Ua afai te mau tahuˈa rarahi ia Iesu i te aorai o Pilato, te tavana. Ua ani atura o Pilato ia ratou: ‘Eaha te ohipa ino ta tera taata i rave?’ Ua pahono ratou: ‘Ua parau oia e e arii oia!’ Ua ani atura Pilato ia Iesu: “O oe te Arii o te ati Iuda?” Ua pahono atura Iesu: “E ere ta ˈu Faatereraa arii no teie nei ao.”

I muri iho, ua afai Pilato ia Iesu i mua ia Heroda, te tia faatere o Galilea, no te ite e ohipa ino anei ta Iesu i rave. Aita Heroda i ite noa ˈˈe i te tahi ohipa ino a Iesu. Ua faahoˈi atura oia ia Iesu i mua ia Pilato. I muri iho, ua parau Pilato i te nunaa: ‘Aita o Heroda e o vau atoa i ite noa ˈˈe i te tahi hara a tera taata. E faatiamâ vau ia ˈna.’ Ua tuô atura te nahoa taata: ‘A haapohe ia ˈna! A haapohe ia ˈna!’ Ua tairi te mau faehau ia Iesu e te hoê hui, ua tutuha ratou i nia ia ˈna e ua taparahi ratou ia ˈna. Ua tuu ratou i te hoê hei taratara i nia i to Iesu upoo e ua faaooo ratou ia ˈna ma te parau: ‘Ia ora na te Arii o te ati Iuda.’ Ua parau faahou o Pilato i te nahoa taata: ‘Aita vau i ite noa ˈˈe i te tahi hara a teie taata.’ Ua tuô râ ratou: “I nia i te pou!” Ua tuu atura o Pilato ia Iesu i te mau faehau ia haapohehia oia.

Ua afai ratou ia Iesu i te hoê vahi parauhia Gologota. Ua patiti ratou ia ˈna i nia i te hoê pou e ua faatia ratou i te reira. Ua pure Iesu: ‘To ˈu Metua e, a faaore i ta ratou mau hapa, inaha aita ratou e ite ra i ta ratou e rave ra.’ Ua faaooo te mau taata ia Iesu ma te parau: ‘Mai te peu e o oe te Tamaiti a te Atua, a pou mai ïa i raro i tena pou! A faaora ia oe iho!’

Ua na ô atura hoê o na taata ohipa ino tei patitihia i pihai iho ia ˈna: “Haamanaˈo mai oe ia ˈu ia tae oe i roto i ta oe Faatereraa arii.” Ua fafau Iesu ia ˈna: “Ei te paradaiso oe e o vau atoa.” I te taperaa mahana, ua poirihia mai te fenua e toru hora i te maoro. I vai na vetahi o te mau pǐpǐ i pihai iho i te pou. Oia atoa o Maria, te metua vahine o Iesu. Ua faaue Iesu ia Ioane ia haapao ia Maria, mai te huru ra e o to ˈna atoa metua vahine.

I te pae hopea, ua parau Iesu: “Ua hope ia ˈu i te rave i ta oe i ani mai!” Ua piˈo ihora to ˈna upoo i raro e ua pohe atura oia. I taua taime ra, ua tupu te hoê aueueraa fenua puai mau. I roto i te hiero, ua mahae te  paruru teiaha tei faataa ê te Vahi Moˈa i te Vahi Moˈa Roa. Ua parau atura te hoê raatira faehau: ‘O te Tamaiti a te Atua iho â teie.’