1-3. (a) Mai pohe roa te utuafare o Abigaila, eaha te tumu? (b) Eaha ta tatou e haapii mai no nia i teie vahine faahiahia mau?

 A HIˈO ai Abigaila i te mata o te taata apî ra, e riaria ta ˈna e ite ra. Eaha e ore ai, e 400 faehau te haere mai ra no te haapohe pauroa te tane o te utuafare o Nabala, te tane a Abigaila. Eaha te tumu?

² No Nabala te hape. Ua haa oia ma te aroha ore e te faatura ore. Mai tera iho â o ˈna. Te taata râ ta ˈna i tuhi, o te raatira herehia ïa o te hoê pǔpǔ faehau taiva ore e te aravihi. Haere atura ïa hoê o ta Nabala mau rave ohipa apî, e tiai mamoe paha, e farerei ia Abigaila ma te tiaturi e e itea mai ia Abigaila te ravea ia ora mai ratou. Eaha hoi ta te hoê noa vahine e nehenehe e rave i mua i te hoê nuu?

³ Na mua, e hiˈo mai tatou o vai Abigaila, mea nafea teie fifi i te tupuraa, e eaha te haapiiraa e huti mai i te faaroo o teie vahine faahiahia mau.

4. A faataa mai na i te huru o Nabala.

⁴ Mea taa ê roa Abigaila raua Nabala. E vahine maitai roa Abigaila. Area Nabala, e tane ino roa ïa. Parau mau, e moni ta ˈna, a manaˈo atu ai oia e e taata o ˈna. Teie râ, eaha to vetahi ê manaˈo? Ia hiˈo oe i roto i te Bibilia, aita e parau maitai to ˈna. To ˈna noa iˈoa, “Maamaa,” aore ra “Neneva” te auraa. Aita tatou i ite e na to ˈna na metua anei i horoa i tera iˈoa no ˈna, aore ra e iˈoa pii noa. Tano maitai râ tera iˈoa no ˈna. E taata etaeta o ˈna, te ohipa ino, te haavî e mea inu roa atoa. Mea rahi te mǎtaˈu ia ˈna e eita atoa e au ia ˈna.—Sam. 1, 25:2, 3, 17, 21, 25.

5, 6. (a) No oe, eaha te mau huru maitatai au-roa ˈˈe-hia o Abigaila? (b) No te aha Abigaila i faaipoipo ai i te hoê tane haapaoraa ore?

 ⁵ E ere roa ˈtu Abigaila mai ia Nabala. “Ua oaoa to ˈu metua tane” te auraa o to ˈna iˈoa. E haapeu roa e rave rahi papa i ta ratou tamahine no to ˈna nehenehe. E oaoa roa ˈtu â râ te hoê papa î i te paari ia ite oia e mea nehenehe te huru o ta ˈna tamarii. E pinepine roa te hoê taata haviti i te manaˈo e aita e faufaa ia faahotu i te mau huru maitatai mai te feruriraa maitai, te paari, te itoito aore ra te faaroo. Aita Abigaila i manaˈo mai tera. Te haapopou ra te Bibilia ia ˈna no to ˈna feruriraa maitai e to ˈna nehenehe.—A taio i te Samuela 1, 25:3 i roto i te nota i raro i te api. a

⁶ E ui paha vetahi: ‘No te aha te hoê potii maramarama hoi i faaipoipo ai i te hoê tane haapaoraa ore?’ A haamanaˈo e i tahito ra, mea rahi te faaipoiporaa na te metua i faaau. Noa ˈtu eaha te tupuraa, mea faufaa roa ta ratou parau faatia. Ua farii anei na metua o Abigaila i teie faaipoiporaa, ua faaau atoa anei i te reira, no ta Nabala faufaa e to ˈna tiaraa aore ra no te veve? Aita tatou i ite. Teie râ, noa ˈtu ta Nabala faufaa, e ere roa ˈtu o ˈna i te tane maitai.

7. (a) No te haapii i te manaˈo tano no nia i te faaipoiporaa i ta ratou mau tamarii, eaha ta te mau metua e ore e rave? (b) Eaha ta Abigaila i faaoti papu e rave?

