Aita Satani e ta ˈna mau demoni e hinaaro ra ia tavini oe i te Atua. Te hinaaro ra ratou e faafariu ê i te taata atoa i te Atua ahiri e tia ia ratou. Nafea ratou e rave ai i te reira? Te hoê ravea, o te haapaoraa hape ïa. (Korinetia 2, 11:13-15) E haapaoraa hape ia ore anaˈe e haapiihia te parau mau o te Bibilia. Te haapaoraa hape, mai te moni haavare ïa te huru, e au ra e mea mau, tera râ, mea faufaa ore. E nehenehe te reira e haafifi rahi ia oe.

Eita roa Iehova, te Atua parau mau e au i te haavare a te haapaoraa. I to Iesu parahiraa i te fenua nei, ua itehia te hoê pǔpǔ haapaoraa tei hinaaro e haapohe ia ˈna. Ua manaˈo ratou e mea tia ta ratou huru haamoriraa. Ua na ô ratou e: “Hoê anaˈe to matou Metua, o te Atua.” Ua farii anei o Iesu i tera parau? Aita! Ua na ô oia ia ratou e: “O te Diabolo to outou metua.” (Ioane 8:41, 44) I teie mahana, te manaˈo ra e rave rahi taata e te haamori ra ratou i te Atua, te tavini mau nei râ ratou ia Satani e ta ˈna mau demoni!—Korinetia 1, 10:20.

 Mai te hoê tumu raau ino e faahotu ra i te maa hotu ino, e faahotu mai te haapaoraa hape i te feia rave ohipa ino. Ua î roa te ao i te ati no te mau ohipa iino ta te taata e rave nei. Te vai ra te taiataraa, te aroraa, te eiâraa, te haavîraa, te taparahiraa taata e te maferaraa. E haapaoraa hoi ta te rahiraa e rave ra i teie mau ohipa iino, aita râ ta ratou haapaoraa e turai ra ia ratou ia rave i te mea maitai. Eita ratou e nehenehe e riro mai ei hoa no te Atua maori râ ia haapae ratou i te rave i te mau ohipa iino.—Mataio 7:17, 18.

Te haapii ra te haapaoraa hape ia pure te taata i te mau idolo. Te parau ra te Atua eiaha e pure i te idolo. Mea tia te reira. E au anei oe ia ore roa ˈtu te hoê taata e paraparau mai ia oe e paraparau noa râ o ˈna i to oe hohoˈa? E nehenehe anei teie taata e riro ei hoa mau no oe? Eita roa ˈtu. Te hinaaro nei Iehova ia paraparau mai te taata ia ˈna, eiaha i te hoê tii aore ra te hoê hohoˈa ora ore.—Exodo 20:4, 5.

Te haapii ra te haapaoraa hape e e fariihia ia haapohe i te taata i te tau tamaˈi. Ua parau Iesu e e itehia te here i rotopu i te mau hoa o te Atua. Eita tatou e haapohe i te taata herehia e tatou. (Ioane 13:35) E ere atoa i te mea tano ia haapohe tatou i te feia iino. I to te mau enemi o Iesu haereraa mai no te haru ia ˈna, aita oia i vaiiho i ta ˈna mau pǐpǐ ia aro no te paruru ia ˈna.—Mataio 26:51, 52.

Te haapii ra te haapaoraa hape e e haamauiuihia te feia iino i roto i te po auahi. Tera râ, te haapii ra te Bibilia e e aratai te hara i te pohe. (Roma 6:23) E Atua here o Iehova. E haamauiui anei te hoê Atua î i te here i te taata e a muri noa ˈtu? Eita roa ˈtu ïa! I te paradaiso, hoê noa ïa haapaoraa, te haapaoraa fariihia e Iehova. (Apokalupo 15:4) E mou roa te mau haapaoraa atoa niuhia i nia i te haavare a Satani.