Pasa o te matahiti 31.

I teie nei, ua tupu te Pasa o te matahiti 32. Peneiaˈe, ia au i te faaueraa a te Atua, ua haere o Iesu i Ierusalema no taua oroa ra. Tera râ, ua haapao maitai oia no te mea ua haamǎtaˈuhia to ˈna ora. I muri aˈe, ua hoˈi aˈera oia i Galilea.

Peneiaˈe e tei Kaperenaumi o Iesu a haere mai ai te mau Pharisea e te mau papai parau ia ˈna ra. Ua imi aˈera ratou i te mau tumu no te pari ia ˈna i te taivaraa i te pae faaroo. “Eaha ta oe nei mau pǐpǐ i faahapa ˈi i te parau a te feia tahito ra?” ta ratou i ani atu ia ˈna. “Aore hoi ratou e horoi i to ratou rima ia amu i te maa.” E ere teie mau parau i te hoê faaheporaa a te Atua, no te mau Pharisea râ, e hara ino roa ïa ia ore e haapao i te peu horoiraa i te rima, e tae roa i te poro rima, hou a amu ai i te maa.

Maoti i te pahono atu i ta ratou faahaparaa, ua parau aˈera o Iesu ia ratou e te ofati nei ratou i te ture a te Atua ma te hinaaro mau. Ua parau aˈera oia e: “Eaha hoi outou iho na i faahapa ˈi i te ture a te Atua i ta outou na tutuu? Ua parau mai hoi te Atua, na ô maira, E faatura i to metua tane e to metua vahine; e O tei faaino i te metua tane e te metua vahine, ia pohe mau ïa oia. Te parau na râ outou e, O te parau atu i tana metua tane e tana metua vahine, Ia moˈa te mau mea atoa na ˈu nei e faufaahia ˈi oe na; eiaha oia e faatura ˈtu i tana metua tane e tana metua vahine i reira.”

Oia mau, ua haapii te mau Pharisea e, te moni, te mau taoˈa aore ra te tahi atu mea i pûpûhia ei taoˈa na te Atua, no te hiero ïa te reira, e eita e nehenehe e ravehia no te tahi atu faaohiparaa. Teie râ, o te taata pûpû noâ, te fatu o te ô i pûpûhia. E nehenehe ïa te hoê tamaiti e ore e haapao faahou i ta ˈna hopoia no te tauturu i to ˈna nau metua tei paari, tei roto paha i te hoê huru tupuraa fifi mau, ma te parau-noa-raa e “Ia Korebana” ta ˈna moni aore ra ta ˈna mau taoˈa, oia hoi te hoê ô tei pûpûhia na te Atua aore ra na te hiero.

No to ˈna inoino, ma te tano hoi, i te huru tia ore roa i ravehia e te mau Pharisea no te taviri i te ture a te Atua, ua parau aˈera o Iesu ia ratou e: “Ua na reira outou i te faaore i te ture a te Atua i ta outou na tutuu. E te mau haavare e, te au maite na outou i ta Isaia i parau ia outou na, a na ô ai ra, Te ati mai nei teie nei feia ia ˈu i to ratou vaha, e te faatura mai nei ia ˈu i to ratou utu; tei te atea ê râ to ratou aau ia ˈu. E mea faufaa ore râ ta ratou e pure ia ˈu nei, a haapii ai i tei tuuhia mai e te taata anaˈe ra.”

Peneiaˈe e ua faaatea ˈtu te feia rahi ia nehenehe te mau Pharisea e uiui ia Iesu. No te mea hoi e aita te mau Pharisea i taa e nafea ia pahono i te aˈoraa etaeta ta Iesu i faatae atu ia ratou ra, ua ani aˈera oia i te feia rahi ia tapiri mai. Ua na ô atura e: “A faaroo mai, ia ite. E ere hoi tei ô atu i roto i te vaha i te mea e viivii ai te taata, o tei na roto mai râ i te vaha ra, e viivii ïa te taata i te reira.”

I muri aˈe, a tomo ai ratou i roto i te hoê fare, ua ani aˈera ta ˈna mau pǐpǐ ia ˈna e: “Te ite atura oe e ua riri te mau Pharisea i te faarooraa i taua parau nei?”

Ua pahono atura Iesu e: “O te mau raau atoa aore i tanuhia e tau Metua i te ao ra, e ihipapahia ïa. E vaiiho noa ˈtu, e matapo aratai matapo ïa; e ia aratai te matapo i te matapo ra, e hiˈa apipiti ïa i roto i te pouohu.”

E au ra e ua maere o Iesu, a ani ai o Petero ia ˈna, na nia i te iˈoa o te mau pǐpǐ, i te hoê haamaramaramaraa no nia i te mea o te haaviivii i te hoê taata. “Te vai ite ore atoa na outou?” ta ˈna ïa i pahono atu. “Aitâ outou i ite e o te ô atu i te vaha ra e tae ïa i te opu? e faaruehia ˈtura i rapae? Area ta te vaha e haapuai mai, no roto mai ïa i te aau, o te mea ïa e viivii ai te taata. No roto mai hoi i te aau te manaˈo iino, te taparahi taata, e te faaturi, te poreneia, e te eiâ, te haavare, e te faaino. O te mau mea ïa e viivii ai te taata; area te amu noa ma te rima horoi-ore-hia ra, e ore te taata e viivii i te reira.”

Aita o Iesu e haafaufaa ore ra i te parau no te vai-mâ-raa o te tino tei matauhia i te rave. Aita oia e hinaaro ra e parau e eiaha e horoi i te rima hou a faaineine ai aore ra a amu ai i te maa. Aita; ua faahapa râ oia i te haavarevare a te feia faatere i te pae faaroo, o tei tamata i te taui i te mau ture tia a te Atua ma te onoonoraa i nia i te mau tutuu aita i niuhia i nia i te mau Papai. Na te mau ohipa iino e haaviivii i te hoê taata, e ua faataa o Iesu e no ǒ mai te reira i te mafatu ra. Ioane 7:1; Deuteronomi 16:16; Mataio 15:1-20; Mareko 7:1-23; Exodo 20:12; 21:17; Isaia 29:13.

▪ Eaha te patoiraa ta Iesu e farerei ra i teie nei?

▪ Eaha ta te mau Pharisea e faahapa ra ia Iesu, tera râ, ia au i ta ˈna parau, mea nafea ratou e ofati ai i te ture a te Atua ma te hinaaro mau?

▪ Ia au i te parau a Iesu, eaha te mau mea e haaviivii i te hoê taata?