E haapiiraa faufaa ta Iesu i horoa a tamaa ˈi oia i ǒ te hoê aratai Pharisea. A tamau noa ˈi Iesu i to ˈna tere i Ierusalema, te na muri ra e rave rahi ia ˈna. No te aha? Te hinaaro mau ra anei ratou e riro ei pǐpǐ na ˈna, noa ˈtu eaha te titauhia?

A haere noa ˈi ratou, faahiti atura Iesu i te hoê parau i huru ê ai paha vetahi: “Te taata e pee mai ia ˈu, ia rahi aˈe ïa to ˈna here ia ˈu i to ˈna metua tane, to ˈna metua vahine, ta ˈna vahine faaipoipo, ta ˈna mau tamarii, to ˈna mau taeae, to ˈna mau tuahine, ia ˈna iho atoa [aore ra to ˈna iho ora]. Aita anaˈe, eita e tia ia ˈna ia riro ei pǐpǐ na ˈu.” (Luka 14:26) Eaha te auraa o teie mau parau?

Aita Iesu e parau ra e eiaha te feia e pee ra ia ˈna ia here i to ratou mau fetii, eiaha râ tera here fetii ia hau aˈe i to ratou here ia ˈna. Ia ore, eita ta ˈna mau pǐpǐ e farii i te titauraa faufaa roa mai te tane no faaipoipo noa ˈtu ra i roto i te faahohoˈaraa o te tamaaraa. (Luka 14:20) Te parauhia ra e “aore Lea i herehia” e Iakoba te tupuna o te ati Iuda, mea here râ na ˈna ia Rahela, oia hoi mea iti aˈe to ˈna here ia Lea i to ˈna tuahine ia Rahela.—Genese 29:31.

Aita Iesu e faaue ra i te feia e pee ra ia ˈna ia tâuˈa ore i to ratou iho ora. E here rahi râ te pǐpǐ mau a Iesu ia ˈna, a ineine ai i te pohe ia titauhia. E hopoia mau â te riroraa ei pǐpǐ na te Mesia. Eiaha te reira ia rave-hanoa-hia, ma te ore e feruri maite.

E nehenehe te pǐpǐ e roohia e te ati e te hamani-ino-raa, ua parau hoi Iesu: “Te taata o te ore e amo i ta ˈna pou haamauiuiraa, a pee mai ai ia ˈu, eita ïa e tia ia riro ei pǐpǐ na ˈu.” (Luka 14:27) Ia ineine iho â te pǐpǐ mau a Iesu i te faaruru i te faainoraa, mai ia Iesu. Ua parau atoa Iesu e e pohe oia i te rima o to ˈna mau enemi.

Ia feruri maitai ïa te taata e rave rahi e ratere ra e o Iesu i te auraa mau o te riroraa ei pǐpǐ na te Mesia. Haapapu maitai atura Iesu i te reira na roto i te hoê faahohoˈaraa: “O vai o outou, ia hinaaro oia e patu i te hoê pare, e ore e parahi na mua, a numera ˈtu ai i te haamâuˈaraa no te ite e navai anei ta ˈna moni no te faaoti i te paturaa? Ia haamau noa ˈtu oia i te niu, a ore atu ai râ e oti ia ˈna, e faaooo mai ïa te taata atoa e hiˈo mai ia ˈna.” (Luka 14:28, 29) Hou ïa te feia e ratere ra e o Iesu i Ierusalema a riro ai ei pǐpǐ na ˈna, ia faaoti papu ratou i te amo maite i teie hopoia. Haapapu atura oia i teie manaˈo na roto i te tahi atu faahohoˈaraa:

“O vai ïa arii 10 000 faehau ta ˈna o te haere ra e faaû i te tahi atu arii e 20 000 faehau ta ˈna, e ore e parahi na mua, a uiui atu ai ia vetahi ê no te ite e upootia anei oia? Mai te peu e eita, e tono ïa oia i te tahi mau tia e ani i te hau i tera arii tei te atea ê â hoi. Oia atoa, te  taata i rotopu ia outou o te ore e haapae i ta ˈna faufaa atoa, e ore ïa e tia ia riro ei pǐpǐ na ˈu.”—Luka 14:31-33.

E ere teie mau parau ta Iesu no te taata anaˈe e na muri ra ia ˈna i to ˈna tere, no te taata atoa râ e haapiihia ra e te Mesia, ia rave ratou i ta ˈna i parau iho nei ma te aau tae. Mea titauhia ïa ia ineine ratou i te haapae i ta ratou mau faufaa e tae roa ˈtu i to ratou ora, no te riro ei pǐpǐ na ˈna. Mea tia ïa ia feruri e ia pure no te reira.

I muri iho, faahiti faahou atura Iesu i te hoê parau ta ˈna i faahiti aˈena i roto i te Aˈoraa i nia i te mouˈa o “te miti o te fenua” ta ˈna mau pǐpǐ. (Mataio 5:13) Ua hinaaro paha oia e parau e, mai te miti e rapaau i te maa, oia atoa ïa te huru o ta ˈna mau pǐpǐ i nia i te taata, ia paruru ratou i te taata ia ore ia mutu to ratou taairaa e o Iehova e ia ore to ratou haerea ia ino. A piri ai râ te hopea o ta ˈna taviniraa, na ô atura oia: “Mea maitai roa iho â te miti. Ia maaro râ te reira, e nafea ïa e avaava faahou ai?” (Luka 14:34) Ua ite te feia e faaroo ra ia ˈna e te vai ra te miti mea viivii, ua anoihia hoi i te repo, a faufaa ore atu ai.

Te faaite ra ïa Iesu e eiaha atoa te aau tae o te feia mea maoro i te riroraa ei pǐpǐ na ˈna ia paruparu, aˈunei ratou e faufaa ore ai, mai te miti i maaro. E riro ratou ei faaoooraa na to te ao. E ere atoa ratou i te farii maitai a te Atua, a faaino atu ai i to ˈna iˈoa. Haapapu atura Iesu i te faufaaraa ia ape i te reira: “E tariˈa to ˈna no te faaroo, a faaroo ïa.”—Luka 14:35.