1, 2. Eaha te mau mea maere mau ta Elia i ite i te roaraa o to ˈna oraraa? Eaha râ te mau ohipa faahiahia roa ta ˈna i ite mai roto mai i te ana i nia i te mouˈa Horeba?

 UA ITE Elia i te mau mea maere mau i te roaraa o to ˈna oraraa. Ua ite oia i te mau oreba i te hopoiraa mai i te maa na ˈna e piti taime i te mahana a tapuni ai oia. Ua ite oia e piti farii i te î-noa-raa i te faraoa ota e te hinu noa ˈtu te maoro o te oˈe. Ua ite atoa oia i te auahi i te mairiraa mai nia mai i te raˈi ei pahonoraa i ta ˈna pure. (Te mau arii 1, pene 17 e 18) Teie râ, aita â Elia i ite aˈenei i te tahi mea maere mai teie.

² A tia ˈi oia i roto i te hoê ana i nia i te mouˈa Horeba, ua ite oia i te tahi mau mea faahiahia roa. Ua faaroo oia i te hoê mataˈi puai e parari aˈera te mau mouˈa e te mau mato, tupu ihora te hoê aueueraa fenua rahi mau. I muri iho, e âhu rahi tei tupu i te na muaraa mai te hoê auahi rahi ia Elia.​—Te mau arii 1, 19:8-12.

3. Eaha te huru maitai o Iehova ta Elia i ite e ihea tatou e ite ai i te haapapuraa o te reira?

³ Ua faaite teie mau ohipa atoa ta Elia i ite i te puai rahi mau o te Atua ra o Iehova. Parau mau, aita e faufaa ia ite roa ˈtu tatou i te semeio no te taa e puai rahi to te Atua. E ite-papu-hia hoi “to ˈna puai mure ore e o ˈna iho â te Atua” na roto i te mau mea atoa ta ˈna i poiete. (Roma 1:20) A feruri noa na ia hoˈa te uira e ia haruru puai te patiri aore ra i te nehenehe e te puai o te toparaa pape aore ra i te rahi o te mau fetia i te raˈi! Aita anei oe e ite ra i te puai rahi o te Atua na roto i teie mau mea atoa? Teie râ, mea iti roa te taata i teie mahana o te farii nei e puai rahi to te Atua. Mea iti atoa o te taa ra no te aha tatou e  faahiahia ˈi i te reira. I roto i to mua ˈtu mau pene, e hiˈopoa maite tatou i teie huru maitai o Iehova e e haapii atoa tatou no te aha mea faufaa ia faafatata ˈtu ia ˈna.

4, 5. (1) Eaha ta te Bibilia e parau ra no nia i te iˈoa o Iehova? (2) No te aha mea tano ia faahohoˈahia te puai o Iehova i te puaatoro oni?

⁴ Aita hoê aˈe mai ia Iehova te puai. Te na ô ra te Ieremia 10:6: “Aita hoê aˈe mai ia oe, e Iehova. E Atua rahi oe, e e iˈoa rahi to oe e te puai.” A tapao na te parauhia ra e iˈoa rahi to Iehova e te puai. A haamanaˈo “Na ˈna e faariro” te auraa o teie iˈoa. No te aha Iehova e nehenehe ai e hamani i te mau mea atoa e e faariro ia ˈna mai ta ˈna atoa e hinaaro? A tahi, no to ˈna puai rahi. Aita e otia to te puai o Iehova, e nehenehe o ˈna e rave i te mea ta ˈna e hinaaro e rave, e tera hoê o to ˈna mau huru maitatai faahiahia.

⁵ No te tauturu ia tatou ia taa i te faito o to ˈna puai, e faaohipa Iehova i te faahohoˈaraa. Mai ta tatou i ite mai, e rave oia i te puaatoro oni no te faahohoˈa i to ˈna puai. (Ezekiela 1:4-10) Mea tano maitai te reira, e animara rahi e te puai hoi te puaatoro. I tahito, ua ite to Paretetina i te hoê puaatoro puai roa parauhia aurochs, ua mou râ i teie mahana. (Ioba 39:9-12) I te hoê taime, ua faataa te faatere Roma ra o Jules César fatata hoê â rahi to teie puaatoro oni e to te elephani. Ua papai oia: “Mea puai roa e mea vitiviti atoa ratou.” No to oe nainai, e riaria roa paha oe i te faafatata ˈtu i teie animara!

