A aˈo ai Iesu i ta ˈna mau pǐpǐ e nafea ia faaohipa i te mau taoˈa, te faaroo atoa mai ra te tahi mau Pharisea. Mea tano ia haafaufaa ratou i ta Iesu aˈoraa. No te aha? Mea “nounou moni” ratou. I to ratou faarooraa i ta Iesu parau, “hiˈo faaooo maira [ratou] ia Iesu.”—Luka 15:2; 16:13, 14.

Aita Iesu i taiâ, na ô atura râ: “Te faataata parau-tia nei outou ia outou i mua ia vetahi ê, ua ite râ te Atua eaha to roto i to outou aau. Ta te taata e haafaufaa rahi nei, mea faufau ïa i te aro o te Atua.”—Luka 16:15.

Mea maoro to te mau Pharisea haafaufaa-rahi-raahia e te taata. E huri râ te mataˈi. E faahaehaahia te feia haafaufaa-rahi-hia mea rahi ta ratou taoˈa, e tiaraa poritita e e tiaraa faaroo to ratou. E faateiteihia te feia riirii e hiaai ra i te mau mea pae varua. Ua faaite maitai Iesu e te tupu ra taua tauiraa rahi ra, a na ô ai:

“I faaite-haere-hia na te ture a Mose e te mau papai a te mau peropheta e tae roa aˈenei ia Ioane ra. Mai reira mai, o te Faatereraa arii a te Atua te faaite-haere-hia nei ei parau apî oaoa e ta te mau huru taata atoa e tapi nei. Ia mou noa ˈtu te raˈi e te fenua, e ore te hoê tuhaa iti o te ture a Mose e mou e ia hope roa i te tupu.” (Luka 3:18; 16:16, 17) E nafea ta Iesu i parau e faaite ai e tauiraa te tupu ra?

Te faahua parau ra te mau aratai haapaoraa ati Iuda e te haapao ra ratou i te ture a Mose. A haamanaˈo na i te araararaa te mata o te hoê tane ia Iesu i Ierusalema, ua parau te mau Pharisea ma te faaoru: “E pǐpǐ [matou] na Mose. Ua ite matou e ua paraparau te Atua ia Mose.” (Ioane 9:13, 28, 29) I horoahia na te ture na roto ia Mose, no te aratai i te feia haehaa i te Mesia ra, oia hoi ia Iesu. Ua parau Ioane Bapetizo e o Iesu te Arenio a te Atua. (Ioane 1:29-34) Na roto i ta Ioane taviniraa i faaroo ai te mau ati Iuda haehaa, te feia riirii iho â râ, i te parau o “te Faatereraa arii a te Atua.” Te vai ra iho â te “parau apî oaoa” no te feia atoa e hinaaro ia faaterehia ratou e te Faatereraa arii a te Atua, a fanaˈo atu ai i te mau haamaitairaa.

Ua aratai te ture a Mose i te taata i te Mesia ra, a ore atu ai e titau-faahou-hia ia haapao i te reira. Ei hiˈoraa, i faatia na te ture a Mose ia faataa te hoê tane faaipoipo i ta ˈna vahine no te mau tumu atoa. Ua faataa râ Iesu e “te tane o te faataa i ta ˈna vahine faaipoipo, a faaipoipo atu ai i te tahi atu, e faaturi ïa. E te tane o te faaipoipo i te hoê vahine ua taa raua ta ˈna tane faaipoipo, e faaturi ïa.” (Luka 16:18) Papu roa, ua riri roa te mau Pharisea mea au na ratou e haamau i te mau faatureraa no te mau mea atoa.

Faatia ˈtura Iesu i te hoê faahohoˈaraa e haapapu ra i te tauiraa rahi e tupu ra. No nia ïa e piti tane, e taui roa to raua tiaraa, aore ra huru tupuraa. A haamanaˈo e te faaroo atoa ra te mau  Pharisea nounou moni e haafaufaa-rahi-hia ra e te taata.

