Ua fanauhia vau i Székesfehérvár i Honegeria, te hoê oire tei î i te aamu tei tupu i te roaraa 1000 matahiti. Tera râ, te haamanaˈo noa ra vau i te mau tapao tuino ta te piti o te Tamaˈi rahi i vaiiho mai.

Na te mau metua o to ˈu mama i aupuru ia ˈu i to ˈu tamarii-rii-raa. Te haamanaˈo maitai ra vau ia raua, to ˈu iho â râ mama ruau Elisabeth. Na ˈna i turai ia ˈu ia tiaturi i te Atua. I te toruraa o to ˈu matahiti, ua tamau noa vau i te faahiti na muri ia ˈna i te mau po atoa te Pure a te Fatu. I te 20raa râ o to ˈu matahiti i taa ˈi ia ˈu te auraa o teie pure.

Na raua i haapao ia ˈu no te mea te ohipa ra to ˈu na metua i te po e te ao ia pue te moni no te hoo mai i te hoê fare maitai no matou. I te mau piti hebedoma atoa, i te Mahana maa, e farerei te utuafare taatoa no te tamaa. Mea au roa na ˈu tera mau taime e amuimui ai matou.

I 1958, ua tupu te opuaraa a to ˈu na metua, ua nehenehe raua e hoo mai i te hoê fare no matou tootoru. Ua ora ïa vau e to ˈu na metua. Auê te oaoa! Ono râ avaˈe i muri aˈe, ua ore taue tera oaoa. Ua pohe to ˈu papa i te mariri ai taata.

Ua oti roa vau. Te haamanaˈo ra vau i ta ˈu pure: “Te Atua, ua taparu vau ia oe ia faaora i to ˈu papa. Te mihi nei au ia ˈna. No te aha aita oe i pahono i ta ˈu mau pure? E hinaaro hoi au e ite teihea to ˈu papa. Tei nia anei oia i te raˈi aore ra ua ore roa to ˈna parau?” Ua faahinaaro vau i te tahi atu mau tamarii e papa noa â to ratou.

E rave rahi matahiti, ua haere noa vau i te vahi hunaraa fatata i te mau mahana atoa. Pinepine au i te tuturi i nia i te menema o to ˈu papa no te pure: “E e te Atua e, te hinaaro nei au e ite teihea to ˈu papa.” Ua ani atoa vau i te tauturu no te taa i te tumu o te oraraa.

I te 13raa o to ˈu matahiti, ua faaoti au e haapii i te reo Heremani. Ua manaˈo vau e noaa ia ˈu te mau pahonoraa i ta ˈu mau uiraa i roto i te buka Heremani e rave rahi. I 1967, ua haamata vau i te haapii i te oire o Jena, i Heremani i hitia o te râ. Ua taio vau ma te feruri maite i te mau buka a te mau philosopho no ǒ, no nia iho â râ i te oraraa o te taata. Noa ˈtu ua noaa ia ˈu te tahi mau manaˈo anaanatae, aita vau i mauruuru roa. Ua tamau noa vau i te pure ia noaa te pahonoraa.

I 1970, ua hoˈi au i Honegeria i reira to ˈu farereiraa ia Rose tei riro mai ei vahine na ˈu. I tera taime, tei raro aˈe Honegeria i te faatereraa Communiste. I muri iti noa ˈˈe to mâua faaipoiporaa, ua horo ê mâua Rose i Auteteria. Ta mâua fa, e haere ïa i Sydney, i Auteralia tei reira te taeae o to ˈu mama i te oraraa.

Ua noaa oioi ta ˈu ohipa i Auteteria. I te hoê mahana, ua parau mai te hoê hoa ohipa e noaa ia ˈu te mau pahonoraa i ta ˈu mau uiraa atoa i roto i te Bibilia. Ua horoa mai oia e piti buka no nia i te Bibilia. Ua taio vau i te reira ma te anaanatae mau e ua hinaaro vau e ite hau atu â. Ua papai ïa vau i te feia nenei i taua buka ra, te mau Ite no Iehova, no te ani e rave rahi atu â papai.

I te taio mahana o to mâua matahiti matamua faaipoiporaa, ua haere mai te hoê Ite no Iehova Auteteria apî e farerei ia mâua Rose. Ua afai mai oia i te papai ta ˈu i ani e ua pûpû mai oia i te hoê haapiiraa Bibilia o ta ˈu i farii. No to ˈu anaanatae, ua haapii matou piti taime te hebedoma, e maha hora te maoro te haapiiraa taitahi!

Ua oaoa vau i ta te mau Ite no Iehova i haapii mai ia ˈu i roto i te Bibilia. Aita vau i tiaturi oioi i to ratou faaiteraa mai i te iˈoa o te Atua, Iehova, i roto i ta ˈu Bibilia reo Honegeria. E 27 matahiti te maoro to ˈu haereraa i te fare pure, aita vau i faaroo noa ˈˈe i te iˈoa o te Atua i te faahitiraahia. Ua faahiahia vau i te mau pahonoraa maramarama e te tano a te Bibilia. Ua haapii au aita te feia pohe i ite i te tahi mea, mai te huru te taoto ra ratou. (Koheleta 9:5, 10; Ioane 11:11-15) Ua haapii atoa vau i te hoê parau fafau a te Bibilia no nia i te ao apî i reira “e ore roa te pohe.” (Apokalupo 21:3, 4) Te tiaturi nei au e farerei faahou i to ˈu papa no te mea i roto i tera ao apî e tia-faahou-raa to te feia pohe.—Ohipa 24:15.

Ma te anaanatae, ua apee mai Rose ia ˈu i roto i te haapiiraa Bibilia. Ua haere oioi mâua i mua. Ua hope te buka haapiiraa i roto e piti noa avaˈe. Ua apiti na mâua i te mau putuputuraa atoa a te mau Ite no Iehova i te Piha a te Basileia. Ua putapû roa mâua i te here, te hamani maitai e te auhoêraa e vai ra i rotopu i te mau Ite no Iehova.—Ioane 13:34, 35.

I 1976, ua fariihia mâua Rose ia faaea i Auteralia. Ua imi oioi mâua i te mau Ite no Iehova o tera vahi. Ua farii-maitai-hia mâua. I 1978, ua riro mâua ei Ite no Iehova.

Ua itehia ia ˈu te mau pahonoraa o te mau uiraa o tei haapeapea ia ˈu e rave rahi matahiti. I to ˈu faafatataraa ˈtu i te Atua ra o Iehova, ua fanaˈo atoa vau i te Papa maitai roa ˈˈe. (Iakobo 4:8) E ua riro to ˈu tiaturiraa e ite faahou i to ˈu papa fanau i roto i te ao apî ei tautooraa rahi no ˈu.—Ioane 5:28, 29.

I 1989, ua faaoti mâua Rose i te hoˈi i Honegeria ia nehenehe mâua e faaite i to mâua tiaturiraa i te mau hoa e fetii, oia atoa i te tahi atu ta mâua e farerei. E fanaˈoraa taa ê to mâua i te haapii tau hanere taata i te Bibilia. Ua hau i te 70 o ratou, oia atoa to ˈu mama here, tei apee mai ia mâua no te tavini ia Iehova.

Ahuru ma hitu matahiti to ˈu pureraa no te ite i te pahonoraa i ta ˈu mau uiraa. Toru ahuru ma iva matahiti tei mairi e te tamau nei â vau i te pure no te parau i teie nei: “Mauruuru to ˈu Papa î i te here i te raˈi i te pahonoraa i ta ˈu mau pure o to ˈu tamarii-rii-raa.”