Tau taime i muri aˈe i to Iesu faraa ˈtu i te mau aposetolo, ua faaoti o Petero i te haere e taiˈa i te miti o Galilea. Ua apiti atoa mai o Toma, Iakobo, Ioane e te tahi atu mau pǐpǐ. Ua taiˈa ratou i te po taatoa e aita hoê aˈe iˈa tei noaahia mai.

I te poipoi roa i muri iho, ua ite ratou i te hoê taata tei tia i tahatai. Ua tuô tera taata ia ratou: ‘Ua noaa anei ia outou maa iˈa?’ Ua pahono ratou ia ˈna: “Aita!” Ua parau atura te taata: “A taora i te upeˈa i te pae atau o te poti.” A na reira ˈi, ua î roa mai te upeˈa i e rave rahi iˈa e aita i haere ia ratou ia huti i te reira. Ua taa ˈtura ia Ioane e o Iesu tera taata e ua na ô oia: “O te Fatu!” Oioi Petero i te ouˈa i roto i te miti e i te ǎu no te haere i tahatai. Ua apee te tahi atu mau pǐpǐ ia ˈna na nia i te poti.

I to ratou taeraa ˈtu i tahatai, ua ite ratou i te faraoa e te iˈa e ama ra. Ua parau Iesu ia ratou ia afai mai maa iˈa tei noaahia no te tunu atu. I muri iho, ua parau oia: ‘A haere mai e tamaa.’

 I muri aˈe i to ratou tamaaraa, ua ani o Iesu ia Petero: ‘Mea here anei na oe ia ˈu hau aˈe i te ohipa ravaai?’ Ua pahono atura o Petero: ‘E, e te Fatu, ua ite oe e mea here na ˈu ia oe.’ Ua parau atura o Iesu: ‘A faaamu ïa i ta ˈu mau fanauˈa mamoe.’ Ua ani faahou â o Iesu: ‘Petero, mea here anei na oe ia ˈu?’ Ua pahono atura o Petero: ‘E te Fatu, ua ite oe e mea here na ˈu ia oe.’ Ua na ô atura Iesu: “A aupuru i ta ˈu mau fanauˈa mamoe.” I te toruraa o te taime, ua ui faahou o Iesu i taua noâ uiraa. Ua oto ihora o Petero e ua parau atu: ‘E te Fatu, ua ite oe i te mau mea atoa. Ua ite oe e mea here na ˈu ia oe.’ Ua na ô atura o Iesu: “A faaamu i ta ˈu mau fanauˈa mamoe.” I muri iho, ua faaue oia ia Petero: “A pee noa mai ia ˈu.”