1, 2. Eaha paha ta Petero i manaˈo a paraparau noa ˈi Iesu i Kaperenaumi, eaha râ tei tupu?

 HIˈO noa ihora Petero i te hohoˈa mata o te feia e faaroo ra ia Iesu i roto i te sunago i Kaperenaumi. Tei te pae apatoerau o te miti no Galilea tera oire, i reira Petero i faaea ˈi e taiˈa atoa ˈi ei imiraa na ˈna. Mea rahi to ˈna hoa, fetii, e hoa ohipa i taua oire ra. Ua manaˈo paha Petero e e farii atoa to Kaperenaumi e o Iesu te Mesia, a oaoa roa ˈi ratou i te faaroo i te orometua haapii rahi roa ˈˈe ia paraparau mai no nia i te Basileia o te Atua. Mea ê roa te ohipa i tupu i tera mahana.

² Mea rahi tei faaea i te faaroo ia Iesu. Ua faaino vetahi i ta ˈna poroi. Te mea râ i huru ê roa ˈi Petero, te huru ïa o te tahi mau pǐpǐ a Iesu. Aita ratou i mauruuru faahou i te pue parau mau apî ta ˈna i haapii atu. Ua horuhoru ratou, ua riri atoa. Ua parau roa vetahi e e parau riaria ta Iesu. Aita ratou i hinaaro faahou e faaroo atu, faarue maira i te sunago e faaea ˈtura i te pee ia Iesu.—A taio i te Ioane 6:60, 66.

3. Ua tauturu to Petero faaroo ia ˈna ia aha?

³ E ere mea ohie no Petero e no te tahi atu mau aposetolo. Aita i taa maitai ia ˈna ta Iesu i parau i tera mahana. Aita anaˈe e tatararaa, e au iho â ïa e mea huru ê roa ta Iesu mau parau. Ua nahea Petero? E ere a tahi ra a tamatahia ˈi to ˈna taiva ore i to ˈna Fatu, e ere atoa teie i te tamataraa hopea. E hiˈo mai tatou mea nafea to Petero faaroo i te tautururaa ia ˈna ia tapea i to ˈna taiva ore noa ˈtu tera mau fifi.

4, 5. Eaha ta Iesu i rave na i maere ai te taata?

⁴ E pinepine Petero i te maere ia Iesu. I rave na e i parau atoa na Iesu i te tahi mau mea i maere ai te taata. Hoê mahana na mua ˈtu, i faatamaa semeio na o ˈna e tausani taata. Hinaaro  aˈera taua nahoa ra e faaarii ia ˈna. Aita râ oia i farii, e faaue atura i ta ˈna mau pǐpǐ ia fano i Kaperenaumi. Mea rahi tei maere. A fano ai te mau pǐpǐ i taua po ra, ua maere atoa ratou i to Iesu haereraa na nia i te miti mataare no Galilea, a horoa ˈtu ai ia Petero i te hoê haapiiraa faufaa no nia i te faaroo.

⁵ Ia poipoi aˈe, ite ihora te mau pǐpǐ e ua pee mai tera nahoa ia ratou na nia i te poti. No to ratou noa hinaaro ia faatamaa semeio Iesu ia ratou i haere mai ai ratou, e ere râ no te faaroo i ta ˈna haapiiraa. Ua faahapa ˈtu Iesu no to ratou nounou i te mau mea materia. (Ioa. 6:25-27) Tamau atura te aparauraa i te sunago i Kaperenaumi, i reira to Iesu haapiiraa ˈtu i te hoê parau mau faufaa roa ta te taata i huru ê.