6. No te aha o Iehova anaˈe te parauhia “te Manahope?”

⁶ Oia mau, mea haihai roa te taata ia faaauhia i te Atua puai ra o Iehova. I mua ia ˈna, e au te mau nunaa puai i te huˈa repo i nia i te faito ra. (Isaia 40:15) Mea papu, e  puai otia ore to Iehova, o ˈna anaˈe hoi te parauhia “te Manahope.” a (Apokalupo 15:3) E “mana rahi mau” to Iehova e e “puai faahiahia” atoa to ˈna (Isaia 40:26) Eita to ˈna puai e iti mai aore ra e pau. Eita te hoê e horoa ˈtu i te puai no te mea “na te Atua te puai.” (Salamo 62:11) E nafea râ Iehova ia faaohipa i to ˈna puai?

7. Eaha te varua moˈa o Iehova? I roto i te Bibilia, eaha te auraa o te taˈo “varua” na roto i te reo Hebera e Heleni?

⁷ Aita e otia to te varua moˈa o Iehova. Mai ta te Genese 1:2 e parau ra, o “te puai ohipa” te reira o te Atua. E nehenehe na taˈo Hebera e Heleni no te parau “varua” e hurihia i te tahi taime ei “mataˈi” e ei “aho.” Ia au i te mau aivanaa, e matara mai te manaˈo o te hoê puai ohipa ite-ore-hia. Mai te mataˈi, eita te varua o te Atua e itehia e to tatou mata, na te mau ohipa râ ta te varua moˈa e faatupu e haapapu mea mau te reira.

8. I roto i te Bibilia, e faahohoˈahia te varua o te Atua i te aha e no te aha mea tano?

⁸ E nehenehe Iehova e faaohipa i te varua moˈa no te faatupu i te ohipa e rave rau ia tupu te opuaraa atoa ta ˈna e manaˈo ra. No reira te Bibilia e faahohoˈa ˈi i te varua moˈa o te Atua i to ˈna “manimani rima,” to ˈna “rima puai” e to ˈna “rima faatorohia.” (Luka 11:20; Deuteronomi 5:15; Salamo 8:3) Mai te hoê taata o te faaohipa i to ˈna rima no te rave i te ohipa e rave rau, e nehenehe atoa ta te Atua e faaohipa i to ˈna varua no te faatupu i te mau mea ta ˈna e opua ra mai te poieteraa i te mau mea huˈa roa, te vahiraa i te miti Uteute aore ra te haaparaparauraa i te mau Kerisetiano matamua na roto i te mau reo ěê.

9. E nafea ˈtu â Iehova ia faaohipa i to ˈna puai?

 ⁹ E faaohipa atoa Iehova i to ˈna puai a faatere ai i te ao taatoa. A feruri na, e titauhia te puai rahi no te faatere e mirioni e e mirioni tavini o tei ineine noa i te haapao i te faaueraa! Ia au i te Bibilia, e “nuu rahi” tavini ta Iehova i nia i te fenua. (Salamo 68:11; 110:3) Tera râ, mea iti te puai o te hoê taata ia faaauhia i to te hoê melahi. Inaha, i to te nuu no Asura aroraa i te nunaa o te Atua, na te hoê noa melahi i haapohe 185 000 o taua mau faehau ra i te hoê noa po! (Te mau arii 2, 19:35) E “puai rahi” to te mau melahi a te Atua.​—Salamo 103:19, 20.

10. (1) No te aha te Manahope e parauhia ˈi, Iehova o te mau nuu? (2) O vai te mea puai aˈe i roto i te mau mea atoa i poietehia e Iehova?

