HAAPIIRAA 29
Eaha te tupu ia pohe tatou?
Ua pohe aˈena anei hoê tei herehia e oe? Mea papu, e taime fifi mau teie. E uiui paha ïa oe: ‘Eaha te tupu ia pohe tatou? E ite faahou ra anei tatou te feia tei herehia e tatou?’ E ite mai ïa oe i roto i teie e i to muri nei haapiiraa i te mau pahonoraa tamahanahana mau ta te Bibilia e horoa ra.
1. Eaha te tupu ia pohe tatou?
Ua faaau Iesu i te pohe i te taoto. Ia varea roa te hoê taata i te taoto, aita oia e haapao i te ohipa e tupu ra ati aˈe ia ˈna. E nafea ïa te pohe i faaauhia ˈi i te taoto? Ia pohe te hoê taata, eita oia e ite i te oto e te mauiui. Te parau ra te Bibilia: “Aita . . . te feia pohe i ite i te tahi mea.”—A taio i te Koheleta 9:5.
2. Eaha te faufaaraa ia ite i te parau mau no nia i te pohe?
I teie mahana, e rave rahi taata te mǎtaˈu nei i te pohe e oia atoa i te feia pohe! Tera râ, e ite mai oe i te tamahanahanaraa i ta te Bibilia e parau ra no nia i te pohe. Ua parau Iesu: “Na te parau mau e faatiamâ ia outou.” (Ioane 8:32) Eaha ta te tahi mau haapaoraa e haapii ra? Te haapii ra ratou e e ora te tahi tuhaa i muri aˈe a pohe ai te hoê taata. E ere tera ta te Bibilia e haapii ra. Ia pohe te hoê taata, eita oia e mauiui. E no te mea aita ratou e ite eaha te tupu ati aˈe ia ratou, aita atoa ta ratou e nehenehe e haamauiui mai. Aita ïa e faufaa ia haamori i te feia pohe aore ra e rave i te tahi mea ia ore ratou ia riri mai ia tatou aore ra e faaoti i te hoê pure no ratou.
Te parau nei te tahi mau taata e e nehenehe ta ratou e paraparau i te feia pohe. Aita roa ˈtu. Mai ta tatou i haapii mai nei, “aita . . . te feia pohe i ite i te tahi mea.” O vai ïa ta ratou e paraparau ra? Te paraparau ra ratou i te mau demoni o te faahua faaite ra e o ratou te feia pohe. No reira, e paruru mai te iteraa i te parau mau no nia i te pohe ia tatou. Te faaara mai ra Iehova ia tatou no nia i te tamataraa i te paraparau i te feia pohe. Ua ite hoi oia e nehenehe te paraparauraa i te mau demoni e haamauiui ia tatou.—A taio i te Deuteronomi 18:10-12.
A FAAHOHONU ATU Â
A ite hau atu â i ta te Bibilia e haapii ra no nia i te feia pohe, e a haapuai i to oe faaroo i te hoê Atua here o te ore roa e haamauiui i te feia pohe.
3. A haapii i te tupuraa mau o te feia pohe
Na te ao atoa nei, ua rau te tiaturiraa a te taata no nia i te tupu ia pohe anaˈe tatou. Te mea papu, e ere teie mau tiaturiraa i te mea mau.
-
Eaha te tiaturiraa no nia i te feia pohe ta oe i ite i to oe vahi?
No te ite eaha ta te Bibilia e haapii ra, a pata i te VIDEO.
A taio i te Koheleta 3:20, e a aparau i teie mau uiraa:
-
Ia au i teie irava, eaha te tupu ia pohe te hoê taata?
-
E ora anei te tahi tuhaa o te hoê taata ia pohe oia?
Te faaite ra te Bibilia no nia i te pohe o Lazaro, te hoê hoa piri o Iesu. A taio i te Ioane 11:11-14, a tapao na eaha ta Iesu i faahiti no nia ia Lazaro. E a aparau i teie mau uiraa:
-
Ua faaau Iesu i te pohe i te aha?
