1-3. Eaha te tupu ia afai mai te mau metua i ta ratou mau tamarii ia Iesu ra, e eaha ta teie tupuraa i faaite no nia ia Iesu?

 UA ITE Iesu e te fatata oioi mai ra te hopea o to ˈna oraraa i nia i te fenua. Tau hebedoma noa to ˈna e toe ra, e mea rahi roâ te ohipa! Te poro ra oia e ta ˈna mau aposetolo i Perea, te hoê tuhaa fenua i te pae hitia o te râ i te anavai Ioridana. Te haere tia ˈtu ra ratou i te pae apatoa i Ierusalema, i reira Iesu e apiti ai i ta ˈna oroa Pasa hopea roa.

² I muri aˈe i ta Iesu aparauraa puai e te tahi mau aratai haapaoraa, te huehue rii ra. Te hopoi mai ra te taata i ta ratou mau tamarii ia ite ratou ia ˈna. E au ra e ua rau te matahiti o te mau tamarii, no te mea te faahiti ra Mareko ia ratou ma te hoê â taˈo ta ˈna i faaohipa na mua ˈtu no te faataa i te hoê tamarii 12 matahiti, area o Luka râ, te faaohipa ra ïa i te hoê taˈo e nehenehe e hurihia ei “tamarii.” (Luka 18:15; Mareko 5:41, 42; 10:13) Parau mau, i te mau vahi atoa e tamarii to reira, e pinepine mea maniania e mea huehue roa. E aˈo te mau pǐpǐ a Iesu i te mau metua, ma te manaˈo paha e eiaha te mau tamarii e haapeapea i te Fatu no te mea e mea rahi ta ˈna ohipa. Eaha ta Iesu e rave?

³ Ia ite oia i te ohipa e tupu ra, e inoino Iesu. Ia vai? Te mau tamarii? Te mau metua? Eita, i ta ˈna mau pǐpǐ! E na ô oia e: “A vaiiho noa i te mau tamarii ia haere mai ia ˈu nei, eiaha e tapea ˈtu, no te feia hoi mai teie mau tamarii te Faatereraa arii a te Atua. Oia mau ta ˈu e parau atu: Te taata e ore e farii i te Faatereraa arii a te Atua mai te hoê tamarii, eita roa ˈtu ïa e ô i roto.” I muri iho e ‘tauahi Iesu’ i te mau tamarii a haamaitai atu ai ia ratou. (Mareko 10:13-16)  Ia au i te paraparauraa a Mareko i ǒ nei, e tauahi Iesu ia ratou ma te here, ma te rave atoa paha i te tahi mau tamarii “i roto i to ˈna rima,” ia au i te huriraa a te tahi taata. Mea maramarama, mea here roa na Iesu te mau tamarii. E haapii râ tatou i te tahi atu mea no nia ia ˈna i ǒ nei, mea ohie ia tapiri atu ia ˈna.

4, 5. (1) E nafea tatou e papu ai e mea ohie ia tapiri atu ia Iesu? (2) Eaha te mau uiraa ta tatou e hiˈopoa i roto i teie pene?

⁴ Ahani mea faaoru aore ra aita Iesu e au i te tahi atu, eita paha taua mau tamarii ra e hinaaro e haere ia ˈna. Eita atoa paha te mau metua e au e tapiri atu ia ˈna. Ia feruri oe, aita anei oe e ite ra i te mata oaoa o te mau metua a faaite ai teie taata maitai i to ˈna here i ta ratou mau tamarii, a farii ai oia e mea faufaa te mau tamarii i te aro o te Atua, e a haamaitai ai oia ia ratou? Oia mau, noa ˈtu e mea rahi te ohipa a Iesu, e mea ohie noa râ no te taata ia tapiri atu ia ˈna.

⁵ O vai atu â tei ite e mea ohie ia tapiri atu ia Iesu? No te aha e mea ohie ai ia tapiri atu ia ˈna? E e nafea tatou e nehenehe ai e haapii i te riro mai ia Iesu i roto i teie tuhaa? E hiˈo mai tatou.

6-8. E pinepine Iesu i te amui ia vai ma, e mea nafea to ˈna huru i nia ia ratou i te taa-ê-raa i to te mau aratai haapaoraa?

⁶ A taio ai oe i te mau aamu o te mau Evanelia, e maere paha oe i te ite e mea rahi te taata aita i taiâ i te tapiri atu ia Iesu. Ei hiˈoraa, te faahiti pinepine ra te mau Evanelia e mea rahi te taata tei haaati ia Iesu. Te parauhia ra: “E nahoa rahi tei pee ia ˈna no Galilea.” “E nahoa rahi tei putuputu mai ia ˈna ra.” “Haere maira te hoê nahoa rahi ia ˈna ra.” “E nahoa rahi te haere atoa ra na muri ia ˈna.” (Mataio 4:25; 13:2; 15:30; Luka 14:25) Oia, ua haaati-pinepine-hia Iesu i te mau nahoa taata.