¹⁰ Ehia rahiraa melahi te vai ra? Na roto i te hoê orama, ua ite te peropheta Daniela e rave rahi mirioni melahi i te raˈi i mua i te terono o Iehova, e ere râ te auraa ua ite oia i te taatoaraa o te mau melahi. (Daniela 7:10) Peneiaˈe e rave rahi atu â hanere mirioni melahi. No reira te Atua i parauhia ˈi, Iehova o te mau nuu. Te faataa ra teie tiaraa iˈoa e faatere o ˈna no te hoê nuu melahi puai rahi e te naho maitai. Ua maiti oia hoê raatira no te mau melahi atoa, oia hoi ta ˈna iho Tamaiti here, “te matahiapo o te mau mea atoa i poietehia.” (Kolosa 1:15) Ei melahi rahi, o Iesu te mea puai aˈe i te mau seraphi, te mau kerubi e te mau melahi atoa e i roto i te mau mea atoa i poietehia e Iehova.

11, 12. (1) E nafea te puai o te Parau a te Atua e ohipa ˈi? (2) Mea nafea to Iesu haapapuraa e puai rahi to Iehova?

¹¹ E faaohipa Iehova i to ˈna puai na roto i te tahi atu ravea. Te na ô ra te Hebera 4:12: “E mea ora hoi te parau a te Atua e te puai rahi.” Ua ite anei oe i te puai rahi o te Parau a te Atua? E haapuai te reira ia tatou, e patu i to tatou faaroo e e tauturu mai ia rave i te mau tauiraa rahi i roto i to tatou oraraa. Ua faaara te aposetolo Paulo i te  mau hoa faaroo no nia i te feia e haerea tia ore to ratou. Ua parau atu oia: “Mai te reira na hoi vetahi o outou.” (Korinetia 1, 6:9-11) Oia mau, ua ohipa te puai o “te parau a te Atua” i roto ia ratou e ua tauturu atu ia taui.

¹² No te rahi o to Iehova puai e te maitai o ta ˈna mau raveraa, eita te hoê noa ˈˈe mea e nehenehe e tapea ia ˈna. Ua parau Iesu: “I te Atua râ, e tia ïa te mau mea atoa.” (Mataio 19:26) No teihea mau opuaraa e faaohipa ˈi Iehova i to ˈna puai?

13, 14. (1) Noa ˈtu o Iehova te mea puai roa ˈˈe, no te aha eita o ˈna e haa ma te aroha ore? (2) E faaohipa Iehova i to ˈna puai no te rave i te aha?

¹³ O Iehova te mea puai roa ˈˈe, e ere râ te auraa e haa o ˈna ma te aroha ore. E faaohipa noa hoi Iehova i to ˈna puai ma te tano. E faaohipa râ oia i to ˈna puai no te rave i te aha?

¹⁴ Mai ta tatou e ite mai, e faaohipa te Atua i to ˈna puai no te poiete, no te haamou, no te paruru, no te hamani i te mau mea apî, oia hoi no te rave i te mau mea atoa ia au i ta ˈna mau opuaraa tia roa. (Isaia 46:10) I te tahi taime, e faaohipa Iehova i to ˈna puai no te haapii i te tahi mau tuhaa faufaa o to ˈna huru e ta ˈna mau ture aveia. Te mea faufaa roa ˈtu â, e faaohipa Iehova i to ˈna puai no te faatupu i to ˈna hinaaro, oia hoi ia moˈa to ˈna iˈoa na roto i ta ˈna Faatereraa arii e ia ite te taata atoa o ˈna te Arii hau ê. Aita roa ˈtu e mea o te nehenehe e tapea i ta ˈna opuaraa.

15. No te aha Iehova e faaohipa ˈi i to ˈna puai no ta ˈna mau tavini e mea nafea te reira i te iteraahia i roto i te tupuraa o Elia?

¹⁵ E faaohipa atoa Iehova i to ˈna puai no te maitai o ta ˈna mau tavini. A tapao na eaha ta te Paraleipomeno 2, 16:9 e parau ra: “Te hiˈo haere ra hoi to Iehova mata i te  fenua taatoa no te faaite i to ˈna puai no te feia ua tia te aau ia ˈna.” O te tupuraa o Elia te tahi hiˈoraa. Ua horeo te arii vahine ino ra o Iezebela e haapohe ia Elia. Ua horo ê, ua moˈemoˈe, ua riaria e ua paruparu te peropheta no to ˈna manaˈo mea faufaa ore te ohipa atoa ta ˈna i rave. I tera taime ua faaite Iehova i to ˈna puai rahi ia Elia. No te aha? No te tamahanahana ia Elia e no te haamanaˈo atu ma te faahiahia mau e Atua puai o ˈna. Ua faaite te mataˈi, te aueueraa fenua e te auahi e tei ia Elia ra te Manahope. Tei pihai iho te Atua Manahope ia ˈna, eaha ïa Elia e mǎtaˈu ai ia Iezebela?​—Te mau arii 1, 19:1-12. b

