1, 2. Eaha tei tupu i te hoê mahana i roto i to Elia oraraa?

 TE HORO noa ra o Elia i raro aˈe i te ûa a poiri noa ˈtu â ˈi. Mea atea â Iezereela, e ere atoa o ˈna i te taurearea faahou. Teie nei râ, te horo noa ra oia ma te rohirohi ore, tei nia hoi “te rima o Iehova” ia ˈna. Ua î to ˈna tino i te hoê puai taa ê aita oia i ite aˈenei. No hemo mai nei ia ˈna te mau puaarehenua e huti ra i te pereoo o te arii Ahaba!—A taio i Te mau arii 1, 18:46.

² I tera taime, o ˈna anaˈe to nia i te purumu. A feruri na ia ˈna e horo ra, a amoamo noa ˈi i te mata no te ûa, e a feruri noa ˈi i te ohipa maere i tupu i taua mahana ra. Te upootiaraa Iehova, te Atua o Elia, e te haamoriraa mau ma te hanahana. I muri roa ia ˈna, i roto i te poiri, te tia noa ra te mouˈa Karemela. I reira to Iehova tairiraa i te haamoriraa a Baala ma te puai e na roto i te hoê semeio. Ua faaite roa Elia e e peropheta haavare na 450 peropheta a Baala e ua haapohe ia ratou. Ua tano roa te reira. I muri iho, pure atura Elia ia Iehova ia faaore i te paˈurâ i mǎrô roa ˈi te fenua e toru matahiti e te afa. E topa maira te ûa.—Arii 1, 18:18-45.

3, 4. (a) A horo noa ˈi oia i Iezereela, no te aha Elia i tiaturi ai paha e e tupu te tahi mau tauiraa? (b) E pahono mai tatou i teihea nau uiraa?

³ A horo noa ˈi Elia i tera atearaa e 30 kilometera i raro aˈe i te ûa, ua tiaturi paha o ˈna e e tupu te tahi mau tauiraa. I te mea e ua haapohehia te mau peropheta a Baala, e afaro mai ïa te mau mea. Te tanoraa, ia taui iho â Ahaba no ta ˈna hoi i ite mata aˈenei, a faaoti atu ai e faarue i te haamoriraa a Baala, e na ˈna e faatere eiaha râ na ta ˈna vahine, e faaea atoa i te hamani ino i te mau tavini a Iehova.

⁴ Ia tupu te mau mea mai ta tatou i manaˈo, e ô mai iho â te tiaturiraa e e maitai mai paha to tatou oraraa. E manaˈo atoa paha tatou e e ore roa to tatou mau fifi ino roa ˈˈe. Mai te peu e tera te manaˈo i puta mai i roto i te feruriraa o Elia, eiaha e maere. “E taata mau â hoi [oia] mai ia tatou atoa te huru.” (Iak. 5:17)  Teie râ, ua farerei Elia e rave rahi atu â fifi. I roto noa tau hora, ua riaria roa e ua toaruaru roa o ˈna, a hinaaro atu ai e pohe. Eaha hoi tei tupu? Mea nafea Iehova i haapuai faahou ai i te faaroo o ta ˈna peropheta, e i faaitoito faahou ai ia ˈna?

5. Na te aha e faaite mai ra e aita Ahaba i faatura noa ˈˈe ia Iehova noa ˈtu te ohipa i tupu i te mouˈa Karemela?

⁵ I to Ahaba taeraa ˈtu i to ˈna aorai i Iezereela, aita o ˈna i faaite i te tatarahapa. Eaha te haapapuraa? Te na ô ra te faatiaraa: “Faaite aˈera Ahaba ia Iezebela i ta Elia i rave; e ua pau te mau peropheta i te taparahihia e ana i te ˈoˈe.” (Arii 1, 19:1) Ua nota mai oe? Aita Ahaba i faahiti noa ˈˈe ia Iehova, to Elia Atua. Ua faatia râ oia i “ta Elia i rave,” oia hoi na Elia i faatupu i tera mau semeio i taua mahana ra. E manaˈo taata mau â teie. Papu maitai, aita oia i haapii i te faatura i te Atua ra o Iehova. E o Iezebela, mai te aha to ˈna huru?

