Pene 30

Te pahonoraa ˈtu i te feia faahapa

I TO te mau upoo faatere haapaoraa ati Iuda faahaparaa ia Iesu no te mea aita oia i haapao i te mahana Sabati, ua pahono atura oia e: “Te ohipa noa nei â tau Metua, e ohipa atoa hoi au.”

Noa ˈtu te parau a te mau Pharisea, aita roa te ohipa a Iesu i opanihia e te ture o te Sabati. Na te Atua iho i horoa mai i te ohipa pororaa e te ohipa faaoraraa i te maˈi, e mai te Atua atoa, ua tamau noâ o Iesu i te ohipa i te mau mahana atoa. Ua riri roa ˈturâ te mau ati Iuda i ta ˈna pahonoraa, e ua imi aˈera ratou e taparahi ia ˈna. No te aha?

No te mea i teie nei, aita noa ratou e manaˈo ra e te ofati ra o Iesu i te Sabati, te parau atoa ra râ ratou e te faahiti ra oia i te parau faaino i te na ôraa e e Tamaiti oia na te Atua. Teie râ, aita o Iesu i mǎtaˈu e ua pahono atura ia ratou no nia i to ˈna mau auraa faufaa roa e te Atua. Ua na ô atura oia e: “E here â hoi te Metua i te Tamaiti, e faaite mai â hoi ia ˈna i te mau mea atoa ta ˈna iho e rave ra.”

Te na ô faahou ra o Iesu e: ‘Mai te Metua e faatia mai i tei pohe ra, e faaora atoa te Tamaiti i ta ˈna i hinaaro.’ Oia mau, ua faaora ê na hoi te Tamaiti i tei pohe i te pae varua! ‘O tei ite i ta ˈu parau e ua faaroo ia ˈna i tei tono mai ia ˈu nei,’ o ta Iesu e parau ra, ‘mai te pohe mai ïa e ora ˈtu ai.’ E te parau râ oia e: “Ua fatata e teie nei â te hora e faaroo ai tei pohe i te reo o te Tamaiti a te Atua, e tei faaroo ra, e orâ ïa.”

Noa ˈtu e aitâ o Iesu i faatia aˈenei i te taata mai te pohe maira, te faataa ra oia i te feia e faahapa maira ia ˈna e e tupu mau â te hoê tia-faahou-raa mai te reira te huru. “Eiaha e maere i te reira;” o ta ˈna ïa e parau ra, “te fatata mai nei hoi te hora e faaroo ai te feia atoa i roto i te apoo ra i tana reo e e haere mai i rapae.”

E tae roa mai i teie nei, e au ra e aitâ o Iesu i haapapu aˈenei i mua i te taata i to ˈna tiaraa faufaa roa i roto i te opuaraa a te Atua. Tera râ, te vai ra i te feia faahapa ia Iesu i te tahi haapapuraa hau atu i ta Iesu iho no nia i teie mau ohipa. Inaha, ua faahaamanaˈo atu o Iesu ia ratou e: “Outou iho hoi tei tono i te vea ia Ioane ra, e ua faaite mai oia i te parau mau.”

E piti noa matahiti na mua ˈtu, ua parau atu o Ioane Bapetizo i teie mau upoo faatere haapaoraa ati Iuda no nia i te Taata e haere mai i muri aˈe ia ˈna. Ma te faahaamanaˈo atu e i mutaa ihora mea faahiahia roa na ratou ia Ioane tei tapeahia hoi i roto i te fare tapearaa i teie nei, ua na ô atura Iesu e: “E i oaoa poto noa ˈtura outou i to ˈna maramarama.” Te faahaamanaˈo atura Iesu ia ratou ma te tiaturi e e nehenehe te reira e tauturu ia ratou, oia mau e faaora ia ratou. Teie râ, eita o ˈna e niu ia ˈna iho i nia i te faaiteraa a Ioane.

“O taua mau ohipa ra ta ˈu e rave nei [e oia atoa te semeio o ta ˈna i rave iho nei], o te faatia mai ïa ia ˈu e na te Metua vau i tono mai.” Hau atu, te na ô râ oia e: “O te Metua hoi i tono mai ia ˈu nei, ua faatia mai oia iho ia ˈu.” Ua faatia te Atua ia Iesu, ei hiˈoraa, i to ˈna bapetizoraahia, i te na ôraa mai e: “Ta ˈu Tamaiti here teie.”

Oia mau, aita roa ˈtu e hororaa to te feia faahapa ia Iesu no te ore e farii ia ˈna. Te haapapu ra te mau Papai iho, ta ratou hoi e parau ra e te heheu ra ratou, ia Iesu! Ua faaoti ihora o Iesu i te na ôraa e: “Ahiri hoi outou i faaroo ia Mose, ua faaroo mai ïa outou ia ˈu, i papai hoi oia i te parau no ˈu. Aore outou i faaroo i ta ˈna i papai ra, eaha atoa outou e faaroo mai ai i ta ˈu parau?” Ioane 5:17-47; 1:19-27; Mataio 3:17.

▪ No te aha aita te ohipa a Iesu e ofati ra i te Sabati?

▪ Mea nafea to Iesu faataaraa mai i to ˈna tiaraa faufaa roa i roto i te opuaraa a te Atua?

▪ Ei haapapuraa e o ˈna te Tamaiti a te Atua, ua faahiti o Iesu i te faaiteraa a vai?