16. No te aha mea mahanahana ia ite e Atua puai rahi Iehova?

¹⁶ I teie mahana, eita Iehova e faatupu faahou i te mau semeio mai i te tau o Elia. (Korinetia 1, 13:8) Tera râ, te hinaaro noa ra oia e faaohipa i to ˈna puai no te feia e here ra ia ˈna. Parau mau, te parahi ra oia i roto i te raˈi, aita râ oia i atea ia tatou. Noa ˈtu to ˈna puai rahi, “tei pihai iho Iehova i te feia e tiaoro ra ia ˈna.” (Salamo 145:18) I te hoê taime, i to te peropheta Daniela aniraa i te tauturu ia Iehova, aita â i hope ta ˈna pure, ua tae ê mai na te melahi ia ˈna ra! (Daniela 9:20-23) Aita e mea e nehenehe e tapea ia Iehova ia tauturu e ia faaitoito i te feia ta ˈna e here ra.​—Salamo 118:6.

17. Mea tano anei ia mǎtaˈu tatou i te Atua no to ˈna puai rahi?

¹⁷ Mea tano anei ia mǎtaˈu tatou i te Atua no to ˈna puai rahi? E. Mai ta tatou i hiˈopoa i roto i te pene na mua ˈtu,  e faatupu tatou i tera mǎtaˈu no te mea te faahiahia e te faatura ra tatou i te Atua no to ˈna mau huru maitatai. Te parau mai ra te Bibilia: “Te mǎtaˈu ia Iehova, o te haamataraa ïa o te paari.” (Salamo 111:10) Eita râ tera mǎtaˈu e turai mai ia riaria i te Atua e eita atoa e tapea ia tatou ia faafatata ˈtu ia ˈna.

18. (1) No te aha te taata e rave rahi e ore ai e tiaturi i te feia mana? (2) E nafea tatou e ite ai eita roa Iehova e faaohipa hape i to ˈna mana?

¹⁸ I te matahiti 1887, ua papai te taata tuatapapa Lord Acton: “Ua fanaˈo anaˈe te taata i te tiaraa, ohie noa o ˈna i te rave i te ino. Rahi atu â o ˈna i te fanaˈo i te mana, rahi atu â o ˈna i te rave i te ino.” Ua faahiti-pinepine-hia ta ˈna parau, peneiaˈe no te mea mea rahi roa te taata o te ite ra e parau mau te reira. Ua itehia i te roaraa o te tau, pinepine te taata tia ore i te faaohipa hape i to ratou mana. (Koheleta 4:1; 8:9) No reira te taata e rave rahi e ore ai e tiaturi i te feia mana. E o Iehova te Atua Manahope, e faaohipa hape anei oia i te mana e vai ra ia ˈna? Eita roa! Mai ta tatou i ite mai, e Atua moˈa Iehova, eita roa oia e rave i te ino. E ere Iehova mai te mau tane e te mau vahine tia ore i roto i teie nei ao piˈo. Aita oia i faaohipa hape aˈenei i to ˈna mana e eita roa ˈtu oia e na reira.

19, 20. (1) E nafea Iehova ia faaohipa i to ˈna mana e no te aha mea mahanahana ia ite i te reira? (2) E nafea oe ia faataa e Atua Iehova o te haavî ia ˈna iho e no te aha mea faufaa ia ite i te reira?

¹⁹ A haamanaˈo, e ere noa Iehova i te Atua Manahope, e Atua parau-tia atoa râ, paari e te î i te here. E ite mai tatou i roto i te mau pene i muri nei, e faaohipa noa Iehova i to ˈna mana ma te parau-tia, ma te paari e ma te here. Hau atu â, e faaohipa atoa Iehova i to ˈna puai ma te haavî ia ˈna iho. Mea varavara tera huru maitai i te itehia i nia i te feia faatere o teie nei ao.