6. Eaha te poroi ta Iezebela i faatae ia Elia, e eaha te auraa o te reira?

⁶ Ua hae roa Iezebela! No to ˈna riri rahi, tono ihora oia i te hoê vea e parau ia Elia: “Ia na reira mai te mau atua ia ˈu, e ia rahi mai â, ia ore oe ia riro mai te hoê o ratou, ananahi â mai teie nei.” (Arii 1, 19:2) Tera te haamǎtaˈuraa riaria roa ˈˈe. Ua horeo Iezebela e ia pohe o ˈna iho ia ore noa ˈtu Elia e pohe ia ˈna ananahi no te tahoo i te mau peropheta a Baala. A feruri na ia Elia e taoto noa ra i roto i te hoê fare haihai i Iezereela i taua po vero ra, faaara ˈtura te vea a te arii vahine ia ˈna e faahiti atura i te mau parau riaria mau. Mai te aha ïa to ˈna huru?

7. Ua aha Elia i mua i te haamǎtaˈuraa a Iezebela?

⁷ Ua manaˈo anei Elia e ua oti te aroraa i te haamoriraa a Baala? Mai te peu e e, e taa oioi roa ia ˈna e ua hape o ˈna. Tera huru to Iezebela ra, tera noa iho â. Mea rahi roa te peropheta taiva ore tei haapohe-ê-na-hia na nia i ta ˈna faaueraa. E au ra e o Elia to muri iho. Ua aha Elia i mua i te haamǎtaˈuraa a Iezebela? Te parau ra te Bibilia: “Mǎtaˈu aˈera oia.” Ua manaˈonaˈo anei oia i te pohe riaria e tiai mai ra ia ˈna i te rima o Iezebela? Mai te peu e e, no reira iho â ïa o ˈna i toaruaru ai. Noa ˈtu eaha ta ˈna i manaˈo, ua taie o ˈna no te imi i te ora.—Arii 1, 18:4; 19:3.

8. (a) Ua aha Petero mai ia Elia? (b) Eaha te haapiiraa ta Elia e ta Petero e horoa mai ra?

⁸ E ere o Elia anaˈe te taata faaroo tei mǎtaˈu. O te aposetolo  Petero atoa i muri aˈe roa. I to Iesu faatiaraa ia ˈna ia haere atu ia ˈna ra na nia i te miti, haere tia ˈtura iho â Petero. I to ˈna râ hiˈoraa i te uˈana o te mataˈi, mǎtaˈu ihora oia e haamata ˈtura i te paremo. (A taio i te Mataio 14:30.) E haapiiraa faufaa ïa ta Elia e ta Petero e horoa mai ra: Eiaha e haamau i to tatou feruriraa i nia i te mau fifi atâta e riaria ˈi tatou. E tiatonu râ tatou i te Tumu o to tatou tiaturiraa e o to tatou puai.

9. A faataa na i to Elia taieraa e to ˈna huru aau.

⁹ No to ˈna riaria, taie ihora Elia i te pae apatoa tooa o te râ i Bere-seba 150 kilometera te atea. To pihai iho teie oire i te otia fenua o Iuda i te pae apatoa. I reira, vaiiho maira Elia i ta ˈna tavini e haere atura o ˈna anaˈe i te medebara “hoê aˈera mahana,” ia au i te faatiaraa. E nehenehe ïa tatou e manaˈo e e poipoi roa o ˈna i te taieraa, ma te ore paha e rave i te maa aore ra te tahi atu mau mea hinaaro-mau-hia. No to ˈna ahoaho e te riaria i haere ai oia na tera vahi aita roa ˈtu oia i matau i raro aˈe i te mahana puai. A topa riirii noa ˈi te mahana e moe roa ˈtura, ua paruparu roa oia. No te rohirohi iti rahi, parahi ihora oia i raro aˈe i te hoê raau retama. Tera anaˈe te tamǎrǔ iti i tera vahi medebara.—Arii 1, 19:4.

10, 11. (a) Eaha te auraa o ta Elia pure ia Iehova? (b) Ia au i te mau irava e vai ra, a faataa na i te ahoaho o te tahi atu mau tavini a te Atua.

¹⁰ Pure ihora Elia ma te ahoaho rahi e ani atura ia pohe oia, a na ô ai: “Aita hoi o ˈu maitai i hau i to tau mau metua.” Ua ite o ˈna e e repo noa to ˈna mau tupuna i roto i te apoo, eita ïa ta ratou e nehenehe e tauturu mai. (Koh. 9:10) I to ˈna manaˈo, mea faufaa ore o ˈna mai ia ratou. Tuô ihora ïa oia: “Atire.” Eaha hoi te apî ia ora noa oia?

¹¹ Eiaha tatou e maere ia ahoaho roa te hoê taata o te Atua. Mea rahi te tane e te vahine faaroo i roto i te Bibilia tei peapea roa, a hinaaro atu ai e pohe, mai ia Rebeka, Iakoba, Mose, e Ioba.—Gen. 25:22; 37:35; Num. 11:13-15; Ioba 14:13.