⁷ E haapii maitai te mau metua î i te paari i te manaˈo tano no nia i te faaipoiporaa i ta ratou mau tamarii. Eita ratou e turai ia ratou ia faaipoipo no te moni aore ra ia haamatau i te hoê apiti e mea apî roa ratou no te amo i te hopoia a te taata paari. (Kor. 1, 7:36) No Abigaila râ, e ere teie te taime no te feruri i teie mau mea. Noa ˈtu eaha te tumu i faaipoipo ai o ˈna, e vahine o ˈna na Nabala e ua faaoti papu o ˈna e faaoromai i teie tupuraa fifi.

8. O vai ta Nabala i tuhi, e no te aha tatou e parau ai e ua hape roa o ˈna i te na reiraraa?

⁸ Ua fifi roa ˈtu â to Abigaila tupuraa ia Nabala. Te taata ta Nabala i tuhi, o Davida ïa te tavini taiva ore a Iehova ta Samuela te peropheta i faatahinu. O Davida ta te Atua i maiti no te mono i te arii Saula. (Sam. 1, 16:1, 2, 11-13) No to ˈna pohehae, imi ihora Saula e haapohe ia Davida, o tei horo e tapuni i te medebara e ta ˈna na 600 faehau tei turu ia ˈna.

9, 10. (a) I roto i teihea tupuraa i imi ai Davida e ta ˈna mau faehau i te ora? (b) No te aha ia mauruuru hoi Nabala ia Davida e ta ˈna mau faehau? (A hiˈo atoa i te nota o te paratarafa 10.)

 ⁹ I faaea na Nabala i Maona, i rave na râ o ˈna i te ohipa i pihai iho mai, i Karemela, e fenua paha to ˈna i reira. b To ropu teie na oire i te mau fenua teitei rii te vai ra te matie no te mamoe. Tano maitai, e 3 000 mamoe ta Nabala. E ati aˈe râ, i te pae apatoa, te tarava noa ra te medebara o Parana. I te pae hitia o te râ, e na roto atu oe i te mau vahi papamǎrô te vai ra te faa e te ana, e tae atu ai oe i te miti Avaava (parauhia miti Pohe i teie mahana). Na taua mau tuhaa fenua ra ïa i imi ai Davida e ta ˈna mau faehau i te ora. Mea papu e ua auau ratou i te animara ei maa na ratou e ua faaruru e rave rahi fifi. E pinepine ratou i te farerei i te feia apî e tiai ra i te mau nǎnǎ a Nabala te taata taoˈa rahi.

¹⁰ Mai te aha te huru o teie mau faehau i nia i te mau tiai mamoe? Mea ohie no ratou ia raverave i te mamoe ei maa na ratou. Aita ratou i na reira. Ua riro râ ratou mai te hoê aua paruru i te mau nǎnǎ e te mau tavini a Nabala. (A taio i te Samuela 1, 25:15, 16.) E nehenehe te mau tiai e te mau mamoe e roohia i te fifi atâta rau. Mea rahi hoi te animara oviri. E pinepine atoa te tahi mau taata ěê i te haru i te mau mamoe e te tahi atu mau mea, mea piri roa mai hoi te otia fenua o Iseraela i te pae apatoa. c

11, 12. (a) Ua aha Davida i roto i ta ˈna poroi i faatae ia Nabala? (b) Eaha te fifi i roto i ta Nabala pahonoraa i ta Davida poroi?

¹¹ E ere mea ohie no Davida ia faatamaa i ta ˈna mau faehau i roto i te medebara. Tono ihora ïa oia hoê ahuru vea ia Nabala no te ani i te tauturu. Ua maiti maitai o ˈna i te taime: te tau paotiraa mamoe, e tau oroa e tamaa maitai ai te taata e mea horoa atoa ratou. Ua maiti maitai atoa Davida i ta ˈna mau parau, e parau faatura. Ua faahiti atoa oia i te parau ra “to tamaiti na Davida,” peneiaˈe no te faaite ma te faatura e mea paari aˈe Nabala ia ˈna. Eaha te pahonoraa a Nabala?—Sam. 1, 25:5-8.