6. Ua faaau Iesu ia ˈna i te aha, e eaha te huru o te feia e faaroo ra ia ˈna?

⁶ Aita Iesu i hinaaro ia haere mai te taata ia ˈna no te mea noa e nehenehe ta ˈna e faatamaa ia ratou. Ua hinaaro râ oia ia taa ia ratou e e horoa ˈtu te Atua i te ora mure ore ia faatupu ratou i te faaroo i te tusia o Iesu, a pee atu ai i to ˈna hiˈoraa. No reira oia i faaau ai ia ˈna i te mâna, te maa no te raˈi mai i te tau o Mose. I to vetahi râ faainoraa mai, faataa ˈtura oia e mea titauhia ia amu i to ˈna tino e ia inu i to ˈna toto e noaa ˈi te ora. I reira iho, riri roa aˈera ratou. Na ô atura vetahi: “E parau riaria te[na].” Faaoti aˈera e rave rahi pǐpǐ a Iesu e faaea i te pee ia ˈna. a—Ioa. 6:48-60, 66.

7, 8. (a) Aita â i taa maitai atura ia Petero te aha? (b) Mea nafea to Petero pahonoraa ia Iesu?

⁷ E o Petero? Eaha ta ˈna i rave? Eita e ore e ua huru ê atoa o ˈna i ta Iesu parau. Aita â i taa maitai atura ia ˈna e ia tupu te hinaaro o te Atua, ia pohe iho â Iesu. Ua hinaaro anei râ o ˈna e faarue ia Iesu? Aita. E huru maitai faufaa to ˈna i ore ai o ˈna i pee i tera mau pǐpǐ e taui hanoa te manaˈo.

⁸ Fariu maira Iesu i ta ˈna na 12 aposetolo e na ô maira: “E haere atoa anei outou?” (Ioa. 6:67) O Petero tei pahono atu. E pinepine o ˈna te paraparau na mua, no te mea paha o ˈna te mea paari aˈe. Noa ˈtu eaha te tumu, o ˈna te mea taiâ ore roa ˈˈe ia faaite roa ˈtu i to ˈna manaˈo. I tera taime, e faahiti o ˈna i to ˈna manaˈo ma teie mau parau nehenehe e ore roa e moehia: “Fatu, e haere tia matou ia vai ra? tei ia oe hoi te parau o te ora mure ore.”—Ioa. 6:68.

9. No te aha tatou e parau ai e e taata taiva ore Petero?

 ⁹ Parau putapû teie, e ere anei? Maoti to ˈna faaroo ia Iesu, ua nehenehe Petero e faahotu i te hoê huru maitai faufaa roa: te taiva ore. Ua ite maitai oia e o Iesu anaˈe te Faaora ta Iehova i horoa mai, e e faaora Iesu maoti ta ˈna mau parau, oia hoi ta ˈna mau haapiiraa no nia i te Basileia o te Atua. Ua ite o ˈna e noa ˈtu e aita i taa ia ˈna te tahi mau mea, maoti anaˈe Iesu e fanaˈo ai o ˈna i ta te Atua farii maitai e te ora mure ore.

10. E nafea ia pee i to Petero taiva ore?

¹⁰ Mai tera atoa anei oe? Mea rahi i teie mahana e parau ra e mea here na ratou ia Iesu, te taiva nei râ ratou ia ˈna. No te faahotu i te taiva ore mau ia ˈna, e titauhia ia au tatou, mai ia Petero, i ta ˈna mau haapiiraa. Oia atoa ia haapii mai, ia taa i te auraa e ia faaohipa i te reira, noa ˈtu e aita tatou e taa ra aore ra aita e tuati ra i to tatou manaˈo aore ra ta tatou e au aˈe. Mea faufaa roa te taiva ore ia hinaaro tatou e ora e a muri noa ˈtu. Tera hoi ta Iesu e hinaaro ra no tatou.—A taio i te Salamo 97:10 i roto i te nota i raro i te api. b