Ua na ô Iesu: “Te vai ra te hoê taata taoˈa rahi, tei oomo noa na i te ahu lino vareau moni rahi, a oaoa ˈi i te mau mahana atoa i to ˈna oraraa fanaˈo. Teie râ, e vaiihohia na te hoê taata veve o Lazaro te iˈoa i te uputa o te fare o te taata taoˈa rahi. Ua î roa to ˈna tino i te aai. Hiaai atoa ihora oia e amu i te huˈahuˈa maa e topa mai nia mai te amuraa maa a te taata taoˈa rahi. Haere atoa maira te urî e mitimiti i to ˈna tino aai.”—Luka 16:19-21.

Mea nounou moni te mau Pharisea. Mea papu maitai ïa o vai ta Iesu e faahohoˈa ra i teie “taata taoˈa rahi.” Mea au atoa na teie mau aratai haapaoraa ati Iuda e oomo i te ahu moni rahi. Hau atu â i ta ratou faufaa, e au ra e mea rahi ta ratou haamaitairaa. Te faahohoˈaraa ia ratou i te hoê tane e ahu arii vareau to ˈna, te faaitehia ra ïa to ratou tiaraa haamaitaihia, e te ahu lino uouo i to ratou huru faahua parau-tia.—Daniela 5:7.

E nafea teie mau aratai taoˈa rahi faaoru e hiˈo ai i te feia riirii? Mai te mau amahaareta, aore ra taata no te fenua (repo), aita i ite i te ture a Mose e eita atoa e tano ia haapiihia ˈtu. (Ioane 7:49) Te faahohoˈa ra te reira i te huru tupuraa o te “taata veve o Lazaro te iˈoa,” e hiaai ra e amu i “te huˈahuˈa maa e topa mai nia mai te  amuraa maa a te taata taoˈa rahi.” Mea hiˈo-ino-hia te feia riirii, mai ia Lazaro ua î roa to ˈna tino i te aai, mai te huru ra e te maˈihia ra ratou i te pae varua.

Mea maoro te vai-noa-raa teie huru tupuraa peapea, ua ite râ Iesu e ua tae i te taime e taui roa ˈi te reira no te feia e au i te taata taoˈa rahi e te feia e au ia Lazaro.

Faataa ˈtura Iesu i teie tauiraa rahi: “I muri aˈe, pohe atura te taata veve e hopoihia ˈtura oia e te mau melahi i pihai iho ia Aberahama. Pohe atoa ˈtura te taata taoˈa rahi e hunahia ˈtura. I te Apoo, a mauiui roa ˈi oia, hiˈo aˈera oia i nia e ite maira ia Aberahama i te atea ê e ia Lazaro i pihai iho ia Aberahama.”—Luka 16:22, 23.

Ua ite te feia e faaroo ra e mea maoro Aberahama i te poheraa e to roto oia i te Apoo. Te haapapu ra te mau Papai e aita hoê aˈe taata i roto i te Apoo e nehenehe e ite aore ra e paraparau, o Aberahama atoa ïa. (Koheleta 9:5, 10) Eaha râ ta teie mau aratai haapaoraa i manaˈo no nia i te auraa o ta Iesu faahohoˈaraa? Eaha ta Iesu e faaite ra no nia i te feia riirii e te mau aratai haapaoraa nounou moni?

No faaite noa mai nei Iesu i taua tauiraa ra ma te parau e “i faaite-haere-hia na te ture a Mose e te mau papai a te mau peropheta e tae roa aˈenei ia Ioane ra. Mai reira mai, o te Faatereraa arii a te Atua te faaite-haere-hia nei ei parau apî oaoa.” Na roto ïa i te pororaa a Ioane e a Iesu Mesia i pohe ai Lazaro e te taata taoˈa rahi, ei auraa parau, i to raua huru tupuraa na mua ˈˈe, a ite atu ai i te huru tupuraa apî i te aro o te Atua.