12. Ia ahoaho noa ˈtu oe, e nahea oe mai ia Elia?

¹² I teie mahana, te ora nei tatou i ‘te anotau ati rahi’ fifi roa. No reira ïa e rave rahi taata, tae noa ˈtu te mau tavini taiva  ore a te Atua, e ahoaho ai i te tahi taime. (Tim. 2, 3:1) Ia û noa ˈtu oe i teie tupuraa fifi roa, a pee i te hiˈoraa o Elia. A haamahora i to aau ia Iehova “te Atua no ˈna anaˈe te mahanahana.” (A taio i te Korinetia 2, 1:3, 4.) Ua tamahanahana anei o ˈna ia Elia?

13, 14. (a) Eaha ta Iehova i rave no te faaite i ta ˈna peropheta e ahoaho ra i to ˈna here e to ˈna haapeapea no ˈna? (b) No te aha e parau mahanahana ˈi e ua ite Iehova ia tatou taitahi, i to tatou atoa mau taotiaraa?

¹³ I to oe manaˈo, e nahea mai Iehova ia ite mai o ˈna mai te raˈi mai i ta ˈna peropheta here e tarava ra i raro aˈe i te hoê tumu retama i roto i te medebara, a ani atu ai ia pohe o ˈna? Mea ohie roa te pahonoraa. I to Elia varearaa i te taoto, tono maira Iehova i te hoê melahi, o tei faaara mǎrû atu ma te tapea ia ˈna, e tei parau atu ia tia mai e ia tamaa. Maa pane iti e maa pape ta te melahi i tuu atu i pihai iho ia ˈna. Ua haamauruuru anei Elia i te melahi? Ta te faatiaraa noa e parau mai ra, ua amu o ˈna i te pane, ua inu i te pape e ua taoto faahou. Peneiaˈe ua rohirohi roa o ˈna no te paraparau. Ua ite râ tatou e ua faaara faahou te melahi ia ˈna, i te aahiata paha. Parau faahou atura oia ia Elia ia tia mai e ia tamaa, mea atea roa hoi te vahi ta ˈna e haere.—Arii 1, 19:5-7.

¹⁴ Maoti te haroaroa no ǒ mai i te Atua ra, ua ite te melahi te haere ra Elia ihea. Ua ite atoa o ˈna e eita e maraa ia Elia tera tere atea roa na nia noa i to ˈna puai. Mea mahanahana mau â ia tavini i te hoê Atua tei ite hau aˈe ia tatou iho, i ta tatou mau fa e to tatou mau taotiaraa! (A taio i te Salamo 103:13, 14.) Ua itoito mai anei Elia i muri aˈe i to ˈna tamaaraa?

15, 16. (a) Ua aha mai Elia i to ˈna amuraa i te pane ta Iehova i horoa ˈtu? (b) E nafea Iehova e turu ai i ta ˈna mau tavini i teie mahana, e eaha te maitai e noaa mai?

¹⁵ Te taio nei tatou: “Ua tia aˈera oia, ua amu, e ua inu, e ua haere atura i te itoito o taua maa ra, e e piti taau aˈera te mahana, e piti taau hoi arui, e tae atura i Horeba i te mouˈa o te Atua.” (Arii 1, 19:8) Aita Elia i tamaa noa ˈˈe e 40 mahana, mai ia Mose e 600 matahiti na mua ˈtu, e mai ia Iesu 1 000 matahiti i muri aˈe ia Elia. (Exo. 34:28; Luka 4:1, 2) Aita taua maa ra i faaore i to Elia mau fifi atoa, ua faaitoito semeio râ ia ˈna. A feruri na ia Elia ruhiruhia e tautoo noa ra i te haere na te medebara, a mairi ïa mahana, a mairi ïa hebedoma, fatata hoê avaˈe e te afa!

¹⁶ I teie mahana, eita Iehova e horoa semeio i te maa na ta  ˈna mau tavini. E turu râ o ˈna ia ratou ma te horoa mai i te tahi mea faufaa roa ˈtu â: te maa varua ia piri to tatou taairaa e o ˈna. (Mat. 4:4) Te haapiiraa i ta ˈna Parau e te mau papai Bibilia no te ite o vai te Atua, mai te huru ra ïa e te amu ra tatou i te maa varua o te tauturu mai ia tamau â i te tavini ia ˈna. Eita te reira e faaore i to tatou mau fifi atoa, e tauturu mai râ ia faaruru i te mau tupuraa eita paha e noaa ia faaoromai. E aratai atoa te reira ia tatou i “te ora mure ore.”—Ioa. 17:3.

