1-3. (a) A faataa na i to Esetera tapiriraa ˈtu i te terono o ta ˈna tane. (b) Eaha ta te arii i rave i to Esetera piriraa ˈtu i te terono?

 TAPIRI mǎrû noa ˈtura Esetera i te terono, a otuˈituˈi vitiviti noa ˈi to ˈna mafatu. A feruri na i tera taime, aita hoê aˈe maniania i roto i tera piha rahi i roto i te aorai Peresia i Susana. Ua faaroo roa Esetera i to ˈna iho mau taahiraa avae e te ǔiǔiraa o to ˈna ahu arii. E ere teie i te taime no te mataitai i tera tiapai piha, te mau pou nehenehe e te mau aroaro fare arezi no Lebanona roa mai, mea nanaˈo-maitai-hia. To nia te mata o Esetera i te taata e parahi ra i nia i te terono, na ˈna hoi e faaoti e e ora anei o ˈna aore ra eita.

² Hiˈo noa maira te arii ia Esetera, e toro maira i ta ˈna sepeta auro. Mea ohie roa ia toro i te sepeta, ua faaora râ te reira ia Esetera. Te auraa ïa e ua faaore te arii i te hara ta Esetera i rave mai nei: te tiaraa ˈtu i mua ia ˈna ma te ore i titauhia mai. I to ˈna piriraa ˈtu i te terono, tapea ihora Esetera i te sepeta.—Ese. 5:1, 2.

³ E arii taoˈa rahi Ahasueru e e mana rahi to ˈna. A hiˈo noa ˈtu ia ˈna. Te manaˈohia ra e e miria moni farane te ahu o te mau arii Peresia i tera ra tau. Teie râ, ua ite atu Esetera i te mahanahana i roto i te mata o ta ˈna tane. Taa aˈera ia ˈna e mea here na Ahasueru ia ˈna. Na ô maira te arii: “Eaha to oe hinaaro, e te arii, e Esetera? eaha ta oe e ani mai? e horoahia ˈtu . . . ia oe e tae noa ˈtu i te afa o te basileia.”—Ese. 5:3.

4. Eaha te fifi e tiai mai ra ia Esetera?

⁴ Tera te faaroo e te itoito mau! Ua tae roa Esetera i mua i te arii no te paruru i to ˈna mau taata i te hoê haapoheraa. Ua tere maitai ïa te mau mea atoa. Tera râ, e fifi rahi atu â te tiai mai ra. Mea titauhia ia faataa Esetera i tera arii teoteo e te taata aˈo tiaturi-roa ˈˈe-hia e ana, e taata ino ïa tei râmâ ia ˈna ia faautua i te mau taata o Esetera i te pohe. E nafea ïa Esetera ia paraparau i te arii, e eaha ta tatou e haapii mai i to ˈna faaroo?

5, 6. (a) Mea nafea Esetera i te faaohiparaa i te Koheleta 3:1, 7? (b) Mea nafea Esetera i te faaiteraa i te paari i to ˈna paraparauraa i ta ˈna tane?

⁵ Ia faaite anei Esetera i te arii i te fifi i mua i te taata atoa i roto i taua piha ra? Ia na reira oia, e faahaama ïa oia i te arii. E nehenehe atoa hoi Hamana e faahapa i ta ˈna mau pariraa. E nahea ïa Esetera? Hau atu i te 500 matahiti na mua ˈtu, ua haapapai Iehova i te arii Solomona i teie mau parau: “E tau to te mau mea atoa nei, . . . e taime to te mamû noa, e taime to te parau.” (Koh. 3:1, 7) Eita e ore e ua haapii Moredekai i tera mau aratairaa i ta ˈna tamahine faaamu. Papu roa, ua taa ia Esetera te faufaaraa ia maiti maitai i te “taime [n]o te parau.”

⁶ Pahono atura Esetera: “Ia tia ia oe, e te arii, e haere mai oe, o te arii, e o Hamana i te amuraa maa i faanahonahohia e au [no oe].” (Ese. 5:4) Farii ihora te arii e poroi atura ia Hamana ia tae atoa mai. Te ite ra oe i te paari o Esetera i roto i ta ˈna huru paraparau i ta ˈna tane? Aita Esetera i faahaama ia ˈna e ua maiti oia  i te hoê taime e te hoê vahi tano aˈe no te faaite i to ˈna mau haapeapearaa.—A taio i te Maseli 10:19.

7, 8. (a) A faataa na i te tamaaraa matamua a Esetera. (b) No te aha Esetera i tiai ai i te paraparau i te arii?