 ⁷ I te rahiraa o te taime, e feia riirii ratou ta te mau aratai haapaoraa i faaau ino, mai “te feia no te repo.” Ua na ô roa te mau Pharisea e te mau tahuˈa e: “Teie . . . mau taata aita i ite i te Ture, ia vai noa te ino i nia ia ratou.” (Ioane 7:49) Na te mau papai a te mau rabi e haapapu i teie huru to ratou i muri aˈe. Mea rahi te aratai haapaoraa tei hiˈo i taua mau taata ra ei feia ino roa, ma te patoi i te tamaa e o ratou, i te hoo mai i ta ratou mau mea aore ra i te amui ia ratou. Inaha, ua parau onoono vetahi e aita e tiaturiraa o te hoê tia-faahou-raa no taua mau taata ra aita i ite i te ture parau-vaha-hia! Eita e ore e mea rahi te taata riirii tei ape i taua mau aratai ra, aita hoi i ani atu i te tauturu aore ra te aratairaa. Mea taa ê râ Iesu.

⁸ Ua amui noa ˈtu Iesu i te feia riirii. Ua tamaa e o ratou, ua faaora ia ratou, ua haapii ia ratou, e ua horoa ˈtu i te tiaturiraa. Parau mau, ua ite Iesu e e patoi te rahiraa i te tavini ia Iehova. (Mataio 7:13, 14) Teie râ, ua tiaturi oia e e farii te taata tataitahi e ua ite oia e mea rahi te nehenehe e rave i te mea tia. Mea taa ê roa ïa oia i tera mau tahuˈa e Pharisea aau etaeta! Te mea maere râ, o te tahi mau tahuˈa e Pharisea atoa tei tapiri atu ia Iesu, e ua taui vetahi o ratou i to ratou haerea e ua pee ia ˈna. (Ohipa 6:7; 15:5) Ua ite atoa te tahi feia taoˈa rahi e te mana e mea ohie ia tapiri atu ia Iesu.—Mareko 10:17, 22.

9. No te aha te mau vahine i ite ai e mea ohie ia tapiri atu ia Iesu?

⁹ Aita te mau vahine i taiâ i te tapiri atu ia Iesu. Ua ite pinepine paha ratou i te vahavaha o te mau aratai haapaoraa. Aita te mau rabi i farii ia haapiihia te mau vahine. Inaha, aita te mau vahine i faatiahia ia horoa i te patururaa i roto i te mau haavaraa, ua hiˈohia ratou ei ite papu ore. Ua faaoti atoa te mau rabi i te hoê pure ma te haamauruuru i te Atua e e ere ratou i te vahine! Teie râ, aita te mau vahine i ite i taua vahavaha ra i nia ia Iesu. Mea rahi tei tapiri atu ia ˈna, ma te hinaaro ru e haapii. Ei hiˈoraa, te  ite ra tatou ia Maria, te tuahine o Lazaro, e parahi ra i te avae o te Fatu, a faaroo maite ai i ta Iesu mau parau, area to ˈna tuahine ra o Mareta, te ohipa haere ra ïa e te haapeapea roa ra no te faaineineraa i te maa. Ua haapopou Iesu ia Maria no to ˈna haamauraa i te mau fa matamua maitatai.—Luka 10:39-42.

10. Mea nafea Iesu i te taa-ê-raa i te mau aratai haapaoraa i roto i to ˈna huru i nia i te feia maˈi?

¹⁰ O te feia maˈi atoa tei haere atu ia Iesu ra, noa ˈtu e mea pinepine ratou i te tuuhia i te hiti e te mau aratai haapaoraa. I faanaho na te Ture a Mose e ia tuuhia te mau lepera i rapaeau mai i te puhapa no te paruru i te ea o te toea, aita râ e tumu no te rave ino ia ratou. (Levitiko, pene 13) I muri aˈe râ, ua parau te mau faatureraa rabi e mea hairiiri te mau lepera mai te tutae. Ua tae roa te tahi mau aratai haapaoraa i te taora i te ofai i nia i te mau lepera no te faaatea ia ratou! E mea fifi ia feruri i taua feia i rave-ino-hia ra ia faaitoito i te tapiri atu i te tahi orometua, ua tapiri atu râ te mau lepera ia Iesu. No te faaite i to ˈna faaroo, ua parau te hoê lepera: “E te Fatu, ia tia ia oe, e nehenehe oe e tamâ ia ˈu.” (Luka 5:12) I to muri iho pene, e hiˈopoa tatou i te pahonoraa a Iesu. No teie râ hiˈoraa, ua faaite papu Iesu i te mǎrû e ua hinaaro te taata e tapiri atu ia ˈna.

