E te mau taeae e tuahine here e:

E turai te here i te Atua e i te taata ia tatou ia “haere . . . e faariro i te taata o te mau nunaa atoa ei pǐpǐ ma te bapetizo ia ratou.” (Mat. 28:19, 20; Mar. 12:28-31) Mea puai mau te here. E nehenehe te reira e haaputapû i “te taata aau farii i te ora mure ore.”—Ohi. 13:48.

I na mua ˈ ˈe, e tamau aau noa tatou i te aparauraa tei faaineinehia e te mau papai tei operehia. I teie nei, titauhia ia tatou ia haamaitai i te huru aparauraa. E faaite tatou i te here ia vetahi ê ma te aparau i te mau tumu parau e anaanatae ai ratou. No reira, a faaau ohie e a haapao i te hinaaro o te taata. E nafea teie buka rairai e tauturu ai ia tatou?

I roto i teie buka rairai, te vai ra 12 haapiiraa o te faataa ra i te mau huru maitatai te titauhia ia faaohipa no te faaite i te here e no te faariro i te taata ei pǐpǐ. Ua niuhia te mau haapiiraa tataitahi i nia i te hoê aamu Bibilia i reira to Iesu e te tahi atu mau Kerisetiano o te senekele matamua i te faaiteraa i te hoê huru maitai i roto i te taviniraa. Te fa, e ere i te tamau-aau-raa i te mau aparauraa, i te imiraa râ i te ravea no te faaite i to tatou here i te taata. Noa ˈtu mea titauhia te huru maitai tataitahi i roto i ta tatou taviniraa, e hiˈopoa tatou e nafea te tahi o te mau huru maitatai e faufaahia ˈi ia haamata iho â tatou i te hoê aparauraa, ia hoˈi tatou e farerei aore ra ia faatere tatou i te haapiiraa Bibilia.

Ia hiˈopoa outou i te mau haapiiraa tataitahi, a feruri maitai e nafea outou e faaite ai i te huru maitai ia poro outou i te taata i to outou vahi. A haapuai i to outou here ia Iehova e i te taata. E tauturu mai teie here, hau atu i te tahi mau ravea taa ê, ia naea ia outou te fa e faariro i te taata ei pǐpǐ.

Te oaoa nei matou i te ohipa ma te tahoê e o outou. (Zeph. 3:9) Ia haamaitai rahi Iehova ia outou a tamau ai outou i te here e i te faariro i te taata ei pǐpǐ!