11. Ihea to Iesu aratairaa i ta ˈna mau pǐpǐ? (A hiˈo atoa i te nota i raro i te api.)

¹¹ I muri rii aˈe i taua tupuraa ra, aratai ihora Iesu i ta ˈna mau aposetolo e te tahi mau pǐpǐ i te pae apatoerau. Mea atea taua tere ra. Ua na nia ratou i te purumu e tae atu ai i nia, i te mau oire rii i pihai iho ia Kaisarea Philipi. c I te tahi taime, mai te miti no Galilea ˈtu, e itehia ˈtu te tupuai tapoˈihia i te hiona o te mouˈa Heremona, i te otia o te Fenua tǎpǔhia i te pae apatoerau. A piri noa ˈtu ai ratou, mea teitei atu â ïa te mouˈa. Ia hiˈo mai ratou i te pae apatoa, mea nehenehe roa te Fenua tǎpǔhia. I reira ïa to Iesu uiraa i te hoê uiraa faufaa i ta ˈna mau pǐpǐ.

12, 13. (a) No te aha Iesu i hinaaro ai e ite i ta te taata e parau ra no ˈna? (b) Mea nafea to Petero pahonoraa ia Iesu, ei faaiteraa i to ˈna faaroo mau?

¹² Ui maira Iesu: “O vai au nei i ta te taata nei parauraa?” A feruri na ia Petero e hiˈo ra i to Iesu mata, a ite atu ai i te hamani maitai e te ite rahi o to ˈna Fatu! Ua hinaaro Iesu e ite  eaha ˈtura te manaˈo o te taata ia ˈna i muri aˈe i to ratou iteraa e faarooraa ia ˈna. Pahono atura te mau pǐpǐ i ta ˈna uiraa, ma te faahiti i te mau manaˈo hape e parauhia ra no ˈna. Ua hinaaro râ Iesu e ite hau atu â. Ua hape atoa anei ta ˈna mau pǐpǐ, mea piri roa hoi ia ˈna? Ui maira oia: “O vai râ vau i ta outou na parauraa?”—Luka 9:18-20.

¹³ O Petero â tei pahono oioi atu. Ua parau roa o ˈna i ta te tahi atu mau pǐpǐ i manaˈo i roto i to ratou aau, oia hoi: “O te Mesia oe, te Tamaiti a te Atua ora.” A feruri na ia Iesu e haapopou ra ia ˈna ma te mauruuru! Haamanaˈo ihora oia ia Petero e e ere na te taata, na Iehova râ i faataa maitai i taua parau mau faufaa roa ra i te feia e faaroo mau to ratou. Auaˈe Iehova i taa ˈi ia Petero o vai te Mesia tei tiai-maoro-hia na!—A taio i te Mataio 16:16, 17.

14. Eaha te mau hopoia rahi ta Iesu i horoa na Petero?

¹⁴ Te faahiti ra te tahi mau parau tohu i tahito ra i te Mesia mai te hoê ofai tei faaruehia e te feia patu. (Sal. 118:22; Luka 20:17) Te manaˈo ra Iesu i taua mau parau tohu ra i to ˈna faaiteraa e e patu Iehova i te hoê amuiraa i nia i te ofai, aore ra te pǎpǎ, oia hoi te Mesia ta Petero i parau mai nei. Horoa maira oia na Petero te tahi mau fanaˈoraa taa ê i roto i taua amuiraa ra. Aita o ˈna i faateitei ia Petero i nia aˈe i te tahi atu mau aposetolo, mai ta vetahi e manaˈo ra, ua horoa ˈtu râ i te mau hopoia: “te mau taviri o te basileia.” (Mat. 16:18, 19) Na Petero ïa e iriti i te tiaturiraa e ô atu i roto i te Basileia o te Atua no e toru pǔpǔ taata: te ati Iuda na mua, to Samaria i muri iho, e i te pae hopea te feia e ere i te ati Iuda.

15. No te aha Petero i tamaˈi ai ia Iesu, e eaha ta ˈna i parau?

¹⁵ Ua parau râ Iesu i muri aˈe e mea rahi te titauhia i te feia mea rahi tei horoahia ˈtu. (Luka 12:48) Te ohipa ïa i tupu i nia ia Petero. Ua tamau â Iesu i te faaite i te pue parau mau faufaa roa no nia i te Mesia, oia atoa fatata o ˈna i te haere i Ierusalema, i reira oia e hamani-ino-hia ˈi e e pohe ai. Horuhoru ihora Petero i te faarooraa i tera parau. Aratai rii ê ihora o ˈna ia Iesu e tamaˈi atura ia ˈna, a na ô ai: “Eiaha roa ïa, e te Fatu, eiaha roa oe ia na reirahia.”—Mat. 16:21, 22.

