No parau iho nei Iesu i te feia e faaroo ra ia ˈna i Perea e rave rahi “to mua, e riro ïa no muri e to muri no mua.” (Mataio 19:30) Ua haapapu oia i teie parau na roto i te faahohoˈaraa o te mau rave ohipa i te hoê faaapu vine:

“E au hoi te Faatereraa arii o te raˈi i te hoê fatu faaapu vine, o tei haere i rapae i te poipoi roa e imi i te rave ohipa no ta ˈna faaapu vine. I muri aˈe i to ˈna faaauraa e te mau rave ohipa e aufau ia ratou hoê denari i te mahana, tono atura oia ia ratou i roto i ta ˈna faaapu vine. Piri i te toru o te hora, haere faahou atura oia i rapae, ite ihora i te tahi mau taata e tia noa ra na te mahora, aore hoi e ohipa ta ratou, e parau atura ia ratou: ‘Outou atoa, a haere i roto i ta ˈu faaapu vine, e aufau atu vau i te moni tia na outou.’ Reva ˈtura ratou. Haere faahou atura oia i rapae piri i te ono o te hora e i te iva o te hora, e na reira atoa ˈtura. E piri i te 11 o te hora, haere faahou atura oia i rapae, ite ihora i te tahi atu mau taata e tia noa ra, e na ô atura: ‘Eaha outou e tia noa ˈi i ǒ nei e a mairi noa ˈtu te mahana ma te ore e rave i te ohipa?’ Parau maira ratou: ‘No te mea aore e taata i ani mai ia matou.’ Na ô atura oia: ‘Outou atoa, a haere i ta ˈu faaapu vine.’”—Mataio 20:1-7.

Eita e ore ua manaˈo te feia e faaroo ra i te Atua ra o Iehova i te faahitiraahia “te Faatereraa arii o te raˈi” e te “fatu faaapu vine.” Te faahiti ra te mau Papai ia Iehova mai te fatu o te hoê faaapu vine, o te faahohoˈa ra i te nunaa Iseraela. (Salamo 80:8, 9; Isaia 5:3, 4) E au te feia i roto i te faufaa tei faaauhia ia Iseraela, oia hoi te ture a Mose, i te mau rave ohipa i te faaapu vine. E ere râ ta Iesu faahohoˈaraa no tahito ra, no te hoê râ ohipa e tupu ra i to ˈna tau.

Te tanoraa, ia rohi noa te mau aratai haapaoraa, mai te mau Pharisea tei tamata aˈenei i te râmâ ia Iesu no nia i te faataaraa, i te tavini i te Atua. E au ratou i te mau rave ohipa mahana taatoa e manaˈo ra e aufauhia ratou hoê denari no hoê mahana ohipa.

No te mau tahuˈa e te tahi atu mau aratai haapaoraa, e au te mau ati Iuda riirii i te mau rave ohipa tau hora noa i te faaapu vine a te Atua, mea iti aˈe hoi ta ratou taviniraa i te Atua. I roto i ta Iesu faahohoˈaraa, o ratou te mau taata tei tihepuhia “piri i te toru o te hora” (hora 9 i te poipoi) aore ra i te ono, te iva e te hoê ahuru ma hoê o te hora (hora 5 i te ahiahi).

I parauhia na te mau tane e vahine e pee ra ia Iesu, eita roa te Atua e au ia ratou. (Ioane 7:49) Ta ratou ohipa na mua ˈˈe e rave rahi matahiti, e ravaai aore ra te tahi atu ohipa. E i Tetepa aore ra Atopa 29, ua tono mai “te fatu faaapu vine” ia Iesu e pii i teie mau taata riirii no te ohipa no ˈna ei pǐpǐ na te Mesia. O ratou “to muri” ta Iesu i faahiti, te mau rave ohipa i te faaapu vine i te 11 o te hora.

Faataa ˈtura Iesu i te ohipa e tupu a oti ai te mahana ohipa: “E ahiahi ihora, parau atura te fatu faaapu vine i ta ˈna tiaau ohipa: ‘A pii i te mau rave ohipa no te aufau ia ratou, te feia hopea na mua e tae atu i te feia matamua.’ Haere maira to te 11 o te hora, horoahia ˈtura na ratou tataitahi hoê denari. I to te feia matamua taeraa mai, manaˈo ihora ratou e e hau aˈe ta ratou moni, hoê noa râ denari tei horoahia ˈtu na ratou atoa. A rave ai ratou i ta ratou moni, amuamu aˈera ratou i te fatu faaapu vine e parau maira: ‘Ua rave teie feia hopea i te ohipa hoê noa hora, hoê â râ moni ta oe i aufau na ratou e na matou tei rohirohi i te ohiparaa i raro aˈe i te veavea o te mahana e ahiahi noa ˈtu!’ No te pahono râ i te hoê o ratou, na ô atura te fatu faaapu vine: ‘Aita vau i taviri ia oe. Aita anei tâua i faaau  no te hoê denari? A rave i ta oe moni e a haere. Te hinaaro nei au e horoa na te feia hopea hoê â moni ohipa e ta oe. E ere anei na ˈu e faaoti e faaohipa i ta ˈu mau taoˈa mai ta ˈu e hinaaro? Aore ra e mata nounou anei to oe no te mea e taata maitai au?’ Mea na reira ïa to muri e riro ai no mua, e to mua no muri.”—Mataio 20:8-16.

Ua uiui paha te mau pǐpǐ no nia i teie tuhaa hopea o ta Iesu faahohoˈaraa. E nafea te mau aratai haapaoraa ati Iuda tei manaˈo e o ratou “to mua,” e riro ai “no muri”? E nafea ta Iesu mau pǐpǐ e riro ai “no mua”?

Te mau pǐpǐ a Iesu, ta te mau Pharisea e te tahi atu i manaˈo e “no muri,” e riro iho â “no mua,” e haamaitai-rahi-hia ratou. Na roto i te pohe o Iesu, e faaruehia te nunaa Iseraela, e maiti hoi te Atua i te hoê nunaa apî, “te Iseraela o te Atua.” (Galatia 6:16; Mataio 23:38) Ua faahiti Ioane Bapetizo ia ratou i to ˈna faahitiraa i te bapetizoraa i te varua moˈa e tupu i muri aˈe. Na mua te feia “no muri” te fanaˈo i taua bapetizoraa ra e te haamaitairaa taa ê e riro ei ite no Iesu “e tae noa ˈtu i te hopea o te fenua.” (Ohipa 1:5, 8; Mataio 3:11) Ia taa i te mau pǐpǐ te tauiraa rahi ta Iesu e tohu ra, e taa ia ratou e e faaruru ratou i te riri rahi o te mau aratai haapaoraa, tei riro “no muri.”