¹² Ua hae roa o ˈna! “Ua avau oia ia ratou,” ta te taata apî ïa o te omuaraa i parau ia Abigaila. Ua pipiri Nabala i ta ˈna faraoa, ta ˈna pape, e ta ˈna iˈo mamoe tupaihia, nounouhia e ana! Ua faariro o ˈna ia Davida mai te hoê taata faufaa ore e ua faaau ia ˈna i te hoê tavini tei faarue i to ˈna fatu. Tera atoa paha to Saula manaˈo ia Davida. Eita hoi o ˈna e au ia ˈna. Aita râ to raua manaˈo e tuati ra e to  Iehova. Mea here na Iehova ia ˈna. No ˈna, e ere Davida i te hoê tavini orure hau, o ˈna râ te riro mai ei arii no Iseraela.—Sam. 1, 25:10, 11, 14.

13. (a) Ua aha Davida i to ˈna faarooraa i ta Nabala i rave? (b) Eaha ta te Iakobo 1:20 e faaite mai ra no nia i te riri o Davida?

¹³ I to te mau vea faatiaraa ia Davida i te ohipa i tupu, riri aˈera oia, e faaue atura: “A tatua na outou atoa i ta outou mau ˈoˈe.” Na reira atoa ihora oia, rave aˈera e 400 faehau e reva ˈtura ratou. Ua horeo oia e haapohe pauroa te tane o to Nabala utuafare. (Sam. 1, 25:12, 13, 21, 22) Ua tano Davida i te ririraa, ta ˈna râ i opua e rave, aita ïa. Te na ô ra te Bibilia: “E ore hoi te riri o te taata nei e faatupu i te parau-tia a te Atua.” (Iak. 1:20) Mea nafea hoi Abigaila i faaora ˈi i to ˈna utuafare?

14. (a) Eaha te taahiraa avae matamua ta Abigaila i rave no te faaafaro i te hape a Nabala? (b) Eaha te haapiiraa e huti mai i te taa-ê-raa i rotopu ia Nabala e ia Abigaila? (A hiˈo atoa i te nota i raro i te api.)

¹⁴ E nehenehe tatou e parau e ua rave ê na Abigaila i te taahiraa avae matamua no te faaafaro i teie hape rahi. Ua horoa oia i te tariˈa faaroo, taa ê roa i ta ˈna tane o Nabala. Aita te tavini apî i faaara ia Nabala i te ati e tae mai i nia i to ˈna utuafare taatoa, no te mea “e taata haapaoraa ore roa oia, a ore atu ai e nehenehe e paraparau ia ˈna.” d (Sam. 1, 25:17, Traduction du monde nouveau) Eita iho â Nabala e hinaaro e faaroo mai, mea teoteo roa o ˈna. Mai tera te rahiraa o te taata i teie mahana. Ua ite râ te tavini apî e mea taa ê Abigaila. No reira paha ïa o ˈna i faaara ˈtu ai ia ˈna.

15, 16. (a) Mea nafea to Abigaila faaiteraa e e au o ˈna i te vahine maitai o te buka Maseli? (b) No te aha tatou e parau ai e aita Abigaila i patoi i te tiaraa upoo o ta ˈna tane?

¹⁵ Feruri ihora Abigaila e haaviti atura. Te na ô ra te Bibilia: “Haapeepee ihora Abigaila.” I roto i teie noa faatiaraa, e maha taime e parauhia ˈi e ua “haapeepee” o ˈna. Ua faaineine o ˈna i te hoê ô huru rahi na Davida e na ta ˈna mau faehau: te faraoa, te uaina, te iˈo mamoe, te huero maa tunu paa, te vine e te suke. Ua ite maitai ïa Abigaila eaha te maa e vai ra i te fare e ua rave maite o ˈna i ta ˈna hopoia utuafare, mai te vahine maitai o te buka Maseli. (Mas. 31:10-31) Tuu atura o ˈna i taua ô ra i vetahi o ta ˈna mau tavini, ta ˈna i tono ia  Davida ra, e na muri maira o ˈna. “Aita râ oia i faaite i tana tane ia Nabala.”—Sam. 1, 25:18, 19, V.C.J.S.

¹⁶ Te auraa anei ïa e te patoi ra Abigaila i te tiaraa upoo o ta ˈna tane? E ere. A haamanaˈo e ua tuhi Nabala i te hoê tavini ta Iehova i faatahinu, e mai pohe e rave rahi taata aita hoi ta ratou e hara. Ia ore Abigaila e ohipa mai, e riro ïa oia i te apiti i te hara a ta ˈna tane. I roto i teie tupuraa, ia faaite ïa oia e o to ˈna Atua ta ˈna e auraro, eiaha ta ˈna tane.