⁷ Papu roa e ua faaineine maitai Esetera i taua tamaaraa ra, ma te haapao i te mau mea atoa ta ta ˈna tane e au. Te vai atoa ra te uaina maitai ia rearea te aau o te arii. (Sal. 104:15) Oaoa ihora Ahasueru e ui faahou maira ia Esetera eaha ta ˈna e hinaaro. Tera anei te taime no te paraparau?

⁸ E ere, te manaˈo ïa o Esetera. Ua titau manihini râ oia i te arii e ia Hamana i te piti o te tamaaraa ananahi aˈe. (Ese. 5:7, 8) No te aha Esetera i tiai ai? A haamanaˈo e no te hoê faaueraa mana a te arii, e ati pohe te tiai mai ra i te mau taata o Esetera. Ia maiti ïa Esetera i te taime tano maitai no te paraparau. Aita anaˈe, mea rahi te taata e pohe. No reira oia i tiai ai, ma te faanaho i te tahi atu tupuraa no te faaite i ta ˈna tane e mea faatura iho â oia ia ˈna.

9. Eaha te faufaaraa o te faaoromai, e e nafea ia pee i te faaoromai o Esetera?

 ⁹ Mea varavara te faaoromai, te hoê huru maitai faufaa roa. Noa ˈtu to ˈna ahoaho e to ˈna hinaaro e faaite i te fifi i te arii, ua tiai maite oia i te taime tano. E nehenehe tatou e huti mai i te haapiiraa. I te tahi taime, ua ite paha tatou i te tahi mau mea e titauhia ia faaafaro. No te faataa i te fifi i te hoê taata e mana to ˈna, mea faufaa ia pee i te hiˈoraa o Esetera e ia faaoromai. Te na ô ra te Maseli 25:15: “E mǎrû mai te tavana i te faaoromai; e fatifati te ivi i te arero [aore ra te parau] mǎrû.” Ia tiai maite tatou i te taime tano e ia paraparau ma te mǎrû, mai ia Esetera, e nehenehe te hoê taata patoi roa ino e mǎrû mai. Ua haamaitai anei Iehova, to Esetera Atua, ia ˈna no to ˈna faaoromai e to ˈna paari?

10, 11. (a) Mai te aha te huru o Hamana i to ˈna faarueraa mai i te tamaaraa, e i muri iho? (b) Ua parau ta ˈna vahine e to ˈna mau hoa ia Hamana ia aha?

¹⁰ Auaˈe Esetera i faaoromai i tupu ai te hoê anairaa ohipa  faahiahia. I to Hamana faarueraa mai i te tamaaraa, ua oaoa e ua rearea to ˈna aau. Ua manaˈo hoi oia e mea au aˈe na te arii e te arii vahine ia ˈna i te tahi atu. I to ˈna râ taeraa ˈtu i rapaeau mai i te aua o te aorai, ua tano atu to ˈna mata i nia ia Moredekai, te ati Iuda aita iho â i piˈo i mua ia ˈna. Mai ta tatou i tapao i te pene na mua ˈtu, e ere teie i te faatura ore. No to ˈna râ manaˈo haava e to ˈna taairaa e te Atua ra o Iehova i ore ai oia i na reira. Teie râ, “î roa aˈera [Hamana] i te riri.”—Ese. 5:9.

¹¹ Faatia ˈtura Hamana i taua huru faatura ore ra i ta ˈna vahine e to ˈna mau hoa. Parau maira ratou ia faatia i te hoê pou e 22 metera te roa e ia ani i te parau faatia a te arii e tarî ia Moredekai i nia iho. Ua au roa Hamana i taua manaˈo ra e faaue atura i reira iho i te tahi taata ia haapao i taua ohipa ra.—Ese. 5:12-14.

12. No te aha te arii i ani ai ia taiohia mai te mau buka tuatapaparaa a te hau, e eaha ta ˈna i ite mai?

¹² “Aita roa o te arii taoto i mairi i taua rui ra,” ta te Bibilia ïa e parau ra. Ani ihora oia ia taiohia mai te mau buka tuatapaparaa a te hau. I roto i taua taioraa ra, ua matara mai te parau o te hoê opuaraa e haapohe ia ˈna. Haamanaˈo aˈera oia i taua parau ra. Na Moredekai i faaara ˈtu i taua opuaraa ra, a haruhia ˈtu ai e a haapohehia ˈtu ai na taata opuaraa ino. Hinaaro ru atura te arii e ite mea nafea Moredekai i te haamauruururaahia. Pahonoraa: aita hoê aˈe mea i ravehia no ˈna.—A taio i te Esetera 6:1-3.