²⁰ A feruri na e farerei oe i te hoê taata rahi e te puai, e taiâ paha oe. I muri mai râ, e tapao oe mea mǎrû oia e ua  ineine atoa i te faaohipa i to ˈna mana no te tauturu e no te paruru i te taata, i te feia haihai iho â râ. Eita roa oia e faaohipa hape i to ˈna puai. Ia faainohia oia ma te tano ore, eita o ˈna e aueue, e faaea hau noa râ. Mai te peu e puai rahi to oe, e tia atoa anei ia oe ia faatupu i te mǎrû e ia haavî ia oe iho? A haamatau ai i teie taata, eita anei oe e hinaaro e riro ei hoa no ˈna? Mea rahi te tumu e hinaaro ai tatou e faafatata ˈtu i te Atua Manahope ra o Iehova. A feruri na i te irava no reira mai te upoo parau o teie pene: “Eita Iehova e riri oioi e e puai rahi to ˈna.” (Nahuma 1:3) Eita Iehova e faaohipa i to ˈna puai na roto i te riri, oia atoa i nia i te feia ino. Mea mǎrû oia e te maitai. “Eita Iehova e riri oioi” noa ˈtu mea rahi te ohipa ta te taata i rave tei haamauiui mau i to ˈna aau.​—Salamo 78:37-41.

21. No te aha Iehova e ore ai e faahepo i te taata ia rave i to ˈna hinaaro e eaha ta te reira e haapii mai no nia ia ˈna?

²¹ E nafea ia papu atu â e Atua Iehova o te haavî ia ˈna iho? Mai te peu e mana rahi to oe, eita anei oe e tamata i te tahi taime i te faahepo i te taata ia rave i to oe hinaaro? Teie nei, a feruri na ia Iehova. Noa ˈtu to ˈna mana rahi,  eita Iehova e faahepo i te taata ia tavini ia ˈna. Noa ˈtu e nehenehe ratou e fanaˈo i te ora mure ore, eita Iehova e faahepo atu ia tavini ia ˈna. E faatura oia i te tiamâraa o te taata tataitahi. E faaara Iehova eaha te mau faahopearaa ino aore ra maitai o ta tatou mau faaotiraa. I muri iho râ, na tatou iho e faaoti. (Deuteronomi 30:19, 20) Eita roa Iehova e mauruuru i te hoê taviniraa ravehia ma te faahepohia aore ra ma te riaria. E imi oia i te feia o te tavini ia ˈna ma te aau tae e te here.​—Korinetia 2, 9:7.

22, 23. (1) E oaoa Iehova i te horoa i te aha? (2) Eaha ta tatou e hiˈopoa i roto i te pene i muri nei?

²² E hiˈo anaˈe i te tahi atu tumu e ore ai tatou e riaria i te Atua Manahope. E taiâ te feia faatere i te horoa i te mana, aore ra i te puai, no vetahi ê. Area o Iehova, e oaoa o ˈna i te horoa i te mana e te hopoia rahi i ta ˈna mau tavini taiva ore mai ta ˈna Tamaiti ra o Iesu. (Mataio 28:18) Eaha ˈtu â ta Iehova e horoa i ta ˈna mau tavini? Te faataa ra te Bibilia: “E Iehova, na oe te mana, te puai rahi, te nehenehe, te hanahana e te teitei, na oe hoi te mau mea atoa i nia i te raˈi e i nia i te fenua. . . . Tei roto i to rima te mana e te puai no te faariro i te taata ei taata rahi e no te horoa i te puai i te taatoaraa.”​—Paraleipomeno 1, 29:11, 12.

²³ Oia, e oaoa Iehova i te horoa i te puai no oe. E horoa atoa oia i “te puai o te hau ê i to te taata nei” i te feia e hinaaro e tavini ia ˈna. (Korinetia 2, 4:7) Eita anei oe e hinaaro e faafatata i teie Atua Manahope o te faaohipa i to ˈna puai ma te here e te parau-tia? I roto i te pene i muri nei, e hiˈopoa maite tatou e nafea Iehova e faaohipa ˈi i to ˈna puai no te poiete.