17. Tae atura Elia ihea, e no te aha e aamu faufaa ˈi to taua vahi ra?

¹⁷ Fatata e 320 kilometera to Elia haere-noa-raa, tae atura o ˈna i te mouˈa Horeba (mouˈa Sinai), e tomo atura i roto i te hoê ana. E aamu faufaa to tera mouˈa. Na mua roa ˈtu, i reira to Iehova faraa ˈtu ia Mose na roto i te hoê melahi i roto i te hoê raau taratara e ura ra. I reira atoa to Iehova faaauraa ia Iseraela i te faufaa o te ture ta ˈna i horoa ˈtu na roto ia Mose.

18, 19. (a) Eaha ta te hoê melahi a Iehova i ui ia Elia, e eaha te pahonoraa a Elia? (b) Eaha na toru tumu i toaruaru ai Elia?

¹⁸ I Horeba, tae maira ta Iehova “parau” na roto i te hoê melahi i te peropheta: “Te aha noa na oe i ǒ n[ei], e Elia?” Papu roa e mea ui-mǎrû-noa-hia ˈtu teie uiraa, ua faaite roa ˈtu hoi Elia i to ˈna huru aau. Na ô roa ˈtura oia: “Itoito noa na vau i te Atua sabaota ia Iehova: ua faarue te tamarii a Iseraela i ta oe parau, e ua huri i ta oe fata i raro, ua taparahi i te mau peropheta na oe i te ˈoˈe; e o vau nei, o vau anaˈe nei tei toe: e te imi mai nei ratou ia ˈu nei ia pohe.” (Arii 1, 19:9, 10) Te faaite mai ra teie mau parau a Elia e toru tumu i toaruaru ai oia.

¹⁹ A tahi, ua manaˈo o ˈna e mea faufaa ore ta ˈna ohipa. Noa ˈtu tera rahiraa matahiti i tavini ai o ˈna ia Iehova ma te “itoito noa,” a tuu ai i te iˈoa moˈa o te Atua e ta ˈna haamoriraa i nia ˈˈe i te mau mea atoa, ua ino noa ˈtu â te tupuraa ia hiˈo atu Elia. Te taiva noa ra e te orure hau noa ra te nunaa Iseraela ia Iehova. Te parare noa ˈtu ra te haamoriraa hape. A piti, ua moˈemoˈe Elia. “O vau anaˈe nei tei toe,” ta ˈna ïa i parau. Mai te huru ra e i roto i te nunaa Iseraela, o ˈna te taata hopea e tavini noa ra ia Iehova. A toru, ua mǎtaˈu Elia. Mea rahi roa te peropheta taiva ore tei haapohe-ê-na-hia, e ua papu roa ia ˈna e o ˈna to muri iho. E ere paha mea ohie no ˈna ia faaite roa i to ˈna huru aau, aita râ o ˈna i vaiiho i te teoteo aore ra te haama ia tapea ia ˈna. Ma te  haamahora i to ˈna aau i to ˈna Atua na roto i te pure, ua vaiiho mai o ˈna i te hiˈoraa maitai.—Sal. 62:8.

20, 21. (a) Eaha ta Elia i ite mata i te uputa o te ana? (b) I to Iehova faaiteraa i to ˈna puai, eaha ta ˈna i haapii ia Elia?

²⁰ Mea nafea to Iehova tamǎrûraa i to Elia mǎtaˈu e to ˈna tapitapi? Ua parau te melahi ia Elia ia tia i te uputa o te ana. Ua faaroo o ˈna, ma te ite ore i te ohipa e tupu. Farara maira te mataˈi rahi! Eita e ore e mea paaina maitai te mataˈi, ua parari hoi te mouˈa e te mato. A feruri na ia Elia e paruru ra i to ˈna mata, a tapea maitai ai i to ˈna ahu huruhuru meumeu a farara ˈi te mataˈi, a tautoo atoa ˈi i te tia noa a haamata ˈi te fenua i te aueue. I te otiraa ˈtu te aueueraa fenua, fa maira te hoê auahi rahi, o te faaotohe ia ˈna ia ore o ˈna e paapaa.—Arii 1, 19:11, 12.

