Mea faatura roa Iesu ia Ioane Bapetizo. Eaha râ te manaˈo o te rahiraa ia Ioane? Te na ô ra Iesu: “E faaau vau i teie nei uˈi ia vai? E au ratou i te mau tamarii rii e parahi ra na te mahora e e pii ra i te tahi atu mau tamarii, a na ô ai: ‘Ua faataˈi matou i te vivo no outou, aita râ outou i ori. Ua himene matou ma te oto, aita râ outou i tupaipai i to outou ouma.’”—Mataio 11:16, 17.

Eaha te auraa o ta Iesu mau parau? Faataa maitai ihora oia: “Ua haere mai Ioane e aita i tamaa e i inu i te uaina, ua parau râ te taata: ‘E demoni to ˈna.’ Ua haere mai te Tamaiti a te taata nei e ua tamaa e ua inu, ua parau râ te taata: ‘Inaha, mea tamaa roa teie taata ma te haapuupuu, mea inu i te uaina, e hoa no te feia titau tute e te feia rave hara.’” (Mataio 11:18, 19) E oraraa haihai noa to Ioane te hoê Nazira, a ore ai i inu i te uaina. Ua parau râ teie nei uˈi e e demoni to ˈna. (Numera 6:2, 3; Luka 1:15) O Iesu râ, i ora na oia mai te tahi atu mau taata. I tamaa na oia e i inu atoa na ma te au noa. Ua parihia râ oia i te tamaa rahi e i te inu hua. Eita iho â te taata e mauruuru hanoa.

Ua faaau Iesu i te uˈi i te mau tamarii rii na te mau mahora aita i hinaaro e ori a faataˈi ai te tahi atu mau tamarii i te vivo, aita atoa i oto a auê ai te tahi atu. Na ô ihora Iesu: “Na te mau ohipa parau-tia ta te hoê taata e rave e haapapu e e taata paari oia.” (Mataio 11:16, 19) Oia mau, na te mau “ohipa,” oia hoi te haapapuraa a Ioane e a Iesu, e faaite mai e mea hape te mau parau i parihia ˈi raua.

I muri iho i to Iesu faataaraa i te uˈi ei uˈi tâuˈa ore, faahapa ihora oia i na oire o Korazina, Betesaida e Kaperenaumi, i reira hoi to ˈna raveraa i te mau ohipa mana. Ua parau Iesu e ahiri oia i rave i taua mau ohipa mana ra i Turia e Sidona i Phenikia, ua tatarahapa ïa to taua na oire ra. Ua faahiti atoa oia ia Kaperenaumi, i reira hoi oia i te raveraa i ta ˈna taviniraa. I reira atoa, aita te rahiraa o te taata i tâuˈa mai. Na ô ihora oia no taua oire ra: “Mea mâmâ aˈe te utua a te fenua o Sodoma i ta outou i te Mahana Haavaraa.”—Mataio 11:24.

Arue ihora Iesu i to ˈna Metua, o te huna i te pue parau mau pae varua faufaa roa “i te feia paari e te maramarama,” o te faaite râ i te reira i te feia haehaa e au i te tamarii rii. (Mataio 11:25) Faatae ihora oia i teie titau-manihini-raa au mau i taua feia haehaa ra: “A haere mai ia ˈu nei outou atoa e rohirohi e e teimaha nei, na ˈu e tamahanahana ia outou. A rave mai i ta ˈu zugo i nia ia outou e ia haapiihia outou e au, mea mǎrû hoi au e te haehaa o te aau, e ite ïa outou i te tamahanahanaraa. Mea mǎrû hoi ta ˈu zugo, e mea mâmâ ta ˈu hopoia.”—Mataio 11:28-30.

Mea nafea Iesu i horoa ˈi i te tamahanahanaraa? Ua faateimaha te mau aratai haapaoraa i te taata i te mau tutuu, mai te mau faatureraa etaeta roa no nia i te Sabati. Ua tamahanahana râ Iesu i taua mau taata ra ma te haapii atu i te parau mau no nia i te Atua, aita roa ˈtu taua mau tutuu ra i roto. Ua faaite atoa oia e nafea te feia e haavîhia ra e te faatereraa a te mau tia poritita e te feia atoa e teimaha ra no te hara, e fanaˈo ai i te tamǎrûraa. Ua faaite roa ˈtu Iesu e nafea ta ratou mau hara e faaorehia ˈi e e nafea ratou e faahau ai e te Atua.

Te feia atoa e farii i te zugo mǎrû a Iesu, e nehenehe ïa e pûpû ia ratou i te Atua, to tatou Metua aumihi e te aroha hamani maitai i te raˈi, a tavini atu ai ia ˈna. E ere i te hopoia teimaha, e ere roa ˈtu hoi mea teimaha te mau titauraa a te Atua.—Ioane 1, 5:3.