11. Eaha te hiˈoraa e faaite ra e ua tapiri noa ˈtu te feia i teimaha i te aau faahapa ia Iesu, e no te aha e mea faufaa ˈi te reira?

¹¹ Ua tapiri noa ˈtu te feia i teimaha i te aau faahapa ia Iesu. A manaˈo ei hiˈoraa i to Iesu tamaaraa i te fare o te hoê Pharisea. Ua haere atu te hoê vahine matauhia ei rave hara e ua tuturi i te avae o Iesu ra ma te oto no ta ˈna hara. Ua rarirari te avae o Iesu i to ˈna roimata, ta ˈna i tamǎrô atu i to ˈna rouru. Ua huru ê te Pharisea e ua faahapa etaeta ia Iesu no te vaiihoraa i tera vahine ia tapiri atu ia ˈna, area Iesu râ,  ua haapopou maitai ïa i te vahine no to ˈna tatarahapa mau e ua haapapu ia ˈna e ua faaore Iehova i ta ˈna hara. (Luka 7:36-50) I teie tau atoa, e mea hinaarohia ia tapiri atu te feia e teimaha ra i te aau faahapa i te feia o te nehenehe e tauturu ia ratou ia faahoa faahou e te Atua! No te aha e mea ohie ai ia tapiri atu ia Iesu?

12. No te aha e ere ai i te mea maere te ohie ia tapiri atu ia Iesu?

¹² A haamanaˈo e ua pee maitai roa Iesu i to ˈna Metua here i te raˈi. (Ioane 14:9) Te haamanaˈo mai ra te Bibilia e ‘aita Iehova i atea ia tatou tataitahi.’ (Ohipa 17:27) E nehenehe noa ta ˈna mau tavini haapao maitai e te tahi atu o te hinaaro mau ra e ite e e tavini ia ˈna, e faafatata noa ˈtu ia Iehova, “Tei faaroo i te pure.” (Salamo 65:2) A feruri noa na, mea ohie roa ˈˈe ia faafatata ˈtu i te Atua puai roa ˈˈe o te ao taatoa! Mai to ˈna Metua, mea here na Iesu te taata. I to muri iho mau pene, e hiˈopoa tatou i te here hohonu o Iesu no te taata. Mea ohie ia tapiri atu ia Iesu, ua faaite papu hoi oia i te here i te taata. E hiˈopoa anaˈe vetahi mau huru o Iesu o tei faaite i taua here ra.

13. E nafea te mau metua e nehenehe ai e pee ia Iesu?

¹³ Ua taa oioi i te taata e te anaanatae roa ra Iesu ia ratou. Aita taua anaanatae ra i moˈe taue a ahoaho ai Iesu. Mai ta tatou i ite ê na, a hopoi ai tera mau metua i ta ratou mau tamarii ia ˈna ra, mea ohie noa ia tapiri atu ia Iesu noa ˈtu e mea ohipa oia e mea rahi ta ˈna mau hopoia. Auê ïa hiˈoraa no te mau metua! Mea fifi ia haapao i te mau tamarii i teie tau. Mea faufaa roa râ ia ite te mau tamarii e mea ohie ia tapiri atu i to ratou mau metua. Mai te peu e e metua oe, ua ite oe e i te tahi taime mea ohipa roa oe no te haapao i ta oe tamarii. E nehenehe anei râ oe e haapapu ia ˈna e e faataa oioi iho â oe i te taime no ˈna? A tapea ˈi oe i ta oe  parau, e haapii ta oe tamarii i te mau maitai o te faaoromai. E haapii atoa oia e e nehenehe noa ta ˈna e faaite atu ia oe i te mau huru fifi aore ra haapeapea atoa.

14-16. (1) I roto i teihea mau tupuraa i rave ai Iesu i ta ˈna semeio matamua, e no te aha e mea faahiahia ˈi te reira? (2) Eaha ta te semeio a Iesu i Kana e faaite ra no nia ia ˈna, a horoa ˈtu ai i teihea haapiiraa na te mau metua?