-
Eaha ta teie faaauraa e parau ra no nia i te pohe?
-
Eaha to oe manaˈo no nia i ta te Bibilia e parau ra no nia i te pohe?
4. E faufaahia tatou i te parau mau no nia i te pohe
E tiamâ mai tatou i te iteraa i te parau mau no nia i te feia pohe. A taio i te Koheleta 9:10, e a aparau i teie uiraa:
-
E nehenehe anei te feia pohe e haamauiui ia tatou?
E paruru atoa mai te parau mau no ô mai i te Bibilia i te tiaturiraa e e titauhia ia rave tatou i te tahi mea ia ore te feia pohe ia riri mai aore ra ia haamori ia ratou. A taio i te Isaia 8:19 e te Apokalupo 4:11, e a aparau i teie uiraa:
-
No oe, eaha to Iehova huru no te hoê taata e haamori ra aore ra e ani ra i te tauturu a te feia tei pohe?
E faatiamâ mai te parau mau no nia i te pohe ia tatou i te mau peu ta Iehova e ore e au
5. E tamahanahanahia tatou i te haapii i te parau mau no nia i te pohe
E rave rahi taata o tei haapii e ia pohe ratou, e haamauiuihia ratou no te mau mea ta ratou i rave na mua ˈˈe. Mea tamahanahana râ ia ite e eita te taata e haamauiuihia ia pohe ratou, oia atoa te mau taata o tei rave i te mau ohipa ino mau. A taio i te Roma 6:7, e a aparau i teie uiraa:
-
Mai te peu, mai ta tatou i taio i roto i te Bibilia, ua matara mai te taata tei pohe i ta ˈna hara, e manaˈo anei oe e e haamauiuihia te hoê taata tei pohe no te hara ta ˈna i rave?
Hau atu â tatou i te haapii no nia ia Iehova, hau atu â tatou i te ite e eita roa oia e haamauiui i te feia tei pohe. A taio i te Deuteronomi 32:4 e te Ioane 1, 4:8, e a aparau i teie mau uiraa:
-
Mai ta teie nau irava e faahiti ra, e farii anei te hoê Atua tera to ˈna mau huru maitatai i te haamauiui i te feia tei pohe?
-
E ere anei i te mea tamahanahana ia ite i te parau mau no nia i te feia pohe? No te aha?
TE MANAˈO O VETAHI: “Te mǎtaˈu nei au i te tupu ia pohe au.”
-
Eaha te mau irava Bibilia tamahanahana mau o ta oe e nehenehe e faaite i te tahi atu taata?
HAAPOTORAA
Ia pohe te hoê taata, ua oti ïa to ˈna parau. Eita te feia pohe e mauiui, e eita atoa ratou e haamauiui i te feia e ora nei.
Haamanaˈoraa
-
Eaha te tupu ia pohe tatou?
-
E nafea tatou e faufaahia ˈi i te parau mau no nia i te pohe?
-
E nafea tatou e tamahanahanahia ˈi i te haapiiraa i te parau mau no nia i te pohe?
HIˈOPOA
A hiˈo eaha te auraa mau o te taˈo “nephe” i roto i te Bibilia.
“E tuhaa anei te ora mai ia pohe te hoê taata?” (Tumu parau natirara)
A hiˈo te faaohipa ra anei te Atua i te po auahi no te haamauiui i te feia ino.
E titauhia anei ia tatou ia mǎtaˈu i te feia pohe?
A hiˈo mea nafea te hoê taata i te tamahanahanaraahia i to ˈna iteraa eaha te parau mau ia pohe tatou.
E au atoa outou . . .
UIRAA A TE TAATA
Eaha te ravehia i te hoê haapiiraa Bibilia pûpûhia na te mau Ite no Iehova?
Maoti teie aparauraa Bibilia tamoni ore pûpûhia na te mau Ite no Iehova, nehenehe outou e faaohipa i ta outou iho Bibilia. A titau atoa mai i to outou utuafare aore ra hoa.