17, 18. (a) Eaha ta Abigaila i rave i to ˈna farereiraa ia Davida, e eaha ta ˈna i parau atu? (b) No te aha Davida i putapû roa ˈi?

¹⁷ Aita i maoro, farerei atura Abigaila ia Davida e ta ˈna mau faehau. Haapeepee faahou atura oia, i tera taime, i te pou mai nia mai i ta ˈna asini e tipapa ihora i mua ia Davida. (Sam. 1, 25:20, 23, V.C.J.S.) Haamahora ihora oia i to ˈna aau e taparuparu atura ia Davida ia aroha i ta ˈna tane e to ˈna utuafare. Ua putapû roa Davida. No te aha?

¹⁸ Ua parau Abigaila ia Davida: “Ei nia ia ˈu, e tau fatu, teie nei hara.” Ani atura oia ia Davida ia faaore mai i ta ˈna hara. Ua parau roa oia e e taata maamaa ta ˈna tane, tera hoi te auraa o to ˈna iˈoa, peneiaˈe no te haaferuri ia Davida e ia faautua o ˈna i tera huru taata, e riro ïa o ˈna mai ia Nabala ra te huru. Ua papu ia ˈna e e tia Davida no Iehova, inaha te aro ra o ˈna i ‘te mau tamaˈi a Iehova.’ Ua ite atoa o ˈna e ua fafau Iehova e e arii mai Davida, ua parau hoi oia e e ‘faariro Iehova ia ˈna ei tavana i nia ia Iseraela.’ Ua taparu atoa oia ia Davida eiaha e haamanii faufaa ore noa i te toto, a riro hoi te reira ei “mauiui” no ˈna, oia hoi a tatarahapa ˈtu ai oia. (A taio i te Samuela 1, 25:24-31.) Mahanahana mau â teie mau parau e te hamani maitai!

19. Ua nahea ˈtura Davida, e no te aha o ˈna i haapopou ai ia Abigaila?

¹⁹ Ua nahea ˈtura Davida? Ua rave o ˈna i te ô a Abigaila e ua na ô: “Ia haamaitai hia te Fatu ra te Atua o Iseraela, o tei tono mai ia oe i teienei mahana e farerei iaˈu, e ia haamaitai atoa hia ta oe ra parau [aore ra to oe feruriraa maitai]. E ua haamaitai atoa hia oe, o oe tei tapea mai iaˈu i teienei mahana, ia ore au ia haamanii i te toto.” Ua haapopou Davida ia ˈna no te mea ua haapeepee oia ma te itoito i te haere mai e farerei ia ˈna. Ua parau roa oia e ua tapea Abigaila ia ˈna ia ore ia haamanii i te toto. Na ô atura oia: “A haere ma te hau i to utuafare, inaha, ua faaroo vau i to parau.”—Sam. 1, 25:32-35, V.C.J.S.

20, 21. (a) Eaha te mea faahiahia no oe i to Abigaila hoˈiraa i ta ˈna ra tane? (b) Mea nafea to Abigaila faaite-faahou-raa i te itoito e te feruriraa maitai?

²⁰ Reva ˈtura Abigaila. Eita e ore e ua manaˈo noa o ˈna i taua  farereiraa ra. Mea taa ê roa Davida taata haapao maitai e te hamani maitai i ta ˈna tane ino mau. Aita râ o ˈna i tapea mai i teie mau manaˈo. Te na ô ra te Bibilia: “Haere maira Abigaila ia Nabala ra.” Ua hoˈi iho â o ˈna i ta ˈna ra tane, a faaoti papu ai e amo maite i ta ˈna hopoia vahine faaipoipo. Ia faaite ïa o ˈna i ta ˈna tane e ua horoa oia i te tahi ô na Davida e na ta ˈna mau faehau. E tiaraa hoi to Nabala ia ite i te reira. Ia faaite atoa o ˈna e mai pohe to Nabala utuafare. Mai te peu e na vetahi ê e faaite atu, mea haama roa ïa no ˈna. Teie râ, eita ta Abigaila e nehenehe e parau atu i taua taime ra. E tamaaraa hoi ta Nabala mai ta te arii e ua taero roa oia.—Sam. 1, 25:36.