13, 14. (a) I roto i teihea tupuraa i tafifi ai Hamana? (b) Eaha ta ta ˈna vahine e to ˈna mau hoa i parau ia Hamana?

¹³ Hinaaro ihora te arii e faaafaro i taua ohipa ra. Ui atura oia o vai te feia toroa mea vata no te tauturu ia ˈna. E o vai to roto i te aua o te arii? O Hamana, e au ra e poipoi roa to ˈna haereraa mai. Te tiai ru ra hoi o ˈna i te ani i te arii i te parau faatia e haapohe ia Moredekai. Hou râ Hamana a tuu atu ai i ta ˈna aniraa, ui maira te arii ia ˈna eaha te ravea maitai roa ˈˈe no te faahanahana i te hoê taata ta te arii e hinaaro e haamauruuru. Manaˈo ihora Hamana e o ˈna ta te arii e manaˈo ra. Pûpû atura Hamana i te hoê ravea hope i te faahiahia: e faaahu i taua taata ra i te hoê ahu arii, na te hoê taata toroa e aratai haere ia ˈna na Susana na nia i te puaarehenua a te arii, a pii noa ˈi e e na reirahia te taata ta te arii e hinaaro e faahanahana. Eaha râ paha Hamana i te maˈeˈe i to ˈna iteraa e o Moredekai tera taata e faahanahanahia! E o vai ta te arii i maiti no taua ohipa ra? O Hamana!—Ese. 6:4-10.

¹⁴ Ua rave iho â Hamana i taua ohipa ra. Ua oti roa râ oia i te inoino, e haere ru atura i to ˈna fare ma te peapea pauroa. No  ta ˈna vahine e to ˈna mau hoa, e tapao faaite ta Hamana i rave mai nei e e ore Moredekai e noaa ia ˈna.—Ese. 6:12, 13.

15. (a) Mea nafea te haamaitairaahia to Esetera faaoromai? (b) No te aha e ‘tiai ai i te Atua’?

¹⁵ No to Esetera faaoromairaa, ma te tiai hoê mahana â no te faaite i te arii i ta ˈna i hinaaro, ua tia ia Hamana ia faaineine i to ˈna iho hiˈaraa. E peneiaˈe na Iehova i rave ia ore te arii e varea i te taoto. (Mas. 21:1) No reira ïa te Bibilia e faaitoito mai ai ia ‘tiai i te Atua.’ (A taio i te Mika 7:7.) Ia tiaturi e ia tiai tatou ia Iehova ia ohipa mai, e itea mai paha ia tatou e ua hau aˈe ta ˈna mau ravea no to tatou mau fifi, i ta tatou i manaˈo.

16, 17. (a) Ua tae mai te taime e paraparau ai Esetera i teihea tupuraa? (b) Eaha te taa-ê-raa i rotopu ia Esetera e ia Vaseti?

¹⁶ Aita Esetera i faatiai faahou â i te arii. I te piti o te tamaaraa, ia faaite pauroa iho â oia i te arii. E nahea râ? Na te arii iho i ui faahou mai eaha ta ˈna e hinaaro. (Ese. 7:2) Ua tae mai ïa te taime e paraparau ai Esetera.

¹⁷ A feruri na ia Esetera e pure ra i roto i to ˈna aau i to ˈna Atua, a na ô atu ai: “Te itehia maira vau e oe, e te arii e, e ia tia hoi ia oe, e te arii, teie to ˈu hinaaro ia ora vau, teie hoi ta ˈu e ani atu, ia ora to ˈu ra mau taata.” (Ese. 7:3) Te faaite mai ra ta ˈna mau parau e mea faatura na ˈna te faaotiraa a ta ˈna tane. Mea taa ê roa ïa Esetera ia Vaseti, te arii vahine tei na mua ˈtu ia ˈna e tei faahaama i ta ˈna tane! (Ese. 1:10-12) Aita atoa Esetera i faaino i te arii no to ˈna tiaturiraa ia Hamana, ua taparu atu râ ia paruru ia ˈna i te hoê ati pohe.

18. Mea nafea to Esetera faaiteraa i te fifi i te arii?

 ¹⁸ Papu roa e ua putapû e ua maere te arii i tera aniraa. O vai hoi te hinaaro ra e haapohe i ta ˈna arii vahine? Na ô atura â Esetera: “Ua [hoo]-roa-hia hoi matou, o vau e to ˈu ra mau taata ia pohe roa, ia taparahi-roa-hia, e ia mou roa. Ahiri hoi matou i hoohia ei tavini tane e ei tavini vahine, ua mamû noa ïa vau, ua ere râ te arii i reira, e ore e [hoona] i ta te enemi ia hopoi mai.” (Ese. 7:4) A tapao na, ua faaite roa ˈtu Esetera eaha te fifi e ua parau atu e ahiri ratou i hoohia ei tavini, e mamû noa ïa o ˈna. No te mea râ e haapoheraa tei opuahia, o te haafifi roa i te arii, eita ïa ta ˈna e nehenehe eiaha e faaite atu.