¹⁴ Ua faaite Iesu i te taata e mea faufaa no ˈna to ratou mau haapeapearaa. A hiˈo na i te semeio matamua a Iesu. Tei te hoê oroa faaipoiporaa oia i Kana, te hoê oire i Galilea. E fifi tei tupu, ua pau te uaina! Ua faaite Maria, te metua vahine o Iesu, i ta ˈna tamaiti eaha tei tupu. Ua aha Iesu? Ua faaue oia i te mau tavini ia faaî e ono farii pape ofai. I te hopoiraahia ˈtu te tahi i te tiaau o te oroa, e uaina maitai roa ïa! E ohipa hauti anei tera? Eita, ua ‘tauihia te pape ei uaina.’ (Ioane 2:1-11) I hinaaro maoro na te taata e faariro i te hoê mea ei ohipa ê atu. A hanere matahiti te maoro, ua tamata te mau taata i te faariro i te tapau ei auro, aita râ i manuïa, noa ˈtu e mea hohoˈa rahi te tapau e te auro. a Mea taa ê râ no te pape e te uaina. No te aha Iesu i rave ai i taua semeio faahiahia ra i te hoê oroa faaipoiporaa? No te aha mea faufaa te uaina?

¹⁵ I te pauraa te uaina, e nehenehe na hoa faaipoipo e haapeapea rahi. I tahito ra i te pae Hitia o te râ no ropu, mea faufaa roa ia farii maitai i te mau manihini. E haama e e huru ê roa na feia faaipoipo apî ia pau te uaina i te oroa faaipoiporaa, a faaino atu ai te taata i to raua mahana faaipoiporaa e a haamanaˈo atu ai te reira e rave rahi matahiti. Ua haapeapea ïa raua e o Iesu atoa, no reira oia i rave ai i te tahi mea no raua. Te taa ra anei ia oe no te aha te taata e faaite ai ia ˈna i to ratou mau haapeapearaa?

¹⁶ I ǒ nei â, e nehenehe te mau metua e huti mai i te hoê  haapiiraa faufaa. E nafea oe ia tapiri atu ta oe tamarii ia oe, no te tahi fifi? E manaˈo paha oe e ere te reira i te mea faufaa roa. E ata atoa paha oe. Ia faaauhia i ta oe iho mau hopoia teimaha, e fifi haihai paha to te tamarii ia hiˈohia. A haamanaˈo râ, e ere te reira i te mea faufaa ore no te tamarii! Mai te peu e mea faufaa no tei here-roa-hia e oe, e ere anei ïa i te mea faufaa atoa no oe? Ia faaite oe i ta oe tamarii e te haapeapea ra oe no to ˈna mau fifi, e riro ïa oe ei metua e mea ohie ia tapiri atu.

17. Eaha te hiˈoraa o te mǎrû ta Iesu i vaiiho mai, e no te aha e e haapapuraa ˈi teie huru maitai i te puai?

¹⁷ Mai ta tatou i tauaparau i te pene 3, mea mǎrû Iesu e te haehaa. (Mataio 11:29) E huru maitai nehenehe te mǎrû, e haapapuraa puai o te haehaa i roto i te aau o te hoê taata. To roto atoa te reira i te hotu a te varua moˈa o te Atua e ua tuea i te paari o te Atua. (Galatia 5:22, 23; Iakobo 3:13)  I mua atoa i te faatihaehaeraa, ua haavî noa Iesu ia ˈna. E ere roa ˈtu to ˈna mǎrû i te paruparu. Teie ta te hoê aivanaa i parau no teie huru maitai: “I muri mai i te mǎrû, te vai ra te puai o te auri.” Oia mau, e titau-pinepine-hia te puai no te haavî i to tatou riri e no te haa ma te mǎrû i nia ia vetahi ê. Maoti râ te haamaitairaa a Iehova i ta tatou mau tutavaraa, e nehenehe tatou e pee ia Iesu i roto i te faaiteraa i te mǎrû, a riro atu ai tatou ei mea ohie atu â i te tapiri mai.

18. Eaha te hiˈoraa e faaite ra i to Iesu huru au noa, e i to oe manaˈo, no te aha e mea ohie ai ia tapiri atu i te hoê taata au noa?