²¹ Ua faaite faahou Abigaila i te itoito e te feruriraa maitai. Ua tiai oia ia poipoi aˈe. Ua pee to Nabala taero, e taa mai ïa ia ˈna ta Abigaila e parau atu. Te fifi râ, e iria mai paha Nabala. Noa ˈtu râ, ua faatia pauroa Abigaila i te ohipa i tupu. Mea papu e ua manaˈo Abigaila e e hae mai Nabala, a rave ino atoa ˈi paha ia ˈna. Aita râ, ua parahi noa Nabala e aita i hautiuti noa ˈˈe.—Sam. 1, 25:37.

22. (a) Eaha hoi to Nabala? (b) Eaha ta teie aamu e faaite mai ra no nia i te mau haavîraa aore ra te mau rave-ino-raa i roto i te utuafare?

²² Eaha hoi to Nabala? “Tarapape roa aˈera tana aau, riro atura oia mai te ofai.” Ua roohia paha o ˈna i te tahi maˈi haaparuparu. Ua pohe râ o ˈna ahuru mahana i muri iho, e ere no te maˈi. “Tairihia ihora Nabala e Iehova, pohe roa aˈera.” (Sam. 1, 25:38) Na roto i taua faautuaraa ra tano roa, ua tiamâ mai Abigaila i te hoê oraraa faaipoipo maoro ino mau. I teie mahana, eita Iehova e rave i teie huru faautuaraa semeio. Te haamanaˈo mai ra râ teie aamu e te ite mai ra iho â o ˈna i te mau haavîraa aore ra te mau rave-ino-raa i roto i te utuafare. I te taime ta ˈna i faataa, e faaafaro iho â o ˈna i taua fifi ra.—A taio i te Luka 8:17.

23. (a) Eaha te tahi atu haamaitairaa ta Abigaila i fanaˈo? (b) No te aha tatou e parau ai e aita o ˈna i teoteo noa ˈˈe no ta Davida aniraa?

²³ Ua matara mai Abigaila i te hoê faaipoiporaa ino mau. Ua fanaˈo râ oia i te tahi atu haamaitairaa. I to Davida faarooraa e ua pohe Nabala, tono ihora oia i te tahi mau vea ia Abigaila ra no te parau atu e e rave oia ia ˈna ei vahine na ˈna. Teie ta Abigaila pahonoraa: “Inaha, ia riro noa ˈtu to tavini vahine ei tavini horoi avae no te mau tavini o tau fatu.” Aita oia i teoteo noa ˈˈe no teie aniraa e riro ei vahine na Davida. Ua parau roa ˈtu oia e e tavini o ˈna i ta ˈna mau tavini.  Ua haapeepee faahou â oia, i taua taime ra, i te faaineine ia ˈna no te haere ia Davida ra.—Sam. 1, 25:39-42, V.C.J.S.

24. (a) Eaha te tahi mau fifi ta Abigaila i farerei i muri iho? (b) Eaha to Davida e to Iehova manaˈo ia ˈna?

²⁴ Te auraa anei ïa e mea ohie to Abigaila oraraa i pihai iho ia Davida? E ere. E vahine ê na ta Davida, o Ahinoama. Noa ˈtu e ua vaiiho te Atua i teie peu i tera ra tau, mea papu e mea fifi no te mau vahine faaipoipo haapao maitai. Aita â atoa Davida i arii atura. E faaruru atoa oia e rave rahi haafifiraa. Teie râ, ua tauturu e ua turu Abigaila ia Davida i te roaraa o to ˈna oraraa i pihai iho i ta ˈna tane e ua fanau atoa mai oia i te hoê tamaroa. Ua ite roa o ˈna e mea here e mea paruru iho â na ta ˈna tane ia ˈna. I te hoê mahana, ua faaorahia o ˈna e Davida i to ˈna haruraahia e te tahi mau taata! (Sam. 1, 30:1-19) Ua pee ïa Davida i te hiˈoraa o Iehova, o te here nei e o te poihere nei i te mau vahine feruriraa maitai, itoito e te haapao maitai.