16. (a) Eaha ta Iesu i parau no te aˈo ia Petero? (b) Eaha te haapiiraa faufaa e huti mai i ta Iesu aˈoraa?

 ¹⁶ Ua hinaaro paha Petero e tamahanahana ia Iesu. Ua maere râ o ˈna i ta Iesu pahonoraa. Fariu ê maira Iesu ia Petero, hiˈo maira i te tahi atu mau pǐpǐ, o te manaˈo atoa ra paha mai ia Petero, e na ô ihora: “Haere na muri mai ia ˈu, e Satani! E turoriraa oe no ˈu, e ere hoi to manaˈo i to te Atua, to te taata râ.” (Mat. 16:23, Traduction du monde nouveau; Mar. 8:32, 33, MN) E haapiiraa faufaa teie no tatou pauroa. Mea ohie roa ia vaiiho i te manaˈo taata ia na nia aˈe i to Iehova manaˈo. Ia na reira tatou, noa ˈtu e no te hinaaro e tauturu, e riro tatou i te faaitoito i te hoê taata ia rave i te hinaaro o Satani, eiaha râ to te Atua. Ua nahea ˈtura râ Petero?

17. Eaha te auraa o ta Iesu parau “haere na muri mai” ia ˈna?

¹⁷ Aita Iesu e parau ra e o Satani iho â Petero. Eita e ore e ua taa ia Petero te reira. Mea ê hoi ta Iesu i pahono ia ˈna i ta ˈna i pahono ia Satani. Ua na ô oia ia Petero: “Haere na muri mai ia ˈu.” Ia Satani râ: “E haere ê atu oe.” (Mat. 4:10) Aita Iesu e tiahi ra i ta ˈna aposetolo, e maitai rahi hoi to ˈna. Ua faaafaro noa râ o ˈna i to Petero huru feruriraa tano ore. Ia faaea hoi Petero i te riro ei turoriraa i mua ia Iesu, ia na muri mai râ i to ˈna Fatu ei pǐpǐ e turu ia ˈna.

18. (a) Mea nafea to Petero faaiteraa i te taiva ore? (b) E nafea ia pee i to Petero hiˈoraa?

¹⁸ Ua mârô anei Petero, ua riri, aore ra ua faariri anei? Aita. Ua farii oia ma te haehaa i te aˈoraa. Ua faaite faahou ïa oia i te taiva ore. I te tahi taime, mea tano iho â ia aˈohia te mau Kerisetiano atoa. Ia farii tatou ma te haehaa i te aˈoraa e ia huti mai i te haapiiraa, e piri noa ˈtu â ïa tatou ia Iesu Mesia e to ˈna Metua te Atua ra o Iehova.—A taio i te Maseli 4:13.

19. Eaha te parau maere ta Iesu i faahiti, e eaha paha ta Petero i uiui?

¹⁹ Faahiti atura Iesu i te tahi atu parau maere: “Oia mau teie ta ˈu e parau atu ia outou nei, O te tahi pae i teie nei feia e tia . . . nei, e ore ïa e ite i te pohe, e ite ai ratou i te Tamaiti a te taata i te taeraa mai i to ˈna ra basileia.” (Mat. 16:28) Papu roa, ua  uiui Petero eaha ta Iesu e hinaaro ra e parau. Ua uiui paha oia e e fanaˈo anei o ˈna i tera haamaitairaa taa ê, no aˈo etaeta mai nei hoi Iesu ia ˈna.

20, 21. (a) A faataa na i ta Petero i ite orama. (b) Eaha ˈtura ïa ta Petero i taa?