¹⁸ Mea au noa Iesu. A vai ai Iesu i Turia, ua haere atu te hoê vahine ia ˈna ra no te mea ‘ua uruhia ta ˈna tamahine e te demoni o te haamauiui nei ia ˈna.’ Na roto e toru ravea, ua faaite Iesu e aita oia e hinaaro ra e rave i ta ˈna e hinaaro ra. A tahi, aita oia i pahono. A piti, ua faataa oia no te aha eiaha ˈi o ˈna e rave i ta ˈna e ani ra. A toru, ua horoa oia i te hoê faahohoˈaraa o tei faataa ˈtu â i te manaˈo. Mea teoteo e mea etaeta anei râ o ˈna? Ua horoa anei oia i te manaˈo e te faatura ore ra teie vahine ia ˈna no te mea e orometua faufaa roa oia? Aita, aita te vahine i taiâ. Ua tamau oia i te ani i te tauturu noa ˈtu ua pahono Iesu aita oia e tauturu ia ˈna. Ua ite râ Iesu i te faaroo faahiahia o tei turai ia ˈna ia onoono, e ua faaora oia i ta ˈna tamahine. (Mataio 15:22-28) Papu maitai e no to Iesu huru au noa, to ˈna hinaaro e faaroo e e farii i te aniraa a vetahi ê ia tano anaˈe, ua hinaaro atu â te taata e tapiri atu ia ˈna!

19. E nafea tatou e ite ai e mea ohie mau â ia tapiri mai ia tatou?

¹⁹ Mea au na te taata e manaˈo e mea ohie ia tapiri atu ia ratou. Ei hiˈoraa, mea au roa na te tahi feia mana e parau i te tahi atu: “E nehenehe outou e paraparau mai ia ˈu i te mau taime atoa.” Te horoa râ te Bibilia i teie faaararaa puai: “Mea rahi te taata e parau e here taiva ore to ratou,  o vai râ te ite mai i te hoê taata haapao maitai?” (Maseli 20:6) E mea ohie ia parau e te hinaaro ra tatou ia tapiri mai te taata no te paraparau mai, te pee mau râ anei tatou ia Iesu? E ite tatou e te pee ra tatou i teie huru maitai o Iesu, ia manaˈo te tahi atu e mea ohie no ratou ia paraparau mai. Ua parau Paulo e: “Ia itehia to outou huru au noa e te taata atoa.” (Philipi 4:5) Mea maitai ia ui tatou tataitahi: ‘Eaha to vetahi ê manaˈo ia ˈu? Eaha to ˈu roo?’

20. (1) No te aha e mea faufaa ˈi ia riro te mau matahiapo Kerisetiano ei mea ohie ia tapiri atu? (2) No te aha tatou e faaite ai te huru au noa i roto i ta tatou mau tiairaa i te mau matahiapo i roto i te amuiraa?

²⁰ O te mau matahiapo Kerisetiano iho â râ te tutava nei i te riro ei mea ohie ia tapiri atu. Te hinaaro mau nei ratou e faaau i nia i te faataaraa a te Isaia 32:1, 2: “E riro ratou tataitahi ei tapuniraa i te mataˈi, ei haapuraa i te vero ûa, mai te taheraa pape i te fenua pape ore, mai te marumaru o te tahi mato rahi i te tahi fenua mǎrô.” E nehenehe te hoê matahiapo e horoa i tera huru parururaa, tamahanahanaraa, e tamǎrûraa mai te peu noa e mea ohie ia tapiri atu ia ˈna. Parau mau, e ere te reira i te mea ohie noa, no te mea te amo nei te mau matahiapo i te mau hopoia teimaha i teie anotau fifi. Teie râ, eiaha roa ˈtu te mau matahiapo e horoa i te manaˈo e mea ohipa roa ratou no te haapao i te mau hinaaro o te mau mamoe a Iehova. (Petero  1, 5:2) Te tutava nei te tahi atu i roto i te amuiraa i te faaite i te huru au noa i roto i ta ratou mau tiairaa i taua mau matahiapo, ma te faaite i te hoê huru feruriraa haehaa e te turu.—Hebera 13:17.

21. E nafea te mau metua e riro noa ˈi ei mea ohie no ta ratou mau tamarii ia tapiri atu, e eaha ta tatou e hiˈopoa i te pene i muri nei?

²¹ Te tutava ra te mau metua i te vata noa no ta ratou mau tamarii. Mea faufaa roa te reira! Te hinaaro ra ratou ia ite ta ratou mau tamarii e aita e fifi ia paraparau noa ˈtu ia papa aore ra ia mama. No reira te mau metua Kerisetiano e ara ˈi i te faaite i te mǎrû e te huru au noa, ma te ore e riri ia faaite atu te hoê tamarii i te hoê hape aore ra te hoê manaˈo tano ore. A haapii ai te mau metua i ta ratou mau tamarii ma te faaoromai, te tutava ra ratou i te haamatara noa i te aparauraa. Oia mau, te hinaaro nei tatou paatoa ia ohie noa vetahi ê i te tapiri mai ia tatou, mai ia Iesu. I te pene i muri nei, e aparau tatou i te aumihi haavare ore o Iesu, te hoê o na huru maitatai rahi i riro ai oia ei mea ohie ia tapiri atu.