Mea maoro to te feia haehaa aore ra riirii faaereraahia i te mau mea pae varua. Ua tauturuhia râ ratou, a farii atu ai i te poroi o te Faatereraa arii i porohia e Ioane Bapetizo na mua, e Iesu i muri iho. I amu noa na ratou i “te huˈahuˈa maa e topa mai nia mai te amuraa maa” pae varua a te mau aratai haapaoraa. I muri iho te faatamaahia ra ratou i te pue parau mau faufaa roa o te mau Papai, te mau mea faahiahia iho â râ ta Iesu e faataa ra. Mai te huru ra e tiaraa haamaitaihia to ratou i te aro o te Atua ra o Iehova.

Aita râ te mau aratai haapaoraa taoˈa rahi e mana to ratou i farii i te poroi o te Faatereraa arii ta Ioane i faaite e ta Iesu i poro haere. (Mataio 3:1, 2; 4:17) Ua riri aore ra ua mauiui ratou no taua poroi ra, o te tohu ra i te haavaraa e au i te auahi a te Atua. (Mataio 3:7-12) E pee to ratou riri aore ra mauiui ahani Iesu e ta ˈna mau pǐpǐ i faaea i te faaite i te poroi a te Atua. E au  taua mau aratai ra i te taata taoˈa rahi o te faahohoˈaraa, o te na ô: “To ˈu metua Aberahama, aroha mai ia ˈu, e a tono mai ia Lazaro ia tuu rii noa ˈˈe i to ˈna manimani rima i roto i te pape, a faatoˈetoˈe mai ai i ta ˈu arero, te mauiui nei hoi au i roto i teie auahi ura.”—Luka 16:24.

Aita râ te reira i tupu. Aita te rahiraa o te mau aratai haapaoraa i taui. Aita ratou i “faaroo ia Mose e te mau peropheta,” a arataihia ˈtu ai ratou ia farii ia Iesu ei Mesia e ei Arii na te Atua. (Luka 16:29, 31; Galatia 3:24) Aita atoa ratou i faahaehaa ia ratou, a pee atu ai i te hiˈoraa o te feia riirii tei farii ia Iesu e o te haamaitaihia ra e te Atua. Eita ta te mau pǐpǐ a Iesu e nehenehe e taiva aore ra e faahuru ê i te parau mau ia mauruuru mai te mau aratai haapaoraa aore ra ia pee to ratou riri aore ra mauiui. I roto i ta ˈna faahohoˈaraa, te faataa ra Iesu i te reira i roto i ta te “metua Aberahama” i parau i te taata taoˈa rahi:

“Tamaiti, a haamanaˈo i te mau maitai rahi tei noaa ia oe i to oe oraraa na, area Lazaro te mauiui rahi ïa. I teie nei râ, te tamahanahanahia ra oia i ǒ nei, o oe râ, te mauiui nei ïa. Ua tuu-atoa-hia te hoê area rahi i rotopu ia matou e ia outou, ia ore to ǒ nei e tae i ǒ outou, e ia ore to ǒ atu e tae mai i ǒ matou.”—Luka 16:25, 26.

Mea tano roa taua tauiraa rahi ra! Te huri ra te mataˈi no te mau aratai haapaoraa faaoru e no te feia haehaa tei farii i ta Iesu zugo. I te pae varua, te tamahanahanahia ra e te faatamaahia ra teie feia haehaa. (Mataio 11:28-30) Ua ite-maitai-hia ˈtu â teie tauiraa tau avaˈe i muri iho i to te faufaa i faaauhia ia Iseraela, te ture a Mose, monoraahia e te faufaa apî. (Ieremia 31:31-33; Kolosa 2:14; Hebera 8:7-13) I to te Atua niniiraa mai i te varua moˈa i te Penetekose 33, o te mau pǐpǐ a Iesu mau â ta te Atua i haamaitai, eiaha râ te mau Pharisea e to ratou mau hoa, te tahi atu mau aratai haapaoraa.