19. Eaha ta te hiˈoraa o Esetera e haapii mai ra?

¹⁹ Te haapii mai ra te hiˈoraa o Esetera eaha te ravea tano no te faataa i te hoê fifi rahi ta tatou i ite i te hoê taata here aore ra e mana to ˈna. Mea maitai ia faaoromai, ia faatura e ia faaite roa ˈtu eaha tera fifi.—Mas. 16:21, 23.

20, 21. (a) Eaha ta Esetera i parau no Hamana, e ua aha te arii? (b) Eaha ta Hamana i rave?

²⁰ Ui maira Ahasueru: “O vai ïa taata, e teihea ïa, tei opua to ˈna aau e na reira?” A feruri na ia Esetera e tohu ra i tera taata a na ô ai: “Taua hamani ino ra, taua enemi ra, o teie nei ïa taata ino o Hamana.” Eaha te huru o Hamana i tera pariraa? Ua mǎtaˈu roa o ˈna. E te arii o te riri hanoa? Eita e ore e ua uteute roa o ˈna i te riri i to ˈna taaraa e ua râmâ to ˈna taata aˈo tiaturihia ia ˈna ia tarima i te hoê faaueraa mana e haapohe i ta ˈna vahine here. Reva ˈtura te arii i roto i te aua no te tamǎrû ia ˈna.—Ese. 7:5-7.

 ²¹ Itehia ˈtura te opuaraa a Hamana. Tipapa ihora Hamana i te pae avae o te arii vahine, a taparuparu noa ˈi ma te riaria ia aroha mai ia ˈna. I to te arii hoˈiraa mai i roto i te fare e to ˈna iteraa ˈtu ia Hamana i nia i te roˈi o Esetera, riri roa aˈera oia e pari atura ia Hamana i te imiraa i te mafera i te arii vahine i roto roa i te fare o te arii. Ua topa te utua pohe i nia ia Hamana. Afaihia ˈtura Hamana ma te tapoˈihia to ˈna mata. Faahiti maira hoê o te feia toroa a te arii i te pou ta Hamana i faatia no Moredekai. Faaue ihora Ahasueru ia tarîhia Hamana i nia iho.—Ese. 7:8-10.

22. Eaha ta tatou e haapii mai i te hiˈoraa o Esetera?

²² I roto i teie nei ao parau-tia ore, mea ohie ia manaˈo e eita roa ˈtu tatou e ite i te parau-tia. Ua manaˈo na paha oe mai tera. Aita roa ˈtu Esetera i taora i te tauera e aita atoa i ere i to ˈna faaroo. I te taime tano, ua paraparau roa oia ma te itoito no nia i te mea tia, e ua vaiiho oia ia Iehova ia rave i tei titauhia. E na reira atoa anaˈe ïa! Aita Iehova i taui mai te tau o Esetera mai â. E nehenehe noa â ta ˈna e faatopa i te feia ino e te haavarevare i roto i ta ratou iho mau marei, mai ta ˈna i rave i nia ia Hamana.—A taio i te Salamo 7:11-16.

23. (a) Mea nafea to te arii haamauruururaa ia Moredekai raua Esetera? (b) Mea nafea te hoê parau tohu a Iakoba i tupu ai? (A hiˈo i te tumu parau “ Tupuraa te hoê parau tohu.”)

²³ Ite atura te arii o vai Moredekai. E ere noa o ˈna te taata toroa haapao maitai tei paruru ia ˈna i te hoê haapoheraa. O ˈna atoa râ te papa faaamu o Esetera. Faatoroa ihora Ahasueru ia Moredekai ei faatere hau nui, te tiaraa ïa o Hamana. Horoa ˈtura oia i te fare o Hamana, tae noa ˈtu ta ˈna faufaa iti rahi, na Esetera o tei maiti ia Moredekai no te haapao i taua fare ra.—Ese. 8:1, 2.

24, 25. (a) No te aha Esetera i ore ai i faaea i te haapeapea? (b) Eaha ta Esetera i rave faahou?