²⁰ Fatata hoê hebedoma i muri aˈe, ua aratai Iesu ia Iakobo, Ioane e Petero i nia i “te hoê mouˈa teitei,” peneiaˈe te mouˈa Heremona e 25 kilometera te atea. E po paha taua taime ra, te faatoa noa ra hoi na toru aposetolo eiaha e taoto. A pure ai râ Iesu, tupu ihora te tahi ohipa, a pee atu ai to ratou varea taoto.—Mat. 17:1; Luka 9:28, 29, 32.

²¹ Haamata ihora to Iesu hohoˈa mata i te anaana, mai te anaana o te mahana. Uouo aˈera to ˈna ahu e anaana roa ˈtura. Fa maira e piti taata: te faahohoˈa ra hoê ia Mose, e te tahi atu ia Elia. Paraparau atura raua ia Iesu no nia i to ˈna ‘faarueraa mai i teie nei ao, o te tupu i Ierusalema.’ Te parau ra ïa raua i to Iesu  poheraa e tia-faahou-raa mai. Taa ˈtura ia Petero e ua hape roa o ˈna i te manaˈoraa e e ore Iesu e hamani-ino-hia, a pohe atu ai.—Luka 9:30, 31, MN.

22, 23. (a) Mea nafea to Petero faaiteraa i te aau tae e te hamani maitai? (b) Eaha te haamaitairaa ta Petero, Iakobo e Ioane i fanaˈo â i taua po ra?

²² Manaˈo ihora Petero e faaô i roto i taua orama faahiahia roa ra. I to ˈna hiˈoraa ˈtu, e au ra e te reva ra Mose raua Elia. Ua imi paha o ˈna i te tapea mai ia raua. Na ô atura ïa oia: “Orometua, e mea maitai ia parahi tatou i ǒ nei; e faatia matou i te fare autâ [aore ra fare ie] e toru aˈe, no oe e tahi, no Mose e tahi, e no Elia e tahi.” Parau mau, e orama teie, e ua pohe ê na tera na tavini a Iehova ahia ˈtura maororaa. Aita ïa e faufaa te fare ie no raua. Ua paraparau ïa Petero ma te ore e feruri na mua. Tera râ, e taata aau tae o ˈna e te hamani maitai. Eita anei oe e au i te hoê taata mai tera?—Luka 9:33.

²³ Ua fanaˈo â Petero, Iakobo e Ioane i te tahi atu haamaitairaa i taua po ra. Fa maira te hoê ata e tapoˈi maira ia ratou. Faaroohia ˈtura te hoê reo no roto mai i taua ata ra, te reo ïa o Iehova e na ô ra: “O tau Tamaiti here teie, a faaroo ia ˈna.” Ore atura te orama, e vai noa ˈtura na aposetolo e o Iesu, o ratou anaˈe, i nia i te mouˈa.—Luka 9:34-36.

24. (a) Mea nafea Petero i te faufaaraahia i te orama o te faahuru-ê-raa? (b) E nafea tatou e faufaahia ˈi i te orama o te faahuru-ê-raa?

²⁴ E ô taua orama ra piihia te faahuru-ê-raa no Petero e no tatou! E rave rahi matahiti i muri aˈe, ua papai oia e mea fanaˈo o ˈna i taua po ra i te ite-mata-raa i to Iesu hanahana ei Arii i te raˈi a muri aˈe. Ua haapapu taua orama ra e e tupu iho â e rave rahi parau tohu o te Parau a te Atua, e ua haapuai i to Petero faaroo ia mau papu o ˈna i mua i te mau tamataraa i muri mai. (A taio i te Petero 2, 1:16-19.) E haapuai atoa te reira i to tatou faaroo, ia tapea tatou mai ia Petero i to tatou taiva ore i te Fatu ta Iehova i faatoroa i nia ia tatou, ia haapii mai tatou ia ˈna, ia farii i ta ˈna aˈoraa e ia pee noa ia ˈna ma te haehaa.