²¹ Te haamanaˈo mai ra te faatiaraa e aita Iehova i roto i tera mau faaiteraa maere o te puai o te natura. Ua ite Elia e e ere Iehova i te tahi atua o te natura mai ia Baala, tei tiaturihia na e na ˈna e faatere i te mau ata, oia hoi na ˈna e faatopa i te ûa. O Iehova te Tumu o te puai hahano o te natura. Mea teitei aˈe râ o ˈna i ta ˈna atoa i poiete. Tae noa ˈtu te raˈi, eita o ˈna e ô i reira! (Arii 1, 8:27) Mea nafea teie mau tupuraa atoa i tauturu ai ia Elia? A haamanaˈo, te mǎtaˈu ra o ˈna. I te mea e na Iehova te Atua mana hope e turu ra ia ˈna, eiaha ïa o ˈna e mǎtaˈu ia Ahaba raua Iezebela!—A taio i te Salamo 118:6.

22. (a) Eaha ta Iehova i haapapu ia Elia? (b) No vai paha te “reo iti haihai”? (A hiˈo i te nota i raro i te api.)

²² Moe atura te auahi e mania ˈtura. Faaroo ihora Elia i te hoê “reo iti haihai,” tei titau ia ˈna ia paraparau faahou. a Faaite faahou atura oia i to ˈna tapitapi ia Iehova. Ua topa paha ïa to ˈna hau. Mea papu râ e ua topa ˈtu â to ˈna hau no ta te “reo iti haihai” i parau ia ˈna i muri iho. Ua haapapu Iehova ia ˈna e e ere roa ˈtu o ˈna i te mea faufaa ore. Ua faaite atu oia i ta ˈna i opua e rave no te faaore i te haamoriraa a Baala i Iseraela. Aita ïa i faufaa ore ta Elia i rave, e tupu iho â ta Iehova opuaraa. Hau atu â,  e ohipa â ta Elia i roto i taua opuaraa ra. E tono faahou Iehova ia ˈna no te tahi hopoia taa maitai.—Arii 1, 19:12-17.

23. Ua nahea Iehova i te moˈemoˈe o Elia?

²³ E te moˈemoˈe o Elia, ua nahea ïa Iehova? Na mua, ua faaue o ˈna ia Elia e faatahinu ia Elisaia ei peropheta o te mono ia ˈna i muri aˈe. E riro mai teie taata apî aˈe ia ˈna ei hoa e ei tauturu no Elia e rave rahi matahiti. Tera te tamahanahanaraa mau! I muri iho, ua faaite atu Iehova i te hoê parau apî oaoa roa: “[Ua] vaiiho râ vau i e hitu tausani taata o Iseraela no ˈu iho, o tei ore i tuu i te turi i raro ia Baala, e tei ore i hôˈi atu te vaha ia ˈna.” (Arii 1, 19:18) Eita e ore e ua mahanahana to Elia aau i te faarooraa e mea rahi roa te Iseraela aita i haamori ia Baala. E ere ïa o ˈna anaˈe te toe ra. Ia tamau â ïa Elia i ta ˈna taviniraa, a horoa ˈtu ai i te hiˈoraa maitai ei peropheta taiva ore aueue ore ia Iehova i taua tau peapea mau ra. Eaha râ paha Elia i te putapû i te faarooraa i teie mau parau faaitoito a te vea a Iehova, te “reo iti haihai” o to ˈna Atua.

24, 25. (a) Maoti te aha e faaroo ai tatou i te “reo iti haihai” o Iehova? (b) Eaha te haapapuraa e ua farii Elia i to Iehova tamahanahanaraa ia ˈna?

²⁴ Mea tano roa ia faahiahia tatou, mai ia Elia, i te puai o te natura. Te faaite maitai ra tei poietehia i te puai o te Atua poiete. (Roma 1:20) Te faaohipa noa ra Iehova i to ˈna puai rahi no te tauturu i ta ˈna mau tavini taiva ore. (Par. 2, 16:9) I roto râ i ta ˈna Parau, te Bibilia, e ite atu â ˈi tatou o vai o ˈna. (A taio i te Isaia 30:21.) Maoti te Bibilia e aˈo mai ai e e faaitoito mai ai Iehova, a haapapu atoa mai ai i to ˈna here ia tatou. E au te Bibilia i te hoê “reo iti haihai” o te aratai ia tatou.

²⁵ Ua farii anei Elia i to Iehova tamahanahanaraa ia ˈna i nia i te mouˈa Horeba? E. Ma te haamarirau ore, ua tavini â oia ia Iehova ei peropheta itoito e te taiva ore tei faahapa i te haamoriraa hape. E haafaufaa atoa anaˈe i ta te Atua mau parau, o te horoa mai i ‘te tamahanahanaraa o te parau i papaihia.’ (Roma 15:4) Mea na reira tatou e pee ai i to Elia faaroo.