²⁴ Ua ora mai ïa Esetera raua Moredekai. Ua faaea anei râ te arii vahine i te haapeapea? Aita, e ere o ˈna i te mea miimii. I taua taime ra, ua reva ê na ta Hamana faaueraa mana e haapohe pauroa  te ati Iuda e ati aˈe te hau emepera Peresia. No te faataa i te mahana tano no ta ˈna opuaraa ino, i tuu na Hamana i te kelero, aore ra te pura. E peu tahutahu teie. (Ese. 9:24-26) E rave rahi avaˈe â e toe ra. Tera râ, e tae oioi mai taua mahana ra. E nehenehe anei e ape i taua ati ra?

²⁵ Ua ineine â Esetera i te pohe. Ua tia faahou oia i mua i te arii ma te ore oia i titauhia. I tera taime, ua taˈi oia no to ˈna mau taata, a taparu ai i ta ˈna tane ia faaore i tera faaueraa mana. Eita râ e nehenehe e faaore i te mau ture i haamauhia i te iˈoa o te arii no Peresia. (Dan. 6:12, 15) Faatia ˈtura ïa te arii ia Esetera raua Moredekai ia haamau i te hoê ture apî. Faarevahia ˈtura te piti o te poroi e faatia ra i te mau ati Iuda ia paruru ia ratou. Tono-ru-hia ˈtura te tahi mau vea na nia i te puaarehenua e faaite i teie parau apî oaoa i te ati Iuda e ati aˈe te hau emepera. E tiaturiraa ïa to ratou. (Ese. 8:3-16) A feruri na i te ati Iuda e faaineine ra ia ratou no te aroraa e ta ratou mau mauhaa, auaˈe hoi te faaueraa mana apî. Te mea faufaa ˈtu â râ, e turu anei ‘Iehova sabaota’ i to ˈna nunaa?—Sam. 1, 17:45.

26, 27. (a) Teihea huru upootiaraa ta Iehova i horoa na to ˈna nunaa? (b) Eaha te parau tohu i tupu i te haapoheraahia na tamaiti a Hamana?

²⁶ I te taeraa mai te mahana faataahia, ua ineine te nunaa o  te Atua. Mea rahi atoa te taata toroa Peresia e ati aˈe te hau emepera tei paruru i te ati Iuda, i to ratou faarooraa e o Moredekai te ati Iuda te faatere hau nui apî. Ua paruru Iehova i to ˈna nunaa ma te horoa ˈtu i te hoê upootiaraa rahi. Papu roa e na ˈna i haapau roa i te enemi o to ˈna nunaa, ia ore ratou e hamani ino faahou ia ratou. a—Ese. 9:1-6.

²⁷ Hau atu â, na Moredekai e haapao ra i te fare o Hamana. Aita i topa to ˈna hau a ora noa ˈi na ahuru tamaiti a Hamana. Haapohe-atoa-hia ˈtura ratou. (Ese. 9:7-10) Tupu aˈera ïa te hoê parau tohu. I faaite atea na hoi te Atua e e mou roa te ati Amaleka, enemi ino mau o to ˈna nunaa. (Deut. 25:17-19) O te mau tamaiti a Hamana paha te mau melo hopea o taua nunaa ra tei faautuahia.

28, 29. (a) No te aha Iehova i hinaaro ai ia aro Esetera e to ˈna mau taata? (b) No te aha e hiˈoraa maitai ai Esetera no tatou?

²⁸ E hopoia teimaha mau ta te potii Esetera i amo na, mai te faaineineraa i te mau faaueraa mana no nia i te tamaˈi e te haapoheraa. E ere paha mea ohie! Ia tupu râ to Iehova hinaaro, ia paruruhia ïa to ˈna nunaa e tia ˈi. E na roto mai hoi te Mesia fafauhia, te tiaturiraa hoê roa o te huitaata, i te nunaa Iseraela! (Gen. 22:18) I teie mahana, te oaoa ra te mau tavini a te Atua, no te mea i to te Mesia haereraa mai i te fenua nei, ua opani oia i ta ˈna mau pǐpǐ ia faaô i roto i te tamaˈi.—Mat. 26:52.

²⁹ To roto râ tatou i te tahi atu tamaˈi, i te pae varua ïa. Te aro nei tatou ia Satani tei faaoti roa e faaere ia tatou i to tatou faaroo i te Atua ra o Iehova. (A taio i te Korinetia 2, 10:3, 4.) E hiˈoraa maitai mau â Esetera no tatou! E pee anaˈe ïa i to ˈna faaroo, ma te faahotu i te paari, te faaoromai, te itoito, e ia ineine tatou i te pohe no to tatou mau taeae e tuahine.